Onitlakat ipan 1934. Notajuan ualeuayaj Suiza, san ika, ochantitoj ipan se kalpan kampa onkatkaj minas tlen itoka Timmins, ne Ontario (Canadá). Kanaj ipan 1939, nonan opeuj kiamapoua revista Amatl Tekakistilijketl niman opeuj yauj tlanechikoltin imiuan iteixpantijkauan Jehová. Nonan nochipa techuikaya tlanechikoltin nejua imiuan chikuasemej nokniuan. Sakin yejua onoapolakti.

Notaj xokuelitak ika nonan onochiuj iteixpantijkauj Jehová, maski ijkon, nonan xokikajkauj ika nomachtia. Niman maski ipan 1940 ika tlayekapan xok okinkauilijkej iteixpantijkauan Jehová manosentlalikan ne Canadá, nonan omelajkanen niman xokikajkauj ika kitekichiuilia Jehová. Noijki nochipa kuajli okinots notaj niman okitlakaitak maski notaj melak xkuajli kinotsaya. Tlen okichiuj nonan melak otechpaleui para noijki matochiuakan iteixpantijkauan Jehová. Melak tiyolpakij ika sakin notaj xok más kualaniya niman opeuj más kuajli technotsa.

Ipan agosto de 1950, oniaj ipan se ueyi tlanechikojli ne Nueva York tlen itoka katka “Aumento de la Teocracia”. Ompa melak miyekej onikimixmat tokniuan akin yoyajkaj iTlamachtil Galaad, niman onijkak kenon melak kualtsin yokitekichiuilijkaj Jehová. Kuakon, yejon onechyolchikauj ijkon manikchiua. Nejua yonikijtojka ika se tonajli más chikauak niktekichiuiliskia Jehová, san ika, ijkuakon, más oniknek ijkon nikchiuas. Kuakon, ijkuak onajsik nochan, onontitlan se solicitud niman ijkon ninochiuas precursor regular. Sucursal de Canadá onechnankili niman onechijli ika kuajli yeskia tla kachtopa ninoapolaktia. Kuakon, ipan 1 de octubre de 1950 oninoapolakti. Se metstli sakin oninochiuj precursor regular niman onechtitlankej ipan se kalpan tlen itoka  Kapuskasing, tlen uejka nokauaya kampa nichantiya.

Ipan 1951, sucursal okimijli tokniuan akin ueliyaj tlajtouayaj francés matlapaleuitij ne Quebec, pampa ompa tlajtouayaj francés niman xmiyekej nemiyaj iteixpantijkauan Jehová. Nejua onikteijli ika ueliskia nias pampa nitlajtouaya francés niman inglés, niman onechtitlankej Rouyn. Ompa xakaj nikixmatiya niman, ijkon ken onipeuj nimechijlia, onajsik ipan kajli kampa onechijlijkej. Ompa kualtsin onechselijkej. Marcel niman nejua melak kuajli otouikakej. Niman oniuejkauj Quebec kanaj naui xiuitl, niman ompa opeuj nitekiti ken precursor especial.

Ijkuak ninemiya Quebec, onechijlijkej maniuiya iTlamachtil Galaad número 26, ne South Lansing (Nueva York). ¡Melak oniyolpak! Onitlan ninomachtia ipan 12 de febrero de 1956 niman onechtitlankej kampa aman kixmatij ken Ghana, b ne África Occidental. San ika, kachtopa ononek nias Canadá niman ijkon nikinpiyas noamauan para ueliskia nias kampa onechtitlankej. Oniknemili ika san seki semanas ompa niuejkauiskia.

