1, 2. a) ¿Tleka apóstol Pablo okijto ika “on tetlajsojtlalistli yejua más ueyi kijtosneki”? b) ¿Tlenon tiknankiliskej?

 SAKIN ika apóstol Pablo otlajto itech “tlaneltokalistli, tlamachalistli niman tetlajsojtlalistli”, ijkuak otlamito okijto: “On tetlajsojtlalistli yejua más ueyi kijtosneki” (1 Cor. 13:13). ¿Tleka ijkon okijto? Pampa ika tlayekapan xok nonekis tikneltokaskej tla toTajtsin kikuepas tlaltikpaktli se xochitlalpan, pampa ijkuakon yonochiuj tlen tikchiayaj. San ika, nochipa nonekis tiktlasojtlaskej Jehová niman tlaltikpakchanejkej. Niman yejon tlasojtlalistli más ueyixtias.

² Pampa nochipa nonekis tikteititiskej ika titetlasojtlaj, tiknankiliskej yejuin yeyi tlajtoltilistin. Kachtopa, ¿tleka noneki totlasojtlaskej imiuan oksekimej? Ika ome, ¿kenon uelis tikteititiskej ika titetlasojtlaj? Niman, ika yeyi, ¿kenon uelis nochipa titetlasojtlaskej?

3. ¿Tleka noneki totlasojtlaskej imiuan oksekimej?

³ ¿Tleka noneki totlasojtlaskej imiuan oksekimej? Pampa  ijkon tikteititiaj ika melauak tikchiuaj ken Cristo. Jesús okimijli iapóstoles: “Tla nemotlajsojtlaj inuan oksekimej, nochi tlakatl kitas ika nennotemachtijkauan” (Juan 13:35). Noijki, tla totlasojtlaj techpaleuiya san sekan matinemikan. Ika yejon, Pablo okijto: “On tetlajsojtlalistli yejua más kuajli kichiua para melauak notlajsojtlalo” (Col. 3:14). Niman noijki, melak noneki matotlasojtlakan ipampa tlen apóstol Juan okimijkuilouili tokniuan: “On yejuan kitlajsojtla Dios no ma kitlajsojtla ikniu” (1 Juan 4:21). Kuakon, ijkuak tikimititiaj tokniuan ika tikintlasojtlaj, noijki tikteititiaj ika tiktlasojtlaj Jehová.

4, 5. Xkijto se neskayotl tlen makiteititi ika ijkuak tiktlasojtlaj toTajtsin noijki tikintlasojtlaj tokniuan.

⁴ ¿Tleka tikijtouaj ika tla tiktlasojtlaj toTajtsin noijki tikintlasojtlaskej tokniuan? Tla tiknekij tikasikamatiskej yejuin, matiknemilikan kenon toyojlo niman okseki tlen tikpiyaj ipan totlalnakayo san sekan tekitij. Se doctor uelis kimatis kenon onka toyojlo tla techpachouilia toma niman kimachilia kenon notlalojtok toyesyo. ¿Tlenon techmachtia yejuin?

⁵ Ijkon ken se doctor ueli kimati kenon onka iyojlo yakaj ijkuak kipachouilia ima para kitas tla isiujkan noso san yolik notlaloua iyesyo, tejuamej noijki uelis tikmatiskej tla totlasojtlalis itech Jehová chikaujtok, tla tikitaj kenon tikintlasojtlatokej tokniuan. Tla tikitaj ika xmás tikintlasojtlaj, kanaj noijki xmás tiktlasojtlaj Jehová. San ika, tla nochipa tikimititiaj tokniuan ika tikintlasojtlaj, kijtosneki ika kema chikaujtok totlasojtlalis itech Jehová.

6. ¿Tleka noneki techajmanas tla tikitaj ika xok más tikintlasojtlaj tokniuan? (1 Juan 4:​7-9, 11).

