1. ¿Tlenon okimijli Jesús nauimej tlakamej akin kimajsiyaj michimej, niman tlenon okichiujkej yejuamej?

SEKIMEJ inomachtijkauan Cristo, ken Pedro, Andrés, Santiago niman Juan kimajsiyaj michimej. Kanaj yejuamej melak omojkatlachixkej ijkuak Jesús okimijli: “Xuajuiyan nouan niman nenkintejtemoskej tlakamej para nenkinuikaskej itech Dios”. ¿Tlenon okichiujkej yejuin tlakamej? Biblia kijtoua: “Yejuamej nimantsin okajkej iminmatlau niman iuan oyajkej” (Mat. 4:18-22). Tlen okitlapejpenijkej okinpatili innemilis. Xok kintejtemoskiaj michimej, aman kintejtemoskiaj tlakamej niman ijkon kinmachtiskej itech iTlajtol toTajtsin (Luc. 5:10). Ipan yejuin tonaltin, Jesús kimijlia miyekej tlaltikpakchanejkej akin yolyemankej niman kipatiojkaitaj tlen melauak matenojnotsakan itech iTlajtol toTajtsin (Mat. 28:19, 20, TNM). ¿Tejua yopeuj tikchiua tlen Jesús techijlia?

2. ¿Tleka noneki matikasikamatikan ika melak ueyi kijtosneki ijkuak yakaj kitlapejpenia tenojnotsas, niman tlenon techpaleuis matiktlapejpenikan titenojnotsaskej?

² Kanaj youejkauj ika mitsmachtijtokej Biblia niman aman timotlajtoltia tla iuelis titenojnotsas. ¿Tiknemilia ika xuelis tikchiuas tlen Jesús techijlia? Maka xmajmana. Kanaj ijkon timomachilia pampa tikasikamati ika melak ueyi kijtosneki ijkuak yakaj kitlapejpenia tenojnotsas. Melauak ika Biblia kijtoua ika Pedro niman akin iuan nemiyaj “nimantsin okajkej iminmatlau”. San ika, Pedro niman ikniuj, Andrés, kachtopa kuajli okinemilijkej tlenon kitlapejpeniskiaj. Ikipiaya ipantsin chikuasen metstin ika okixmatkaj Jesús niman yokasikamatkaj ika yejua Mesías katka (Juan 1:35-42). Kanaj tejua noijki melak kuajli yotikixmat Jehová niman Jesús, niman aman tikneki titenojnotsas. San ika, achto tiktlapejpenis yejuin, noneki tikasikamatis  nochi tlen kichiua akin tenojnotsa. ¿Tlenon okichiuj ika Pedro, Andrés niman oksekimej makitlapejpenikan tenojnotsaskej?

3. ¿Tlenon techpaleuis matikchiuakan tlen okijto Jesús?

³ Inomachtijkauan Jesús kuajli kasikamatiyaj tleka nonekiya tenojnotsaskej, kimatstoyaj kenijki tenojnotsaskej, yolchikaujkej katkaj niman nokojtiliayaj kuajli kichiuaskej intekiyo. Nochi yejuin okinpaleui kuajli makinmachtikan oksekimej. Matikitakan kenon uelis tikchiuaskej ken yejuamej.

4. ¿Tleka Pedro kimajsiya michimej?

⁴ Pedro kimajsiya michimej niman ijkon kinmakas ichanejkauan tlen kinpolouaya. San ika, xsan ipampa yejon michajsiya, nesi ika yejua noijki melak kuelitaya itekiyo (Juan 21:3, 9-15). San ika, noijki melak okuelitak kinnojnotsas oksekimej itech toTajtsin. Jehová okipaleui Pedro kuajli makichiua yejuin tekitl (Hech. 2:14, 41).

5. a) Ijkon ken kijtoua Lucas 5:8-11, ¿tleka nomojtiaya Pedro? b) ¿Tlenon techpaleuis tla noijki tomachiliaj ken Pedro?

