MIYEKEJ kuelitaskiaj kimatiskej tla techkaki toTajtsin. Yotikitakej ika Biblia kijtoua ika toTajtsin kinkaki san seki teoyomej, san ika, ¿techkaki ijkuak tejuamej tiknotsaj? Matikitakan tlenon noneki tikchiuaskej tla tiknekij matechnankili toTajtsin.

Jesús okijto ika miyekej teopixkej xkuajli ken kinotsayaj toTajtsin, yejuamej san kinekiyaj ika oksekimej makitakan ika temojti tlaneltokayaj itech toTajtsin. Jesús noijki okijto ika yejuamej “ye kipiyaj intlayokolil”. Yejon teopixkej xkichiayaj makinnankili toTajtsin, yejuamej san kinekiyaj makinueyiteneuakan, ika yejon, toTajtsin xkinkakiya inteoyouan (Mateo 6:5). Ipan yejuin tonaltin, noijki ijkon panoua, miyekej ijkuak kinotsaj toTajtsin, san tlanemilijtokej itech tlen yejuamej kinekij, niman xtlanemiliaj itech tlen toTajtsin kineki noso tlen yejua kuelitaskia manochiua. Niman pampa xkichiuaj ijkon ken Biblia kijtoua, toTajtsin xkinnankilia.

Aman tej, Biblia xkijtoua tla toTajtsin san kita tla kenon otoskaltijkej, kanon tiualeuaj noso tla tikpiyaj tomin noso ka niman ijkon technankilis ijkuak tiknotsaj. Biblia kijtoua ika “Dios xkichikoita se tlakatl iuan okse, yej kiselia san akinon yejuan kitlakaita niman kuajli nouika maski ualeua san katlejua país” (Hechos 10:34, 35). Se akin “kitlakaita” niman kitlasojtla toTajtsin nokojtilia xkichiuas itlaj tlen makiyolkoko. Niman akin “kuajli nouika” nokojtilia nochipa kitlakamatis toTajtsin niman xsan kichiuas tlen yejua kineki noso tlen kinekij oksekimej. Kuakon, tla tiknekij matechkaki Jehová, noneki tikchiuaskej ijkon ken kijtoua Biblia. *

Miyekej kichiaj ika toTajtsin makinankili inteoyouan ika se milagro. San ika, maski yeuejkaui Jehová tenankiliaya ika milagros, xnochipa ijkon kichiuaya, niman ijkuak kichiuaya se milagro, sakin melak uejkauiya para oksejpa kichiuas okse milagro. Noijki, Biblia kijtoua ika sakin ika mikiskiaj nochimej apóstoles xok nochiuaskiaj milagros (1 Corintios 13:8-10). Maski ijkon, nochi yejuin xkijtosneki tla toTajtsin xtechnankilia ijkuak tiknotsaj. Matikitakan kenon toTajtsin technankilia.

Techmaka tlamachilistli. Itech toTajtsin ualeua melauak tlamachilistli, yejua ika, kinmaka akin kitlajtlaniliaj niman akin nokojtiliaj kitlakamatiskej (Santiago 1:5).

Techmaka iespíritu santo. Xitlaj onka ijkon ken espíritu santo, noso ikojtilis toTajtsin. Iespíritu santo toTajtsin techpaleuiya matitlaxikokan ijkuak tikixnamikij tlen xkuajli, techyolseuiya ijkuak tajmanaj niman techpaleuiya matikchiuakan tlen toTajtsin kineki (Gálatas 5:22, 23). Niman Jesús okijto ika toTajtsin techmakas iespíritu santo san kech nonekis (Lucas 11:13).

Kichiua matikmatikan tlen melauak. Ijkon ken kijtoua Hechos 17:26, 27, miyekej kinekij kixmatiskej toTajtsin. Kinekij kimatiskej kenon itoka, tlen kichiuas ika tlayekapan niman kenon uelis itech nonisiuiskej (Santiago 4:8). Iteixpantijkauan Jehová ika nochi inyojlo kinpaleuiyaj oksekimej makimatikan tlen kijtoua Biblia itech tlen notlajtoltiaj.

¿Otikselij yejuin revista pampa tikneki tikmatis tlen miyekpa timotlajtoltia? ¿Tikneki tikixmatis toTajtsin? Tla ijkon, uelis kuajli tikmatstos ika toTajtsin yomitsnankilij.