1, 2. a) ¿Tlenon okijtokej Elifaz niman Bildad itech kenon kita toTajtsin totekiyo? b) ¿Tlenon okijto Jehová itech tlen okijtokej yejuin tlakamej?

YEUEJKAUI, yeyimej tlakamej otlajtoto iuan Job, se itekipanojkauj toTajtsin. Se itech yejon tlakamej katka Elifaz akin temanita. Yejua okitlajtolti yejuin: “¿Uelis toTajtsin kitekitiltis se tlakatl itech itlaj? ¿Uelis yakaj akin tlamachilise ipan itlaj kipaleuis yejua? ¿Tiknemilia ika Akin nochi ueli kichiua kitstika ika tejua timelajkanemi, noso itlaj kitlani yejua pampa tejua tiyolmelaujki?” (Job 22:1-3). Elifaz kinemiliaya ika tlen okitlajtolti nonankiliaya ika ka. Okse tlakatl akin iuan otlajto Job itoka Bildad akin suhita katka. Bildad okijli Job ika xuelis nonemilis ika toTajtsin uelis kimitas ika tlaltikpakchanejkej melajkej (xpoua Job 25:4). *

² Elifaz niman Bildad okiyejyekojkej kitlaneltokiltiskej Job ika xtlaj kijtosneki ken nochikaua kitekichiuilis Jehová. Yejuamej kinekiyaj makineltoka ika toTajtsin techita san kentla se kojpochauistli noso se okuilin (Job 4:19; 25:6). Kanaj uelis  nonemilis ika ijkon otlajtokej pampa yolyemankej katka (Job 22:29). Tikmatstokej ika tejuamej melak tipitentsitsintin xijkon ken Jehová, akin melak ueyi. Ijkuak tinemij ikuatipan tepetl niman tontlachiaj ika tlatsintlan noso tontlachiaj ipan iventanilla se avión, tikitaj ika tejuamej melak tipitentsitsintin niman xueyi ika titlasojtij. Aman, ¿ijkon kita Jehová ijkuak tochikauaj tiktekichiuiliskej niman tikpaleuiskej iTekiuajyo? Ka. Jehová okimijli Elifaz, Bildad niman Zofar ika tlen yokijtokaj se tlakajkayaualistli katka. Sakin toTajtsin okijto ika pakiya itech Job, akin okitokayoti “notekipanojkauj” (Job 42:7, 8). Kuakon uelis kuajli tikmatstoskej ika tejuamej akin titlajtlakolejkej uelis tikpaleuiskej toTajtsin.

3. ¿Tlenon okijto Elihú itech ken tochikaua tiktekichiuiliskej Jehová, niman tlenon okijtosnek?

³ Se telpochtli itoka Elihú kikaktoya tlen kijtotoyaj yejon yeyi tlakamej iuan Job. Ijkuak yejuamej otlankej tlajtouaj, Elihú okitlajtolti Job yejuin itech Jehová: “Tla tejua tiyolmelaujki, ¿tlenon tikmaka yejua, noso tlenon kiselia motech?” (Job 35:7). ¿Okijtosnek Elihú ika ijkuak tochikaua tiktekichiuiliaj toTajtsin xtlaj kijtosneki? Ka. Jehová xokiyektlali Elihú, ijkon ken okinyektlali yejon yeyi tlakamej. Elihú kijtosnekiya ika Jehová xkipoloua matikueyichiuakan. Yejua xtlaj kipoloua makimakakan. Xtlaj uelis tikchiuaskej tlen uelis kichiuas makipiya tlen patioj noso makipiya chikaualistli. Niman xsan yejon, nochi kualneskayomej tlen tikinpiyaj noso tlen tiueltokej ualeua itech toTajtsin, niman yejua kitaj kenon tikintekitiltiaj.

4. ¿Kenon nomachilia Jehová ijkuak tikchiuaj itlaj tlen kuajli ipampa oksekimej?

