1. ¿Tlenon okiteijlikej inomachtijkauan Jesús ne Jerusalén?

MELAK miyekej tlakamej niman siuamej oyajkej Jerusalén. Ualeuayaj itech sesejneka países niman tlajtouayaj sesejneka tlajtoltin. Ipan yejon tonajli opanok itlaj tlen melak temojkatlachialti: miyekej judíos opeuj tlajtouaj ijkon ken tlajtouayaj akin ompa nemiyaj. San ika, más otemojkatlachialti tlen okijtokej yejon judíos niman tlen sakin okimijli apóstol Pedro. Yejua okimijli ika tla kinekiyaj makisaskej, nonekiya tlaneltokaskej itech Jesucristo. Tlen Pedro okijto oajsik ipan inyojlo nochimej akin ompa nemiyaj, yejua ika, okitlajtoltijkej: “¿Tlinon tikchiuaskej?”. Niman Pedro okinnankili: “Nemochimej xmoapolaktikan” (Hech. 2:37; Hech. 2:38, TNM).

2. ¿Tlenon tikitaskej ipan yejuin tlamachtijli? (Xkita tlaixkopinajli tlen onka ixpan yejuin revista).

² Ipan yejon tonajli, onoapolaktijkej kanaj 3,000 tlaltikpakchanejkej niman ijkon onochiujkej inomachtijkauan Cristo. Ijkon opeuj on tekitl tlen Jesús okinnauati inomachtijkauan. Niman tlen hasta aman tikchiujtokej. Ipan yejuin tonaltin, xsan se hora noneki tikmachtiskej yakaj para manoapolakti. Kemantika, uejkaui seki metstin, seki xiujtin noso noneki más tiempo. Akin temachtiaj kimatstokej ika noneki timokojtilis  tla tikneki kuajli titemachtis. Ipan yejuin tlamachtijli, tikitaskej kenon uelis tikinpaleuiskej manoapolaktikan akin tikinmachtiaj.

3. Itech tlen kijtoua Mateo 28:19, 20, ¿tlenon noneki kichiuas akin tikmachtijtokej tla kineki noapolaktis?

³ Tla akin tikmachtijtokej kineki noapolaktis, kachtopa noneki kichiuas tlen nomachtijtika ipan Biblia (xpoua Mateo 28:19, 20, TNM). * Ijkuak ijkon kichiua, kiteititia ika yejua tlamachilise ijkon ken on tlakatl akin okichijchiuj ikal ipan tepetlatl akin Jesús okiteneuj (Mat. 7:24, 25; Luc. 6:47, 48). Matikitakan tlenon uelis tikchiuaskej tla tiknekij tikpaleuiskej akin tikmachtijtokej makichiua tlen ueltiuj ipan Biblia.

4. ¿Kenon uelis tikpaleuiskej akin tikmachtiaj niman ijkon manoapolakti? (Noijki xkita recuadro “ Xpaleui akin tikmachtia makita tlenon uelis kichiuas”).

⁴ Matikpaleuikan akin tikmachtiaj makita tlenon kichiuas. ¿Tleka melak noneki matikpaleuikan? Matikonnemilikan yejuin, ijkuak kanaj tonpaxalouaj tiknemiliaj kanon uelis toteltijtiaskej, ijkon xtikmachiliskej tla melak uejka kampa tiauej. Noijki ijkon, ijkuak akin tikmachtiaj nimantsin kichiua tlen nomachtijtiuj, kipaleuis kitas ika kema uelis noapolaktis. ¿Kenon uelis tikpaleuiskej? Uelis tijkuiskej recuadro “Xchiua yejuin” tlen uajlauj ipan libro tlen itoka ¡Nochipa uelis tiyolpakis! Ijkuak yotitlankej se tlamachtijli, matikijlikan kenon yejon uelis kipaleuis makichiua ijkon ken yokinemili. Noijki, uelis tikijliskej makijkuilo okseki tlen kineki kichiuas kampa  kijtoua “Tlen noijki uelis tikchiuas”, tejuamej noijki uelis tikijkuiloskej. Ijkuak iuan tomachtijtoskej, matitlajtlajtokan itech tlen yokichiuj niman itech tlen uelis kichiuas nimantsin niman ika tlayekapan.

