1. ¿Tlenon okichiuj Manóah ijkuak okimat ika tajtli yeskia?

MANÓAH niman isiuauj israelitas katkaj. Yejuamej kinemiliayaj ika xkeman kinpiyaskiaj inkoneuan. San ika, se tonajli, se iluikaktekitketl iuan otlajto isiuauj Manóah niman okijli ika kipiyaskia se ikoneuj. Ijkuak yejua okijli iueuentsin, melak okiyolpakti. San ika, Manóah noijki otlanemili itech tlenon kichiaskia Jehová makichiua yejua ken tajtli. Ipan yejon tonajli, miyekej israelitas kichiuayaj miyek tlemach tlen xkuajli. ¿Kenon Manóah niman isiuauj kimachtiskiaj inkoneuj makitekichiuili Jehová? Manóah okitlajtlanili Jehová oksejpa makuajtitlani iiluikaktekitkauj niman ijkon makimijli kenon kiskaltiskiaj konetsintli (Jueces 13:1-8).

2. ¿Tlenon tekitl kipiyaj tajtin, niman tlenon kinpaleuis makichiuakan? (Xkita noijki recuadro“  “Akin melak noneki tikinmachtis itech Biblia”.)

² Tla tejua tikinpiya mokoneuan, kuakon tikasikamati Manóah. Tejua noijki tikpiya tekitl, tikinmachtis mokoneuan makitekichiuilikan Jehová niman makitlasojtlakan (Proverbios 1:8). ¿Tlenon mitspaleuis xchiua motekiyo? Mitspaleuis tla tikueyichiua toTajtsin iuan mochanejkauan nochi semanas. Yejuin mitspaleuis tikinmachtis mokoneuan  itech Jehová niman itech Biblia (xpoua Deuteronomio 6:6-9). * San ika ¿tlenon okseki mitspaleuis? Ineskayo Jesús. Yejua xokinpix ikoneuan, san ika, tajtin uelis nomachtiskej itech kenon yejua okinmachti inomachtijkauan. Ipan yejuin tlamachtijli tikitaskej kenon Jesús okimititi tetlasojtlalistli niman yolyemanilistli. Yejua okimasikamat kenon nomachiliayaj, niman kimatstoya kenon kinpaleuis. Noijki tikitaskej kenon uelis tikchiuaskej ken yejua.

3. ¿Tleka inomachtijkauan Jesús kimatstoyaj ika kintlasojtlaya?

³ Jesús yonomatka kimijlis inomachtijkauan ika kintlasojtlaya (xpoua Juan 15:9). Noijki, uejkauiya imiuan nemiya (Marcos 6:31, 32; Juan 2:2; 21:12, 13). Yejua xsan intemachtijkauj katka, yejua kuajli imiuan nouikaya. Ika yejon, inomachtijkauan kimatstoyaj ika Jesús kintlasojtlaya. ¿Kenon tejua uelis tikchiuas ken Jesús?

4. ¿Kenon uelis tikimititis mokoneuan ika tikintlasojtla? (Xkita tlaixkopinajli kampa peua tlen tomachtijtokej.)

⁴ Xmomati xkimijli mokoneuan ika tikintlasojtla. Xkimititi ika melak tikintlasojkaita (Proverbios 4:3; Tito 2:4). Se iteixpantijkauj Jehová itoka Samuel, akin chanej Australia, kijtoua ika ijkuak konetl katka, itaj kipouiliaya mojmostla ika yeuajli Noamox historias. Sakin yejua kinankiliaya maski san tlenon kitlajtoltiaya, kinapalouaya niman kitenkuaya noso kipipitsouaya. Miyek xiuitl ika tlayekapan Samuel otlamojkaitak ijkuak okimat ika itaj onoskalti kampa xnomatiyaj nonapaloskej nion notenkuaskej noso nopipitsoskej. San ika, itaj onokojtili kititis ika melak kitlasojtlaya. Ika tlen okichiuj itaj, Samuel nochipa oyolpak niman kuajli onomachili, niman yejua iuan itaj melak kuajli onouikakej. Tla tejua timomati tikimijlia mokoneuan ika tikintlasojtla, noijki ijkon nomachiliskej ken Samuel. Ika yejon, xkinpipitso niman xkinnapalo, imiuan xtlajto, xtlakua niman imiuan xmauilti.

