ONINOSKALTI ipan Graz (Austria). Ijkuak nikpiaya chikome xiuitl onechtitlankej ipan se kaltlamachtijli niman ijkon manechmachtikan itech Biblia. Melak onechmojkatlachialti ika ompa auilnemiyaj teopixkej niman monjas. Ipampa yejon, onikijli nonan manechkixti itech yejon kaltlamachtijli, niman onikis ijkuak xpanouaya nion se xiuitl.

Sakin, onikalak ipan se albergue. Se yeuajli notaj onechtejtemoko, kinekiya nechuikas kampa uelis kuajli ninemis, pampa ipan Graz kintlajkaltoyaj bombas. Otopaleuijkej ipan kalpan Schladming. Ijkuak otajsikej otikpanauijkej se puente, niman ijkuak yotikpanauijkaj nimantsin okitoponaltijkej. Niman okse tonajli, seki aviones tlen melak tlaltech patlantoyaj otechmojmotlakej noabuela niman nejua ijkuak tinemiyaj tokiyauak. Ijkuak otlan guerra, otikmachilijkej ika teopan niman tekiuajkej san otechilkaujkej.

Ipan 1950, se iteixpantijkauj Jehová opeuj kinojnotsa nonan itech Biblia. Nejua nijkakiya tlen tlajtlatouayaj niman hasta kemantika niaya iuan nonan ipan tlanechikoltin. Pampa okineltokak ika iteixpantijkauan temachtiayaj tlen melauak, onoapolakti ipan 1952.

Ipan tlanechikojli kampa tiayaj nejua nikitaya kentla kampa san nosentlaliayaj siuamej akin iuejueyimej. San ika, sakin otiajkej ipan se tlanechikojli kampa nemiyaj miyekej telpokamej niman ichpokamej. ¡Ompa xnesiya ika nosentlaliayaj san siuamej akin iuejueyimej! Ijkuak oninokuep Graz, opeuj niauj ipan nochi tlanechikoltin niman xouejkauj nejua noijki onikmat ika niueltoya tlen melauak. Niman onikmat ika Jehová se toTajtsin akin xkeman kinkaua itekipanojkauan. Maski tikixnamiktoskej tlen melak ouijtika niman toselti tomachiliskej, Jehová nochipa ompa nemis (Sal. 3:5, 6).

Niknekiya nikimijlis oksekimej tlen yoniuelka niman onipeuj ika nokniuan. Nauimej nokniuan siuamej yokiskaj nochan niman tekitiyaj  ken temachtijkej. Oniaj ipan kalpamej kampa nemiyaj niman onikinyolchikauj manomachtikan Biblia. Sakin, nochimej nokniuan onochiujkej iteixpantijkauan Jehová.

Ijkuak xinikajxiltiaya ome semana ika nitenojnotsaya techajchan, onitlajtlajto iuan se siuatl akin kipiaya ipantsin treinta xiuitl niman opeuj nikmachtia itech Biblia. Yejua okichikauj itlaneltokil niman onoapolakti. Sakin, noijki iueuentsin niman omemej ikoneuan. Yejon tlamachtijli itech Biblia melak okichikauj notlaneltokil. ¿Tleka? Pampa nejua xkeman onikselijka se tlamachtijli niman nonekiya melak kuajli ninomachtis. Kachtopa ika nikititis itlaj akin nikmachtiaya, nonekiya nejua kuajli nikasikamatis. Pampa melak oninomachti onechpaleui kuajli manikasikamati tlen melauak. Oninosentemakak itech Jehová niman ipan abril, xiuitl 1954, oninoapolakti.

