1. ¿Tleka itekipanojkauan toTajtsin yolchikaujkej katkaj?

 BIBLIA miyekpa kijtoua ika itekipanojkauan toTajtsin melak yolchikaujkej. San ika, xnochipa ijkon onomachilijkej. Matitlajtokan itech tekiuaj David, yejua kemantika nomachiliaya yolchikauak niman melak kojtik ken se tepetl. San ika, kemantika xokimachili tla yolchikauak niman nomojtiaya (Sal. 30:7). Noijki, Sansón melak kojtik katka ijkuak Jehová kimakaya iespíritu. San ika, noijki kasikamatiya ika tla toTajtsin xkimakaya ikojtilis yejua nochiuaya “sano ijki ken oksekimej tlakamej” (Juec. 14:​5, 6; 16:17). ¿Tleka itekipanojkauan toTajtsin yolchikaujkej katkaj? Pampa Jehová kinpaleuiaya.

2. ¿Tlenon okijtosnek Pablo ijkuak okijto: “Ijkuak xnikojtik, ijkuakon más nikojtik”? (2 Corintios 12:​9, 10, TNM).

² Apóstol Pablo okasikamat ika nonekiya Jehová makipaleui (xpoua 2 Corintios 12:​9, 10, TNM). b Ijkon ken timiyekej, Pablo noijki kemantika okualok (Gál. 4:​13, 14). Noijki, kemantika ouijtika kitaya kichiuas tlen kuajli (Rom. 7:​18, 19). Niman kemantika melak najmanaya niman kimachiliaya ika ueliskia kimiktiskej (2 Cor. 1:​8, 9). Maski ijkon, yejua okijto: “Pampa, ijkuak xnikojtik, ijkuakon más nikojtik”. ¿Tlenon okijtosnek? Ika yejua kimachiliaya ika oksejpa kojtik pampa Jehová kipaleuiaya.

3. ¿Tlenon tiknankiliskej ipan yejuin tlamachtijli?

 ³ Jehová yokijto ika noijki techkojtilis (1 Ped. 5:10). San ika, tejuamej noijki noneki itlaj tikchiuaskej. Matikonteneuakan yejuin: se carro xsan noneki kipiyas se kuajli motor, noijki akin tlanejnemiltia noneki kipachouilis acelerador niman ijkon manejnemi yejon carro. Noijki, tejuamej uelis itlaj tikchiuaskej para Jehová matechpaleui. ¿Tlenon techmaka Jehová para matikojtitokan? ¿Tlenon noneki tikchiuaskej tla tiknekij matechpaleui nochi yejuin? Tla tiknekij tikmatiskej yejon, matikitakan kenon Jehová okiyolchikauj teotlajtoketl Jonás, María inan Jesús niman apóstol Pablo. Noijki tikitaskej kenon Jehová kinyolchikaua itekipanojkauan ipan yejuin tonaltin.

4. ¿Tlenon uelis tikchiuaskej tla tiknekij Jehová matechkojtili?

⁴ Tejuamej uelis tikojtitoskej tla tikchiuiliaj teoyotl toTajtsin. Yejua kinnankilia toteoyouan ijkuak techmaka “on ueyi poder yejuan [ . . . ] ualeua itech Dios” (2 Cor. 4:7). Noijki, melak techpaleuis tla tikamapouaj iTlajtol niman itech titlanemiliaj (Sal. 86:11). Tlen Jehová techijlia ipan Biblia “kipiya poder” (Heb. 4:12). Yejua ika, tla tiknotsa Jehová niman tikamapoua iTlajtol, mitspaleuis xtlaxiko, xtekichiuili ika nochi moyojlo noso xchiua se tekitl tlen ouijtika tikita. Matikitakan kenon Jehová okikojtili teotlajtoketl Jonás.

5. ¿Tleka nonekiya makikojtilikan Jonás?

