ITECH TLEN TLAJTOUA IXPAN | ¿TLENON KINEMILIA TOTAJTSIN ITECH GUERRAS?
Ken toTajtsin kimitaya guerras ipan kachtopa siglo
Se kalpan tlajyouijtoya. Ijkon ken iuejkachanejkauan, judíos ipan kachtopa siglo noijki okitlajtlanilijkej toTajtsin makinmakixti itech romanos akin melak kintlajyouiltiayaj. Sakin okixmatkej Jesús, niman sekimej opeujkej notlajtoltiaj tla yejua katka Mesías akin yonoijtokej uajlaskia. Ika yejon, miyekej kichiayaj ika “yejua kimakixtiskia in país de Israel” itech romanos akin kintlajyouiltiayaj (Lucas 24:21). Niman xsan xoyejkok tonajli ijkuak makisaskiaj, pampa ipan xiuitl 70, romanos okixoxotonijkej Jerusalén niman iteopan.
¿Tleka toTajtsin xok okinmakixti judíos ijkon ken yokichiujka yeuejkaui iuan ikalpan? ¿Noso tleka xok okinkauili matlaixnamikikan niman ijkon manopaleuikan? ¿Yokipatlaka toTajtsin tlen kinemilia itech guerra? Ka. San yonopatlaka ken toTajtsin imiuan nouikaya, pampa xokiselijkej Jesús ken Mesías (Hechos 2:36, TNM). Kuakon, toTajtsin xokinseli niman xok kimitaya kentla ikalpan akin okitlapejpeni (Mateo 23:37, 38).
Judíos niman Tlajli tlen yokijtoka kinmakas xok kipiaya itlateochiualis toTajtsin. Kuakon, judíos xok uelis kichiuaskiaj guerras niman kinemiliskiaj ika toTajtsin kinpaleuis. Ken Jesús yokijtoka, kalpan Israel okipolo itlateochiualis toTajtsin. Ika yejon, toTajtsin xok okinpaleui. Aman, toTajtsin kiteochiuaskia akin Biblia kitokayotia Israel itlatki toTajtsin (Mateo 21:43). Se grupo ika tlaneltokakej itech Cristo tlen toTajtsin yokitlapejpeni onochiuj Israel itlatki toTajtsin. Ika yejon, ipan kachtopa siglo okimijlikej: “Achtoj nemejuamej xnenteyaxkauan katkaj itech Dios, pero aman neniyaxkauan” (1 Pedro 2:9, 10).
Tla aman kimitaya toTajtsin ken ikalpan akin kichiuaj ken Cristo, ¿okinpaleui niman okinmakixti ijkuak romanos kintlajyouiltiayaj niman otlaixnamik inpampa? ¿Okinkauili matlaixnamikikan itech akin kintlajyouiltiayaj? Ka, xokichiuj. ¿Tleka? Ken otikitakej ipan tlamachtijli tlen yopanok, toTajtsin kuajli kitaya guerras san ijkuak kitlapejpenia kemanon nochiuas se guerra. Ipan kachtopa siglo, toTajtsin xotlaixnamik inpampa akin kichiuaj ken Cristo nion xokinkauili matlaixnamikikan ipan guerra. Kuajli ones ika ipan yejon tonajli xiyejkoya ijkuak manopopolo tlen xkuajli niman tlajyouilistli.
Yejon kachtopa tlaneltokakej itech Cristo nonekiya tlamachiaskiaj ijkuak toTajtsin makipopolo tlen xkuajli niman tlajyouilistli, ijkon ken yeuejkaui itekipanojkauan otlamachixkej. Hasta mayejko yejon tonajli, toTajtsin xkinkauiliskia makipeualtikan se guerra san yejuamej. Jesucristo xokimijli ika mayakan ipan guerras. Yejuin tlen kema okimijli: “Xkintlajsojtlakan on nemotlauelikniuan. [...] Xchiuakan oración para on yejuan mechchiuiliaj on tlen xkuajli” (Mateo 5:44). Ijkuak okijto ika romanos kixnamikiskiaj Jerusalén, Jesús okimijli maka matlaixnamikikan, yejua okimijli macholokan. Niman yejon tlen okichiujkej (Lucas 21:20, 21).
Niman noijki, Pablo, itlatitlankauj Cristo, okijkuilo: “Ma ka sa no nemejuamej itlaj xtekuepiltikan, [...] pampa in Yektlajkuilojli ijkin kijtoua: ‘Nejua niktekuepiltis; nitetlaxtlauilis ken nonekiʼ” (Romanos 12:19). Pablo kijtotoya tlen toTajtsin yokijtoka yeuejkaui ipan Levítico 19:18 niman Deuteronomio 32:35. Yotikitakej ika kipaleuiaya ikalpan ijkuak yeuejkaui kipiaya guerras imiuan akin kitlauelitayaj. Pampa Pablo okijto tlen toTajtsin yokijtoka, nesi ika toTajtsin ok yejon kinemiliaya itech guerras, kijtosneki, ika kitaya ken itlaj tlen ika kinpaleuiya itekipanojkauan niman ika kiteltiaya tlen xkuajli. Ijkon ken yopanoka yeuejkaui, Jehová kijtoskia kemanon nochiuaskia guerra niman akinon tlaixnamikiskia.
Kuajli nesi ika toTajtsin xokinkauili kachtopa tlaneltokakej itech Cristo mayakan ipan guerra. Ipan yejuin tonajli, ¿nemi se grupo akin toTajtsin kiteochiua mauiya ipan se guerra? ¿Yoyejkok tonajli ijkuak toTajtsin makinpaleui itekipanojkauan? Ipan yejuin tonajli, ¿tlenon kinemilia toTajtsin itech guerras? Ipan okse tlamachtijli nonankilis yejuin.
