Ipan Biblia, ika tlajtojli griego kemantika notlajtolkuepa “toyekanaskej melajki” kijtosneki itlaj tlen melak kuajli. Noijki kijtosnekis itlaj tlen kualtsin niman notlasojkaita ken tlanemiliaj.

Akin kichiuayaj ken Cristo yemelak okitlakamatkej tlen Pablo okijto: “Tiknekij toyekanaskej melajki itech nochi tlemach”. ¿Tlenon kijtosneki yejuin?

Melak miyekej tlaltikpakchanejkej ijkuak kanaj yaskej nochipa noitaj ipan se teskatl. ¿Tleka? Pampa kinekij melak kuajli nesiskej. San ika, onka itlaj tlen melak ueyi kijtosneki xsan ken timoyektlalis noso kuajli tinesis. Titlajtouaj itech kenon yemelak tejuamej ipan toyojlo. Yejon uelis kichiuas melak kuajli matinesikan noso uelis melak xkuajli ken tinesiskej.

Biblia kuajli kijtoua ika tiknekij tikchiuaskej tlen xkuajli. Génesis 8:21 kijtoua ika “iyojlo tlaltikpakchane kinemilia kichiuas tlen xkuajli ijkuak telpochtia”. Tla tiknekij melajki toyekanaskej, noneki maka matokauilikan matechtlani tlen kineki kichiuas toyojlo. Pablo okijto kenon kimachiliaya ouijtika kixnamikis tlajtlakojli: “Ipan noyojlo nikuelita itlanauatil Dios. Pero ipan notlalnakayo nikmati ika onkaj yejua in okse tlanauatijli yejuan no kineki nechnauatis. Yejua in tlanauatijli de tlajtlakojli kitlauelixnamiki on itlanauatil Dios yejuan noyojlo kuelita. Yejua in tlanauatijli de tlajtlakojli yejuan onkaj ipan notlalnakayo, nechpia ken nitsakutikaj” (Romanos 7:22, 23).

Ijkuak tikmachiliaj ika tiknekij tikchiuaskej tlen xmelauak, xkipiya ika tijkauiliskej matechtlani tlen kineki toyojlo, kentla tejuamej xueliskia tikteltiskej tlen tikchiuaj. Tejuamej xtitlakeualtin itech tlen kineki kichiuas toyojlo. Tejuamej tiktlapejpeniskej tla tikchiuaskej tlen melajki noso ka. Ijkuak tikmapeuaj tlen xkuajli tlanemilijli, toyekanaj melajki kampa xnochiua tlen melauak.

Noneki tiknekiskej tikchiuaskej tlen melajki niman ijkon uelis tikchiuaskej tlen melauak. San ika, miyekej tlaltikpakchanejkej kinemiliaj ika melak ueyi kijtosneki ken kimitaj niman xijkon ken kichiuaskej tlen melajki. Kuakon kinemiliaj ika kuajli ken noyekanaj san pampa xkinekij itlaj inpan manochiuaj. Ipan amoxtli The (Honest) Truth About Dishonesty, tlen tlajtoua itech tlen melauak niman tlen xmelauak, kijtoua: “Uelis tikijtoskej ika titekajkayauaj hasta ijkuak ok tiknemiliaj ika tikchiujtokej tlen melauak”. San ika ¿tlenon techpaleuis kuajli matikitakan ken toyekanaskej melajki?

Miyekej tlaltikpakchanejkej yokitakej ika Biblia kuajli teyekana. Kema, iTlajtol toTajtsin kinpiya uejueyimej tlanauatiltin itech ken toyekanaskej (Salmo 19:7). Tlen tlajtoua techpaleuiya itech tochanejkauan, ipan totekiyo, ken tinemiskej niman ken touikaskej iuan toTajtsin. Itlajtolpaleuilisuan xkeman panouaj, nochipa tepaleuiya. Itlanauatiluan niman tlajtolyekanalistin itech Biblia  kinpaleuiya nochimej tlaltikpakchanejkej ipan nochi países, raza, ken tlachiaj niman kalpamej. Tla tikpouaj Biblia, tiknemiliaj tlen kijtoua niman ika toyekanaj, uelis melajki toyekanaskej ika nochi toyojlo.