San ika, oniuejkauj chikome metstin ne Toronto para manechinmakakan noamauan. Niman yejon metstin oninokauj inchan tokniuan Cripps. Yejuamej kipiayaj se imichpoch akin itoka katka Sheila, niman melak otouelitakej. Ijkuak inikijliskia tla kinekiya nouan nonamiktis, onechinmakakej noamauan. Sheila niman nejua otiknotskej Jehová niman otikijtojkej ika kachtopa niaskia kampa onechtitlankej niman san totlajkuilouiliskiaj niman ijkon sakin tikitaskej tla ueliskia tonamiktiskej. Maski ouijtika otikitakej ijkon tikchiuaskej, sakin otikitakej ika yejon melak otechpaleui.

Oniuejkauj se metstli para najsis Accra, icapital Ghana, niman ononek nias ipan tren, barco niman avión. Opeuj nitekiti ken tlayekanketl ipan distrito, niman nonekiya nias Ghana, Costa de Marfil niman Togolandia (aman kixmatij ken Togo). Sucursal onechmakak se camioneta para  uelis ipan nikistinemis. Nochipa san nejuatsin nikistinemiya niman melak nikuelitaya nikomintlajpalos tokniuan.

Ipan itlamiyan semana niaya ipan uejueyimej tlanechikoltin pampa nechmakayaj tekitl. Ompa xonkatkaj kaltin kampa tikinpiyaj toueyitlanechikoluan, kuakon, tokniuan san kichijchiuayaj se kajli ika bambú niman ikuatipan kitlaliliayaj soyatl niman ijkon xtitonalmikiskiaj. Niman pampa xonkatkaj refrigeradores, tokniuan kinuikayaj yolkamej kampa tikinpiayaj toueyitlanechikoluan niman ijkon ompa kinmiktiskiaj para kintlakualtiskiaj akin yayaj.

Kemantika, ipan uejueyimej tlanechikoltin panouaya tlen melak techuetskitiaya. Sejpa, se misionero, akin itoka Herb Jennings, c kipanoltijtoya se tlamachtijli niman san otikitakej ika se becerro ixpan opanotikis. Yejon becerro xok kimatiya kanon yas niman tokniuj Herb xok kimatiya tlenon kijtos. Sakin, nauimej tokniuan okajsikej yejon becerro niman ijkuak ikuikatoyaj, nochimej akin ompa nemiyaj onomatlaxkalojkej.

Ipan semana, nikteititiaya ipan kalpantsitsintin película tlen itoka La Sociedad del Nuevo Mundo en acción. Nikpilouaya se tlakentli istak ipan ome postes noso ome kojtin. ¡Akin kitayaj película melak kuelitayaj! Sekimej xkeman kitayaj se película. Niman ijkuak kitayaj ipan película ika sekimej noapolaktiayaj, yejuamej melak nomatlaxkalouayaj. Yejon película okinpaleui makitakan ika nochiuiyan nemij tokniuan.

Ipan 1958, ijkuak inikuikaya ome xiuitl ne África, onechnotskej maniuiya ipan ueyi tlanechikojli iuan miyekej países ne Nueva York. Ipan yejon ueyi tlanechikojli noijki okinotskej Sheila, yejua nemiya ken precursora especial ne Quebec. ¡Melak oniyolpak pampa oksejpa onikitak! Tejuamej totlajkuilouiliayaj, niman aman ika yotoitakaj onikijli tla kinekiya nouan nonamiktis, niman yejua okijto ika kema. Onontlajkuilouili tokniuj Knorr d niman oniktlajtolti tla Sheila ueliskia yas Galaad niman sakin kontitlaniskiaj África, niman tokniuj Knorr okijto ika kema. Ijkuak Sheila oajsik Ghana, otonamiktijkej ne Accra ipan 3 de octubre de 1959. Otikmachilijkej ika Jehová yotechteochiujka pampa kachtopa otiknejkej chikauak tiktekichiuiliskej.