⁵ Tejuamej tiknekij titenojnotsaskej pampa melak tiktlasojtlaj Jehová. Yejuin tlasojtlalistli tlen tikmachiliaj ipampa uelis techpaleuis matitenojnotsakan maski tikitaskej ika ouijtika yejuin tekitl. Ijkuak Jesús okijli Pedro manochiua inomachtijkauj niman matenojnotsa, noijki okijli: “Maka xmomojti” (xpoua Lucas 5:8-11). Yejuin xkijtosneki tla Pedro kimojtiaya tlen ueliskia ipan nochiuas tla nochiuaya inomachtijkauj Jesús. Ka, yejua san kimachiliaya ika xkinamikiya tekitis iuan Jesús. ¿Tleka? Pampa Jesús kemach yokichiujka se milagro inpampa. Okichiuj makimasikan melak miyekej michimej, niman Pedro melak omojkatlachix. ¿Tejua noijki ijkon timomachilia? ¿Tikmachilia ika ouijtika tikchiuas tlen Jesús kinnauatia nochimej inomachtijkauan? Tla ijkon timomachilia, timitsyolchikauaj xchiua tlen noneki niman ijkon más tiktlasojtlas Jehová, Jesús niman  oksekimej tlaltikpakchanejkej. Ijkon, ika moyojlo tiknekis titenojnotsas (Mat. 22:37, 39; Juan 14:15).

6. Xteneua okseki tlemach tlen techpaleuiya matiknekikan matitenojnotsakan.

⁶ Matikitakan okseki tlemach tlen techpaleuiya matiknekikan titenojnotsaskej. Tejuamej tiknekij ijkin tikchiuaskej pampa Jesús otechnauati: “Xuiyan [...] niman xmachtikan nochi tlakatl para yejuamej no nonomachtijkauan yeskej” (Mat. 28:19, 20). Noijki, pampa tikitaj ika miyekej tlaltikpakchanejkej najmanaj niman nemij “ken on borreguitos yejuan xkipiyaj intlajpixkau” niman noneki yakaj makinmachti itech iTekiuajyo toTajtsin (Mat. 9:36). Jehová kineki ika nochimej tlaltikpakchanejkej makimatikan tlen melauak niman mamakisakan (1 Tim. 2:4).

7. Ken kijtoua Romanos 10:13-15, ¿tleka melak noneki matitenojnotsakan?

⁷ Noijki uelis mitspaleuis xneki xtenojnotsa tla tiknemilia kenon melak tepaleui yejuin tekitl tlen Jesús otechnauati. Akin michajsij kintejtemouaj michimej niman ijkon kinnemakaskej noso kinkuaskej, san ika, tejuamej tikintejtemouaj tlaltikpakchanejkej niman ijkon tikinpaleuiskej mamakisakan (xpoua Romanos 10:13-15; 1 Tim. 4:16).

8, 9. ¿Tlenon noneki kimatis se akin kimajsi michimej, niman tleka?

⁸ Ipan itonaluan Jesús, israelitas akin michajsiyaj nonekiya kimatiskej katlejua michimej ueliskiaj kimajsiskej (Lev. 11:9-12). Noijki nonekiya kimatiskej kanon ueliskia kinnextiskej. Michimej nemij kampa tlauelitaj niman kampa onka miyek tlakuajli. ¿Onka se hora ijkuak michajsikej uelis kinnextiskej on michimej? Matitlanemilikan itech tlen okijto se tokniuj akin chanti ipan se isla tlen onka ipan Pacífico. Yejua nonojnotstoya iuan se misionero niman okijli tla kinekiya iuan onmichajsis. Tokniuj misionero okijli: “Totaskej mostla a las nueve ika kualkan”. San ika, tokniuj okinankili: “Nonekis tiaskej ijkuak uelis tikinnextiskej michimej, xijkuak tejuamej tiknekiskej”.