⁵ Jonás kinekiya makiyolchikauakan. Jehová yokimakaka se tekitl. San ika, pampa melak nomojtiaya, yejua ocholojteuj niman okajsik se barco tlen oksekan okuikak. Pampa ijkon okichiuj, Jonás niman nochimej akin yayaj ipan barco hasta imikiyaj ipampa se ueyi ajakakiyaujtli. Ijkuak akin yayaj ipan barco okontlajkalkej ijtik mar, se ueyi michin okitolo. ¿Kenon onomachili Jonás? ¿Kanaj okinemili ika ompa mikiskia? ¿Okinemili ika Jehová yokikaujka? Kuajli tikmatstokej ika melak onajman.

6. ¿Tlenon okipaleui Jonás matlaxiko ijkuak iselti nemiya ijtik ueyi michin? (Jonás 2:​1, 2, 7).

⁶ ¿Tlenon okichiuj Jonás niman ijkon tlaxikos ijkuak san iselti nemiya ijtik se ueyi michin? Okichiuili teoyotl Jehová (xpoua Jonás 2:​1, 2, 7). Maski yejua xokitlakamatka toTajtsin, Jonás kimatstoya ika kikakiskia iteoyouj pampa yonoyolkuepka. Noijki, otlanemili itech tlen kijtoua iTlajtol toTajtsin. ¿Kenon tikmatij? Pampa ipan iteoyouj, tlen onka ipan Jonás capítulo 2, okintekitilti miyek tlajtoltin tlen uajlauej ipan salmos (uelis tikitas Jonás 2:​2, 5 niman Salmo 69:1; 86:7). Kuajli nesi ika Jonás kimixmatiya yejuin tlaxeloltin. Niman pampa intech otlanemili ijkuak okixnamik tlen ouijtika, kuajli okasikamat ika Jehová kipaleuiskia. Sakin, ijkuak michin okikauato ipan tlajli, oksejpa ouel okichiuj yejon tekitl tlen toTajtsin yokimakaka (Jon. 2:10–3:4).

7, 8. ¿Tlenon okipaleui tokniuj Zhiming ijkuak kixnamiktoya tlen ouijtika?

⁷ Tlen ipan onochiuj Jonás techpaleuiya ijkuak tikixnamikij tlen ouijtika. Matitlanemilikan itech tokniuj Zhiming, c akin ualeua Taiwán. Yejua melak kualo niman noijki ichanejkauan kitlauelitaj pampa kitekichiuilia Jehová. ¿Tlenon kipaleuiya tokniuj matlaxiko? Kinotsa Jehová niman nomachtia. Yejua kijtoua: “Kemantika, ijkuak nikixnamiki tlen ouijtika melak ninajmana niman xueli ninomachtia”. San ika, yejua xnosiaujkaua. Tokniuj noijki kijtoua: “Kachtopa niknotsa  Jehová, sakin nikinnotlalilia audífonos niman nikinkaki seki tlakuikaltin tlen tikintekitiltiaj ipan totlanechikoluan. Kemantika san yoliktsin ninokuikatia, niman yejon nechyolseuiya. Niman sakin peua ninomachtia”.

⁸ Tlen Zhiming iselti yonomachti melak yokipaleui makojtito niman matlaxiko. Sejpatipan, ijkuak pajtitoya ipampa se operación tlen okichiuilijkaj, enfermera okijli ika pampa xmiyek yestli kipiaya, nonekiya kitlaliliskej yestli. San ika, tokniuj Zhiming yokipoujka tlen ipan onochiuj se tokniuj siuatl akin noijki okichiuilijkaj operación tlen yejua yokichiuilijkaj. Yejuin tokniuj siuatl más xmiyek yestli kipiaya, san ika, xokinek makitlalilikan niman kuajli opajtik. Yejuin tlen okipouj tokniuj Zhiming okipaleui mayolmelajkanemi.

9. ¿Tlenon uelis tikchiuas tla itlaj tikixnamiktika niman tikmati ika xok titlaxikoua? (Noijki xkimita tlaixkopinaltin).