5. Itech tlen kijtoua Marcos 10:17-22, ¿tlenon okijli Jesús se tlakatl akin kipiaya miyek tomin, niman tleka?

⁵ Matikpaleuikan manopatla akin tikmachtiaj (xpoua Marcos 10:17-22). Jesús okijli se tlakatl akin kipiaya miyek tomin ika makinemaka nochi tlen kipiaya maski kimatstoya ika ouijtika yeskia (Mar. 10:23). ¿Tleka ijkon okijli? Pampa kitlasojtlaya. Kanaj kemantika xtikijliaj tlen noneki kichiuas akin tikmachtijtokej pampa tiknemiliaj ika xiuelis kichiuas. Melauak, se kemantika uejkaui para nopatlas niman kichiuas tlen toTajtsin kitlajtlanilia (Col. 3:9, 10). San ika, tla nimantsin tikijliaj tlenon uelis kipatlas, yejua más nimantsin nokojtilis kichiuas. Ijkuak ijkon tikchiuaj, tikititiaj ika tiktlasojtlaj (Sal. 141:5; Prov. 27:17).

6. ¿Tleka melak noneki matiktlajtoltikan akin tikmachtiaj tlenon kinemilia?

⁶ Melak noneki matiktlajtoltikan akin tikmachtiaj tlenon kinemilia. Tla ijkon tikchiuaj, uelis tikmatiskej tlenon kasikamatstiuj niman tlenon kineltoka. Niman ika tlayekapan uelis tikpaleuiskej makasikamati tlen más ouijtika. Ipan libro ¡Nochipa uelis tiyolpakis!, tiknextis tlenon uelis tiktlajtoltis akin tikmachtijtika. Ken ipan tlamachtijli 4 kijtoua: “¿Tiknemilia ika toTajtsin paki ijkuak tiknotsaj ika itoka?”. Niman ipan tlamachtijli 9 kijtoua: “¿Tlenon tikuelitaskia tikijlis toTajtsin ijkuak tiknotsas?”. Maski akin tikmachtiaj kanaj uejkauis para technankilis, matijkauilikan matlanemili. Uelis tikpaleuiskej tla tikmachtiaj matlanemili itech tlaxeloltin niman tlaixkopinaltin tlen uajnestiuej ipan tlamachtijli tlen tikitstokej.

7. ¿Kenon uelis kinpaleuis akin tikinmachtiaj tla tikimijliaj tlenon okichiujkej sekimej tokniuan?

⁷ Tla akin tikmachtiaj yokasikamat tlenon noneki kichiuas, matikyolchikauakan ijkon makichiua. Uelis tikijliskej kenon sekimej tokniuan youelkej ijkon yokichiujkej. Tla akin tikmachtijtokej ouijtika kita yas tlanechikoltin, uelis tikititiskej video Jehová najmana notech, tlen uajnestiuj ipan sección “Okseki xkita” itech tlamachtijli 14. Ipan sección “Okseki xkasikamati” niman “Okseki xkita” * itech libro ¡Nochipa uelis tiyolpakis!, tiknextis tlen yokinpaleui sekimej tokniuan. Maka matikijlikan akin tikmachtiaj: “¡Tla yejua ouel, tejua noijki tiuelis!”. Matijkauilikan san no yejua ijkon makinemili. Ijkuak nenkitaskej se video, xkijli tlen texto noso tlenon okipaleui tokniuj. Matokojtilikan matikijlikan kenon Jehová okipaleui yejon tokniuj.

8. ¿Kenon uelis tikpaleuiskej akin tikmachtiaj makitlasojtla Jehová?

⁸ Matikpaleuikan akin tikmachtiaj makitlasojtla Jehová. Nochipa matikijlikan tlenon melak kualtsin kichiua Jehová. Matikititikan ika Jehová yolpaki niman kuelita kinpaleuis akin kitlasojtlaj (1 Tim. 1:11; Heb. 11:6). Matikititikan kenon kipaleuis tla kichiua tlen nomachtijtiuj ipan Biblia. Niman matikasikamachiltikan ika Jehová techmachtia tlen melauak pampa techtlasojtla (Is. 48:17, 18). Tla akin tikmachtiaj más kitlasojtla Jehová, uelis nimantsin nopatlas (1 Juan 5:3).

9. Itech tlen kijtoua Marcos 10:29, 30, ¿tlenon uelis kipaleuis manoapolakti akin tikmachtiaj?

⁹ Tla akin tikmachtiaj kineki noapolaktis, noneki kikajkauas seki tlemach. Ijkon ken yejon  tlakatl akin kipiaya miyek tomin niman otikteneujkej ipan párrafo 5, kanaj akin tikmachtiaj noijki nonekis kikajkauas seki tlemach tlen kipiya. Sekimej kanaj hasta nonekis kikauaskej intekiyo, tla ompa nochiua tlen toTajtsin xkuelita. Sekimej kanaj xok uelis nouikaskej imiuan akin xkitlasojtlaj Jehová. Oksekimej kanaj kintlauelitaskej inchanejkauan. Jesús okijto ika sekimej ouijtika kitaskiaj kikajkauaskej nochi yejuin. San ika, Jesús noijki okijto ika Jehová kinteochiuaskia akin kitekichiuiliaj niman kinmakaskia miyekej amigos (xpoua Marcos 10:29, 30). ¿Kenon uelis tikpaleuiskej akin tikmachtiaj makinnexti amigos ipan tlanechikojli?

