YEUEJKAUI, ipan kalpan Israel melak kinuelitayaj tlakuikaltin. Ipan Biblia miyekpa noteneuaj sekimej akin ueliyaj tlakuikayaj noso tlatsotsonayaj, niman melak miyek tlakuikaltin ompa tikinnextiaj. Nochi tlen onka ipan Salmos, El Cantar de los Cantares niman Lamentaciones onoijkuilojkej para makintlakuikakan. Amoxtli Music in Biblical Life (Ken yeuejkaui tlakuikayaj) kijtoua ika tlaltikpakchanejkej mojmostla tlakuikayaj.

Tlakuikaltin tlen kiteititiayaj kenon nomachiliayaj. Israelitas tlakuikayaj niman ijkon kiteititiayaj kenon nomachiliayaj (Is. 30:29). Ijkuak kitlaliayaj se yenkuik tekiuaj, ijkuak iluipanouayaj noso ijkuak tetlaniyaj ipan guerra, siuamej ika inyojlo tlakuikayaj, nijtotiayaj niman kitsotsonayaj pandereta (Juec. 11:34; 1 Sam. 18:​6, 7; 1 Rey. 1:​39, 40). Ijkuak yakaj mikiya, israelitas kintlakuikayaj ajmankatlakuikaltin niman ijkon kiteititiskej ika melak noyolkokouayaj (2 Crón. 35:25). Se amoxtli kijtoua ika hebreos melak kinuelitayaj tlakuikaltin (Cyclopedia, de McClintock y Strong).

Tlakuikaltin kampa chantiya tekiuaj. Tekiuajkej ipan Israel melak kinuelitayaj tlakuikaltin. Tekiuaj Saúl okitlapejpeni David niman ijkon makitsotsonili arpa (1 Sam. 16:​18, 23). Ijkuak David tekiuaj katka, okinchijchiuj yenkuikej tlen ika titlatsotsonas, yenkuikej tlakuikaltin niman okitlali se grupo akin tlatsotsonaya, niman sakin yejuin grupo otlatsotsonkej ipan iteopan Jehová (2 Crón. 7:6; Amós 6:5). Noijki nemiyaj tlakamej niman siuamej akin kitlakuikiliayaj tekiuaj Salomón kampa chantiya (Ecl. 2:8).

Tlakuikaltin tlen ika kiueyichiuayaj Jehová. Ne Jerusalén, ipan teopan nemiyaj 4,000 tlatsotsonkej, sekimej tlapitskej katkaj, sekimej kintsotsonayaj címbalos, arpas niman okseki tlen notsotsonayaj ika cuerda (1 Crón. 23:5; 2 Crón. 5:12). San ika, xsan yejuamej tlatsotsonayaj para kiueyichiuaskej Jehová. Ijkuak israelitas oniluipanouayaj Jerusalén, kintlakuikatiayaj tlakuikaltin tlen onkatij ipan Salmos 120-134. Niman seki amoxtin tlen okimijkuilojkej judíos kijtouaj ika tlakuikayaj Hallel a ijkuak kipanoltiayaj Pascua.

Ipan yejuin tonaltin, ikalpan Jehová noijki melak kuelitaj tlakuikaskej (Sant. 5:13). Titlakuikaj niman ijkon tikueyichiuaskej Jehová (Efes. 5:19). Ijkuak titlakuikaj imiuan tokniuan, toyolchikauaj niman techpaleuiya matitlaxikokan ijkuak itlaj tikixnamikij (Hech. 16:25; Col. 3:16). Tlakuikaltin techpaleuiyaj matikteititikan ika titlaneltokaj itech Jehová niman ika melak tiktlasojtlaj.