1. ¿Tlenon techkauilia Jehová?

JEHOVÁ techkauilia matiktlapejpenikan tlenon tikchiuaskej ipan tonemilis. Yejua techmachtia matiktlapejpenikan tlen kuajli. Ijkuak tiktlapejpeniaj tlen kiyolpaktia, yejua techpaleuiya kuajli makisati tlen tiktlapejpeniaj (Sal. 119:173). Kuakon, tla tikchiuaj ken kijtoua Biblia, tiktlapejpeniskej tlen techpaleuis (Heb. 5:14).

2. ¿Tlenon nonekis tikchiuaskej tla itlaj yotiktlapejpenijkej?

² Aman tej, maski tla yotikijtokej tikchiuaskej itlaj tlen techpaleuis, kanaj nonekis tokojtiliskej niman ijkon titlamiskej tlen otikpeualtijkaj. Matikitakan tlen kemantika panoua. Se telpochtli kijtoua kipouas nochi Biblia. Panoua seki semanas niman melak kuajli kipoujtiuj, san ika, sakin kikajkaua. Se tokniuj siuatl kijtoua ika nochiuas precursora, san ika, xueli nochiua pampa nochipa san kijtotika ika nochias okse achijtsin. Sekimej tokniuan akin tlayekanaj ipan se tlanechikojli kijtouaj nokojtiliskej komintaskej tokniuan niman kinyolchikauaskej, san ika, panoua miyek metstli niman xakaj kontlajpalouaj. Maski tlatlamantik tlen tokniuan okijtokej kichiuaskej, ¿otikitak tlenon opanok? Nochimej xokichiujkej tlen okijtokaj kichiuaskej. Tokniuan akin chantiyaj Corinto ipan kachtopa siglo noijki ijkon inpan onochiuj. Matikitakan tlenon tiuelij intech yejuamej.

3. ¿Tlenon okijtokej kichiuaskej corintios, san ika, tlenon opanok?

³ Kanaj ipan xiuitl 55, tokniuan corintios okitlapejpenijkej itlaj tlen ueyi kijtosnekiya. Okimatkej ika tokniuan akin chantiyaj Jerusalén niman Judea xkipiayaj tomintsin, niman ika  okseki tlanechikoltin kisentlalijtoyaj tomin niman ijkon kinpaleuiskej. Pampa tokniuan corintios kuelitayaj kitemakaskej niman kuajli kipiayaj inyojlo, okijtokej tepaleuiskej niman okitlajtoltijkej apóstol Pablo tlenon ueliskiaj kichiuaskej. Apóstol Pablo okimijli kenon ueliskiaj tepaleuiskej niman okitekitlali Tito makisentlali on tomin (1 Cor. 16:1; 2 Cor. 8:6). San ika, opanok seki metstin niman apóstol Pablo okimat ika xitlaj kichiuayaj. Ika yejon, kanaj xkititlaniskiaj intomin iuan tlen okseki tlanechikoltin kontitlaniskiaj (2 Cor. 9:4, 5).

4. Ken kijtoua 2 Corintios 8:7, 10, 11, ¿tlenon okimijli Pablo tokniuan corintios?

⁴ Melak kuajli tlen okijtokaj kichiuaskej tokniuan corintios, niman Pablo okimijli ika kuajli tlen kichiujtoyaj pampa chikauak onkatka intlaneltokil niman melak kinekiyaj tepaleuiskej. San ika, noijki okimijli matlamikan tlen okipeualtijkaj (xpoua 2 Corintios 8:7, 10, 11). Yejuin techititia ika hasta tokniuan akin chikauak intlaneltokil noneki nokojtiliskej kichiuaskej tlen kijtouaj.

5. ¿Tlenon tiknankilijtoskej ipan yejuin tlamachtijli?