⁹ Ijkuak itlaj tikixnamiki, ¿melak timajmana niman ouijtika tikita tiknotsas toTajtsin? ¿Ouijtika tikita timomachtis? Xkilnamiki ika Jehová mitsasikamati niman kuajli kimatstika tlenon tikixnamiktok. Ika yejon, ijkuak tiknotsas niman xmiyek tikijtos kuajli xmatsto ika yejua mitsmakas tlen mitspoloua (Efes. 3:20). Tla tikualo noso melak timajmana niman ouijtika tikita timomachtis, melak kuajli tla tikinkaki grabaciones itech Biblia noso itech toamatlajkuiloluan. Noijki uelis mitspaleuis tla tijkaki se tlakuikajli noso tikita se video tlen onka ipan jw.org. Ijkuak tiknotsa Jehová niman tikita kenon mitsnankilia ipan Biblia noso itech itlaj okse tlen yejua techmaka, kentla tikijlitoskia: “Nimitstlajtlanilia xnechpaleui”.

10. ¿Kenon techpaleuiyaj tokniuan?

¹⁰ Jehová uelis kintekitiltis tokniuan niman ijkon matechpaleuikan. Ijkuak itlaj tikixnamiktoskej noso tikmachiliskej ika xuelis tikchiuaskej tlen yotechnauatijkej, yejuamej uelis techyoltlaliskej (Col. 4:​10, 11). Ijkuak onka ajmantli, ijkuakon más tiknekij matechpaleuikan akin iuan touikaj (Prov. 17:17). Tla xok tikojtikej, tokniuan uelis techpaleuiskej ika tlen techpoloua, uelis techyolchikauaskej niman noijki uelis techpaleuiskej  nochipa matiktekichiuilikan Jehová. Matikitakan kenon okipaleuijkej María, inan Jesús.

11. ¿Tleka nonekiya makipaleuikan María?

¹¹ María nonekiya makipaleuikan niman ijkon ueliskia kichiuas tlen Jehová kineki. Yejua kanaj melak onomojti ijkuak ángel Gabriel okijli tlen panoskia. Ika koneuajtiskia maski xinonamiktiaya. Niman maski María xkeman kiskaltiaya se konetsintli, aman kiskaltiskia akin yeskia Mesías. María noijki xkeman notekaya iuan se tlakatl, niman aman nonekiya kijlis José, akin iuan nonamiktiskia, ika ikoneuaj katka (Luc. 1:​26-33).

12. Ken kijtoua Lucas 1:​39-45, ¿kenon okipaleuijkej María?

¹² María onopaleui intech oksekimej niman ijkon kichiuas tlen toTajtsin yokijlika. Kachtopa, okitlajtlanili ángel Gabriel okseki makijli itech tlen Jehová yokinauatijka (Luc. 1:34). Sakin, uejka oyaj “ipan on tepemej” niman ijkon kontlajpalos ichanejkauj, Elisabet. ¡Niman melak kuajli ika okitlajpaloto! Elisabet melak oyolpak ipampa tlen okijli María, niman ika iespíritu toTajtsin, okijto se kualtsin teotlajtojli itech konetsintli tlen kipiyaskia María (xpoua Lucas 1:​39-45). Ika yejon, María okijto ika Jehová “okiteititij ipoder ikan on tlen okichiu” (Luc. 1:​46-51). Jehová okitekitilti ángel Gabriel niman Elisabet niman ijkon makiyolchikauakan María.

13. ¿Tlenon opanok ijkuak Dasurí okintlajtlanili tokniuan makipaleuikan?

