TLEN OKICHIUJKEJ NOTAJUAN

Itlamiyan 1950, notajuan akin chantiyaj Italia, onochantitoj ipan se pueblito tlen itoka Kindersley ne Canadá, tlen nokaua ne Saskatchewan. Sakin, notajuan opeujkej nomachtiaj Biblia niman yejon tlen más ueyi kijtosnekiya ipan tonemilis. Nikilnamiki ika ijkuak nitelpokatsin katka melak niuejkauiya nitenojnotstinemiya iuan nochanejkauan. Ika yejon, kemantika nikamanaloua niman nikijtoua ika oninochiuj precursor auxiliar ijkuak nikpiaya ocho xiuitl.

Maski notajuan xmás kipiayaj tomintsin, nochipa kinektoyaj chikauak kitekichiuiliskej Jehová. Ipan 1963 onopanolti se ueyi tlanechikojli iuan miyekej países ne Pasadena (California, Estados Unidos). Niman pampa notajuan kinekiyaj yaskej, okinemakakej seki tlen kipiayaj niman ijkon kipiyaskiaj tomintsin tlen ika tiaskiaj. Ipan 1972 otichantitoj ipan se pueblito tlen melak uejka nokauaya tlen itoka Trail ne Columbia Británica (Canadá), ompa otiajkej para tikinnojnotsaskej akin tlajtouaj italiano. Notaj tekitiya kampa tlanemakalo, niman pampa kinekiya chikauak kitekichiuilis Jehová, xokiseli seki tekitl tlen kimakayaj kampa más ueyi kitlaxtlauiliskiaj.

Melak niktlasojkamati pampa notajuan melak kuajli onechmachtijkej nejua niman yeyimej nokniuan. Niman pampa yejuamej melak kuajli kitekichiuiliayaj Jehová, onechpaleui noijki ijkon manikchiua. Yejuamej onechititijkej ika tla kachtopa niktekichiuilia Jehová yejua nochipa nechtlajpiyas (Mat. 6:33).

OPEUJ MÁS CHIKAUAK TIKTEKICHIUILIAJ JEHOVÁ

Ipan 1980, oninonamikti iuan se kualtsin tokniuj akin itoka Debbie, yejua yokijtojka kenijki kinekiya kitekichiuilis Jehová. Tiomemej tiknekiyaj tochiuaskej precursores, ika yejon, Debbie onochiuj precursora yeyi metstli sakin ika yotonamiktijkaj. Uajsextli otiajkej ipan se tlanechikojli kampa xmás nemiyaj tenojnotskej, niman ompa oninochiuj precursor.

 Sakin, xok más tiyolpakiyaj niman tiknekiyaj tokuepaskej tochan. San ika, kachtopa otitlajtokej iuan tlayekanketl ipan circuito, niman yejua san kualtsin ijkin otechmelajkaijli: “San no nemejuamej nenkichiuaj ika tlen nenkixnamikij más maouijtika. Pampa san nenkinemilijtokej tlen nenkixnamiktokej niman xnenkitaj tlen kualtsin nenkipiyaj”. Yejon tlen tiknekiyaj yakaj matechijli (Sal. 141:5). Nimantsin otikchiujkej tlen otechijli niman otikitakej ika melak miyek tlen kualtsin tikpiyaj. Miyekej tokniuan ipan tlanechikojli más kinekiyaj kitekichiuiliskej Jehová hasta kokonej niman tokniuan akin inueuentsitsinuan xnomachtiayaj Biblia. Yejuin otechmachti ika noneki nochipa tikitaskej tlen kualtsin tikpiyaj niman tikneltokaskej ika Jehová kiyektlalis tlen tikixnamikij ijkuak kita ika yenoneki (Miq. 7:7). Oksejpa opeuj tiyolpakij pampa xok san tiknemilijtoyaj tlen tikixnamiktoyaj.

Ijkuak kachtopa otiajkej ipan tlamachtijli tlen kiseliaj precursores, otechmachtijkej nauimej tokniuan niman yeyimej yotlapaleuijkaj ipan okseki países. Pampa yejuamej otechimititijkej tlaixkopinaltin niman otechijlijkej tlen okixnamijkej niman kenijki Jehová yokinteochiujka, okichiuj matiknekikan titlapaleuiskej ken misioneros niman yejon tlen tiknekiyaj tikchiuaskej.