⁴ Ijkuak tikimititiaj tlasojtlalistli tlen xtekaua itekipanojkauan Jehová, yejua kita. Yejua kita tlen kuajli tikinchiuiliaj oksekimej kentla yejua tikchiuiliskiaj. Proverbios 19:17 kijtoua: “Akin kipaleuiya akin itlaj kipoloua kitlaneujtia Jehová, niman yejua kitlaxtlauilis ipampa tlen kichiua”. Nochipa ijkuak yakaj tikititiaj iknelilistli, Jehová kita. Maski yejua Akin okichijchiuj nochi tlen onka ipan iluikak niman ipan tlaltikpaktli, yejua kimachilia ika techuikilia ijkuak tikchiuaj itlaj tlen kuajli ipampa oksekimej niman techtlaxtlauilia ika miyek tlateochiualistin. Hasta ikoneuj toTajtsin otemachti ika yemelak ijkon (xpoua Lucas 14:13, 14).

5. ¿Tlenon tlajtoltilistin tikinnankiliskej?

⁵ Yeuejkaui, Jehová okitlajtlanili teotlajtoketl Isaías makiteixpantili niman makitekichiuili ken xmiyekej kichiuaj (Isaías 6:8-10). Isaías okiseli ika nochi iyojlo ijkuak okinots toTajtsin niman okijli: “¡Nikan ninemi! ¡Nejua xnechtitlani!”. Ipan yejuin tonajli, Jehová noijki kinnotsa itekipanojkauan iuan matekitikan. Melak miyekej kiteititiaj ika tlanemiliaj ken Isaías. Yejuamej kinektokej kitekichiuiliskej Jehová ipan miyek tekitl, san kanon niman maski ijkuak ouijtika. San ika, kanaj yakaj ijkin yokinemili: “Niktlasojkamatij ika Jehová nechkauilia maniktekichiuili. San ika ¿yemelak  itlaj kijtosneki tlen nejua nikchiua? Maski tla niktekichiuilia noso ka, ¿xkitas Jehová ika manochiua tekitl?”. Matikinnankilikan yejuin tlajtoltilistin ika tlen inpan onochiuj ome itekipanojkauan Jehová akin yeuejkaui onenkej, Débora niman Barac.

6. ¿Tleka nesiskia ika akin tlaixnamikij itech Jabín nimantsin kintlaniskiaj israelitas?

⁶ Barac katka se soldado israelita, niman Débora se teotlajtoketl. Ipan 20 xiujtin, se tekiuaj cananeo itoka Jabín melak yokintlajyouiltijka israelitas. Akin tlaixnamikiyaj itech Jabín melak tetlajyouiltiayaj niman xkuakualtin katkaj. Ika yejon israelitas akin chantiyaj san kiyauak nion xkisayaj itech inchan. Akin tlaixnamikiyaj itech Jabín kinpiayaj 900 carros tlen ika tlauisokij tlen okintlalilijkej hoces tlachijchiujtin ika tepostli. San ika, israelitas xkinpiayaj armas tlen ika ueliskia tlaixnamikiskej nion tlen ika notlatsakuiliskej (Jueces 4:1-3, 13; 5:6-8) * (xkita nota).

7, 8. a) ¿Tlenon Jehová okijli Barac kachtopa manochiua? b) ¿Kenon israelitas okintlankej akin tlaixnamikij itech Jabín? (Xkita tlaixkopinajli kampa peua tlen tomachtijtokej).

⁷ Israelitas nesiyaj xkojtikej niman ika xouijtika kintlaniskiaj, xijkon ken akin tlaixnamikij itech Jabín. Maski ijkon, itechkopa teotlajtoketl Débora, Jehová okijli Barac makichiua yejuin: “Xuiya niman xnejnemi ipan tepetl Tabor, niman xkinuika mouan 10,000 tlakamej itech Neftalí niman Zabulón. Nejua ompa nimitsuajuikilis Sísara, akin kinyekana akin tlaixnamikij itech Jabín, iuan icarros tlen ika tlauisokij niman nochi akin iuan tlaixnamikij kampa atentli Cisón, niman nejua nimitsmakas ipan moma” (Jueces 4:4-7).

