1, 2. ¿Tlenon kijtoua Biblia intech sekimej tekiuajkej de Israel?

 BIBLIA kinteneua ipantsin 40 tlakamej akin tekiuajkej katkaj de Israel. Niman kuajli techijlia tlenon okichiujkej sekimej, hasta kijtoua ika sekimej tekiuajkej akin kichiuayaj tlen kuajli noijki okichiujkej tlen xkuajli. a Matikteneuakan David. Yejua se kuajli tekiuaj katka, hasta Jehová okijto: “Onechtokak ika nochi iyojlo. Niman yejua okichiu tlen kuajli ijkon ken nejua niknekiya” (1 Rey. 14:8). San ika, yejua oauilnen iuan se siuatl akin kipiaya iueuentsin niman okitak kenon ueliskia kimiktiskej iueuentsin yejon siuatl ipan guerra (2 Sam. 11:​4, 14, 15).

² Biblia noijki kinteneua sekimej xkuajkualtin tekiuajkej akin okichiujkej tlen kuajli. Matikteneuakan tekiuaj Rehoboam. Tikmatstokej ika Jehová okitak Rehoboam ken se tekiuaj akin xmelajkanemiya pampa okijto ika “okichiu tlen xkuajli” (2 Crón. 12:14). San ika, ijkuak Jehová okijli maka makimixnamiki 10 tribus de Israel niman makinkauili yejuamej makitlapejpenikan intekiuaj, yejua otetlakamat. Noijki, yejua “okinyeualtsauk ikan tepantli sekimej uejueyikalpanmej ne Judá para okinmanauij” (1 Rey. 12:​21-24; 2 Crón. 11:​5-12).

3. ¿Kanaj tlenon totlajtoltiaj, niman tlenon tikitaskej ipan yejuin tlamachtijli?

³ Tla nochimej tekiuajkej okichiujkej tlen kuajli niman okichiujkej tlen xkuajli, ¿tleka Jehová okijto ika sekimej yolmelajkej  katkaj niman oksekimej xyolmelajkej katkaj? Tla kuajli tomachtiaj yejuin, techpaleuis matikmatikan tlenon noneki tikchiuaskej niman ijkon tikyolpaktiskej Jehová. Ipan yejuin tlamachtijli tikitaskej yeyi tlemach tlen kitaya Jehová ijkuak kintlajtlakolmakaya tekiuajkej de Israel: tla kitlasojtlayaj ika nochi inyojlo, tla noyolkuepayaj ijkuak kichiuayaj se tlajtlakojli niman tla kiueyichiuayaj ijkon ken yejua kitlajtlaniya.

KITLASOJTLAYAJ JEHOVÁ IKA NOCHI INYOJLO

4. ¿Kenon kitaya Jehová tla se tekiuaj yolmelajki noso xyolmelajki?

⁴ Jehová kitaya ika se tekiuaj yolmelajki tla kitlasojtlaya ika nochi iyojlo, b ken tekiuaj Jehosafat. Biblia kijtoua ika yejua “okitlakaitak toTEKO ikan nochi iyojlo” (2 Crón. 22:9). Niman Josías noijki yolmelajki katka pampa Biblia kijtoua: “Xkaman onen sen rey, nion achtoj, nion sakin de yejua, yejuan onokuep itechika toTEKO ikan nochi iyojlo” (2 Rey. 23:25). San ika, Biblia noijki kinteneua tekiuajkej akin xyolmelajkej katkaj, ken Salomón. Yejua opeuj kichiua tlen xkuajli niman “xiuan onouikak toTEKO Dios ikan nochi iyojlo” (1 Rey. 11:4). Niman tekiuaj Abiyam noijki xyolmelajki katka pampa Biblia kijtoua ika yejua “xokitokak toTEKO Dios ika nochi iyojlo” (1 Rey. 15:3).

5. ¿Tlenon kijtosneki tiktekichiuilis Jehová ika nochi moyojlo?

⁵ Tiktekichiuilis Jehová ika nochi moyojlo kijtosneki tiktekichiuilis pampa tiktlasojtla niman tiktlakaita niman xtiktekichiuilis san pampa tikmatstok ika noneki ijkon tikchiuas noso pampa tiknemilia ika yejon tlen kuajli. Noijki, kijtosneki nochipa tiktlasojtlatos Jehová.

6. ¿Kenon uelis tiktlasojtlaskej Jehová ika nochi toyojlo? (Proverbios 4:23; Mateo 5:​29, 30).

