TLAMACHTIJLI 22
TLAKUIKAJLI 15 Matikueyilikan iYenkuiyoj Jehová
¿Kenijki kita Jesús itoka Jehová?
“Yonikimititi motoka, niman nochipa ijkon nikchiuas” (JUAN 17:26).
TLEN TIKITASKEJ
Jesús okiteititi, okichipaujkaitak niman okichipaujkateneuj itoka Jehová. ¿Tlenon kijtosneki nochi yejon, niman kenijki okichiuj?
1, 2. a) ¿Tlenon okichiuj Jesús ipan yeuajli achto mikis? b) ¿Tlenon tiknankiliskej ipan yejuin tlamachtijli?
SE JUEVES ika tlayoua, Jesús nemiya imiuan iapóstoles ipan se cuarto tlen onkatka ikuatipan se kajli. Kemach yopeujka 14 de nisán xiuitl 33 niman xok ueyi poliuiya ika Jesús kitemaktiliskiaj, kitlajtlakolmakaskiaj, kijliskiaj ika kimiktiskej, kitlajyouiltiskiaj niman kimiktiskiaj. Sakin ika Jesús niman iapóstoles yotlakuajkaj, okimijli tlen melak okinyolchikauj. Niman ijkuak yeyaskiaj, Jesús okichiuj se teoyotl tlen melak ueyi okijtosnek. Apóstol Juan okijkuilo yejon teoyotl ipan Juan, capítulo 17.
2 Ipan yejuin tlamachtijli, tikitaskej tlenon techmachtia teoyotl tlen okichiuj Jesús: ¿tlenon kajmantoya Jesús ijkuak okichiuj yejon teoyotl?, niman ¿tlenon más okinek kichiuas Jesús ijkuak ouajlajka ipan tlaltikpaktli?
“YONIKIMITITI MOTOKA”
3. ¿Tlenon okijto Jesús ipan teoyotl tlen okichiuj, niman tlenon kijtosnekiya? (Juan 17:6, 26).
3 Ipan teoyotl tlen Jesús okichiuj, ijkin okijli Jehová: “Yonikimititi motoka”. Yejua melak kinekiya kiteititis itoka Jehová pampa hasta okpa ijkin okijto (xpoua Juan 17:6, 26). San ika ¿kijtojtoya ika okiteititi ika toTajtsin itoka Jehová? Ka. Inomachtijkauan kimatstoyaj kenijki itoka toTajtsin pampa judíos katkaj niman ipan Tlajkuiloltin ika Hebreo miyekpa uajnestiaya itoka toTajtsin. Ijkuak Jesús okijto ika okiteititi itoka toTajtsin, kijtosnekiya ika okiteititi kenijki Jehová. Yejuin kijtosneki ika okiteititi ikualneskayouan, tlen kichiua niman tlen kineki kichiuas. Kema, san Jesús melak kuajli kixmatstok iTaj, kuakon, san yejua ueliskia melak kuajli temachtiskia itech kenijki Jehová.
4, 5. a) ¿Kenijki yakaj uelis peuas más kipatiojkaitas se tokayotl? Xkijto se neskayotl. b) ¿Tleka apóstoles más okipatiojkaitakej itoka Jehová?
4 Matikitakan se neskayotl. Xkonnemili ika ipan motlanechikol nemi se tlayekanketl akin itoka David niman yejua tlapajtijketl. Kanaj melak youejkauj ika tikixmati. Aman matikonnemilikan ika se tonajli tejua chikauak timokokoua. Kuakon, mitsuikaj hospital kampa tekiti David, niman yejua mitspajtia para maka xmiki. ¿Xmelak ika aman más tiktlasojtlaskia yejon tokniuj? Kema, niman ijkuak tikaki itoka, nochipa tikilnamiki tlen okichiuj mopampa. Aman David xok san tikita ken tlayekanketl ipan motlanechikol, aman noijki tikita ken akin omitsmakixti.
