Nochia ika kanaj 5,000 millones tlaltikpakchanejkej makitakan Copa Mundial de la FIFA, tlen nopanoltijtos ipan 20 de noviembre hasta18 de diciembre de 2022. Miyekej kinemiliaj ika yejuin melak tepaleuis niman xsan kichiuas manosentlalikan ijkuak kitaskej kenon nauiltiaj.

•   Nelson Mandela, akin tekiuaj katka ipan Sudáfrica, okijto: “Deporte, uelis kipatlas tlaltikpaktli, pampa yejuin teyolchikaua niman ueli kinsentlalia tlaltikpakchanejkej, xijkon ken okseki tlemach”.

•   Gianni Infantino, akin kiyekana FIFA, a okijto: “Fútbol [...] ueli kichiua ika nochimej kuajli manouikakan, manotlasojtlakan, mayolpakikan niman manotlakaitakan”.

 ¿Uelis fútbol noso okse deporte, kichiuas nochimej kuajli matouikakan? ¿Uelis tinochimej tiyolseujtoskej niman kuajli touikaskej?

 Ipan yejuin mundial, miyekej xsan tlajtouaj itech fútbol, pampa yokichiuj ika manokamauisokikan itech kenon sekimej kinchikoitaj, xkinmakaj tlen kinamiki niman kenon sekimej notomintiaj chika oksekimej xtlaj kipiyaj.

 Maski ijkon, miyekej yolpakij kitaskej yejuin deporte niman okseki. San ika, maski kinekiskiaj ika yejuin makichiua nochimej kuajli manouikakan, xijkon panoua, pampa ipan yejuin deporte, nesi kenon xkuajli tlanemiliaj niman tlen xkuajli kichiuaj. Biblia yokijtojka ika yejuin panotoskia ipan itlamiyan tonaltin (2 Timoteo 3:1-5).

 Biblia techijlia kenon uelis nochimej kuajli touikaskej. Kijtoua ika san iTekiuajyo toTajtsin, tlen onka iluikak, uelis kichiuas nochimej kuajli matouikakan (Lucas 4:43; Mateo 6:10).

 Jesucristo, yejua akin tlayekanas ipan iTekiuajyo toTajtsin, yejua kichiuas matikpiyakan yolseuilistli, Biblia kijtoua:

•   “¡Ma onya yolseuilistli niman yolmelajkilistli nochi on tiempo ijkuak yejua tlamandaros!” (Salmo 72:7).

•   “Yejua kimanauis on mayanki yejuan kitlajtlanilis ma kipaleui [...]. Yejua kinmanauis on yejuan kintlajyouiltiaj niman kimpiya ikan tlauelijlotl” (Salmo 72:12, 14).

 Ipan 239 países, miyekej tlakamej yokinpaleui tlen Jesús otemachti, yokinpaleui maka manotlauelitakan niman kuajli manouikakan. Tla tikneki okseki tikmatis, xkita tlamachtiltin “Maka sa matitetlauelitakan”.