⁹ Noijki ijkon, tokniuan akin nemiyaj ipan kachtopa siglo tenojnotsayaj ijkuak kimatiyaj ika kinnextiskej akin kinnojnotsaskej, niman yayaj kampa kimatstoyaj ika ompa kinnextiskiaj. Inomachtijkauan Jesús tenojnotsayaj ipan teopan, ipan sinagogas, techajchan niman ipan mercado (Hech. 5:42; 17:17; 18:4). Tejuamej noijki noneki kuajli tikmatiskej tlenon kineltokaj akin tikinnojnotsaj. Noneki tokojtiliskej tiaskej kampa uelis tikinnextiskej tlaltikpakchanejkej niman tiaskej ijkuak ompa nemiskej (1 Cor. 9:19-23).

10. ¿Tlenon techmaka ikalpan Jehová?

¹⁰ Akin kimajsij michimej noneki kipiyaskej nochi tlen kitekitiltiskej niman ijkon kuajli michajsiskej, niman noijki noneki kimatstoskej kenijki kikuiskej nochi yejon. Tejuamej noijki noneki ijkon tikchiuaskej. Jesús kuajli okimijli inomachtijkauan kenon tenojnotsaskej. Okimijli tlenon kitkiskiaj, kanon tenojnotsaskiaj niman tlenon kijtoskiaj (Mat. 10:5-7; Luc. 10:1-11). Aman, ikalpan Jehová techmaka tlen ika titemachtiaj niman techititia kenon uelis tikintekitiltiskej. Nochi yejuin techpaleuiya kuajli matitenojnotsakan niman matitemachtikan. * Ken techmachtia ikalpan Jehová techpaleuiya kuajli matikchiuakan totekiyo tlen yotechmakak Jesús (2 Tim. 2:15).

11. ¿Tleka akin titenojnotsaj noneki tiyolchikaujkej yeskej?

¹¹ Akin kimajsij michimej noneki yolchikaujkej yeskej, pampa uelis kixnamikiskej tlen ouijtika  ipan mar. Yejuamej kemantika noneki tekitiskej ika tlayoua niman kemantika san totoka peua ajakakiyaui. Akin titenojnotsaj noijki noneki tiyolchikaujkej yeskej. Ijkuak tipeuaj titenojnotsaj niman tikteijliaj ika tiiteixpantijkauan Jehová, kanaj noijki peuas tikixnamikiskej tlen ouijtika, tlen yeskiaj kentla ajakakiyaujtin. Kanaj peuas techtlauelitaskej tochanejkauan, techpijpinaujtiskej toamigos niman kanaj miyekej xkinekiskej techkakiskej ijkuak tikinnojnotsaskej. San ika, nochi yejuin xtechmojkatlachialtia, pampa Jesús okijto ika kintitlaniskia inomachtijkauan “intsajlan on xkuajkualtin tlakamej” (Mat. 10:16).

12. Ijkon ken kijtoua Josué 1:7-9, ¿tlenon techpaleuis matiyolchikaujkej?

¹² ¿Tlenon mitspaleuis xmochiua yolchikauak? Kachtopa, kuajli xmatsto ika Jesús ok kiyekantika yejuin tekitl desde ne iluikak (Juan 16:33; Apoc. 14:14-16). Sakin, xchiua tlen noneki niman ijkon más kuajli tikneltokas ika Jehová mitstlajpiyas, ijkon ken yejua yokijto (Mat. 6:32-34). Tla chikauak tikpiya motlaneltokil, más tiyolchikauak yes. Pedro niman oksekimej okiteititijkej ika chikauak kipiayaj intlaneltokil ijkuak okikaujkej intekiyo niman ijkon oyajkej iuan Jesús. Tejua noijki otikteititi ika chikauak motlaneltokil ijkuak otikimijli moamigos niman mochanejkauan ika yopeuj timomachtia Biblia imiuan iteixpantijkauan Jehová niman ika yopeuj tiauj ipan tlanechikoltin. Niman kuajli tikmatstokej ika yotikpatlak monemilis niman ijkon tiktlakamatis Jehová. Kuajli nesi ika tejua titlaneltoka itech Jehová niman ika tiyolchikauak. Tla timokojtilia tiyolchikauak yes, uelis tikneltokas  ika Jehová mouan nemis maski san kanon tias (xpoua Josué 1:7-9).