Ipan 1955 oniaj ipan uejueyimej tlanechikoltin iuan miyekej países ipan Alemania, Francia niman Inglaterra. Ijkuak ninemiya Londres, onikixmat Albert Schroeder, se temachtijketl itech iTlamachtil Galaad akin sakin otekit iuan Grupo akin Tlayekana ipan nochi tlanechikoltin. Otikixmatitoj Museo Británico niman tokniuj Schroeder otechititi seki tlajkuiloltin itech Biblia. Otechijli ika yejon tlajkuiloltin kipiayaj itoka toTajtsin ika letras hebreas niman ika melak ueyi kijtosnekiyaj. Yejon melak oajsik ipan noyojlo niman okichikauj notlaneltokil. Aman melak niknekiya niktemachiltis tlen melauak itech iTlajtol toTajtsin.

Opeuj chikauak niktekichiuilia toTajtsin ipan enero 1, xiuitl 1956. Opanok naui metstli, onechijlikej tla uelis nitekitis ken precursora especial ipan Austria niman onechtitlankej Mistelbach, kampa xnemiyaj iteixpantijkauan Jehová. San ika, nikixnamikiskia okse tlen ouijtika: precursora akin iuan onechtitlankej niman nejua xsan noijki ken titlanemiliayaj. Nejua inikajxiltiskia 19 xiuitl niman yejua kipiaya 25. Nejua niualeuaya itech se ueyi kalpan niman yejua itech se pitentsin kalpan. Nejua xnikuelitaya saniman ninokuiteuas niman yejua kema. Niman ijkuak itlayoua katka nejua ok niknekiya nitlachixtos niman yejua kinekiya onkochis. San ika, pampa otoyekankej ika Biblia, otikyektlalijkej tlen xtouelitiliayaj niman otechyolpakti san sekan titenojnotsaskej.

Noijki otikixnamijkej okseki tlen melak ouijtika. Uelis tikijtoskej ika otechtlaueltokakej, san ika, xkeman otechkaujkej (2 Cor. 4:7-9). Nikilnamiki ika sejpa titenojnotstoyaj ipan se kalpan pitentsin niman akin ompa chantiyaj okinmakaujkej imitskuinuan niman ijkon matechkuakan. Nimantsin, akin iuan nitenojnotstinemiya niman nejua otechyeualojkej chichimej niman techtlajtlajuatoyaj niman nanalkatoyaj. Otitajsikej ipan toma niman nejua hasta oniktlajtlanili Jehová: “Nimitstlajtlanilia Jehová, ika ijkuak topan uajlaskej nimantsin matechmiktikan”. San ika, ijkuak poliuiya kanaj se metro ika kuajli technisiuiskej yejon chichimej, onoteltijkej, opeuj nokuikuitlapiltlajkalij niman oyajkej. Otikmachilijkej ika Jehová otechmakixti. Ijkuak opanok yejon, otitenojnotskej ipan nochi kalpan niman, melak otechyolpakti ika tlaltikpakchanejkej kuajli otechkakej. Kanaj melak okinmojkatlachialti ika chichimej xtlaj otexchiuilijkej noso pampa xotikauilijkej matechtelti tlen temomojti otikixnamijkej. Sekimej akin nisiuj chantiyaj onochiujkej iteixpantijkauan Jehová.

 Otikixnamijkej okse tlen temojti. Se tonajli akin itlatki kajli kampa tichantiyaj otlauan niman okijto ika techmiktis pampa tikinpasolouayaj tlaltikpakchanejkej. Isiuauj okinek kiteltis san ika, xouel. Tejuamej tinemiyaj tlakpak kampa tikochiyaj, niman ompa tikuajkaktoyaj nochi. Nimantsin otikintlalijkej sillas ipan puerta niman opeuj titlatlajtlaliaj. Ijkuak otitlatlapojkej, otikitakej ika yejon tlakatl yotlejkoka ipan escaleras niman kipiaya se cuchillo melak ueyi ipan ima. Otikiskej ipan puerta tlen tlakuitlapan onkatka niman otinejnenkej kampa tlaxochiyo tlen melak ueyi, niman kuajli otikijtokej ika xok keman tokuepaskiaj.