10. ¿Tlenon techmachtia tlen okijto Manuel?

¹⁰ Kuajli matouikakan iuan akin tikmachtiaj. Noneki tikititiskej ika tiknekij tikpaleuiskej. ¿Tleka? Matikitakan tlen kijtoua Manuel, se tokniuj akin chanti México. Yejua kijtoua: “Ijkuak opeuj ninomachtia Biblia, akin nechontlajpalouaya, nochipa nechtlajtoltiaya kenon ninemiya. Yejon nechpaleuiaya maka maninomojti niman manikijli tlen nikmachiliaya. Nikitaya ika melauak kinekiya nechpaleuis”.

11. ¿Tleka melak tepaleui tla tikxelouaj tiempo niman ijkon tosentlaliskej iuan akin tikmachtiaj?

¹¹ Ijkon ken Jesús okixelo tiempo niman ijkon onen imiuan inomachtijkauan, tejuamej noijki noneki tikxeloskej tiempo niman ijkon tinemiskej iuan akin tikmachtiaj (Juan 3:22). Tla tikitaj ika akin tikmachtiaj nopatlatiuj, uelis tiknotsaskej tochan. Uelis tikijliskej touan makoniti se café, touan matlakuati noso touan makitati JW Broadcasting. Melak kitlasojkamatis tla tiknotsaj, ijkuak ichanejkauan akin xnomachtiaj iluichiuaj, pampa ijkuakon kanaj san iselti nomachilis. Kazibwe, akin chanti Uganda, kijtoua: “Ijkuak ninosentlaliaya iuan akin nechmachtiaya, melak miyek niueliya itech Jehová, ijkon ken ijkuak nechonmachtiaya. Onikitak ika Jehová kineki ika itekipanojkauan kuajli manemikan  niman noijki onikitak ika melak yolpakij. Yejon tlen nejua noijki niknekiya”.

12. ¿Tleka melak tepaleui tla tiauej imiuan tlatlamantikej tokniuan ijkuak tontemachtiaj?

¹² Matitemachtitij imiuan tlatlamantikej tokniuan. Kemantika kanaj tikuelitaskej san toselti tontemachtiskej noso san no yejua tokniuj iuan tiaskej. San ika, akin tikmachtiaj, más noyolchikauas tla tiauej imiuan tlatlamantikej tokniuan. Tokniuj Dimitri, akin chanti Moldavia, kijtoua: “Ijkuak akin nechuajmachtiaya uajlaya imiuan tlatlamantikej tokniuan, nejua nochipa niueliya itlaj tlen yenkuik. Niman noijki xok más oninomojti ijkuak kachtopa oniaj ipan tlanechikojli, pampa inikimixmatiya miyekej tokniuan”.

13. ¿Tleka melak noneki matikyolchikauakan akin tikmachtiaj mauiya tlanechikoltin?

¹³ Matikyolchikauakan akin tikmachtiaj mauiya tlanechikoltin. ¿Tleka? Pampa ijkon yotechnauati Jehová niman pampa ijkon san sekan tikueyichiuaj (Heb. 10:24, 25). Noijki, pampa tokniuan akin nemij ipan tlanechikojli yeskiaj kentla tochanejkauan. Ijkuak san sekan tinemij ipan tlanechikojli, yeskia kentla san sekan titlakuajtoskiaj. Ijkuak tikyolchikauaj akin tikmachtijtokej mauiya tlanechikoltin, tikpaleuijtokej makichiua tlen noneki niman ijkon noapolaktis. San ika, kanaj onka itlaj tlen xkikauilia mauiya tlanechikoltin. ¿Kenon uelis tikpaleuiskej ika libro ¡Nochipa uelis tiyolpakis!?

14. ¿Kenon uelis tikyolchikauaskej akin tikmachtiaj mauiya tlanechikoltin?