⁵ Ken tokniuan corintios, tejuamej kanaj noijki ouijtika tikitaj tikchiuaskej tlen tikijtouaj. ¿Tleka? Pampa titlajtlakolejkej niman nochipa san tikijtotokej ika sakin tikchiuaskej. Noso kemantika topan nochiua tlen xtikchiayaj niman xnimantsin tikchiuaj tlen yotikijtokaj (Ecl. 9:11; Rom. 7:18). Ipan yejuin tlamachtijli tiknankilijtoskej yejuin: ¿kenon uelis tiktlapejpeniskej tlen techpaleuis?, ¿tlenon techpaleuis matikitakan tla nonekis tikpatlaskej itlaj tlen yotikijtokaj tikchiuaskej? niman ¿kenon uelis titlamiskej tlen yotikpeualtijkaj?

6. ¿Kemanon nonekis tikpatlaskej tlen tikijtouaj tikchiuaskej?

⁶ Seki tlemach tlen otiktlapejpenijkej tikchiuaskej xtiknekij tikpatlaskej. Yotikijtokej nochipa tiktekichiuiliskej Jehová niman xtikajkayauaskej toixnamik (Mat. 16:24; 19:6). San ika, onka okseki tlen kanaj nonekis tikpatlaskej. ¿Tleka? Pampa kanaj itlaj uelis nopatlas. ¿Kenon uelis tiktlapejpeniskej tlen techpaleuis?

7. ¿Tlenon noneki tiktlajtlaniliskej Jehová, niman tleka?

⁷ Matiktlajtlanilikan toTajtsin tlamachilistli. Jehová okichiuj ika Santiago makijkuilo yejuin: “Tla semej nemejuamej xnenkimatij on tlen kuajli nenkichiuaskej, xtlajtlanilikan Dios tlamatkilistli, niman yejua miyek mechmakas” (Sant. 1:5). Tinochimej techpoloua “tlamatkilistli” noso tlamachilistli ipan seki tlemach. Yejua ika, matiktlajtlanilikan Jehová matechpaleui ijkuak itlaj tiktlapejpeniskej tikchiuaskej niman ijkuak nonekis tikpatlaskej tlen yotikijtokaj tikchiuaskej. Tla ijkon tikchiuaj, Jehová techpaleuis.

8. ¿Tlenon noneki tikchiuaskej ijkuak tiktlapejpeniskej itlaj?

⁸ Kuajli matomachtikan. Matikitakan tlenon kijtoua iTlajtol toTajtsin, matikinpouakan toamatlajkuiloluan niman matonojnotsakan iuan yakaj akin itech titlaneltokaj (Prov. 20:18). Melak noneki matikchiuakan yejuin ijkuak tiknemilijtoskej tla okse tekitl tikchiuaskej, tla tochanpatlaskej noso tlenon tomachtiskej niman ijkon tikpiyaskej se totekiyo tlen matechkauili matiktekichiuilikan Jehová.

9. ¿Tleka techpaleuis tla tikasikamatij tleka tiknekij tikchiuaskej itlaj?

⁹ Matikasikamatikan tleka tiknekij itlaj tikchiuaskej. Jehová kita tlenon tikpiyaj ipan toyojlo, yejua ika, noijki kita tleka tiknekij itlaj tikchiuaskej (1 Sam. 16:7). Noneki toixtlaloskej niman ijkon tikasikamatiskej tlenon tikpiyaj ipan toyojlo. ¿Tleka? Pampa tla xijkon tikchiuaj, ouijtika tikitaskej titlamiskej tlen otikpeualtijkej. Matiknemilikan yejuin, se  telpochtli kitlapejpenia nochiuas precursor, san ika, sakin kita ika xueli kajxiltia ihoras niman xnemi ika iyojlo ijkuak tenojnotsa. Kanaj kinemiliaya ika onochiujka precursor pampa kinekiya kiyolpaktis Jehová. San ika ¿xmelak ika kanaj okichiuj pampa kinekiya kinyolpaktis itajuan noso yakaj akin kitlakaita?

10. ¿Tlenon techpaleuis matopatlakan?