5, 6. a) ¿Tlenon okichiuj Jesús ipampa inomachtijkauan? b) ¿Kenon tajtin uelis kinmelajkatlaliskej inkoneuan?

⁵ Jesús okijto: “On yejuan nikintlajsojtla, nikinchikajkanotsa, niman nikincastigaroua ijkuak kichiuaj on tlen xkuajli” (Apocalipsis [Revelación] 3:19). * Xnemili, Jesús okimitak ika inomachtijkauan nochipa nokualanijtoyaj pampa kinekiyaj kimatiskej akinon melak ueyixtika. Kuakon miyekpa okintlajtolpaleui, san ika, nochipa okitak kenon niman kanon okinmelajkatlali ika tlasojtlalistli (Marcos 9:33-37).

⁶ Tejua tikintlasojtla mokoneuan, ika yejon noneki tikinmelajkatlalis. Tla kichiuaj itlaj tlen xkuajli, kemantika san nonekis tikimijlis tleka xkuajli tlen yokichiujkej. Niman ¿tla maski ijkon yejuamej xtetlakamatij? (Proverbios 22:15). Xchiua tlen okichiuj Jesús. Ika yolik xkinyektlalijtiuj, xkinmelajkatlali niman xkintlajtolpaleui. Xtejtemo kemanon niman kanon uelis tikinmelajkatlalis ika tlasojtlalistli. Se iteixpantijkauj Jehová itoka Elaine, akin chanej Sudáfrica, kilnamiki kenon kimelajkatlaliayaj itajuan. Yejuamej nochipa kijliayaj tlen kinekiya makichiua. Niman kijliayaj ika tla xtetlakamati kimelajkatlaliskiaj, niman ijkon kichiuayaj. Nochipa kijliayaj tleka kimelajkatlaliayaj niman xkeman kichiuayaj ika tlauejli. Yejuin okichiuj makita ika itajuan kitlasojtlayaj.

7, 8. a) ¿Tlenon ouelkej inomachtijkauan Jesús ijkuak Jesús okichiuj teoyotl? b) Ijkuak tejua tikchiua teoyotl imixpan mokoneuan, ¿kenon uelis tikinmachtis matlaneltokakan itech Jehová?

⁷ Ijkuak Jesús kajsiskiaj niman kimiktiskiaj  okijli iTaj: “NoTajtsin, tejua tiueli nochi. Xnechmakixti ikan in tlajyouilistli yejuan nechcha, pero ma ka manochiua ken nejua nikneki, yej manochiua ken tejua tikneki” (Marcos 14:36). * ¿Tlenon ouelkej inomachtijkauan Jesús ijkuak okikakej teoyotl ken yejuin? Okitakej ika, maski Jesús xtlajtlakole katka, okitlajtlanili iTaj makipaleui. Noijki, onomachtijkej ika yejuamej noneki yolyemankej yeskej niman noneki kitlajtlaniliskej Jehová makinpaleui.

⁸ Mokoneuan uelis nomachtiskej ijkuak kikakiskej kenon tikchiua teoyotl imixpan. Yejuin xkijtosneki ika tejua tikchiua teoyotl xsan pampa ompa tikinmachtia mokoneuan. San ika, ijkuak tikchiua teoyotl imixpan, uelis tikinmachtis matlaneltokakan itech Jehová. ¿Kenon? Maka san xtlajtlanili Jehová inpampa, noijki xtlajtlani mopampa. Ana, akin chanti Brasil, kijtoua ika ijkuak itajuan kipiayaj tlaueltin, nochipa kitlajtlaniliayaj toTajtsin makinpaleui. Se neskayotl, ijkuak iabuelos Ana okualokej, itajuan okitlajtlanilijkej Jehová chikaualistli niman tlamachilistli niman ijkon kuajli kitlapejpeniskiaj tlenon kichiuaskiaj. Nochipa okikauilijkej toTajtsin makinpaleui, hasta kampa melak ouijtika. Yejuin okipaleui Ana matlaneltoka itech Jehová. Tejua noijki ijkon uelis tikchiuas iuan mokoneuan. Kanaj uelis tiktlajtlanilis Jehová mamitsmaka chikaualistli tiknojnotsas akin chantij kampa nisiuj tichanti noso tiktlajtlanilis akin itech titekiti mamitskauili xuiya ipan se ueyi tlanechikojli. Kuakon, mokoneuan kitaskej ika tejua titlaneltoka itech Jehová niman yejuamej noijki ijkon kichiuaskej.