Ipan 1984, otitochantitoj Quebec, tlen nokauaya ipantsin 4,000 kilómetros ika uejka itech Columbia Británica. Ijkon otikchiujkej pampa tiknekiyaj tikitaskej tla tiueliskiaj titlapaleuiskej ken misioneros. San ika, ompa ononek tomatiskej niman tiueliskej titlajtoskej francés niman kemantika xtechajxiliaya totomintsin. Sejpa katka xtikpiayaj tlen tikuaskej, san ika, se tlakatsintli akin kintokaya papas otechkauili matikinpejpenatij papas tlen yokikaujkaj. Debbie opeuj kichijchiua tlatlamantik tlakuajli ika papas niman melak uelik kikixtiaya. Maski miyek tlen ouijtika otikixnamijkej, otokojtilijkej titlaxikoskej niman tiyolpakiskej. Noijki kuajli otikitakej kenijki Jehová otechtlajpix (Sal. 64:10).

Se tonajli, ijkuak xtikchiayaj, otechuajnotskej niman otechijlijkej tla tiknekiyaj tontlapaleuiskej Betel tlen onka Canadá. Xtikmatiyaj tla tiaskej pampa yotikontitlankaj solicitud para tiaskej iTlamachtil Galaad, maski ijkon, otiajkej Betel. Ijkuak otajsikej, ijkin otikijlijkej tokniuj Kenneth Little, akin teuan ipan Grupo akin tlayekana ipan Sucursal: “¿Tlenon tikchiuaskej tla technotsaj Galaad?”.  Yejua ijkin otechnankili: “Yejon tikitaskej sakin ijkuak yomechajnotskej”.

San opanok se semana otechnotskej Galaad. Kuakon, nonekiya tikitaskej tlenon tikchiuaskej. Tokniuj Little ijkin otechijli: “Maski san katlejua xtlapejpenikan onias tonajli ijkuak nenkinemiliskej ika kanaj más kuajli yeskia tla okse nenkitlapejpeniskiaj. Maski san katlejua nenkitlapejpeniskej nochi ome kuajli pampa Jehová kiteochiuas”. Otikijtojkej ika tiaskiaj iTlamachtil Galaad, niman yotikitakej ika yemelak tlen otechijli tokniuj Little. Niman yejon tlen tikimijlianij tokniuan ijkuak noneki kitlapejpeniskej kenijki kinekij kitekichiuiliskej Jehová.

OPEUJ TITLAPALEUIYAJ KEN MISIONEROS

Melak otiyolpakkej tomachtiskej imiuan 24 tokniuan ipan iTlamachtil Galaad número 83, tlen opeuj ipan abril de 1987 ne Brooklyn (Nueva York). Otechmachti tokniuj Ulysses Glass niman Jack Redford. Nion xotikmatkej kenijki opanok on makuijli metstin, otitlankej tomachtiaj ipan 6 de septiembre de 1987. Otechontitlankej Haití iuan tokniuj John niman Marie Goode.

Ne Haití xok komintitlaniyaj misioneros de Galaad desde 1962, ijkuak okinkixtijkej nochimej misioneros. Yeyi semana sakin ika yotikselijkaj iTlamachtil Galaad, opeuj titlapaleuiyaj ipan se tlanechikojli kampa san nemiyaj 35 tenojnotskej, yejuin tlanechikojli melak uejka nokauaya. Ipan kajli kampa chantiyaj misioneros san tejuamej ompa tichantiyaj, miyek nonekiya tiueliskej pampa san titelpokamej katkaj. Akin chantiyaj Haití xkipiayaj tomintsin niman miyekej xueliyaj tlaamapouayaj. Ijkuak ompa tichantiyaj otikitakej kenijki nokualanilo ipampa política, kinkixtisnekiyaj akin  ompa tlayekanayaj, miyekej komontsajtsiliayaj tekiuajkej niman kemantika ajakakiyauiya.

Melak miyek tlen otiuelkej intech tokniuan pampa melak tlaxikouayaj niman yolpakiyaj. Maski sekimej kixnamikiyaj tlen ouijtika, melak kitlasojtlayaj Jehová niman kuelitayaj tenojnotsaskej. Se tokniuj akin yelamajtsin maski xueliya tlaamapouaya yokintsontekontlalijka 150 textos. Nochi tlen tikitayaj techpaleuiaya más matiknekikan matikimijlikan oksekimej ika san iGobierno toTajtsin uelis nochi kiyektlalis tlen xkuajli. Melak tiyolpakij ika sekimej akin kachtopa otikinmachtijkej onochiujkej precursores regulares, precursores especiales niman tlayekankej.

Ijkuak tinemiyaj Haití onikixmat se telpochtli akin itoka Trevor, yejua katka misionero mormón, miyekpa iuan onitlajto itech Biblia. Ijkuak yopanoka seki xiujtin, melak onechmojkatlachialti pampa onechuajtitlanili se carta kampa kijtouaya: “¡Ninoapolaktis ipan toueyitlanechikol! Oksejpa nikneki nias Haití niman niprecursor especial yes ijkon ken ijkuak ompa ninemiya ken mormón”. Niman ompa onenkej miyek xiujtin iuan isiuatsin.