¹⁰ Matitlanemilikan itech yejuin. Se akin nomachtijtika Biblia kijtoua ika xok pokis. Nokojtilia xpokis kanaj ome semana, san ika, oksejpa peua poki. Sakin, yejua kuajli kikajkaua ika poki pampa kitlasojtla Jehová niman pampa kineki kiyolpaktis (Col. 1:10; 3:23).

11. ¿Tlenon noijki techpaleuis matikchiuakan tlen tiknekij?

¹¹ Matikchiuakan tlen techpaleuis. Yejuin kichiuas matitlamikan tlen otikpeualtijkej. Kanaj yotikijtokej mojmostla tikpouaskej Biblia, san ika, tla xtikpiyaj se programa, kanaj xkeman tikchiuaskej tlen tiknekij. * Noso kanaj tlayekankej kinekij komintlajpaloskej tokniuan, san ika, panoua miyek tonajli niman xkichiuaj. Melak kinpaleuis tla notlajtoltiaj: “¿Yotikimijkuilojkej akinomej tikomintaskej? ¿Yotikijtokej kemanon tikomintaskej?”.

12. ¿Kanaj tlenon nonekis tikchiuaskej, niman tleka?

¹² Matikitakan tla melauak uelis tikchiuaskej. Tiknekij miyek tikchiuaskej, san ika, xakaj kipiya tiempo, tomin nion kojtilistli niman ijkon kichiuas tlen kineki. Yejua ika, noneki kuajli titlanemiliskej niman totlajtoltiskej tla melauak uelis tikchiuaskej. Kemantika kanaj nonekis tikpatlaskej tlen yotikijtokaj tikchiuaskej pampa xtiuelij tikchiuaj (Ecl. 3:6). Aman, matikonnemilikan ika yotikasikamatkej ika noneki tikpatlaskej tlen yotikijtojkaj, tikpatlaj niman tikitaj ika iuelis tikchiuaskej, ¿tlenon techpaleuis matitlamikan tlen yotikpeualtijkaj? Matikitakan.

13. ¿Kenon uelis tikpiyaskej kojtilistli niman ijkon tikchiuaskej tlen yotikijtokej?

¹³ Matiktlajtlanilikan Jehová matechmaka kojtilistli. Jehová uelis techmakas kojtilistli niman ijkon tikchiuaskej tlen yotikijtokej (Filip. 2:13). Kuakon, matiktlajtlanilikan Jehová matechmaka espíritu santo niman ijkon tikpiyaskej kojtilistli tlen techpoloua. Matiknotstokan Jehová maski tikitaskej ika uejkaui technankilia. Jesús okijto ika Jehová techmakas espíritu santo, san ika, noijki okijto: “Xtlajtlanilikan Dios [...], niman yejua mechmakas” (Luc. 11:9, 13).

14. ¿Kenon techpaleuiya Proverbios 21:5 matikchiuakan tlen yotikijtokej?

¹⁴ Matiknemilikan kenijki tikchiuaskej (xpoua Proverbios 21:5). Tla tiknekij itlaj tikchiuaskej, noneki kuajli tiknemiliskej kenijki uelis tikchiuaskej. Kuakon, ijkuak tikijtoskej itlaj tikchiuaskej, matikchijchiuakan se amatsintli kampa matiktlalikan tlenon tikchiujtiaskej. Tla tikitaj ika itlaj melak ouijtika, matikijkuilokan okseki tlen techpaleuis matikchiuakan yejon, ijkon tikitaskej ika inochiujtiuj yejon tekitl. Pablo okimijli corintios ika chijchikueyi tonajli makixelojtiakan intomin, niman maka nochiaskej hasta ijkuak ajsiskia niman kintlajtlaniliskia (1 Cor. 16:2). Melak kuajli tla tikxelouaj tekitl tlen noneki tikchiuaskej pampa yejon techpaleuis maka matisiauikan.