⁶ ¿Noneki techajmanas tla tikitaj ika xok más tikintlasojtlaj tokniuan? Kema. Pampa yejon kijtosnekiskia ika xok más kuajli touikaj iuan Jehová. Yejon tlen kiteititiaj itlajtoluan apóstol Juan ijkuak okijto: “Tla se xkitlajsojtla ikniu yejuan kita, no xkitlajsojtla Dios yejuan xkita” (1 Juan 4:20). ¿Tlenon techititia yejon? Ika san uelis tikyolpaktiskej Jehová tla totlasojtlaj (xpoua 1 Juan 4:​7-9, 11).

7, 8. ¿Kenon uelis tikteititiskej ika titetlasojtlaj?

⁷ Biblia miyekpa kiteneua yejuin: “Xmotlajsojtlakan iuan oksekimej” (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Tlasojtlalistli ualeua ipan toyojlo niman xakaj ueli kita. Kuakon, ¿kenon uelis tikteititiskej ika titetlasojtlaj niman ijkon oksekimej makitakan tlen onka ipan toyojlo? Ika tlen tikijtouaj niman tikchiuaj.

⁸ Biblia kijtoua ika onka miyek ken uelis tikimititiskej tokniuan ika tikintlasojtlaj. Yejuin san seki: “Xmoijlikan tlen melauak imiuan oksekimej” (Zac. 8:​16, TNM). “Xchantikan inuan oksekimej ikan yolseuilistli” (Mar. 9:50). “Xkintlakaitakan oksekimej” (Rom. 12:10). “Xmoselikan cada se iuan oksekimej” (Rom. 15:7). “Xtlapojpoluikan tla yakaj xkuajli itlaj mechchiuilia” (Col. 3:13). “Xmopaleuikan inuan oksekimej ijkuak nenkipiyaj pasolouilistli” (Gál. 6:2). “Xmoyoltlalikan cada se inuan oksekimej” (1 Tes. 4:18). “Xmoyolchikauakan ikan tlaneltoktli iuan oksekimej” (1 Tes. 5:11). “Xchiuakan oración impampa oksekimej” (Sant. 5:16).

9. ¿Tleka tikijtouaj ika ijkuak tikinyoltlaliaj oksekimej tikimititiaj ika tikintlasojtlaj? (Noijki xkita tlaixkopinajli).

 ⁹ Matikitakan kenon uelis tikteititiskej ika titetlasojtlaj tla tikinyoltlaliaj oksekimej, ijkon ken Pablo okijto. Se libro tlen tlajtoua itech Biblia kijtoua ika tlajtojli griego “xmoyoltlalikan” kijtosneki “inakastlan tinentos yakaj niman ijkon tikyolchikauas ijkuak kixnamikis tlen ouijtika”. Kuakon, ijkuak tikyoltlaliaj se tokniuj akin tlajyouijtika, tikpaleuijtokej niman ijkon maka makisa itech ojtli tlen teuika ipan nemilistli. Nochipa ijkuak tikpaleuiyaj niman iuan tinemij se tokniuj, kentla tikijlitokej ika tiktlasojtlaj (2 Cor. 7:​6, 7, 13).

10. ¿Tleka tikijtouaj ika akin teiknelia noijki teyoltlalia?

¹⁰ Yakaj akin teiknelia noijki teyoltlalia niman tepaleuiya. Kuakon, kachtopa titeikneliaj niman sakin titepaleuiyaj. Jehová noijki ijkon kichiua. Apóstol Pablo okijto ika yejua “techiknelijtikaj niman nochipa techyoltlalijtikaj” (2 Cor. 1:3). Kuakon, pampa toTajtsin techiknelia “techyoltlalia ipan nochi on tlen tikijyouiyaj” (2 Cor. 1:4). Ijkon ken ijkuak melak tamikij techpaleuiya ijkuak tikonij atl, Jehová techpaleuiya ijkuak kita ika titlajyouijtokej. Amantsin tikitaskej tlenon uelis techpaleuis niman ijkon titeikneliskej niman titeyoltlaliskej, ijkon ken Jehová kichiua.