13. ¿Tlenon okseki tlemach mitspaleuis xmochiua yolchikauak, niman kenon mitspaleuis yejon?

¹³ ¿Tlenon okseki tlemach mitspaleuis xmochiua yolchikauak? Xtlajtlanili Jehová mamitsyolchikaua (Hech. 4:29, 31). Yejua kikakis moteoyouj niman xkeman mitskauas. Yejua nochipa kinektos mitspaleuis. Noijki xnemili kenon Jehová yeuejkaui okinmakixti itekipanojkauan. Niman noijki xnemili kenon mitspaleuiya xtlaxiko ijkuak tikixnamiki tlen ouijtika niman kenon yomitspaleui xpatla monemilis. Tla yejua okipaleui ikalpan makipanaui mar Rojo, kuajli xmatsto ika uelis mitspaleuis xmochiua inomachtijkauj Cristo (Éx. 14:13). Uelis titlaneltokas itech Jehová ijkon ken salmista akin okijto: “ToTEKO nouan nemi. Yejua ika xninomojtia. ¿Tlinon uelis nechiuilis yakaj tlakatl?” (Sal. 118:6).

14. ¿Tlenon tiueli itech tlen ipan onochiuj Masae niman Tomoyo?

¹⁴ Tla tiknemilia kenon Jehová yokinpaleui oksekimej tokniuan manochiuakan yolchikaujkej, noijki mitspaleuis xmochiua yolchikauak. Matikitakan tlenon ipan onochiuj se tokniuj siuatl akin itoka Masae. Yejua melak pinauiya niman kimachiliaya ika xkeman ueliskia tenojnotsas. Ijkuak kinemiliaya ika nonekiya tlajtos imiuan oksekimej, kimachiliaya kentla tla nonekiskia tlejkos ipan se tepetl tlen melak ueyi. Kuakon onokojtili kichiuas tlen nonekiya niman ijkon más kitlasojtlas Jehová niman kintlasojtlas oksekimej. Okasikamat ika tinemij ipan itlamiyan tonaltin niman ika melak noneki matitenojnotsakan. Kuakon, okitlajtlanili toTajtsin makipaleui más makineki matenojnotsa. Yejon okipaleui maka sa manomojti tenojnotsas niman hasta onochiuj precursora regular. Jehová noijki uelis kinpaleuis mayolchikaujkej akin kemach yopeujkej tenojnotsaj. Matikitakan tlenon ipan onochiuj se tokniuj siuatl akin itoka Tomoyo. Ijkuak opeuj tenojnotsa techajchan, kampa kachtopa oontlatetepini ouajkis se siuatl akin okijli: “¡Xnikneki nitlajtos imiuan iteixpantijkauan Jehová!”, niman ixko okitsauk puerta. Tomoyo xonoyolkoko, niman okijli akin iuan tenojnotstinemiya: “¿Otikitak? Xitlaj onikijto niman yejon siuatl ikimatstoya ika nejua niiteixpantijkauj Jehová. ¡Melak niyolpaki!”. Aman Tomoyo tlapaleuiya ken precursora regular.

15. ¿Tlenon kijtosneki kuajli tikchiuaskej totekiyo, niman tleka noneki ijkon matikchiuakan?

¹⁵ Se michajsiketl akin kuajli kichiua itekiyo nokojtilia kichiuas tlen noneki maski ijkuak ouijtika yes. Kema, yejua noneki nokojtilis san kualkantsin nokuiteuas, nokauas ipan itekiyo hasta ijkuak kuajli tlamis niman xkikajkauas ika kimajsitos michimej maski melak makiyaujto noso mapanoto tlen ouijtika. Tejuamej akin tikchiuaj ken Cristo noijki noneki tokojtiliskej tikchiuaskej tlen noneki niman ijkon uelis titlaxikoskej hasta ijkuak tlamis totekiyo (Mat. 10:22).