EUROPA NIMAN SAKIN ÁFRICA

Sakin, otechtitlankej Europa kampa yenotekauiliaya manotenojnotsa. Ipan 1992 otajsikej Liubliana (Eslovenia), nisiuj kampa notajuan chantiyaj achto yaskiaj Italia. Ijkuakon, Yugoslavia, tlen nokauaya ompa nisiuj, panotoya se guerra. Tokniuan akin nemij Sucursal de Viena (Austria) niman oficinas de Zagreb (Croacia) niman Belgrado (Serbia), yejuamej akin kitayaj kenijki notenojnotsas ompa. San ika, aman on naui países tlen okiskej itech Yugoslavia nochimej yekipiyaskiaj insucursal.

Kuakon, ononek tomajmachtiskej okse tlajtojli niman ononek titomatiskej ompa. Akin chantiyaj Eslovenia techijliayaj “Ježik je težik”, tlen kijtosneki “Yejuin tlajtojli melak ouijtika”. ¡Niman ouijtika otikitakej tiueliskej! Otechyolpakti tikitaskej kenijki tokniuan melajkanemiyaj niman kuajli kiseliayaj ijkuak ikalpan toTajtsin itlaj kipatlaya, niman kenijki Jehová kinteochiuaya ipampa yejon. Oksejpa otikitakej kenijki ika tlasojtlalistli Jehová kiyektlalia itlaj ijkuak kita ika yenoneki. Ijkuak tinemiyaj  Eslovenia miyek tlen otiuelkej, niman más otikpatiojkaitakej tlen yotiuelkaj yeuejkaui.

Ipan 2000 oksejpa ononek tejkuaniskej, otechtitlankej ipan Costa de Marfil, tlen nokaua África Occidental. San ika, ipan yejon país opeuj se guerra, ika yejon, ipan noviembre de 2002 otechuikakej Sierra Leona, kampa kemach yotlanka guerra tlen ouejkauj 11 xiuitl. Melak ouijtika otikitakej san totoka tikaujteuaskej Costa de Marfil, san ika, nochi tlen yotiuelkaj otechpaleui nochipa matiyolpakikan.

San tikitayaj kenijki tlaltikpakchanejkej kuajli techkakiyaj ijkuak tikinnojnotsayaj niman kenijki tokniuan akin uejkaujtipan yotlaxikojkej ipan guerra, melak tetlasojtlayaj. Maski yejuamej xmás miyek kinopiliayaj, kinektoyaj kitemakaskej tlen kipiayaj. Se tokniuj siuatl kinekiya kitlayokolis Debbie seki tlakentin, kachtopa Debbie xkinekiya kinselis, san ika, tokniuj ijkin okijli: “Ipan guerra, sekimej tokniuan itech okseki países melak otechpaleuijkej. Aman tejuamej noneki titepaleuiskej”. Yejua ika, tejuamej noijki opeuj tikchiuaj ken yejuamej.

Satepan oksejpa otokuepkej Costa de Marfil, san ika, oksejpa opeuj nochiua tlen melak xkuajli ipampa política. Yejua ika, ipan noviembre de 2004 otechanatoj ika se helicóptero niman xmiyek ouel otikitkikej. Otikochkej ipan tlajli kampa nemiyaj soldados franceses, niman uajmostla otechuikakej Suiza. Maski melak yetlayoua katka ijkuak otajsikej sucursal, tokniuan akin ompa tlayekanaj niman tokniuan akin temachtiaj ipan Escuela de Entrenamiento Ministerial niman insiuauan, ompa techchiatoyaj para technapaloskej, techtlakualtiskej niman techmakaskej chocolatl tlen ompa nochijchiua. Yejuin okichiuj melak kuajli matomachilikan.

Otechtitlankej Ghana, niman ijkuak xok más nochiuaya tlen xkuajli oksejpa otokuepkej Costa de Marfil. Ipan yejon tiempo ijkuak miyekpa ononek tikisaskej niman miyekkan yotechtitlankaj, tokniuan melak otechpaleuijkej. Maski ipan ikalpan Jehová noneki totlasojtlaskej, Debbie niman nejua otikijtojkej ika nochipa tikpatiojkaitaskiaj ken techtlasojtlaj tokniuan. Nochi tlen yotikixnamikkej yotechpaleui más kuajli matiktekichiuilikan Jehová.

