PARTE 3
¿Kén yajki xo̱chital ka̱n Adán wan Eva cha̱ntijtoyaj?
Dios kima’ Adán wa̱n Eva komati tejté̱ yej ye̱kti (Génesis 1:28)
Jehová kichij Eva, yej achto siwa̱’, wa̱n kima’ Adán iga mamochi̱wa isiwa̱’ (Génesis 2:21, 22).
Ke̱man Dios kichij Adán wa̱n Eva akipiayaj nité̱ yej aye̱kti pan itajla̱mikilis ni pan inakayo. Awel mikiáj.
Yejeme̱n mocha̱ntijtoyaj pan se̱ xo̱chita̱l yej onoya pan Edén. Inó̱n xo̱chita̱l onoya mo̱nsaj: kipiaya se̱ we̱ya̱’, kuawimej wa̱n yo̱lka̱mej.
Jehová tajtowa̱ya wa̱n Adán wa̱n Eva, wa̱n no̱ kine̱xtiliaya sekin tejté̱. Si kinekiáj maonokan pan inó̱n xo̱chita̱l, monekiá makitajto̱lkakikan Dios.
Dios kijlij iga amo makikuakan ita̱kilyo se̱ kuawi’ (Génesis 2:16, 17)
Se̱ ángel akiné̱ makitajto̱lkaki Dios. Inó̱n ángel yej aye̱kti moi̱xmati ken Tsitsimi’, o Satanás, el Diablo.
Dios kijlij Adán wa̱n Eva iga amo makikuakan ita̱kilyo se̱ kuawi’ yej onoya pan xo̱chita̱l. Si kikuayaj ita̱kilyo, mikiskiáj.
Tsitsimi’ akinekiá iga yejeme̱n makitajto̱lkakikan Jehová. Pan se̱ kowa̱, Tsitsimi’ kino̱tsa Eva wa̱n kijlij iga amikiskiáj si kikuayaj ita̱kilyo kuawi’. Kijlij: «An mochiwaskej ken Dios». ¡Se̱ weyi takajkaya̱walis! (Génesis 3:1-5.)