15. Tla yotiknemilijkej kenijki itlaj tikchiuaskej, ¿tlenon okse itlaj uelis techpaleuis?

¹⁵ Tla tikijkuilouaj kenijki yotiknemilijkej tikchiuaskej itlaj, melak techpaleuis matikchiuakan (1 Cor. 14:40). Se neskayotl, tokniuan akin tlayekanaj ipan tlanechikojli kimijliaj  makitekitlalikan se tlayekanketl akin makijkuilojtiuj tlenon kijtouaj kichiuaskej, akinon kichiuas niman kemanon tlamiskej. Tlayekankej akin kichiuaj ken kijtoua ikalpan Jehová melak kuajli kichiuaj tlen kijtouaj (1 Cor. 9:26). Tejuamej noijki uelis tikchiuaskej yejuin. Kanaj uelis tikchijchiuaskej se amatsintli kampa uelis tikijkuilojtiaskej tlen techpoloua tikchiuaskej, niman kanaj uelis kachtopa tikijkuiloskej tlen más tiknekij tikchiuaskej. Yejuin xsan techpaleuis matitlamikan tlen otikpeualtijkaj, noijki techpaleuis matikchiuakan okseki tlemach.

16. Ken kijtoua Romanos 12:11, ¿tlenon techpaleuis matikchiuakan tlen yotikijtokej?

¹⁶ Matokojtilikan. Noneki tokojtiliskej niman ijkon tikchiuaskej ken yotiknemilijkej niman titlamiskej tlen yotikpeualtijkej (xpoua Romanos 12:11). Pablo okijli Timoteo manokojtilijto kuajli temachtis niman nochipa ijkon makichiujto. Yejuin tlen okijto Pablo uelis techpaleuis matikchiuakan tlen yotikijtokej tikchiuaskej ipan itekiyo Jehová (1 Tim. 4:13, 16).

17. ¿Kenon techpaleuiya Efesios 5:15, 16 matikchiuakan tlen yotikijtokej?

¹⁷ Kuajli matiktekitiltikan tiempo (xpoua Efesios 5:15, 16). Matikijtokan kemanon tikchiuaskej itlaj niman maka matikpatlakan. Maka matiknemilikan ika ajsis se tonajli ijkuak melak kuajli tikchiuaskej yejon, pampa kanaj xkeman ajsis yejon tonajli (Ecl. 11:4). Matiktekitiltikan totiempo niman tokojtilis ipan tlemach tlen ueyi kijtosneki niman maka ipan tlemach tlen xueyi kijtosneki (Filip. 1:10). Tla tiuelij, matikitakan kemanon uelis tikchiuaskej tlen yotiknemilijkej ijkuak xakaj nion itlaj uelis techpasolos. Matikimijlikan oksekimej ika tiknekij tikchiuaskej itlaj. Kanaj uelis tikseuiskej toteléfono noso kanaj tokojtiliskej xtikitaskej ijkuakon correos electrónicos noso redes sociales. *

18, 19. ¿Tlenon techpaleuis matikchiuakan tlen yotikijtokej maski tikixnamikiskej tlen ouijtika?

¹⁸ Matiknemilikan tlenon panos. Uelis tikijtoskej ika ijkuak tikchiuaj tlen tikijtouaj, kentla tajsiskiaj kampa tiknekiyaj. Kemantika se ojtli tsauktika, san ika, pampa tiknekij tajsiskej kampa yotiknemilijkej, tikajsij okse ojtli tlen san no ompa techuikas kampa tiknekij tajsiskej. Kuakon, tla tiknemiliaj tlenon panos ijkuak tikchiuaskej tlen yotikijtokej, tiknektoskej titlaxikoskej maski tikixnamikiskej tlen ouijtika (Gál. 6:9).

¹⁹ Ouijtika tiktlapejpenis itlaj niman tikchiuas ken yotikijto. San ika, Jehová techpaleuis matikpiyakan tlamachilistli niman kojtilistli niman ijkon matitlamikan tlen yotikpeualtijkaj.