⁶ ¿Kenon uelis tiktlasojtlaskej Jehová ika nochi toyojlo ijkon ken okichiujkej tekiuajkej akin omelajkanenkej? Xnoneki tikchiuaskej tlen ueliskia kichiuas maka sa matouikakan iuan Jehová. San seki matikteneuakan: noneki matotlajpiyakan ika tlen toyolpaktiaj, niman noneki kuajli matikitakan imiuan akinomej touikaj niman ijkon xpeuas tiknemiliskej ika melak noneki matotomintikan. Niman tla tikitaj ika yopeuj tikchiuaj tlen xkuajli, nimantsin matopatlakan (xpoua Proverbios 4:23; Mateo 5:​29, 30).

7. ¿Tleka noneki totlajpiyaskej ika tlen uelis kijtlakos toyojlo?

⁷ Melak noneki matiktlajpiyakan toyojlo, pampa tla xtiktlajpiyaj, ueliskia tiknemiliskej ika tla tiktekichiuilijtokej Jehová xtlaj uelis kijtlakos ken iuan touikaj. Para más kuajli tikasikamatiskej xkonnemili ika tinemi kampa melak tona. Tejua melak tatli pampa tikneki timoseselis. San ika ¿tlenon panoskia tla uejkauiskia tinemiskia ixko tonajli niman xtiaskia kampa tlaseuilpan? Oksejpa nimantsin tamikiskia. Noijki ijkon, xsan noneki tikchiuaskej tlen kichiuas más matonisiuikan itech Jehová. Ijkon ken xuejkauiskia tinemiskia ixko tonajli, noijki xnoneki tijkalaktiskej ipan toyojlo tlen ueliskia kijtlakos ken touikaj iuan Jehová (Efes. 2:2).

ONOYOLKUEPKEJ

8, 9. ¿Tlenon okichiujkej David niman Ezequías ijkuak okinyektlalijkej? (Xkita tlaixkopinajli tlen nesi ixpan yejuin revista).

⁸ Ken yotikteneujkaj, tekiuaj David okichiuj se ueyi tlajtlakojli. San ika, ijkuak Natán okitato niman okijlito tlen okichiujka, David onoyolyemanili niman onoyolkuep (2 Sam. 12:13). David, xsan okiteititi ika onoyolkuep para makita Natán noso para maka itlaj  makichiuilikan. Tlen okijkuilo ipan Salmo 51 techititia ika melauak onoyolkuep (Sal. 51:​3, 4, 17).

⁹ Tekiuaj Ezequías noijki otlajtlako. Biblia kijtoua ika yejua “sanoyej onoueyimat. Yejua ika, toTEKO okualan iuan niman no iuan Judá niman Jerusalén” (2 Crón. 32:25). ¿Tleka opeuj noueyimati? Kanaj pampa Jehová nochi okimakak, kanaj pampa okipaleui makintlani asirios noso pampa okikixtili se kokolistli tlen ueliskia kimiktis. Niman pampa opeuj noueyimati, yejua okimititi Babilonios nochi tlen kipiaya. Ika yejon, teotlajtoketl Isaías okiyektlali (2 Rey. 20:​12-18). San ika, Ezequías onoyolyemanili niman onoyolkuep, ijkon ken okichiuj David (2 Crón. 32:26). Niman ijkuak Jehová okitak nochi tlen okichiuj Ezequías, yejua okitak ken se tekiuaj akin omelajkanen. Biblia kijtoua: “On yejuan okichiu Ezequías okipaktij toTEKO” (2 Rey. 18:3).

10. ¿Tlenon okichiuj Amasías ijkuak okijlikej ika xkuajli tlen kichiujtoya?

¹⁰ Maski Amasías akin tekiuajtitoya Judá okichiuj tlen kuajli, xokichiuj “ika nochi iyojlo” (2 Crón. 25:2). ¿Tlenon xkuajli okichiuj? Sakin ika Jehová yokipaleuijka makintlani edomitas, yejua opeuj kinueyichiua intajtsitsinuan edomitas. c Sakin, ijkuak Jehová okontitlan se teotlajtoketl makijliti tlen xkuajli kichiujtoya, yejua melak onoueyimat niman xokinek okikak (2 Crón. 25:​14-16).

11. Ijkon ken kijtoua 2 Corintios 7:​9, 11, ¿tlenon noneki tikchiuaskej tla tiknekij matechtlapopolui Jehová? (Noijki xkimita tlaixkopinaltin).