⁸ Kuakon onomat ika nonekiyaj akin tlapaleuiskej niman onosentlalijkej 10,000 tlakamej ipan tepetl Tabor. Barac niman 10,000 tlakamej oyajkej otlaixnamikitoj kampa itoka Taanac (xpoua Jueces 4:14-16). * ¿Okinpaleui Jehová yejon israelitas? Kema. San totoka, opeuj chikauak ajakakiyaui niman kampa noixnamiktoyaj melak osokitiak. Yejuin okinpaleui israelitas. Barac okintlaueltokak akin tlaixnamikij itech Sísara hasta kampa itoka Haróset tlen nokauaya 24 kilómetros ika uejka. Kanaj ipan yejon ojtli, icarro Sísara osaliuito ipan sokitl. Kuakon Sísara otemok niman onotlalo hasta Zaananim. Ompa, oniyan ichan se siuatl itoka Jael. Pampa melak yosiaujka, nimantsin okoch. Ijkuak Sísara kochiya, Jael onoyolchikauj niman okimikti (Jueces 4:17-21). Ijkon Jehová okinpaleui israelitas makintlanikan intlauelikniuan * (xkita nota).

9. ¿Tlenon tomachtiskej ipan Jueces 5:20, 21 itech ken okixnamijkej Sísara?

⁹ Tikitaskej okseki itech tlen opanok tlen noteneua ipan Jueces tlaxelojli ueyi 4 ijkuak tikpouaskej tlaxelojli  ueyi 5. Jueces 5:20, 21 techijlia. “Ipan iluikak sitlalimej ouajtlauisojkej; ipan inojui okualixnamijkej Sísara. Chikauak atentli Cisón okinuikak”. ¿Kijtosneki yejuin ika iluikaktekitkej okinpaleuijkej israelitas ijkuak otlaixnamijkej noso kijtosneki ika ouetsikoj meteoritos itech ne iluikak? Biblia xtlaj kijtoua. San ika, kema uelis tiknemiliskej ika Jehová okimakixti ikalpan pampa okichiuj chikauak makiyaui ijkuak nonekiya niman kampa nonekiya. Ijkon, yejon 900 carros tlen ika tlauisokij ouijtika nejnemiyaj. Ijkuak tikpouaj Jueces 4:14, 15, tikitaj ika yexpa kiteititia ika Jehová yejua akin otetlan kampa tlaixnamikij. Nion se itech 10,000 israelitas akin onotemakakej tlapaleuiskej ueliskia kijtos ika yejuamej otetlankej.

10, 11. ¿Tlenon katka Meroz, niman tleka okiuijuikaltijkej?

¹⁰ Aman matikitakan itlaj tlen melak techtlanemililtis. Sakin ijkuak yotetlan Israel, Débora niman Barac okiueyiteneujkej Jehová. Yejuamej okijtokej: “‘Xuijuikaltikan Meroz’, okijto iiluikaktekitkauj Jehová, ‘kema, xuijuikaltikan akin ompa chantij, pampa yejuamej xoualajkej okipaleuikoj Jehová, xokipaleuikoj Jehová iuan akin kojtikej’” (Jueces 5:23).

¹¹ ¿Tlenon katka Meroz? Xkuajli tikmatij. San ika, pampa okiuijuikaltijkej Meroz okichiuj kuajli mapopoloui. Kanaj uelis tiknemiliskej ika Meroz katka se ueyikalpan akin xokinek notemakas ontlapaleuis ijkuak Barac otlaixnamik. Pampa 10,000 onotemakakej kominixnamikiskej cananeos, akin chantiyaj Meroz kanaj noijki okikakej ika notlajtlaniyaj akin ontlapaleuiskej. Noso kanaj Meroz katka se ueyikalpan kampa Sísara opanok ijkuak ocholoj itech Barac. Kanaj akin chantiyaj Meroz ueliskia kajsiskej Sísara, san ika, xokichiujkej. San xkonemili kenon yejuamej san okitakej yejuin xkuajli tlakatl teixnamijketl cholouaya ipan inojuiuan niman ijkon makisas. Yejuamej uelis kichiuaskiaj itlaj tlen ueyi kijtosneki niman ijkon tlapaleuiskej manochiua tlen Jehová kineki. Tla yejuamej kichiuaskiaj, toTajtsin kinteochiuaskia. San ika, xtlaj okichiujkej. Nesi ika akin chantiyaj Meroz xijkon katkaj ken Jael, akin itlaj okichiuj ika yolchikaualistli (Jueces 5:24-27).