OKSEKAN TECHTITLANIJ

Ipan 2006, oficina kampa noyekanaj nochi sucursales otechuajtitlanili se carta kampa techijliaya ika aman techtitlaniskiaj Asia occidental (Oriente Medio). Oksejpa miyek tlen topan nochiuaskia, nonekiskia titomatiskej, tiueliskej okse tlajtojli niman miyek tlen tikixnamikiskiaj. Nonekiya tikmatiskej tlenon tikchiuaskej pampa ompa melak nokalaktiayaj ipan política niman melak tlaneltokayaj. Maski ijkon, otikuelitakej ompa tinemiskej pampa otikimixmatkej miyekej tokniuan akin tlajtouayaj okseki tlajtoltin niman nochimej tokniuan kuajli nouikayaj pampa kitlakamatiyaj ikalpan toTajtsin. Melak techmojkatlachialtiaya tikitaskej kenijki tokniuan tlaxikouayaj maski kintlauelitayaj inchanejkauan, akin imiuan nomachtiayaj, akin imiuan tekitiyaj niman akin nisiuj chantiyaj.

Ipan 2012 otiajkaj se ueyitlanechikojli tlen onopanolti ne Tel Aviv (Israel). Xkeman tikilkauaskej yejuin ueyitlanechikojli tlen ompa onopanolti pampa desde ipan iluitl Pentecostés itech xiuitl 33 xok keman ijkon nosentlaliayaj.

 Ipan yejon xiujtin, otechtitlankej matikintlajpalotij tokniuan ipan se país kampa tokniuan xkinkauiliayaj makiueyichiuakan Jehová. Otikimitkikej seki toamatlajkuiloluan, otitenojnotskej niman otiajkej ipan seki toueyitlanechikoluan kampa xmiyekej onosentlalijkej. Maski ompa nemiyaj miyekej soldados niman miyekkan mitsteltiskej, xtitomojtiayaj pampa sekimej tokniuan techuikatinemiyaj niman techijliayaj tlenon xnonekiya tikchiuaskej.

TITOKUEPAJ ÁFRICA

Ipan 2013 otechtitlankej ipan isucursal Kinsasa (República Democrática del Congo). Yejuin país melak ueyi katka niman melak tlakualtsinkan, san ika, xonkatka tomintsin niman melak nomojmotlalouaya. Kachtopa otiknemilijkej: “Yotichantikaj África, kuakon, yetikmatstokej tlenon uelis tikixnamikiskej”. San ika, ok nonekiya tiueliskej kenijki tikistinemiskej kampa xonokej carreteras nion puentes. Maski ijkon, tikuelitayaj ompa tinemiskej pampa tikitayaj kenijki tokniuan tlaxikouayaj, yolpakiyaj maski xkipiayaj tomintsin, kuelitayaj tenojnotsaskej niman nokojtiliayaj yaskej tlanechikoltin niman ueyi tlanechikoltin. Otikitakej kenijki miyekej kuelitayaj nomachtiskej niman kenijki okinteochiuj Jehová. Nochi yejon tiempo tlen otinenkej Congo-Kinsasa melak miyek otiuelkej niman otikimixmatkej miyekej toamigos akin onochiujkej ken tochanejkauan.

Itlamiyan 2017 otechtitlankej Betel tlen onka Sudáfrica, yejon Betel más ueyi xken okseki kampa yotinenkaj, ompa otechmakakej tekitl tlen xkeman tikchiuayaj. Oksejpa nonekiya miyek tiueliskej, san ika, tlen yotiuelkaj yeuejkaui melak otechpaleui. Otikimixmatkej miyekej tokniuan akin youejkaujkaj kitekichiuilijtoyaj Jehová niman sajnoye otikintlasojtlakej. Otechmojkatlachialti tikitaskej kenijki tokniuan betelitas nochimej melak kuajli nouikayaj maski oksekan ualeuaj niman tlatlamantik ken onoskaltijkej. Kuajli otikitakej kenijki Jehová kichiua mayolseujtokan itekipanojkauan akin nokojtiliaj nopatlatiaskej niman kichiuaskej tlen kijtoua Biblia.

Ipan nochi yejuin xiujtin, Debbie niman nejua miyekkan yotitlapaleuijtinenkej, ononek tomatiskej kampa techtitlaniyaj niman yotiuelkej okseki tlajtoltin. Niman maski kemantika ouijtika tikitayaj, Jehová xkeman otechkauj niman otechpaleui itechkopa tokniuan niman ikalpan (Sal. 144:2). Nochi tlen yotiuelkej pampa chikauak yotiktekichiuilijkej Jehová, yotechpaleui más kuajli iuan matouikakan.

Melak niktlasojkamati ken onechiskaltijkej notajuan, ken yonechpaleui nosiuatsin Debbie niman tlen yoniuel intech tokniuan. Tejuamej yotikijtojkej ika nochipa tokauiliskej matechmachti toUeyi Tlamachtijkauj.