Tlaltikpakchanejkej xkeman uelis kichiuaskej tinochimej matiyolseujtokan. Matikitakan tleka:

•   “Tlaltikpakchane xueli noyekana. Se tlaltikpakchane nion xkimati kanon cholos ijkuak nejnemi” (Jeremías 10:23). ToTajtsin xotexchijchiuj para san no tejuamej matoyekanakan, ika yejon, xueli tikchiuaj maonia yolseuilistli tlen nochipa maonia.

•   “Maka xtlali moyojlo intech on tlakamej yejuan uejueyixtokej, pampa on san tlakamej yejuan xuelij temakixtiaj. Ijkuak mikij, tlaltiaj, niman ipan on tonajli tlami nochi iminplanes” (Salmo 146:3, 4). Maski tekiuajkej kinekiskiaj kipopoloskej nochi tlen kichiua maoniakan guerras, xkeman ueliskej.

•   Ipan itlamiyan tonaltin “tlamach nochiuas tlen sanoyej xkuajli. On tlakamej [...] sanoyej xipanteitaskej niman xitlaj kuelitaskej tlen kuajli. Teichtakauiskej, xnomojtiskej itlaj kichiuaskej, noueyimatiskej” (2 Timoteo 3:1-4). Pampa tinemij ipan sa itlamiyan tonaltin nochiua miyek tlen xkuajli, niman yejon kichiua maka matiyolseujtokan.

•   “¡Lástima para nemejuamej yejuan nenchantij ipan in tlaltikpaktli niman ipan mar! pampa on diablo nemotech yoyaj. Yejua yotemok ikan temojtij tlauejli, pampa kimatstikaj ika xok uejkajtika kiselis icastigo” (Apocalipsis 12:12). Diablo, akin itlauelikniuj toTajtsin okuajtlakalkej ipan tlaltikpaktli niman kinkajkayaujtok miyekej para makichiuakan ijkon ken yejua. Aman ika Diablo tlayekantok ipan yejuin tlaltikpaktli, xuelis tiyolseujtoskej (Juan 12:31).

•   “[ITekiuajyo toTajtsin] kimpojpolos on oksekimej reinos [akin kixnamikij toTajtsin], niman ireino nokauas para nochipa” (Daniel 2:44). San iTekiuajyo toTajtsin uelis kichiuas nochipa matiyolseujtokan (Salmo 145:16).