Xuelis tikchias manochiua itlaj san pampa tejua tikneki. Noneki timokojtilis ijkon tikchiuas, tiknemilis kenon tikchiujtias niman xtijkauilis ika itlaj mamitstelti xchiua.

Tlen tikuelitaskia tikchiuas kanaj xnimantsin nochiuas, uelis uejkauis seki tonaltin, metstin noso xiujtin. Tla tikneki tikchiuas itlaj tlen melak uejkauis, uelis tikchiujtias ika yolik.

Tla yotikchiuj tlen yotiknemilijka, mitspaleuis xkasikamati ika kema tiuelis tikchiuas okseki tlemach, noijki más kuajli timouikas iuan moamigos niman kichiuas xyolpaki.

Más motech titlaneltokas. Kachtopa xchiua tlen xmás mitstekiyomakas, ijkuakon tikitas ika uelis tikchiuas okseki tlemach tlen tiknemilia ika ouijtika noso tlen más mitsuejkauas. Yejuin mitsyolchikauas niman ijkon tikixnamikis maski san tlenon, kentla ijkuak mitschiualtisnekij xchiua tlen xkuajli.

Kuajli timouikas imiuan moamigos. Tinochimej tikuelitaj touikaskej imiuan akin nokojtiliaj kichiuaskej tlen kinekij noso tlen yokinemilijkej. Noijki más kuajli timouikas imiuan moamigos tla san sekan nemokojtiliaj nenkichiuaskej tlen yonenkinemilijkej.

Más tiyolpakis. Ijkuak tikchiua tlen tikneki, kuajli timomachilis niman más tiyolpakis.

“Nikuelita nitlanemilis itech tlen nikchiuas ika tlayekapan, pampa ijkon nitlanemilijtika kenon nikchiuas. Melak tipakis ijkuak tikitas ika yotikchiuj tlen yotiknemilijka tikchiuas niman ijkuakon uelis tikijtos: ‘¡Kema, ouel onikchiuj!’” (Chistopher).

TLEN BIBLIA KIJTOUA: “Se akin san kita ajakatl xkitokas xinachtli, niman se akin san kita moxtli xpixkas” (Eclesiastés 11:4, TNM).

Tlen nikan nesi mitspaleuis xnemili tlenon tikuelitaskia tikchiuas niman kenon tikchiuas.

Xtlapejpeni tlen tikneki tikchiuas. Xkijkuilo nochi tlen tikneki tikchiuas niman sakin xkita katlejua kachtopa tikchiuas.

Xnemili kenon tikchiuas. Xchiua yejuin:

• Kuajli xnemili kemanon kipiya ika titlamis.

• Xkijkuilo nochi tlen noneki tikchiuas.

• Xnemili tlenon uelis tikchiuas ijkuak tikixnamikis itlaj tlen uelis mitsteltis.

Aman xchiua tlen yotikijto. Xnoneki tikmatis kenon tikchiuas nochi achto ika tipeuas. Kachtopa xmotlajtolti: “¿Tlenon noneki nikchiuas para kuajli onkisas tlen nikneki?”. Niman sakin xchiua. Noijki xkijkuilojtiuj tlen kuajli tikchiujtok.

TLEN BIBLIA KIJTOUA: “Ijkuak itlaj kuajli kinemiliaj ken kichiuaskej, kuajli kisa” (Proverbios 21:5).