Ipan 1961, otechtitlankej Camerún, niman onechijlijkej  manitlapaleui kampa nochijchiuaskia se yenkuik sucursal. Melak miyek tekitl nikpiaya, niman nonekiya miyek niuelis pampa onechtlalijkej ken siervo de sucursal. Ipan 1965, otikmatkej ika Sheila koneuaj katka, niman xueliya tikneltokayaj pampa yejon xtikchiayaj. San ika, ijkuak opeuj melak tipakij pampa tikpiyaskiaj tokoneuj niman opeuj tikitaj kenon uelis tokuepaskej Canadá, opanok tlen melak xkuajli.

Sheila okoneuets, noso, opiluets. Doctor otechijli ika tokoneuj telpokatsin yeskia. Maski yopanok ipantsin 50 xiuitl, xtikilkauaj tlen opanok. Maski melak otoyolkokojkej, otikijtojkej tokauaskej kampa titlapaleuijtoyaj pampa melak tikuelitayaj ompa tinemiskej.

Tokniuan akin chantiyaj Camerún miyekpa kintlaueltokayaj pampa xkinpaleuiayaj políticos. Niman más ouijtika kitayaj ijkuak kitlapejpeniayaj akin tekiuajtiskia ipan yejon país. Niman ipan 13 de mayo de 1970, tekiuajkej xok otechkauilijkej matosentlalikan niman matitenojnotsakan. Okinotlatkitijkej tosucursal tlen melak kualtsin yonokaujkaj niman san makuijli metstli yotiktekitiltijkaj. Se semana sakin, nochimej misioneros akin titlapaleuijtoyaj ipan yejon país otechuajkixtijkej. Melak otechajman tikinkaujteuaskej tokniuan akin melak tikintlasojtlayaj. Tejuamej xtikmatiyaj tlenon inpan panoskia, ika yejon, melak tajmanayaj inpampa.

Otinenkej chikuasen metstin ne sucursal de Francia, niman ompa nikitaya kenon ueliskia tikinpaleuiskej tokniuan akin chantiyaj Camerún. Ipan diciembre, otechtitlankej sucursal de Nigeria, niman desde ompa opeuj noyekanaya tekitl tlen nochiuaya ne Camerún. Tokniuan akin chantiyaj Nigeria melak kuajli otechselijkej niman melak kuajli otomachilijkej ijkuak ompa tinemiyaj.

Ipan 1973, ononek itlaj tiktlapejpeniskej. Sheila melak kualouaya. Ijkuak tinemiyaj ipan se ueyi tlanechikojli ne Nueva York, oixtenchokak niman onechijli: “Xok niueli. Melak yonisiauj, san nikualotok”. Yotiuejkaujkaj 14 xiuitl ne África Occidental niman melak nikuelitaya kenon Sheila nokojtiliaya kuajli kitekichiuilis Jehová. San ika, nikmatstoya ika nonekiya itlaj tikchiuaskej niman ijkon Sheila kuajli manomachili. Kuakon, otitlajtojkej niman otiknotskej Jehová niman otikijtojkej ika tokuepaskej Canadá para ijkon Sheila uelis pajtis. Melak ouijtika otikitakej tiknemiliskej tla xok titlapaleuiskej kampa tinemiyaj niman tokuepaskej tochan. Melak otechajman ijkuak ijkon otikchiujkej.

Ijkuak otajsikej Canadá, onitekit iuan se noamigo akin kinemakaya carros ne Toronto. Otiktlaneujkej se kajli, otikinkoujkej muebles tlen xyenkuikej katkaj niman ijkon xononek totlaneuiskej. Tejuamej tiknekiyaj tinemiskej san ika achijtsin ijkon ken tikuajchiujtiayaj pampa tiknekiyaj oksejpa chikauak tiktekichiuiliskej Jehová ijkuak tiueliskiaj. Xmás ouejkauj ijkuak ouel oksejpa ijkon otikchiujkej.