Otiajkej ipan se hotel niman otiktlajtlankej kampa uelis toseuiskej. Ompa otokaujkej kanaj se xiuitl, niman yejon otechpaleui ipan totenojnotsalis. Pampa hotel tlatlajko onkatka itech yejon kalpan, sekimej akin tikinmachtiayaj kinekiyaj ompa matikinmachtikan. Sakin, ompa kampa tichantiyaj opeuj tomachtiaj amoxtli tlen nomachtijtoyaj ipan tlanechikoltin niman Amatl Tekakistilijketl tlen tomachtiaj nochi semanas. Kanaj 15 ompa tosentlaliayaj.

Otinenkej Mistelbach ipantsin se xiuitl. Sakin, onechtitlankej Feldbach, tlen onka sureste itech Graz iuan okse precursora. Ompa noijki xonkatka tlanechikojli. Tichantiyaj ipan se cuarto melak pitentsin tlen onkatka tlakpak itech se kaltsintli tlachijchiujtli ika kojtin. Ejekatl kalakiya tlatlajko itech yejon kojtin niman nonekiya tiktsajtsakuaskej kampa kalakiya ejekatl ika periódico. Noijki nonekiya tijkixtiskej atl ipan se pozo. San ika, nochi tlen otikixnamijkej otepaleui. Opanok seki metstin niman onochiuj se grupo. Niman sakin, kanaj 30 akin tikinmachtiayaj okiselijkej tlen melauak.

Nochi tlen onikixnamik okichiuj melak manikpatiojkaita kenon Jehová nochipa kinpaleuiya akin kachtopa kichiuaj tlen yejua kineki. Maski tiknemiliskej ika xakaj nemi akin uelis techpaleuis, Jehová nochipa ompa nemi (Sal. 121:1-3).

Ipan 1958 onochiuj se ueyi tlanechikojli iuan miyekej países ipan Nueva York, onochiuj ipan Estadio de los Yankees niman ipan Polo Grounds. Oniktemilti se amatl kampa onikteijli ika nikuelitaskia nias, niman sucursal itech Austria onechtlajtolti tla ueliskia nias ipan iTlamachtil Galaad número 32. Yejon katka se ueyi tlateochiualistli, ¿kenon xniknekiskia? Nimantsin onitenankili: “¡Kema!”.

Kampa tomachtiayaj ninotlaliaya inakastlan Martin Poetzinger. Yejuin tokniuj okixnamijka tlen temojti kampa nazis tetlajyouiltiayaj ika  chikauak tekitl. Sakin otekit iuan Grupo akin Tlayekana ipan nochi tlanechikoltin. Pampa tokniuj niman nejua titlajtouayaj alemán niman techmachtiayaj ika inglés, yejua kemantika nechichtakaijliaya: “Erika, ¿tlenon kijtosneki yejon?”.

Ijkuak tlajko poliuiya ika tlamis tomachtiskej, tokniuj Nathan Knorr otechijli kanon techontitlaniskiaj. Nejua onechontitlankej Paraguay. Pampa xiniueyi katka, nonekiya ika notaj manechkauili maniuiya ipan yejon país. Notaj onechkauili, niman ipan marzo, xiuitl 1959 onajsik Paraguay. Nichantiskia kampa chantiyaj misioneros tlen onkatka Asunción, niman iuan nichantiskia okse tokniuj siuatl.

Xouejkauj, onikixmat Walter Bright, se misionero akin oyajka ipan iTlamachtil Galaad número 30. Otonamiktijkej niman san sekan otikixnamiktiajkej tlen ouijtika. Ijkuak tipanotoyaj itech tlen ouijtika, tikpouayaj Isaías 41:10, kampa kijtoua: “Maka xmomojti, pampa mouan ninemi. Maka xmojkamiki, pampa nejua nimoTajtsin. Nejua nimitsyolchikauas”. Yejuin tlaxelojli techilnamiktiaya ika tla tokojtiliayaj tiyolmelaujkanemiskej itech Jehová niman kachtopa tiktlaliayaj iTekiuajyo, yejua xkeman techkauaskia.