12. a) ¿Tlenon ome tlanemililtin nesij ipan Jueces 5:9, 10? b) ¿Tlenon techmachtia yejuin?

¹² Ipan Jueces 5:9, 10, tikitaj ika ken tlanemiliayaj 10,000 akin onotemakakej tlapaleuiskej xsan noijki katka ken akin xonotemakakej tlapaleuiskej. Débora niman Barac okinueyiteneujkej “tlanauatijkej itech akin tlaixnamiki ipan Israel, akin iuan kalpan onotemakakej ika inyojlo tlapaleuiskej”. Yejuamej xijkon katkaj ken akin kistinemiyaj “ipan polokomej koseujkej”, akin nomachiliayaj uejueyixtokej niman ika yejon xkinnamikiya yaskej ontlaixnamikiskej. Noijki noijtoua ika noseuijtokej “ipan patiojkej tlakenpetlamej” niman “nejnentinemij ipan ojtli”. Yejuamej kuelitayaj kuajli panoskej ipan innemilis. San ika, akin onotemakakej tlapaleuiskej iuan Barac oyajkej otlaixnamikitoj itsajlan temej ipan tepetl Tabor niman kampa onka tlalsokitl ipan tlalmantli Cisón. Akin kuelitayaj xouijtika panoskej ipan innemilis okimijlikej: “¡Xtlanemilikan ipan yejuin!”. Yejuamej nonekiya tlakakiskej niman tlanemiliskej  itech kenon okipolojkej tlen ika ueliskia kipaleuiskej Jehová. Ipan yejuin tonajli, tejuamej noijki noneki matikitakan kenon titlanemiliaj itech itekiyo toTajtsin.

13. ¿Tleka ken tlanemiliayaj ifamilia Rubén, Dan niman Aser xijkon katka ken ifamilia Zabulón niman Neftalí?

¹³ Yejon 10,000 akin onotemakakej tlapaleuiskej ouel okitakej kenon Jehová yejua Tekiuaj akin Ueyixtika. Noijki yejuamej ouel okimijlikej oksekimej kenon Jehová yokichiujka tlen kinamiki (Jueces 5:11). San ika, ifamilia Rubén, Dan niman Aser melak kinajmanaya kitlajpiyaskej inyolkauan, inbarcos niman kampa yejkoya inbarcos. Yejuamej nion xnajmanaya itech itekiyo Jehová (Jueces 5:15-17). Xnochimej okichiujkej ken yejuamej. Ifamilia Zabulón niman Neftalí okinejkej kipaleuiskej Débora niman Barac maski uelis kipoloskiaj innemilis (Jueces 5:18). Tejuamej uelis tomachtiskej itlaj tlen ueyi kijtosneki itech kenon kitayaj yejuamej timotemakas tikpaleuis Jehová.

14. ¿Kenon tikteititiaj ika tikpaleuiyaj itlayekanalis Jehová?

¹⁴ Ipan yejuin tonajli, xnoneki titlaixnamikiskej niman ijkon tikpaleuiskej Jehová. Tikteititiaj ika tikpaleuiyaj ijkuak titenojnotsaj ika yolchikaualistli niman ika nochi toyojlo. Aman melak noneki matotemakakan titlapaleuiskej ipan itekiyo Jehová. Melak miyekej tokniuan tlakamej, siuamej, telpokamej niman ichpokamej notemaka tlapaleuiskej ika nochi inyojlo ipan miyek ken nochiua chikauak itekiyo toTajtsin. Se neskayotl, miyekej tekitij ken precursores, tlapaleuiya ipan Betel, tekitij kampa nochijchiuaj Kaltin kampa Tosentlaliaj niman oksekimej tlapaleuiyaj ipan uejueyimej tlanechikoltin. Sekimej tokniuan chikauak tekitij ken Tlayekankej akin Kinpaleuiyaj Tokniuan ipan Hospitales niman oksekimej kitaj kenon nopanoltiskej uejueyimej tlanechikoltin. Tejuamej uelis kuajli tikmatstoskej ika Jehová melak kitlasojkaita ika  tiknekij tiktekichiuiliskej ipan nochi tlen noneki niman yejua xkilkauas ika otochikaujkej tiktekichiuiliskej (Hebreos 6:10).

