TLEN KIJTOUA BIBLIA
Timauiltis ipampa tomin
Sekimej kinemiliaj ika timauiltis ipampa tomin xteijtlako, san ika, oksekimej kinemiliaj ika melak xkuajli.
¿Xkuajli tla timauiltia ipampa tomin?
TLEN SEKIMEJ KIJTOUAJ:
Miyekej kinemiliaj ika timauiltis ipampa tomin xteijtlako tla nochipa timauiltia ken noneki. Tekiuajkej kisentlaliaj tomintsin kampa nauiltiaj lotería niman yejon tomitsin kinmakaj akin más kinpoloua.
TLEN BIBLIA KIJTOUA:
Biblia xtlajtoua itech timauiltis ika tomin. San ika, kema techijlia tlen techpaleuis matikasikamatikan tlenon kinemilia toTajtsin.
Timauiltis ipampa tomin kijtosneki ika tikchiuas maski san tlenon para ijkon titetlanis, san ika, Jesús okijto: “Xmocuidarokan para maka sanoyej xnekikan nenricojtiskej” (Lucas 12:15). Miyekej nauiltiaj pampa kinekij miyek tomin kipiyaskej. Akin kinekij xmauilti ipampa tomin mitsijliskej ika melak miyek tomin tiktlanis, san ika, xnochipa ijkon panoua. Miyekej akin kinekij notomintiskej kitemakaj miyek tomitsin niman ijkon más miyek kitlaniskej. Ijkuak se nauiltia ika tomin ojuitika kita kikajkauas pampa kita ika xouijtika kitlani tomin.
Ijkuak se nauiltia ipampa tomin san itech tlanemilia pampa kineki kitlanis tomin tlen oksekimej kipolouaj. San ika, Biblia kijtoua: “Maka yakaj kitejtemo on tlen kuajli san para yejua, yej ma kitejtemo on tlen kuajli para oksekimej” (1 Corintios 10:24). Se itech yejon majtlaktli tlanauatiltin, kijtoua: “Maka itlaj tikeleuis on tlen teyaxka” (Éxodo 20:17). Ijkuak se nauiltia, kineki tetlanis niman yejua kichia ika oksekimej matlapolokan niman ijkon kinokauis nochi intomin.
Biblia techijlia ika xnoneki tikitaskej on suerte ken se kojtilistli tlen uelis techpaleuis. Yeuejkaui, sekimej israelitas akin xotlaneltokakej itech toTajtsin, opeuj kinueyichiuaj tajtsitsintin akin kinemiliayaj ika kinmakayaj suerte. Niman ¿kenon okitak toTajtsin? Yejua okijto: “Xonennechnankilijkej. Ijkuak onitlajtoj xonennechkakej, yej onenkichijkej on tlen nejua xniknekiya xchiuakan” (Isaías 65:11, 12).
Yemelak ika ipan seki países, tomitsin tlen nosentlalia kampa nauiltiaj, kitekitiltiaj para kinpaleuiskej oksekimej; ken ipan escuelas noso oksejkan. San ika, maski kuajli ken kinekij kitekitiltiskej, yejon tomin ualeua kampa kiteititiaj ika san kinekij kipiyaskej tomin, ika xtlanemiliaj intech oksekimej niman ika uelis kitlaniskej miyek tomin maski xtlaj kichiuaskej.
“Maka itlaj tikeleuis on tlen teyaxka” (Éxodo 20:17).
¿Teijtlako tla tikuelita timauiltis ipampa tomin?
TLEN BIBLIA KIJTOUA:
Biblia kijtoua: “Pero on yejuan kinekij ricojtiskej, xkixikouaj on tetlatlatalistli yejuan kintlajkali ipan tlajtlakojli. Yejuamej kipiyaj miyek xkuajli ineleuilis yejuan kinuika kampa teyolkokoj niman kampa xoxotonij” (1 Timoteo 6:9). Tiknekis tikpiyas más tomin uelis mitsijtlakos pampa kichiuas sajnoye xmauilti. Pampa melak teijtlako, Biblia kiteneua yejuin ken itlaj tlen noneki tiktlalkauiskej (Efesios 5:3).
Timauiltis ipampa tomin kichiuas xkita ika xouijtika tikpiyas miyek tomin, san ika, yejon kichiua más xtlasojtla tomin. Biblia kijtoua ika ijkuak yakaj peua kitlasojtla tomin “ompa peua nochi tlajtlamach tlen xkuajli”. Niman peua melak kijtlakoua pampa kichiua melak maajmankamiki niman kijtlakoua ken nouika iuan toTajtsin. Biblia kuajli kijtoua ika akin melak kitlasojtlaj tomin “kipiyaj miyek ajmantli ipan innemilis” (1 Timoteo 6:10).
Tiknekis tikpiyas miyek tomin kichiua maka xpaki niman miyekej ijkon inpan nochiua pampa xok yolpakij ika tomintsin tlen kipiyaj. Eclesiastés 5:10 kijtoua: “Yejuan sanoyej kineki kipiyas tomin, nochipa kineki más; yejuan sanoyej kineki riquezas, xkaman yolpachiui”.
Miyekej akin melak okuelitakej nauiltiskej ipampa tomin, kijtouaj ika aman xok uelij kikajkauaj. San ipan Estados Unidos melak miyekej nemij akin sajnoye kuelitaj nauiltiskej.
Proverbios 20:21 techijlia ika yakaj uelis sajnoye kipiyas miyek tomin, san ika, xkipiyas itlatiochiualis toTajtsin. Noijki, akin melak kuelita nauiltis ipampa tomin uelis sajnoye notlaneuis, kipolos iamigos, itekiyo niman ifamilia. Tikintlakamatiskej itlanauatiluan Biblia techpaleuiya niman techtlajpiya itech nochi yejuin.
“Pero on yejuan kinekij ricojtiskej, xkixikouaj on tetlatlatalistli yejuan kintlajkali ipan tlajtlakojli. Yejuamej kipiyaj miyek xkuajli ineleuilis yejuan kinuika kampa teyolkokoj niman kampa xoxotonij” (1 Timoteo 6:9).