16. ¿Tlenon techpaleuis kuajli matikchiuakan totekiyo?

¹⁶ Tinochimej ouijtika tikitaj kuajli tikchiuaskej totekiyo, san tikuelitaj tikchiuaskej tlen nion xouijtika. Tla tiknekij kuajli tikchiuaskej totekiyo, noneki toyekanaskej ken kinamiki. Kuajli nesi ika noneki yakaj matechpaleui tla tiknekij tikchiuaskej tlen techtekiyomaka. Niman Jehová techpaleuiya itechkopa iespíritu santo (Gál. 5:22, 23).

17. Itech tlen kijtoua 1 Corintios 9:25-27, ¿tlenon okijto Pablo ika nonekiya kichiuas niman ijkon kuajli kichiuas itekiyo?

¹⁷ Apóstol Pablo kuajli kichiuaya itekiyo, san ika, yejua okijto ika nonekiya kitlajyouiltis itlalnakayo niman ijkon kichiuas tlen kuajli  (xpoua 1 Corintios 9:25-27, TNM). * Yejua okimijli inomachtijkauan Cristo: “Xchiuakan ken kitocaroua, niman maka sa kenijki xchiuakan” (1 Cor. 14:40). Kuakon, noneki tokojtiliskej niman ijkon nochipa tiktekichiuiliskej Jehová, nochipa titenojnotsaskej niman titemachtiskej (Hech. 2:46).

18. ¿Tlenon noneki tikchiuaskej tla tiknekij ika Jehová mayolpaki ipampa totekiyo?

¹⁸ Se michajsiketl kijtoua ika kuajli kichiua itekiyo ijkuak kimajsi miyekej michimej, san ika, tejuamej akin titenojnotsaj xtikijtouaj ika kuajli otikchiujkej totekiyo san pampa melak miyekej yotikinmachtijkej (Luc. 8:11-15). Tla nochipa tokojtiliaj titenojnotsaskej niman titemachtiskej, Jehová yolpakis ipampa totekiyo. ¿Tleka? Pampa tiktlakamatstokej yejua niman noijki iKonetsin (Mar. 13:10; Hech. 5:28, 29).

19, 20. ¿Tleka tokojtiliaj chikauak titenojnotsaskej ipan yejuin tonaltin?

¹⁹ Ipan seki países, san seki metstin notekauilia makimajsikan michimej. Ijkuak on michajsikej kimatij ika itlamiskej yejon metstin, yejuamej más chikauak tekitij. Tejuamej noijki tokojtiliaj chikauak titenojnotsaskej ipan yejuin tonaltin pampa sa achijtsin poliui ijkuak kipopoloskej tlen xkuajli. Xok onka miyek tiempo niman ijkon tikinpaleuiskej oksekimej mamakisakan. Maka xnemili ika san uelis titlapaleuis ipan yejuin tekitl hasta ijkuak xok tikixnamikis itlaj tlen xkuajli (Ecl. 11:4).

²⁰ Ika yejon, noneki ika aman xkasikamati tleka noneki titenojnotsas niman kenijki titenojnotsas. Xmokojtili tiyolchikauak yes niman noijki xmokojtili kuajli tikchiuas motekiyo. Xtekichiuili Jehová imiuan on 8 millones tokniuan akin chikauak tenojnotsaj ipan nochi tlaltikpaktli. Tla ijkon tikchiua, tikpiyas “on pakilistli yejuan toTEKO techmaka” (Neh. 8:10). Chikauak xtenojnotsto hasta ijkuak Jehová kijtos ika xok nochiuas yejuin tekitl. Ipan okse tlamachtijli, tikitaskej yeyi tlemach tlen techpaleuis nochipa matiknektokan titenojnotsaskej itech iTekiuajyo toTajtsin.