5 Noijki ijkon, inomachtijkauan Jesús yekimatstoyaj ika toTajtsin itoka Jehová. San ika, aman, yejuamej más kipatiojkaitayaj yejon tokayotl pampa Jesús okinpaleui más kuajli makixmatikan. ¿Niman kenijki okinpaleui? Okiteititi kenijki iTaj ika tlen okijto niman ika tlen okichiuj. Ijkuak apóstoles okitakej kenijki temachtiaya Jesús niman kenijki tenotsaya, yejuamej más kuajli okixmatkej Jehová (Juan 14:9; 17:3).
“MOTOKA, YEJON TOKAYOTL TLEN TEJUA OTINECHMAKAK”
6. ¿Tlenon okijtosnek Jesús ijkuak okijto ika Jehová okimakak itoka? (Juan 17:11, 12).
6 Jesús okinteneuj inomachtijkauan ipan iteoyouj, yejua ijkin okijli Jehová: “Xkintlajpiya ipampa motoka, yejon tokayotl tlen tejua otinechmakak” (xpoua Juan 17:11, 12). ¿Kijtosnekiya Jesús ika aman itoka yeskia Jehová? Ka. Kuajli matikitakan ika Jesús okijli Jehová “motoka”. Kuakon, Jesús xokipatlak itoka, xonotokayoti Jehová. Aman tej, ¿tlenon okijtosnek Jesús ijkuak okijto ika Jehová okimakak itoka? Kachtopa, okijtosnek ika Jehová okuajtitlanka niman ijkon ipampa matlajtoki. Jesús ouajla ika itoka toTajtsin niman miyek okichiuj ika itoka Jehová (Juan 5:43; 10:25). Ika ome, itoka Jesús kijtosneki “Jehová toTemakixtijkauj”. Ken tikitaj, tlen kijtosneki itoka Jesús kuika itoka Jehová.
7. ¿Tleka Jesús ueliya tlajtouaya ika itoka Jehová? Xkijto se neskayotl.
7 Matikitakan se neskayotl niman ijkon más kuajli tikajsikamatiskej. Se tekiuaj uelis kitekitlalis se tlakatl niman ijkon ipampa matlajto. Tlen kijtos yejon tlakatl yeskia kentla tla tekiuaj kijtoskia. Noijki ijkon, Jehová okitekitlali Jesús niman ijkon matlajto ika itoka (Mat. 21:9; Luc. 13:35).
8. ¿Tleka Jehová okijto ika itoka “ipan” onkatka Jesús ijkuak xeuajlaya ipan tlaltikpaktli? (Éxodo 23:20, 21, TNM).
8 Biblia kijtoua ika Jesús yejua Tlajtojli. ¿Tleka? Pampa Jehová kitekitiltiani Jesús niman ijkon kimijlis iluikaktekitkej niman tlaltikpakchanejkej tlenon noneki kichiuaskej (Juan 1:1-3). Kanaj Jesús katka yejon iluikaktekitketl akin Jehová okititlan niman ijkon makinyekana niman makintlajpiya israelitas ipan tlaluaktli. ¿Tleka israelitas nonekiya kitlakamatiskej yejon iluikaktekitketl? Jehová okimijli: “Notoka ipan onka” (xpoua Éxodo 23:20, 21, TNM). a b ¿Tleka Jehová okijto ika itoka “ipan” onkatka Jesús? Pampa Jesús tlajtoua ipampa Jehová niman kiteititia ika Jehová chipauak niman ika nochi kuajli kichiua.
“NOTAJ, XKUEYITENEUA MOTOKA”
9. ¿Kenijki tikmatij ika Jesús melak kipatiojkaitaya itoka Jehová?