9. a) ¿Kenon okinmachti Jesús inomachtijkauan mayolyemankej niman manajmanakan intech oksekimej? b) Tla tejua tiyolyemanki niman timajmana intech oksekimej, ¿tlenon kichiuaskej mokoneuan?

⁹ Jesús okinmachti inomachtijkauan mayolyemankej niman makinpaleuikan oksekimej. ¿Kenon okinmachti? Yejua okimititi kenon kichiuaskej (xpoua Lucas 22:27). Itlatitlankauan okitakej tlenon okichiuj ijkuak okitekichiuili Jehová niman onajman intech oksekimej niman  okinpaleui. Yejuamej noijki ijkon okichiujkej. Ika tlen tikchiua uelis tikinmachtis mokoneuan. Xnemili itech se tokniuj siuatl itoka Debbie niman iueuentsin itoka Pranas, akin tekitiya ken se tlayekanketl. Yejuamej kipiayaj ome inkoneuan. Tokniuj Debbie kijtoua ika xkeman okimachili ika iueuentsin okinkauj pampa kichiujtinemiya tekitl ipan tlanechikojli. Kuajli kimatstoya ika iueuentsin ompa nemiskia niman kinpaleuiskia inchanejkauan itech tlen kinpolouaya (1 Timoteo 3:4, 5). ¿Kenon okinpaleuijkej inkoneuan Debbie niman Pranas tlen okichiujkej? Yejua kijtoua ika inkoneuan melak pakiyaj niman kuajli nouikayaj iuan nochimej tokniuan. Noijki, nochipa kinekiyaj tlapaleuiskiaj ipan uejueyimej tlanechikoltin. Ipan yejuin tonajli, nochimej chikauak kitekichiuiliaj toTajtsin. Tla tejua tiyolyemanki niman timajmana intech oksekimej, mokoneuan noijki ijkon kichiuaskej.

10. ¿Tlenon okichiuj Jesús ijkuak sekimej chanejkej Galilea kitejtemojtinemiyaj?

¹⁰ Jesús xtlajtlakole katka. Ika yejon kuajli kimasikamatiya tlaltikpakchanejkej (Juan 2:25). Yejua xsan kitaya tlenon kichiuayaj, noijki kasikamatiya tleka kichiuayaj. Se neskayotl, se tonajli, sekimej akin chanejkej Galilea kitejtemojtinemiyaj Jesús (Juan 6:22-24). San ika, yejua kimatstoya ika xompa nemiyaj pampa kinekiyaj kikakiskej, yejuamej san kinekiyaj kitlajtlaniliskej tlakuajli. Kuakon okinmelajkatlali yejon tlaltikpakchanejkej niman okimijli tlenon nonekiya kipatlaskej (xpoua Juan 6:25-27).

11. a) ¿Kenon uelis tikmatis ika mokoneuan kuelitaj ontenojnotsaskej? b) ¿Kenon uelis tikinpaleuis mokoneuan makuelitakan matenojnotsakan?

¹¹ Maski tejua xuelis tikmatis tlenon kinemilijtokej mokoneuan, kema uelis tikmatis tleka kichiuaj seki tlemach. Se neskayotl, ijkuak mokoneuan mouan ontenojnotsaj, xmotlajtolti tleka ontenojnotsaj: “¿Yemelak kuelitaj noso yauej san pampa itlaj kikuaj noso konij?”. Tla tikita ika mokoneuan xkuelitaj tenojnotsaskej, xchiua makuelitakan. Se neskayotl, kanaj uelis tikimijlis matlatetepinikan ipan puertas, makitemakakan se amatlajkuilojli noso itlaj makichiuakan tlen ueliskej niman ijkon kuajli manomachilikan ijkuak tenojnotsaskej.

12. a) ¿Itech tlenon okimijli Jesús inomachtijkauan manotlajpiyakan? b) ¿Tleka nonekiya makimijli yejon?

