Ipan enero de 2021, Grupo akin Tlayekana ipan nochi tlanechikoltin okijto ika nochijchiuaskia se yenkuik libro tlen ika titemachtiskej, tlen itoka ¡Nochipa uelis tiyolpakis! a ¿Kenon onomachilijkej tokniuan ijkuak okimatkej yejuin? Matthew, akin chanti Canadá, techijlia kenon onomachili: “¡Xueliya nikneltokaya! Niman ijkuak onikinkak tlamachtiltin niman onikimitak videos kampa techijliaj tleka onochijchiuj yejuin libro niman kenon melak tepaleuiya, sajnoye oniyolpak. ¡Melak niknekiya nikitas niman niktekitiltis!”.

 Ika yejuin libro, tlamantik ken titemachtiskej. Tla tejua itikpiya yejuin libro ika amatl, kanaj yotikitak ika xsan noijki ken okseki libros tlen tikintekitiltiaj. ¿Tikneki tikmatis tleka? Ipampa kenon onochijchiuj yejuin yenkuik libro ¡Nochipa uelis tiyolpakis!

 Se amatl tlen tilauak. Para nochijchiuas yejuin yenkuik libro ¡Nochipa uelis tiyolpakis! nonekiya se amatl tlen tilauak, ¿tleka? Pampa yejuin libro kipiya ipantsin 600 tlaixkopinaltin tlen melak tlapalyojkej, kanaj 10 veces más itech libro Temachtia Biblia. Noijki yejuin yenkuik libro kipiya seki páginas tlen xmás kipiya letras nion tlaixkopinaltin, ika yejon tla kipiyaskia se amatl tlen melak kanauak nesiskia nochi tlen onka ipan on okse página. Para maka ijkon panoskia, tokniuan itech Departamento Internacional de Impresión ne Wallkill (Nueva York) okiyejyekojkej naui amamej tlen notekitiltiaj ipan toimprenta. Niman Grupo akin kiyekana tlen Noijkuiloua okitlapejpeni se amatl tlen más tilauak. Yejuin amatl más patioj xijkon ken tlen tikintekitiltiaj, san ika kichiua ika akin nomachtia ika yejuin yenkuik libro ¡Nochipa uelis tiyolpakis! kuajli makita niman maka makinpasolo tlen uajnestiuj ipan on okse página.

 Ken onochijchiuj tlen ika noixpantsakua libro. Yejuin yenkuik libro melak tlamantik ken onochijchiuj, pampa tlen ika noixpantsakua okitlalilijkej se plástico tlen xkeman notekitiltiaya ipan toamatlajkuiloluan. Tlen ika noixpantsakua okseki libros petlani san ika tlen ika noixpantsakua yejuin libro xijkon, yejuin kichiua más kualtsin manesi tlaixkopinajli. Niman tlen ika onochijchiuj kampa noixpantsakua noijki kipaleuiya maka nimantsin maijtlakaui libro. San ika, yejuin plástico más patioj xijkon ken tlen tikintekitiltiaj, ika yejon sekimej sucursales san sekan otekitkej niman ijkon kinextiskiaj yejon plástico kampa xmás patioj.

 Kuakon, ¿tleka miyek onotlaxtlauj para kichijchiuaskej yejuin libro? Se tokniuj akin tekiti ipan Departamento Internacional de Impresión, okijto: “Tiknekij ika yejuin libro nochipa kuajli manesi maski miyekpa manotekitilti”. Eduardo, akin tekiti kampa nochijchiua amatlajkuiloltin ne Brasil, kijtoua: “Melak tipakij pampa ikalpan Jehová okitak kenon kuajli notekitiltis tomintsin niman ijkon kuajli nochijchiuaskia yejuin libro, tlen xnimantsin ijtlakaui niman tlen tikuelitas tiktekitiltis”.

 Opeuj tikchijchiuaj libro ¡Nochipa uelis tiyolpakis! ipan marzo de 2021. Ijkuakon onkatka COVID-19, ipampa yejon miyek tlen otikixnamijkej, xakaj ueliya kalakiya betel, nion tokniuan xueliyaj tlapaleuiayaj kampa nochijchiuaj amatlajkuiloltin. Ipan seki sucursales xok ouel onochijchiujkej amatlajkuiloltin pampa okintsajkej imprentas niman ipan okseki xnemiyaj akin ueliskiaj tlapaleuiskia ijkuak nochijchiuayaj.

 ¿Kenon ouel otikixnamijkej nochi yejuin? Ijkuak opeuj oksejpa kinchijchiuaj seki amatlajkuiloltin, okintlajtlanilijkej sekimej betelitas akin tekitij ipan okseki departamentos matlapaleuikan ipan imprenta. Joel, akin tlapaleuiya ipan Departamento Internacional de Impresión, kijtoua: “Pampa tokniuan melak kinekiyaj techpaleuiskej niman pampa kuajli otekitkej, ouel otikchiujkej nochi yejon tekitl tlen tikpiayaj”.

 Maski miyek tlen yotikixnamijkej yotikinchijchiujkej miyekej libros ¡Nochipa uelis tiyolpakis! Para tikinchijchiuaskej notekitiltia miyek tlemach, ken planchas de impresión, plásticos tlen kitlaliliaj kampa noixpantsakuaj, amatl, tlapajli niman tlen ika kinpepechouaj. San ipan 5 metstin yonopopolo ipantsin 2.3 millones de dólares, para okikoujkej tlen okitekitiltijkej ijkuak okinchijchiujkej libros, san ika, san tikinchijchiuaj libros tlen tokniuan yemelak kintekitiltiskej ijkon xmiyek tomin tikpopoloskej.

 ¿Kenon nomachiliaj akin temachtiaj niman akin nomachtiaj ika yejuin libro? Tokniuj Paul, akin chanti Australia, kijtoua: “Melak nikuelita niktekitiltis yejuin libro niman niyolpaki ijkuak nitemachtia. Melak kualtsin pampa kichiua ika tinochimej matitlajtokan, kuajli nasikamati, kipiya tlajtoltilistin tlen kichiua matitlanemilikan, kuajkui videos, tlaixkopinaltin, recuadros niman kichiua ika akin nomachtia makichiua tlen ueltiuj. Melak kualtsin ken tlachijchiujtli; yejuin libro nechpaleuis más kuajli manitemachti”.

 Se akin nomachtia Biblia niman chanti Estados Unidos, kijtoua: “Melak nikuelita yejuin libro. Tlaixkopinaltin nechpaleuiyaj manikasikamati tlen ninomachtijtika niman videos ajsi ipan noyojlo pampa nechyolchikauaj manikchiua tlen niueltiuj”. Yejua nochipa yauj ipan tlanechikoltin niman nomachtia okpa ipan se semana.

 Ok noneki tikchijchiuaskej miyek libros ika miyek tlajtoltin. Ika yejon, Grupo akin Tlayekana okijto ika uelis notlajtolkuepas ika 710 tlajtoltin, 340 tlajtoltin más itech ken onotlajtolkuep libro Temachtia Biblia.

 ¿Kanon nokixtia tomin tlen ika notlaxtlaua nochi yejuin? Itech donaciones tlen nemejuamej nenkitemakaj ipan tlen ika nochiua tekitl ipan nochi tlaltikpaktli, ijkon ken nonextia ipan donate.jw.org. Melak tiktlasojkamatij pampa nenkuelitaj nenkitemakaskej. Ipampa donaciones uelij tikinchijchiuaj amatlajkuiloltin tlen ika nomachtiskej akin yemelak kinekij kixmatiskej Jehová niman akin kinekij nochipa nemiskej (Salmo 22:26).