9 Ken yotikonitakej, achto uajlaskia ipan tlaltikpaktli, Jesús melak kipatiojkaitaya itoka Jehová. Niman nochi tlen okichiuj ipan tlaltikpaktli, okiteititi ika ok melak kipatiojkaitaya. Ijkuak yetlamiskia itenojnotsalis ipan tlaltikpaktli, Jesús ijkin okitlajtlanili iTaj: “NoTaj, xkueyiteneua motoka”. ITaj nimantsin okinankili ika se chikauak tlajtojli tlen oualeuj ne iluikak: “Yonikueyiteneuj niman oksejpa nikueyiteneuas” (Juan 12:28).
10, 11. a) ¿Kenijki Jesús okiueyiteneuj itoka Jehová? (Noijki xkita tlaixkopinajli). b) ¿Tleka melak noneki matikchipajkaitakan niman matikchipaujkateneuakan itoka Jehová?
10 Jesús noijki okiueyiteneuj itoka iTaj. ¿Kenijki okichiuj? Yejua otenojnots itech ikualneskayouan Jehová niman itech tlen kualtsin okichijchiuj. San ika, xsan yejon, Jesús noijki kimatstoya ika nonekiya kichipaujkaitas niman kichipaujkateneuas itoka Jehová. c Jesús okiteititi ika melak nonekiya ijkon manochiua ijkuak okinmachti inomachtijkauan kenijki kichiuaskej teoyotl. Yejua ijkin okijto: “ToTajtsin akin tinemi ne ipan cielo, makitlakaitakan motoka” (Mat. 6:9).
11 ¿Tleka melak noneki matikchipajkaitakan niman matikchipaujkateneuakan itoka Jehová? Pampa ipan jardín de Edén, Satanás okitlajtolchijchiuili Jehová niman okijto ika Jehová tekajkayaua niman ika kintlasojtiliaya Adán niman Eva tlen kuajli (Gén. 3:1-5). Diablo noijki okijto ika xkuajli ken Jehová tlayekana. Nochi tlen Diablo okijto, okichiuj ika tlaltikpakchanejkej makinemilikan ika Jehová se toTajtsin akin xkuajli. Niman sakin, ipan itonaluan Job, Satanás okijto ika nochimej akin kitekichiuiliaj Jehová kichiuaj san pampa kinekij itlaj kiseliskej. Niman okijto ika xakaj nemi akin melak makitlasojtla Jehová niman makinekto kitekichiuilis ijkuak kixnamiktos tlen xkuajli (Job 1:9-11; 2:4). Kuakon, nonekiya tiempo niman ijkon noteititis akinon kijtouaya tlen melauak: tla Jehová noso Satanás.
Jesús okinmachti inomachtijkauan ika melak nonekiya makichipaujkaitakan itoka toTajtsin. (Xkita párrafo 10).
“NIKTEMAKA NONEMILIS”
12. ¿Tlenon okinek kichiuas Jesús pampa melak kitlasojtlaya itoka Jehová?
12 Jesús melak onokojtili kichipaujkaitas niman kichipaujkateneuas itoka iTaj, Jehová, pampa melak kitlasojtlaya. Ika yejon, okijto: “Niktemaka nonemilis” (Juan 10:17, 18). Kema, yejua kinektoya mikis ipampa itoka Jehová. d Matikilnamikikan ika Adán niman Eva, akin xtlajtlakolejkej katkaj, okixnamikkej Jehová niman opeuj kipaleuiyaj Satanás. San ika, Jesús hasta okinek uajlas ipan tlaltikpaktli niman kitlakamatis Jehová nochi inemilis niman ijkon kiteititis ika melak kitlasojtlaya (Heb. 4:15; 5:7-10). Jesús nochipa omelajkanen itech Jehová hasta ijkuak okimiktijkej ipan se kojtli melaktik (Heb. 12:2). Niman ijkon okiteititi ika melak kitlasojtlaya Jehová niman itoka.
13. ¿Tleka xnemi okse ken Jesús akin ueliskia kiteititis ika Satanás san tekajkayaua? (Noijki xkita tlaixkopinajli).