¹³ Ijkon ken María, oksekimej tokniuan noijki uelis mitsyolchikauaskej. Matikitakan tlen ipan onochiuj se tokniuj de Bolivia akin itoka Dasurí. Yejua okijlikej ika itaj kipiaya se kokolistli tlen kimiktiskia niman okuikakej hospital. Dasurí kinekiya kuajli kitlajpiyas itaj (1 Tim. 5:4). San ika, nonekiya oksekimej makipaleuikan niman ijkon kuajli kichiuas yejuin tekitl. Yejua kijtoua: “Miyekpa nikmachiliaya ika xok nitlaxikouaya”. Yejua kachtopa xokitlajtlan makipaleuikan. ¿Tleka? Dasurí kijtoua: “Xniknekiya nikintekiyomakas tokniuan. Nejua nikijtouaya: ‘Jehová yejua akin nechpaleuis, san ika, sakin onikitak ika san noselti niknekiya nikixnamikis tlen nopan nochiujtoya’” (Prov. 18:1). Dasurí okintlajkuilouili iamigos niman okimijli tlenon kixnamiktoya. Yejua kijtoua: “Melak nikintlasojkamachilia yejuin tokniuan pampa onechpaleuijkej niman onechyolchikaujkej. Nechuajkuiliayaj tlakuajli ipan hospital niman nechyolchikauayaj ika tlaxeloltin tlen uajlauej ipan Biblia. Xok nikmachiliaya tla noselti ninemiya. Nikita ika tinemij ipan se ueyi familia akin melak kinekij techpaleuiskej, akin kinekij touan chokaskej niman touan nemiskej”.

14. ¿Tleka noneki tokauiliskej matechpaleuikan tlayekankej?

¹⁴ Jehová noijki kintekitiltia tlayekankej niman ijkon techkojtilis. Yejuamej ken tetlayokoliltin tlen techinmaka niman ijkon matechyolchikauakan niman matechyolseuikan (Is. 32:​1, 2). Kuakon, imiuan xtlajto ijkuak itlaj mitsajmana niman xmokauili mamitspaleuikan. Jehová kintekitiltia niman ijkon techyolchikauas.

15. ¿Tlenon tikchiaj mapano ika tlayekapan akin tikchiuaj ken Cristo?

¹⁵ Tlen kijtoua Biblia ika panos ika tlayekapan kichiua matikojtitokan (Rom. 4:​3, 18-20). Tinochimej akin tikchiuaj ken Cristo tikchiaj nochipa tinemiskej ipan yejuin tlaltikpaktli. Yejuin tlen tikchiaj mapano techpaleuiya matikxikokan tlen xkuajli topan nochiua, matitenojnotsakan niman kuajli matikchiuakan totekiyo ipan tlanechikojli  (1 Tes. 1:3). Matikitakan kenon tlen kichiaya apóstol Pablo okipaleui matlaxiko.

16. ¿Tleka nonekiya makiyolchikauakan apóstol Pablo?

¹⁶ Ipan carta tlen okimijkuilouili corintios okijto ika nomachiliaya kentla se kontli tlachijchiujtli ika sokitl. Okijto ika yokitlajyouiltijkaj, yokitlaueltokakaj niman ika kemantika xok kimatiya tlenon kichiuas. Noijki okijto ika okpa hasta imikiya (2 Cor. 4:​8-10). Yejua okijkuilo nochi yejuin ijkuak ika yexpa kintlajpalojtinemiya tlanechikoltin. Kanaj ijkuakon xkimatiya ika kixnamikiskia itlaj tlen más ouijtika. Sakin, sekimej okixnamijkej, okajsikej, iamimiktoya niman noijki okitsajkej. Yejua ika, apóstol Pablo kinekiya makiyolchikauakan.