Sakin, otechontitlankej ipan se kalpan tlen nisiuj onkatka kampa peuaya Brasil. Ompa, teopixkej okimijlikej telpokamej makitemojmotlakan inkal misioneros kampa tejuamej tichantiyaj, tlen yoijtlakaujka. Ijkuak Walter opeuj nomachtia iuan akin kinyekana policías, yejua okichiuj ika se semana policías makitlajpixtokan tokal. Ijkuakon xok yakaj itlaj otexchiuili. Sakin, otechtitlankej matichantitij ipan okse kajli tlen kuajli niman onkatka itenko Brasil. Yejon melak otepaleui pampa ouel otikchiujkej tlanechikoltin ipan Paraguay niman Brasil. Ijkuak ok ompa tinemiyaj yonochiujkaj ome tlanechikoltin pitentsitsintin.

Tepajtikej onechijlikaj ika xkeman ueliskia nikinpiyaskia nokoneuan, kuakon xkonnemilikan kenon melak otechmojkatlachialti ijkuak ipan 1962 onikmat ika nikoneua katka. Otichantitoj Hollywood, ipan Florida (Estados Unidos), nisiuj kampa chantiyaj ichanejkauan Walter. Ipan seki xiujtin, ipampa tekitl tlen tikpiayaj tochan, xouel otitekitkej ken precursores. Maski ijkon, nochipa kachtopa otiktejtemojkej tikchiuaskej itekiyo toTajtsin (Mat. 6:33)

Ijkuak otajsikej Florida ipan noviembre, xiuitl 1962, otikitakej itlaj tlen melak otechmojkatlachialti. Pampa tlaltikpakchanejkej techikoitayaj, tokniuan chipaujkej niman kapotstikej nojnonkua nosentlaliayaj niman tenojnotsayaj. San ika, Jehová xtechikoita niman xouejkauj ika tlanechikoltin okikaujkej yejuin tlen yonomatkaj kichiuayaj. Kuajli ones ika Jehová akin okichiuj manopatla yejuin pampa aman onka miyek tlanechikoltin.

Melak teajman ika ipan 2015 Walter omik ipampa se cáncer tlen okajsik ipan itsontekon. Noueuentsin melak onechpaleui ipan cincuenta y cinco xiujtin, katka se tlakatl akin okitlasojtlak Jehová niman okinpaleui miyekej tokniuan. Melak nikchiatok oksejpa nikitas ijkuak yoliuis niman xok kualos (Hech. 24:15).

Melak niktlasojkamati ika ouel chikauak niktekichiuilia Jehová ipantsin cuarenta xiujtin niman ika onikpix miyek tlateochiualistin niman tlen melak onechyolpakti. Se neskayotl, Walter niman nejua ouel otikitakej kenon onoapolaktijkej 136 akin otikinmachtijkej. Melauak ika kemantika otikixnamijkej tlen ouijtika, san ika, xkeman otikitakej yejon ken itlaj tlen ika tijkajkauaskej tiktekichiuiliskej Jehová, toTajtsin akin xtekaua. Ipan yejon tonaltin, melak itech tonisiuiayaj niman titlaneltokayaj ika yejua melak kuajli kiyektlaliskia tlaueltin niman kiyektlaliskia ijkuak nonekiskia. Niman nochipa ijkon yokichiuj (2 Tim. 4:16, 17).

Melak niktemoua Walter, san ika, pampa nitekiti ken precursora yejon nechpaleuiya nikixnamikis ajmantli. Yonikitak ika nechpaleuiya nikinmachtis oksekimej tlen melauak, niman melak kuajli ninomachilia ijkuak nikinnojnotsa itech yoliuilistli. Yemelak, Jehová xkeman nechkaua. Melak yonechtlajpix ken xuelis nikijtos. Ijkon ken yejua okijto, nochipa yonechpaleui, yonechyolchikauj niman nochipa nechajsitok ika imayekma tlen melajki (Is. 41:10).