¹¹ ¿Tlenon tiuelij itech yejuin tekiuajkej? Ika tla yotitlajtlakojkej, noneki toyolkuepaskej niman tokojtiliskej para maka sa ijkon matikchiuakan. ¿Niman tla kemantika tlayekankej techmelajkatlaliaj ipan tlen tejuamej tikitaj ika xmás noneki? Maka matiknemilikan ika xok tikyolpaktiaj Jehová noso ika tlayekankej techtlauelitaj, pampa hasta tekiuajkej akin okichiujkej tlen kuajli ononek kinpaleuiskej niman kinmelajkatlaliskej (Heb. 12:6). Kuakon ¿tlenon noneki tikchiuaskej tla techmelajkatlaliaj? 1) Matiyolyemankej, 2) matokojtilikan maka sa ijkon matikchiuakan niman 3) matiktekichiuilijtokan Jehová ika nochi toyojlo. Tla toyolkuepaj, Jehová techtlapopoluis (xpoua 2 Corintios 7:​9, 11).

OKIUEYICHIUJKEJ JEHOVÁ IJKON KEN YEJUA KITLAJTLANIYA

12. ¿Kenon nesiya se tekiuaj yolmelajki niman se tekiuaj xyolmelajki?

¹² Jehová kimitaya yolmelajkej tekiuajkej akin kiueyichiuayaj ken yejua kitlajtlaniya niman kimijliayaj oksekimej noijki makiueyichiuakan. Maski kemantika nopopolouayaj, yejuamej san kiueyichiuayaj Jehová niman nokojtiliayaj kinpopoloskej tajtsitsintin ipan ikalpan. d

13. ¿Tleka Jehová okitak tekiuaj Acab ika xyolmelauak katka?

¹³ Aman matitlajtokan intech tekiuajkej akin Jehová okimitak ika xyolmelajkej. Yejuamej okichiujkej tlen melak xkuajli, san ika, kemantika noijki okichiujkej tlen kuajli, ken tekiuaj Acab. Yejua onoyolyemanili niman xkuajli onomachili ijkuak okimat ika ipampa okimiktijkej Nabot (1 Rey. 21:​27-29). Noijki okinchijchiuj kalpamej niman miyekpa otetlan ipan guerra (1 Rey. 20:​21, 29; 22:39). San ika, Acab okichiuj itlaj tlen melak xkuajli niman xkeman onoyolkuep. Okichiuj  ika sekimej makinueyichiuakan tajtsitsintin tlen xmelajkej san pampa isiuauj ijkon okijli (1 Rey. 21:​25, 26).

14. a) ¿Tleka Jehová okitak ika Rehoboam xomelajkanen? b) ¿Tlenon okichiujkej miyekej tekiuajkej akin xoyolmelajkanenkej?

¹⁴ Aman matitlajtokan itech tekiuaj Rehoboam akin noijki xomelajkanen. Ken otikijtojkej ipan párrafo 2, Rehoboam okichiuj miyek tlen kuajli. San ika, ijkuak “okimat ika ye kipiyaya poder”, xok okintlakamat itlanauatiluan Jehová niman opeuj kinueyichiua tajtsitsintin tlen xmelajkej (2 Crón. 12:1). Desde ijkuakon, kemantika kiueyichiuaya Jehová niman kemantika kinueyichiuaya tajtsitsintin (1 Rey. 14:​21-24). Xsan Rehoboam niman Acab okikajkaujkej ika kuajli kitekichiuiliayaj Jehová. Melak miyekej tekiuajkej akin xoyolmelajkanenkej opeuj kinueyichiuaj tajtsitsintin tlen xmelajkej niman okinyolchikaujkej oksekimej noijki ijkon makichiuakan. Kuakon, yejuin techititia ika Jehová kitaya tla se kuajli tekiuaj katka noso xkuajli tekiuaj katka tla kiueyichiuaya ken yejua kitlajtlaniya.

15. ¿Tleka Jehová melak kipatiojkaitaya ken kiueyichiuayaj?

¹⁵ Jehová melak kipatiojkaita ken kiueyichiuaj. Yejua okintlali tekiuajkej niman ijkon makipaleuikan ikalpan makiueyichiuakan ijkon ken noneki. San ika, ijkuak yejuamej kinueyichiuayaj tajtsitsintin, peuayaj kichiuayaj tlen xok kinamikiya niman kichiuayaj okseki tlajtlakojli (Os. 4:​1, 2). Noijki, tekiuajkej niman israelitas yonosentemakakaj itech Jehová, kuakon, ijkuak yejuamej kinueyichiuayaj tajtsitsintin, Biblia kijtoua ika kentla kikajkayaujtoskiaj imixnamik (Jer. 3:​8, 9). Ijkuak yakaj kikajkayaua isiuauj noso iueuentsin,  melak kiyolkokoua. Noijki ijkon, ijkuak yakaj akin yonosentemakak itech Jehová peua kinueyichiua tajtsitsintin, melak kiyolkokoua Jehová (Deut. 4:​23, 24). e

16. ¿Kenon kita Jehová tla yakaj yolmelauak noso xyolmelauak?