17. Ken kijtoua 2 Corintios 4:​16-18, ¿tlenon okipaleui apóstol Pablo matlaxiko?

¹⁷ Apóstol Pablo otlaxiko pampa tlanemiliaya itech tlen kiseliskia ika tlayekapan (xpoua 2 Corintios 4:​16-18). Okimijli tokniuan akin chantiyaj Corinto ika maski itlalnakayo tlantiaya, itlaneltok más chikaujtiaya. Otlanemili itech tlen kiseliskia ijkuak yoliuiskia ne iluikak. Yejua kitaya ika yejuin “más sanoyej ueyi kijtosneki”. Yejua ika, nokojtiliaya kixikos maski san tlenon kixnamikiya. Pablo otlanemili itech tlen kiseliskia ika tlayekapan, ika yejon, itlaneltokil más chikaujtiaya.

18. ¿Tlenon kipaleuiya Tíjomir niman ichanejkauan?

¹⁸ Se tokniuj akin itoka Tíjomir niman chanti Bulgaria kijtoua ika tlen kichia ika tlayekapan yejon tlen kipaleuiya. Ikipiya seki xiujtin ika ikniuj akin más pitentsin, Zdravko, omik ipan se accidente. Tíjomir melak onoyolkoko. ¿Tlenon okipaleui yejua niman ichanejkauan niman ijkon matlaxikokan? Yejuamej tlanemiliaj itech kenon yes ijkuak Jehová teyolitis. Yejua kijtoua: “Titlajtlajtouaj itech kanon tikseliskej Zdravko, tlenon tikualtiskej, akinomej tikinnotsaskej ijkuak tikseliskej niman tlenon tikijliskej itech tlen opanok itlamiyan tonaltin”. Tíjomir kijtoua ika pampa yejua niman ichanejkauan tlanemiliaj itech tlen kichiaj  ika tlayekapan yejon kinpaleuiya matlaxikojtokan niman noijki sa makichiatokan tonajli ijkuak Jehová kiyolitis ikniuj.

19. ¿Tlenon uelis tikchiuas niman ijkon más tikneltokas ika yemelak nochiuas tlen tikchia? (Noijki xkita tlaixkopinajli).

¹⁹ ¿Tlenon uelis tikchiuas niman ijkon más tikneltokas ika yemelak nochiuas tlen tikchia? Tla tikchia nochipa tinemis ipan tlaltikpaktli, xpoua kampa Biblia tlajtoua itech xochitlalpan niman xnemili ika iompa tinemi (Is. 25:8; 32:​16-18). Xkonnemili kenon tinemiskej ipan yenkuik tlaltikpaktli. ¿Ompa timoita? ¿Akinon tikita? ¿Tlenon tijkaki? ¿Tlenon tikmachilia? Tlaixkopinaltin tlen uajlauej ipan toamatlajkuiloluan mitspaleuiskej xnemili kenon tinemiskej ipan xochitlalpan. Noijki uelis tikimitas yejuin videos: Sajnoye tipakis, Melak nisiuj noso Sa nikchiatika yejon tonajli. Uelis tikxikoskej nochi tlen tikixnamikij tla nochipa tikilnamikij kenon tinemiskej ipan yenkuik tlaltikpaktli (2 Cor. 4:17). Tlen Jehová yokijto kichiuas topampa ika tlayekapan techkojtilis.

20. ¿Tlenon techpaleuis matikojtitokan?

²⁰ “Ikan itlapaleuil toDios titetlaniskej” maski tikmachiliskej ika xok tikojtikej (Sal. 108:13). Jehová yotechmakak nochi tlen noneki niman ijkon matikojtitokan. Ika yejon, ijkuak ouijtika tikitaskej tikchiuaskej se tekitl, tikxikoskej itlaj tlen ouijtika noso tiktekichiuilijtoskej toTajtsin ika pakilistli, matiknotsakan ika nochi toyojlo niman matomachtikan iTlajtol niman ijkon matechyekana. Noijki, matijkauilikan ika oksekimej tokniuan matechpaleuikan niman matitlanemilijtokan itech tlen tikseliskej ika tlayekapan. Ijkon Jehová “ikan nochi iueyi poder” techpaleuis matikxikokan “nochi tlajtlamach ikan miyek ijyouilistli niman pakilistli” (Col. 1:11).