¹² ¿Kenon noijki okinpaleui Jesús inomachtijkauan? Yejua kimatstoya ika tla yakaj nopopoloua uelis kichiuas tlen melak xkuajli noso se ueyi tlajtlakojli. Ika yejon, okimijli inomachtijkauan ika noneki notlajpiyaskej. Xnemili, yejuamej kimatstoyaj ika xkuajli tla auilnemiskej. San ika, Jesús okimijli tlen uelis kichiuas makichiuakan yejon tlajtlakojli. Okimijli ika tla se tlakatl xnoteltia ika kitlajtlatstos se siuatl akin xisiuauj pampa kineki iuan notekas, itlajtlakotika iuan ipan iyojlo. Niman okimijli: “Aman, tej, tla yejua on mixtololoj yejuan tikpia moyekmakopa mitschiuilia para titlajtlakoua, xkixti niman xtlajkali” (Mateo 5:27-29). ¿Tleka nonekiya Jesús kimijlis nochi yejon? Pampa tlaltikpakchanejkej ipan yejon tonajli melak auilnemiyaj niman tlamauisouayaj kampa auilnemiyaj niman kijtouayaj tlen tsokuiltik tlajtojli. Pampa Jesús kintlasojtlaya inomachtijkauan, okimijli ika makitlalkauikan itech nochi tlen uelis kichiuas matlajtlakokan.

13, 14. ¿Kenon uelis tikinpaleuis mokoneuan maka manoyolpaktikan ika tlen xkuajli?

 ¹³ Tejua noneki tikintlajpiyas mokoneuan niman ijkon maka itlaj makichiuakan tlen Jehová kitlauelita. Teyolkoko ika hasta kokonej ipan yejuin tonajli uelis kitaskej tlaixkopinaltin tsokuiltikej niman okseki tlemach, tlen kichiuas makileuikan auilnemiskej. ¿Kenon uelis tikintlajpiyas mokoneuan? Kema, noneki tikimijlis ika xkuajli makitakan yejon. San ika, xsan yejon noneki tikimijlis. Xmotlajtolti: “¿Kimatstokej nokoneuan ika melak teijtlako kitaskej yejon tlaixkopinaltin tsokuiltikej? ¿Tlenon uelis kichiuas makinekikan kitaskej yejon? ¿Kinektokej nouan tlajtoskej maski san itech tlenon? Tla kimachiliaj ika kinekij kitaskej tlen tsokuiltik, ¿notech uajlaskej niman nechijliskej?”. Maski tla mokoneuan pitentsitsintin uelis tikimijlis: “Tla kemantika ipan Internet uajnesij tlaixkopinaltin tsokuiltikej niman tikmachilia ika tikneki tikimitas, xnechijli. Maka xmomojti tinechijlis nion maka xmajmana, nejua nikneki nimitspaleuis”.

¹⁴ Ijkuak tejua tiktlapejpenis kenon timoyolpaktis, xnemili tlenon tikimititijtika mokoneuan. Tajtli akin otikteneujkej ipan párrafo 9 kijtoua ika tajtin uelis kimijliskej miyek inkoneuan, san ika, tekoneuan kichiuaskej tlen kitaj kichiuaj intajuan. Tla tejua tiktlapejpenia tlakuikaltin, películas niman amoxtin tlen xkipiya tlen tsokuiltik, mokoneuan noijki ijkon kichiuaskej (Romanos 2:21-24).

15, 16. a) ¿Tleka kuajli tikmatstok ika Jehová mitspaleuis tikinmachtis mokoneuan? b) ¿Tlenon tikitaskej ipan okse tlamachtijli?

¹⁵ ¿Tlenon opanok ijkuak Manóah okitlajtlanili Jehová makipaleui kuajli makiskalti ikoneuj? “ToTajtsin akin melauak okikak Manóah.” (Jueces 13:9.) Ika yejon kuajli xmatsto ika Jehová noijki kikakis moteoyouan niman mitspaleuis xkinmachti mokoneuan. Noijki yejua mitspaleuis xkimititi ika tikintlasojtla, ika tiyolyemanki niman ika tikinmasikamati.

¹⁶ San ika, Jehová xsan mitspaleuis xkinmachti mokoneuan ijkuak pitentsitsintin. Yejua mitspaleuijtias ijkuak mokoneuan telpochtiaskej. Ipan okse tlamachtijli tikitaskej kenon uelis tikchiuas ken Jesús niman tikimititis mokoneuan ika tikintlasojtla, tiyolyemanki niman tikinmasikamati. Ijkon uelis tikinmachtis mokoneuan akin yotelpochtiakej makitekichiuilikan Jehová.