11. Ken kijtoua Colosenses 3:12 niman 1 Pedro 3:​8, ¿tlenon más uelis techpaleuis matitetlasojtlakan niman matiteyoltlalikan?

¹¹ ¿Tlenon techpaleuis nochipa matotlasojtlatokan niman matoyoltlalikan? Tla tikyejyekouaj tikimasikamatiskej tokniuan, tla totlasojtlaj ken ikniujtin niman tla tikchiuaj tlen kuajli (xpoua Colosenses 3:12; 1 Pedro 3:8). Tla titeikneliaj niman tikchiuaj okseki tlen kuajli, tikinpaleuiskej tokniuan akin kixnamiktokej tlen ouijtika. Jesús okijto: “Tlen kisa ipan tekamak ualeua ne ipan teyojlo kampa yejua ika tlatentok. On yejuan kuajli tlakatl kijtoua tlajtlamach tlen kuajli pampa ipan iyojlo kipiya on tlen kuajli” (Mat. 12:​34, 35). Kuakon, tikimititiskej tokniuan ika tikintlasojtlaj tla tikinyoltlaliaj.

12. a) ¿Tleka noneki totlajpiyaskej? b) ¿Tlenon tiknankiliskej?

¹² Tinochimej tiknekij tikchiuaskej yejuin: “Matitotlajsojtlakan inuan oksekimej” (1 Juan 4:7). San ika, xnoneki tikilkauaskej tlen Jesús okijto: “Miyekej xok notlajsojtlaskej inuan oksekimej” (Mat. 24:12). Ika yejuin tlajtoltin Jesús xkijtotoya tla inomachtijkauan xok notlasojtlaskiaj. Ipan yejuin tonaltin miyekej xok notlasojtlaj, ika yejon, melak noneki totlajpiyaskej niman ijkon xtechmauaskej. Aman, matiknankilikan yejuin: ¿kenon uelis tikmatiskej tla yemelak tikintlasojtlatokej tokniuan?

13. ¿Kemanon noneki tikimititiskej tokniuan tla melauak tikintlasojtlaj?

¹³ Tla tiknekij tikmatiskej tla ok tikintlasojtlaj tokniuan, noneki tikitaskej tlen tikchiuaj ijkuak itlaj panoua (2 Cor. 8:8). Apóstol Pedro okijto: “In yejua más ueyi kijtosneki. Sanoyej xmotlajsojtlakan iuan oksekimej pampa tla melauak nentetlajsojtlaj nenkitlapojpoluiskej yejuan mechchiuilia tlen xkuajli [noso ika nemotlasojtlalis nenkintlapachoskej intlajtlakoluan oksekimej, TNM]” (1 Ped. 4:8). Kuakon, ijkuak  tokniuan nopopolouaj noso techyolkokouaj, ijkuakon uelis tikimititiskej tla melauak tikintlasojtlaj.

14. Ken kijtoua 1 Pedro 4:​8, ¿kenon noneki totlasojtlaskej? Xkijto se neskayotl.

¹⁴ Más matikasikamatikan tlen okijto Pedro. Ipeujyan tlaxelojli 8 kijtoua ika noneki “sanoyej” totlasojtlaskej. Tlajtojli ika griego “sanoyej” kijtosneki “itlaj tlen patlaui”. Sakin, ipan yejuin tlaxelojli kijtoua ika tla “sanoyej” totlasojtlaj, tikintlapachoskej intlajtlakoluan tokniuan. Kuakon, tlasojtlalistli yeskia ken se tlakentli tlen uelis tikpatlauas niman xsan tiktlapachos se noso ome tlajtlakojli, uelis tikintlapachos miyekej tlajtlakoltin. Ipan 1 Pedro 4:​8, tlajtojli tiktlapachos kijtosneki titetlapopoluis. Ijkon ken se tlakentli pitentsin ueli kitlapachoua itlaj tlen tsokuiltik, tlasojtlalistli uelis kitlapachos tlen xkuajli kichiuaj oksekimej ijkuak nopopolouaj.