¹⁴ Uelis tijkuiskej tlamachtijli 10 tlen uajlauj ipan libro ¡Nochipa uelis tiyolpakis! niman ijkon tikyolchikauaskej akin tikmachtiaj mauiya tlanechikoltin. Ijkuak xikisaya yejuin libro, okimijlikej sekimej tokniuan akin miyekej yokinmachtijkej makitekitiltikan tlamachtijli 10, niman melak kuajli tlen opanok. Yemelak, xnoneki tajsiskej ipan tlamachtijli 10 niman ijkon tikyolchikauaskej akin tikmachtiaj mauiya tlanechikoltin. Noneki nimantsin matikyolchikauakan mauiya tlanechikoltin niman maka matosiaujkauakan. Nochimej akin tikinmachtiaj tlatlamantik tlen kixnamikij. Yejua ika, matiknemilikan kenon uelis tikinpaleuiskej inseselti. Maka matosiaujkauakan niman maka matoyolkokokan tla akin tikmachtiaj xnimantsin yauj tlanechikoltin.

15. ¿Tlenon uelis kimojtis akin tikmachtiaj?

¹⁵ ¿Xmelak ika ijkuak opeuj tomachtiaj Biblia tomojtiayaj tochiuaskej iteixpantijkauj Jehová? Kanaj tiknemiliayaj ika xkeman ueliskia titenojnotsaskiaj techajchan. Noso xtiknekiyaj ika tochanejkauan niman toamigos matechtlauelitakan. Tla ijkon topan onochiuj, kuakon kuajli tikasikamatij kenon nomachilia akin tikmachtiaj. Jesús okijto ika miyekej ijkon nomachiliskiaj. San ika, yejua okimijli inomachtijkauan maka manomojtikan niman kuajli makitekichiuilikan Jehová (Mat. 10:16, 17, 27, 28). ¿Kenon okinpaleui maka sa manomojtikan? Niman ¿kenon tejuamej noijki ijkon uelis tikchiuaskej?

16. ¿Kenon uelis tikititiskej matenojnotsa akin tikmachtiaj?

¹⁶ Matikititikan akin tikmachtiaj kenon uelis tenojnotsas. Kuajli tikmatstokej ika inomachtijkauan Jesús onomojtijkej ijkuak okimijlikej ika nonekiya tenojnotsaskej. San ika, Jesús okimijli akinomej kinnojnotsaskiaj niman tlenon kimijliskiaj (Mat. 10:5-7). ¿Kenon uelis tikchiuaskej ijkon ken Jesús? Matikpaleuikan akin tikmachtiaj makita akinomej uelis kinnojnotsas. Uelis tiktlajtoltiskej tla kixmati yakaj akin kinekiskia kimatis itech iTlajtol toTajtsin. Sakin, matikmajmachtikan kenon  uelis kinojnotsas. Noijki, uelis tikmajmachtiskej kenon uelis tenojnotsas tla tikintekitiltiaj secciones “Sekimej kijtouaj” niman “Sekimej ueliskia kijtoskej”, tlen onka ipan libro ¡Nochipa uelis tiyolpakis! Ijkuak tikmajmachtiskej ika yejuin secciones, matikititikan kenon uelis tetlakaitas niman kenon uelis kitekitiltis Biblia ijkuak tenojnotsas.

17. ¿Kenon uelis tikpaleuiskej akin tikmachtiaj matlaneltoka itech Jehová ika tlen kijtoua Mateo 10:19, 20, 29-31?

¹⁷ Matikpaleuikan akin tikmachtiaj matlaneltoka itech Jehová. Jesús okimijli inomachtijkauan ika Jehová kinpaleuiskia pampa kintlasojtlaya (xpoua Mateo 10:19, 20, 29-31). Matikilnamiktikan akin tikmachtiaj ika Jehová noijki kipaleuis. Matikititikan ika melak noneki makitlajtlanili Jehová makipaleui ika tlen yokitlapejpeni. Franciszek, akin chanti Polonia, kijtoua: “Akin nechmachtiaya, ijkuak kichiuaya teoyotl, kitlajtlaniliaya toTajtsin manechpaleui ika tlen yoniktlapejpeni nikchiuas. Ijkuak onikitak kenon Jehová kinankiliaya, noijki nimantsin opeuj nikchiua teoyotl. Onikmachili ika Jehová onechpaleui ijkuak ononek nikijlis akin itech nitekitiya ika niaskia ipan ueyi tlanechikojli niman ipan tlanechikoltin”.

18. ¿Tlenon kimachilia Jehová ipampa nochi tlen kichiuaj akin temachtiaj itech Biblia?

¹⁸ Niman tla amantsin xakaj tikmachtijtokej itech Biblia, ¿uelis tikpaleuiskej yakaj manoapolakti? Kema. ¿Kenon? Tla tiauej iuan se tokniuj ijkuak ontemachtia. Kuajli nesi ika Jehová kineki kinpaleuis akin tikinmachtiaj itech Biblia. Noijki, Jehová kipatiojkaita nochi tlen tikchiuaj. Niman melak techtlasojtla pampa tikinpaleuiyaj makinisiuikan akin tikinmachtiaj (Is. 52:7).