13 Nochi tlen Jesús okichiuj ipan tlaltikpaktli, okiteititi ika Jehová xtlakajkayaua, yej Satanás yejua akin tlakajkayaua (Juan 8:44). Xnemi okse akin melak kuajli makixmati Jehová ijkon ken Jesús. Ika yejon, tla oniaskia itlaj tlen melauak itech tlen Satanás okijtouili Jehová, Jesús kimatiskia. San ika, Jesús nochipa okinek kiteititis ika xmelauak tlen okijtouilijkej Jehová niman okimanoui itoka. Hasta ijkuak nesiya ika Jehová yokitlalkauijka, Jesús xkeman okinemili kixnamikis iTaj niman okinokauili makimiktikan (Mat. 27:46). e
Nochi tlen Jesús okichiuj, okiteititi ika Jehová xtlakajkayaua, yej Satanás akin tlakajkayaua. (Xkita párrafo 13).
“YONIKTLAMILTI TEKITL TLEN OTINECHNAUATI”
14. ¿Kenijki Jehová okiteochiuj Jesús pampa omelajkanen?
14 Se yeuajli achto mikis Jesús, yejua ijkin okijli Jehová: “Yoniktlamilti tekitl tlen otinechnauati”. Jesús kimatstoya ika tla melajkanemiya, Jehová kiteochiuaskia (Juan 17:4, 5). Niman xonopopolo. Jehová xokitekauili manokaua ipan tlalkontli (Hech. 2:23, 24). Yejua okiyoliti niman okimakak se ueyi tekitl ne iluikak (Filip. 2:8, 9). Miyek xiuitl sakin, Jesús opeuj tlayekana ken Tekiuaj ipan iTekiuajyo toTajtsin. ¿Niman tlenon kichiuaskia yejon Tekiuajyotl? Jesús okijto ijkuak otechmachti kenijki tikchiuaskej teoyotl: “Mayejko moGobierno. Ijkon ken ne cielo nochiua tlen tejua tikneki, nikan noijki ijkon manochiua” (Mat. 6:10).
15. ¿Tlenon más kichiuas Jesús?
15 Sa achijtsin poliui ijkuak Jesús kimixnamikis itlauelikniuan toTajtsin niman kinpopolos akin xkuajkualtin ipan Armagedón (Apoc. 16:14, 16; 19:11-16). Sakin, kontlajkalis Satanás ipan “on pozo yejuan xnesi kech ika uejkatlan”, kijtosneki, tsauktos niman xtlaj uelis kichiuas (Apoc. 20:1-3). Sakin, tekiuajtis Mil Xiuitl, niman ipan yejon xiujtin Jesús kichiuas ika ipan tlaltikpaktli maonia yolseuilistli niman kinpaleuis tlaltikpakchanejkej maka sa makipiyakan tlajtlakojli. Noijki, kinyolitis akin yomikkej niman kichiuas ika yejuin tlaltikpaktli manochiua se xochitlalpan. ¡Aman kema nochiuas tlen Jehová kinekiya! (Apoc. 21:1-4).
16. ¿Kenijki tinemiskej ijkuak Jesús tlamis tekiuajtis Mil Xiuitl?
16 ¿Kenijki tinemiskej ijkuak Jesús tlamis tekiuajtis Mil Xiuitl? Xok onias tlajtlakojli. Tlaltikpakchanejkej xok nonekis kitlajtlaniskej makintlapojpoluikan itechkopa imikilis Cristo. Xok nonekis yakaj topampa tlajtos nion xok nonekiskej teopixkej akin matechpaleuikan matitonisiuikan itech Jehová. “On mikilistli, yejuan nochi tlakatl itlauelikniu”, xok onias. Mijkatsitsintin yoliuiskej. Nochimej akin nemiskej ipan tlaltikpaktli xok kipiyaskej tlajtlakojli (1 Cor. 15:25, 26).
