Se tonajli ne Jerusalén, Jesús otemachti itech iTaj, Jehová, niman okiteititi ika akin temachtiayaj ipan religiones xkijtouayaj tlen melauak (Juan 8:12-30). Tlen yejua otemachti techpaleuiya kuajli matikitakan tla melauak tlen kineltokaj oksekimej itech toTajtsin. Yejua okijto: “Tla nenmelajkanemiskej ipan on tlen nemechijlia, nenmochiuaskej melauak nennomachtijkauan. Nenkixmatiskej tlen melauak, niman on tlen melauak yejua mechmanauis” (Juan 8:31, 32).

Ijkuak Jesús okijto “tla nenmelajkanemiskej ipan on tlen nemechijlia”, yejua okiteneuj tlen techpaleuis matikmatstokan tla itlaj melauak noso xmelauak. Ijkuak yakaj mitsmachtis itlaj itech toTajtsin, xmotlajtolti: “¿Yejuin tlen nechijlia notlajtolnamiki ika tlen Jesús otemachti noso ika tlen temachtia Biblia?”. Xchiua ken akin okikakkej apóstol Pablo, yejuamej kuajli onomachtijkej Biblia niman ijkon kitaskej tla melauak tlen yejua kimijliaya (Hechos 17:11).

Ijkon okichiujkej Marco, Rosa niman Raimunda, akin otikinteneujkej ipan okseki tlamachtiltin: onomachtijkej Biblia imiuan iteixpantijkauan Jehová. ¿Tlenon ouelkej?

Marco: “Iteixpantijkauj Jehová akin techmachtiaya nochipa kikuiya Biblia ijkuak kinankiliaya tlen nejua niman nosiuatsin tiktlajtoltiayaj. Ika yolik opeuj tiktlasojtlaj Jehová niman hasta okichiuj ika nejua niman nosiuatsin más kuajli matinemikan”.

Rosa: “Niknemiliaya ika Biblia katka se libro kampa san kijtouaya tlen tlaltikpakchanejkej kinemiliayaj itech toTajtsin. San ika, ika yolik opeuj nikasikamati ipan Biblia nochi tlen ninotlajtoltiaya. Aman, nikita ika Jehová yemelak nemi niman ika uelis itech nitlaneltokas”.

Raimunda: “Oniktlajtlanili toTajtsin ika manechpaleui manikixmati. Sakin, nejua iuan noueuentsin opeuj tomachtiaj Biblia. ¡Aman kema yemelak otikixmatkej Jehová! Melak otiyolpajkej ijkuak otikitakej kenon yejua”.

Biblia, iTlajtol toTajtsin, xsan kijtoua tlen melauak itech toTajtsin, noijki techititia nochi tlen yejua kuajli kichiua. Noijki, techpaleuiya matikimixmatikan “on tlatiochiualistin yejuan Dios yotechmakak” (1 Corintios 2:12). ¿Tleka xsa no tejua timomachtia tlen Biblia temachtia itech toTajtsin, tlen yejua kineki kichiuas niman kenon tinemiskej ika tlayekapan? Uelis timomachtis yejuin niman okseki tlamachtiltin ipan jw.org kampa kijtoua “Tlamachtiltin itech Biblia> Tlen miyekej notlajtoltiaj itech Biblia”. Ompa noijki uelis tiktlajtlanis mamitsmachtiti se iteixpantijkauj Jehová. Tla timomachtia, tikitas ika kema uelis tiktlasojtlas toTajtsin.