Opeuj nontlapaleuiya nochi sábados kampa nochijchiujtoya Kajli kampa tikpiyaj Toueyitlanechikol ne Norval (Ontario). Sakin, onechijlijkej tla  uelis nitlayekanas ipan yejon Kajli kampa tikpiyaj Toueyitlanechikol, niman otikselijkej yejon tekitl pampa Sheila xok más kualouaya. Kuakon, ipan junio de 1974, otichantitoj ipan cuarto tlen ompa onkatka. Melak tiyolpakiyaj pampa oksejpa yotipeujkaj chikauak tiktekichiuiliaj Jehová.

Ome xiuitl sakin, onechijlijkej tla ueliskia nitlapaleuis ken tlayekanketl ipan circuito, niman otikselijkej yejon tekitl pampa Sheila xok kualouaya. Kuakon, opeuj tikintlajpalouaj tlanechikoltin tlen onkatkaj ne Manitoba, Canadá. Ompa melak seua katka, san ika, melak kuajli tomachiliayaj pampa tokniuan melak tetlasojtlayaj niman kuajli techseliayaj. Otikasikamatkej ika maski san kanon matiktekichiuilikan Jehová, más ueyi kijtosneki tla tikmakaj hasta kampa tiuelij.

Ijkuak yotiuejkaujkaj ika titlapaleuijtoyaj ipan circuito, otechijlijkej matitlapaleuitij Betel de Canadá, ipan 1978. Sakin, oniuel itlaj tlen xkeman nikilkauas. Onechtlajtlanilijkej manikpanolti se tlamachtijli ika francés tlen uejkauiya se hora uan tlajko ipan se tlanechikojli ne Montreal. Ijkuak onikpanolti, akin onechkakkej xmás okuelkakkej, niman se tokniuj akin tlapaleuiaya ipan Grupo akin Kiyekana Tenojnotsalistli onechnots. Ijkuakon, xnikitaya ika nejua xmás kualtsin nikinpanoltiaya tlamachtiltin. Kuakon, tlen onechijli yejon tokniuj xonikuelkak. Nikmachiliaya ika xiuan ninasikamatiya, onikmachili ika san nechtejteneujtoya niman ika xnechijliaya tlen kuajli onikchiuj. Kuakon, xoniknek nikchiuas tlen onechijli pampa xonikuelitak ika yejua onechijli niman xonikuelkak kenon onechijli.

Seki tonaltin sakin, se tokniuj itech Grupo akin kiyekana Sucursal nouan otlajto. Nejua onikijli ika nikmatstoya ika xkuajli oniknankilijka tokniuj akin onechnots niman onikijli ika xok keman ijkon nikchiuas. Sakin, onikitato yejon tokniuj niman onikijli manechtlapopolui, niman yejua onechtlapopolui. Tlen opanok onechititi itlaj tlen xkeman nikilkauas: melak noneki matiyolyemankej (Prov. 16:18). Miyekpa yonikijli Jehová tlen xkuajli onikchiuj, niman kuajli yonikijto ika xok keman nikualanis tla kemantika oksejpa yakaj nechijlia tlen uelis nechpaleuis.

Inikpiya ipantsin 40 xiuitl nikan Betel de Canadá, niman desde 1985 onechmakakej se kualtsin tekitl: niteuan itech Grupo akin kiyekana Sucursal. Ipan febrero de 2021, nosiuatsin Sheila omik, niman melak niktemoua. Noijki, aman más yopeuj nikualo, san ika, mojmostla chikauak niktekichiuilia Jehová niman nion xnikita kenon panoua tiempo (Ecl. 5:20). Maski miyekpa yonikixnamik tlen xkuajli, más miyekpa yoniyolpak pampa niktekichiuilia toTajtsin. Nochipa oniknek kachtopa niktekichiuilis Jehová, niman chikauak yoniktekichiuili 70 xiuitl. Melak niktlajtlanilia Jehová ika nochimej telpokamej makinekikan makitekichiuilikan, pampa kuajli nikmatstok ika san yejon uelis kichiuas kuajli manemikan niman mayolpakikan.