¹⁶ ¿Tlenon techmachtia nochi tlen yotikitakej? Ika xnoneki tokalaktiskej ipan tlaneltokijli tlen xmelauak. Niman xsan yejon, noneki nochipa tikueyichiuaskej Jehová ken yejua kuelita niman chikauak tiktekichiuilijtoskej. Teotlajtoketl Malaquías okijto tlenon kichiua ika Jehová makita tla yakaj yolmelajki noso xyolmelajki: “Nemejuamej oksejpa nenkitaskej kenon xsan noijki se akin yolmelajki niman se xkuajli tlakatl, se akin kitekichiuilia toTajtsin niman se akin xkitekichiuilia” (Mal. 3:18). Yejua ika, maski kemantika topopoloskej maka matikauilikan ika yejon makichiua matiktlalkauikan toTajtsin. Ijkuak yakaj kikaua Jehová, kichiua se ueyi tlajtlakojli.

17. ¿Tleka se noneki kuajli kitlapejpenis iuan akin nonamiktis?

¹⁷ Tla tejua titelpochtli noso tiichpochtli niman tiknemilijtika timonamiktis, melak mitspaleuis tlen okijto Malaquías para kuajli tiktlapejpenis iuan akinon timonamiktis. Xnemili yejuin: tla yakaj kinpiya kualtsitsintin kualneskayomej, san ika, xkitekichiuilia Jehová ¿tiknemilia ika Jehová kita ken yakaj akin yolmelajki? (2 Cor. 6:14). Tla iuan timonamiktia, ¿mitspaleuis kuajli xtekichiuili Jehová? Xkilnamiki tlen ipan opanok tekiuaj Salomón, isiuauan akin xisraelitas katkaj kanaj kipiayaj kualtsitsintin kualneskayomej, san ika, xkitekichiuiliayaj Jehová. Niman ika yolik isiuauan okichiujkej makinueyichiua okseki tajtsitsintin (1 Rey. 11:​1, 4).

18. ¿Tlenon noneki kinmachtiskej tatajtin inkoneuan?

 ¹⁸ Tatajtin, xmomachtikan imiuan nemokoneuan tlen yeuejkaui okichiujkej tekiuajkej niman ijkon makinekikan makitekichiuilikan Jehová. Melak noneki makasikamatikan ika ijkuak se tekiuaj kinpaleuiyaya oksekimej makitekichiuilikan Jehová, Jehová kitaya ken se kuajli tekiuaj. San ika, akin xijkon kichiuaya kitaya ken se xkuajli tekiuaj. Xkinmachtikan nemokoneuan ika melak noneki kachtopa makitekichiuilikan Jehová: noneki kiamapouaskej inBiblia, yaskej tlanechikojli niman ontenojnotsaskej. San ika, nemejuamej noijki ijkon xchiuakan para ijkon nemotech mauelikan (Mat. 6:33). Tla xijkon nenkichiuaj, nemokoneuan ueliskia kinemiliskej ika noneki nochiuaskej iteixpantijkauan Jehová san pampa nemejuamej ijkon onenkichiujkej, niman sakin ueliskia xok kuajli kitekichiuiliskej Jehová noso hasta ueliskia kikauaskej Jehová.

19. Tla yakaj xok kitekichiuilia Jehová, ¿uelis oksejpa iuan nouikas? (Noijki xkita recuadro “ Tejua uelis timokuepas itech Jehová”).

¹⁹ Niman tla yakaj xok kitekichiuilia Jehová, ¿uelis oksejpa iuan nouikas? Kema, pampa uelis noyolkuepas. San ika, kanaj nonekis noyolyemanilis niman kinektos ika tlayekankej makipaleuikan (Sant. 5:14). Niman tla kichiua nochi tlen noneki para uelis oksejpa kiyolpaktis Jehová, melak yolpakis.

20. ¿Tlenon kijtos motech Jehová tla tikchiua ijkon ken tekiuajkej akin omelajkanenkej?

²⁰ Kuakon, ¿tlenon tiuelij intech tekiuajkej de Israel? Ika tla tiktlasojtlaj Jehová ika nochi toyojlo, tiyeskej ijkon ken tekiuajkej akin omelajkanenkej. Ijkuak topopoloskej, matoyolkuepakan niman matopatlakan para maka oksejpa ijkon matikchiuakan. Noijki otiuelkej ika melak noneki san matiktekichiuilikan toTajtsin akin melauak. Niman tla tejua timelajkanemi itech Jehová, yejua noijki kijtos ika tejua timelajki.