17, 18. a) ¿Tlenon panos ijkuak tlamis Mil Xiuitl? b) ¿Tlenon kichiuas Jesús ijkuak tlamis tekiuajtis? (1 Corintios 15:24, 28; noijki xkita tlaixkopinajli).
17 ¿Tlenon okseki panos ijkuak tlamis Mil Xiuitl? Itlaj tlen melak kualtsin: xok yakaj kijtos ika toTajtsin xchipauak niman xyolmelajki. Matikilnamikikan ika Satanás okijto ipan jardín de Edén ika Jehová tlakajkayaua niman ika se xkuajli tekiuaj akin xtechtlasojtla. Desde ijkuakon, itekipanojkauan Jehová miyekpa yokiteititijkej ika más kuajli tla tiktlakamatij Jehová. Ijkuak Jesús tlamis tekiuajtis Mil Xiuitl, tlamis ika nochipaujkateneuas itoka Jehová. Niman ToTaj iluikakchane tlamis kiteititis ika melauak techtlasojtla.
18 Itlamiyan Mil Xiuitl, nochimej kitaskej ika nochi tlen okijto Satanás itech Jehová xmelauak. ¿Tlenon kichiuas Jesús ijkuak tlamis tekiuajtis? ¿Kichiuas ken Satanás niman kixnamikis Jehová? ¡Ka, yejua xijkon kichiuas! (Xpoua 1 Corintios 15:24, 28). Jesús kikuepilis iTaj iTekiuajyo niman kinokauilis makiyekana. Yejua ijkon kichiuas pampa melak kitlasojtla Jehová.
Jesús kinektos kikuepilis Jehová iTekiuajyo ijkuak tlamis tekiuajtis Mil Xiuitl. (Xkita párrafo 18).
19. ¿Kenijki kita Jesús itoka Jehová?
19 Tlen yotikitakej, techititia tleka Jehová okinek kimakas itoka iKoneuj niman ijkon ipampa matlajto. Niman Jesús melak kuajli okichiuj tekitl tlen okimakakej. Kuakon, ¿kenijki kita Jesús itoka Jehová? Yejon tlen más kipatiojkaita. Yejua okinek mikis ipampa itoka Jehová niman kinektos kikuepilis Jehová iTekiuajyo ijkuak tlamis tekiuajtis Mil Xiuitl. ¿Kenijki uelis tikchiuaskej ken Jesús? Yejuin tiknankiliskej ipan okse tlamachtijli.
TLAKUIKAJLI 16 Matikueyichiuakan Jehová ipampa iKoneuj
b Noijki onenkej iluikaktekitkej akin Jehová okintekitilti niman ijkon intechkopa tlajtos. Yejuamej otlajtojkej ika itoka Jehová. Ika yejon, kemantika Biblia kijtoua ika Jehová tlajtoua, san ika, okichiuj itechkopa se iluikaktekitketl (Gén. 18:1-33). Maski Tlajkuiloltin kijtoua ika Jehová yejua akin okimakak Tlanauatijli Moisés, ipan okseki tlaxeloltin kijtouaj ika okintekitilti iluikaktekitkej niman ijkon kimakas Moisés yejon Tlanauatijli (Lev. 27:34; Hech. 7:38, 53; Gál. 3:19; Heb. 2:2-4).
c TLEN NONEKI MATIKMATIKAN: Tikchipaujkaitas kijtosneki sajnoye tiktlakaitas yakaj niman tikitas ika chipauak. Tikchipaujkateneuas kijtosneki tikchipauas itoka, tikteijlis tlen melauak itech niman titepaleuis manoteititi ika xmelauak tlen kijtouiliaj.
d Imikilis Jesús okichiuj ika tlaltikpakchanejkej mauelikan nochipa manemikan.
e Xkita sección “Tlen notlajtoltiaj akin kitaj revistas” itech Amatl Tekakistilijketl de abril de 2021, páginas 30 niman 31.