15. ¿Kenon uelis tikmatiskej tla xok chikauak tikchiujtokej itekiyo toTajtsin?

¹⁵ Noneki tikitaskej tlen tiknemiliaj itech totemakaskej titlapaleuiskej ika nochi toyojlo. Uelis totlajtoltiskej: “¿San nikinkauilia oksekimej makichiuakan nochi tekitl? ¿San niknemilia kenon nikpiyas miyek tlemach tlen patioj niman xniknemilia kenon niktekichiuilis Jehová? Noso ijkon ken okichiujkej Barac, Débora, Jael niman 10,000 akin onotemakakej tlapaleuiskej, ¿nikixkopintika intlaneltokil niman inyolchikaualis niman ijkon nikpaleuis Jehová ika nochi tlen nikpiya? ¿Niknemilijtika nias ipan okse ueyikalpan noso okse país niman ijkon melak niktlanis tomin niman melak kuajli ninemis? Tla kema, ¿nikchiuilijtika teoyotl Jehová ika manechititi kenon yejuin uelis kijtlakos nochanejkauan niman tlanechikojli? * (xkita nota).

16. Maski Jehová kipiya nochi, ¿tlenon uelis tikmakaskej?

¹⁶ Jehová techititia ika techtlakaita ijkuak techkauilia matikpaleuikan itlayekanalis. Ipan itonaluan Adán niman Eva, Satanás opeuj kitejtemoua ika tlaltikpakchanejkej makixnamikikan Jehová. San ika, ijkuak tikpaleuiya itlayekanalis Jehová, kuajli tikititiaj Satanás ika tejuamej tinemij iuan toTajtsin. Totlaneltokil niman toyolmelaujkanemilis itech toTajtsin techyolmapeua ika matiknekikan totemakaskej ipan itekiyo toTajtsin, niman yejuin melak kiyolpaktia (Proverbios 23:15, 16). Tla tejuamej tikpaleuiyaj niman tiktlakamatij ToTajtsin, yejuin kipaleuis ika kinankilis itlakajkayaualisuan Satanás (Proverbios 27:11). Ijkuak tiktlakamatij Jehová, tikmakaj itlaj tlen melak kitlasojkaita niman kiyolpaktia.

17. ¿Tlenon techmachtia Jueces 5:31 itech tlen panos ika tlayekapan?

¹⁷ Sa achijtsin poliui ijkuak nochimej ipan tlaltikpaktli kinekiskej kipaleuiskej san itlayekanalis Jehová. ¡Melak tiknekij mayejko yejon tonajli! Tomachiliskej ken Débora niman Barac akin onokuikatijkej: “Ijkon mamikikan nochimej motlauelikniuan, Jehová, san ika, akin mitstlasojtlaj manochiuakan ijkon ken tonajli ijkuak uajkisa ika iueyilis” (Jueces 5:31). Yejon panos ijkuak Jehová kipopolos nochi tlen Satanás kiyekana. Ijkuak peuas Armagedón, Jehová xtechtlajtlanilis matikpaleuikan niman ijkon kinpopolos itlauelikniuan. Tejuamej san titlamachiaskej niman tikitaskej kenon Jehová techmakixtia (2 Crónicas 20:17). San ika, ipan yejuin tonajli, kema uelis tikpaleuiskej itlayekanalis Jehová ika yolchikaualistli niman ika nochi toyojlo.

18. ¿Kenon uelis kinpaleuis oksekimej ijkuak timotemaka titlapaleuis?

¹⁸ Débora niman Barac opeuj kiueyiteneuaj Jehová, niman nion xse tlakatl, ipan se tlakuikajli ika otetlankej. Yejuamej onokuikatijkej: “Pampa kalpan onotemakak ika iyojlo tlapaleuis, ¡xueyiteneuakan Jehová!” (Jueces 5:1, 2). Noijki ijkon, ijkuak tiktekichiuiliaj Jehová ken yejua kineki, oksekimej noijki uelis kinyolchikauas makiueyiteneuakan Jehová.