15. ¿Kenon techpaleuiya tla melak tikintlasojtlaj tokniuan? (Efesios 4:32).

¹⁵ Tla melak tikintlasojtlaj tokniuan,  techpaleuis matikintlapopoluikan maski ouijtika tikitaskej (xpoua Efesios 4:32). Ijkuak tikintlapopoluiyaj oksekimej, tikteititiaj ika melak tiktlasojtlaj Jehová niman ika tiknekij tikyolpaktiskej. ¿Tlenon más techpaleuis matikintlapopoluikan tokniuan ijkuak nopopolouaj niman ijkuak kichiuaj tlen techkualania?

16, 17. ¿Tlenon más uelis techpaleuis maka matikilnamiktokan tlen xkuajli kichiuaj oksekimej? Xkijto se neskayotl. (Noijki xkita tlaixkopinajli).

¹⁶ San matikitakan tlen kuajli kichiuaj oksekimej, maka matikitakan tlen xkuajli. Xkonnemili ika timoyolpaktijtika imiuan sekimej tokniuan niman sakin nenkimokixtiliaj fotos. Tejua tikinkixtia yeyi fotos, san ika, tikita ika ipan se foto se tokniuj xkuajli okis. ¿Tlenon tikchiuas ika yejon foto? Tikpopolos niman san timokauas ika ome fotos, kampa nochimej uetskatokej.

¹⁷ Fotos tlen tikimejyeuaj yeskia kentla tlen tikilnamikij intech oksekimej. Niman miyekpa más kuajli tikilnamikij kenon otoyolpaktijkej imiuan tokniuan. San ika, matikonnemilikan ika ijkuak toyolpaktijtoyaj se tokniuj okijto noso okichiuj itlaj tlen xkuajli. ¿Tlenon tikchiuaskia ika yejon tlen  okijto noso okichiuj? ¿Tleka xtikpopoloua ijkon ken se foto tlen xkuajli okis? (Prov. 19:11). Pampa más miyekpa kualtsin yotoyolpaktijkej iuan yejon tokniuj xouijtika tikitaskej tikilkauaskej tlen xkuajli okichiuj. Melak kuajli tla san tikimejyeuaj “fotos tlen kualtsitsintin”.

18. ¿Tlenon otikitakej ipan yejuin tlamachtijli?

¹⁸ ¿Tleka tiknekij nochipa totlasojtlaskej? Pampa, ken otikitakej ipan yejuin tlamachtijli, ijkuak tikimititiaj tokniuan ika tikintlasojtlaj noijki tikititiaj Jehová ika tiktlasojtlaj. ¿Kenon uelis tikimititiskej tokniuan ika tikintlasojtlaj? Tla tikinyoltlaliaj. Niman, uelis tikinyoltlaliskej, tla tikimikneliaj. ¿Kenon uelis nochipa titetlasojtlaskej? Tla tokojtiliaj tikintlapopoluiskej oksekimej ijkuak nopopolouaj.

19. ¿Tleka aman más noneki matotlasojtlakan imiuan oksekimej?

¹⁹ ¿Tleka aman más noneki matotlasojtlakan imiuan oksekimej? Matikitakan tlen okijto Pedro: “Ye nisiu para tlamis nochi tlajtlamach. Yejua ika, […] sanoyej xmotlajsojtlakan iuan oksekimej” (1 Ped. 4:​7, 8). ¿Tlenon nochiuas achto tlapopoliuis? Jesús okimijli inomachtijkauan: “San nopampa nochi tlakatl mechtlauelitas” (Mat. 24:9). Tla tiknekij nochipa tiktekichiuiliskej Jehová maski matechtlauelitakan, noneki san sekan tinemiskej. Satanás kineki techxelos, san ika, xuelis kichiuas tla totlasojtlaj, “pampa on tetlajsojtlalistli yejua más kuajli kichiua para melauak notlajsojtlalo” (Col. 3:14; Filip. 2:​1, 2).