Ipan yejuin tonajli tinemij kampa nemij tlaltikpakchanejkej akin kinekij matikchiuakan ken yejuamej noyekanaj. Ika yejon, xsa noneki matikixmatikan Biblia. Tla tiknekij melajki toyekanaskej niman tikchiuaskej tlen melauak, noneki tiktlajtlaniliskej toTajtsin matechpaleui (Filipenses 4:6, 7). Ijkon uelis tikchiuaskej tlen melauak niman melajki toyekanaskej itech nochi.

Hitoshi, akin yotikteneujkej kachtopa, okichiuj ipan itekiyo tlen melajki niman yejon melak okipaleui. Sakin opeuj tekiti kampa notlasojkaita tlen melajki. Yejua kijtoua: “Melak niktlasojkamati pampa oniknexti se tekitl kampa ueli nikpiya kuajli notlamachilis”.

Sekimej noijki ijkon inpan onochiuj. Xkita neskayomej kenon sekimej okinpaleui pampa onoyekankej “melajki itech nochi tlemach”.

• Tikpiyas chipauak motlamachilis

  “Ijkuak nikpiaya 13 xiuitl, xok onia ipan kaltlamachtijli niman opeuj nitekiti imiuan akin tlachtekij. Itech 95% tlen niktlaniya ualeuaya itech tekitl kampa nochiua tlen xmelauak. Sakin oninonamikti, nejua iuan noueuentsin opeuj tomachtiaj Biblia iuan iteixpantijkauan Jehová. * Ijkuak opeuj tomachtiaj otikitakej ika Jehová xkuelita se akin xmelajki noyekana. Kuakon otiknemilijkej tikpatlaskej tlen tikchiuayaj ipan tonemilis (Proverbios 6:16-19). Ipan xiuitl 1990 otoapolaktijkej niman otochiujkej iteixpantijkauan Jehová.

  ”Kachtopa nikpiaya ipan nochan miyek tlen xnotlatki katka, san ika, aman xok nikpiya yejon. Aman melajki ninoyekana niman nikpiya kuajli notlamachilis. Ijkuak niknemilia kenon yeuejkaui nitlachtekiya, niktlasojkamachilia Jehová pampa onechikneli. Melak kuajli ninomachilia mojmostla ijkuak nikochi pampa nikmati ika Jehová yolpaki nouan.” (Cheryl, Irlanda)

  “Ijkuak akin itech nitekiti okimat ika xonikseli itlaj tlen nechmakaya se akin xmelajki noyekana, onechijli: ‘Motajtsin yomitspaleui xmochiua se akin uelis timitsneltokaskej. Melak kuajli pampa touan titekitij’. Pampa melajki ninoyekana, nikpiya kuajli notlamachilis ixpan Jehová. Noijki ueli nikinpaleuiya nochanejkauan niman oksekimej noijki ijkon makichiuakan.” (Sonny, Hong Kong)

• Tikpiyas yolseuilistli

  “Nejua nitlapaleuiya itech se tekitl tlen nochiua ipan se banco internacional. Ipan yejuin tekitl nochipa nemij miyekej akin xnoyekanaj melajki pampa kinekij manotlani tomin. Yejuamej kinemiliaj: ‘¿Tleka xuelis titlakajkayauas maski san achijtsin tla melak notlani tomin?’. San ika, pampa kuajli ninoyekana, ninemi ika yolseuilistli. Yoniknemili ika ijkon nikchiuas maski san tlenon mapano. Akin intech nitekiti kimatij ika xkeman nitekajkayauas inpampa nion xnikinkajkayauas yejuamej.” (Tom, Estados Unidos)

• Mitstlakaitaskej

  “Akin nouan tekiti onechtlajtlanili matitlakajkayaua itech tlen opoliuj, san ika, nejua xoniknek. Ijkuak okimatkej akinomej otlachtejkej, noteko otechtlasojkamachili pampa xonitekajkayauj. Ipan yejuin tonaltin, tla tiknekij melajki toyekanaskej, noneki tiyolchikaujkej yeskej. Sakin, techneltokaskej niman techtlakaitaskej oksekimej.” (Kaori, Japón)

Tla melajki toyekanaj, tikpiyaskej kuajli totlamachilis, yolseuilistli niman techtlakaitaskej. Kuakon, tikchiuas tlen melajki melak kuajli tonkisas.