1, 2. ¿Tleka tikijtouaj ika tejuamej tiyeskiaj ijkon ken yejon ueyi kajli tlen onochijchiuj ne Tokio? (1 Corintios 15:58).

 IPAN 1978, ne Tokio (Japón), opeuj kichijchiuaj se ueyi kajli tlen kipiya 60 pisos. Akin ompa panouayaj notlajtoltiayaj tla yejon kajli tlaxikoskia ijkuak chikauak tlaloliniskia, niman kema otlaxiko. ¿Tleka? Pampa akin okichijchiujkej yejuin ueyi kajli okichiujkej ika machikauak niman noijki maueli achijtsin manoolini para uelis tlaxikos niman xtlapanis ijkuak tlalolinis. Akin tikchiuaj ken Cristo noijki tiijkomej ken yejon ueyi kajli. ¿Tleka ijkon tikijtouaj?

² Ijkon ken yejon kajli melak chikauak, akin kitekichiuilia Jehová noijki noneki yolchikauak yes ijkuak kintlakamatis itlanauatiluan Jehová. San ika, noijki noneki teasikamatis (xpoua 1 Corintios 15:58). Noneki nochipa kinektos kintlakamatis itlanauatiluan toTajtsin. Yejua noijki kichiua ijkon ken yejon kajli tlen achijtsin ueli noolinia. ¿Kenon? Ijkuak kiteititia ika kimasikamati oksekimej niman kinektika ika itlaj achijtsin manopatla (Sant. 3:17). Tla ijkon tikchiuaj, titeasikamatiskej ijkuak tikitaskej ika noneki, san ika, xtiknemiliskej ika uelis tikchiuaskej nochi tlen tiknekij. Ipan yejuin tlamachtijli tikitaskej kemanon nonekis tikteititiskej ika tichikaujkej ijkon ken yejon kajli. Noijki tikitaskej makuijli tlemach tlen Satanás kitekitiltia para kichiuas maka matimelajkanemikan.

3. ¿Tlenon techijlia Jehová ipan Hechos 15:28, 29?

³ San Jehová kinamiki makintemaka tlanauatiltin, niman desde yeuejkaui yokualijlijtiaj ikalpan tlenon noneki kichiuas  (Is. 33:22). Matontlanemilikan itech tlen okichiuj grupo akin tlayekanaya ipan kachtopa siglo. Tokniuan okijtokej ika noneki timelajkanemiskej itech yejuin: 1) ika noneki san Jehová tikueyichiuaskej niman xnoneki tikinueyichiuaskej tajtsitsintin, 2) ika noneki tikpatiojkaitaskej yestli niman 3) ika xnoneki tiauilnemiskej (xpoua Hechos 15:28, 29). ¿Kenon uelis tikteititiskej ipan yejuin tonaltin ika ijkon tikchiuaj?

4. ¿Tlenon xtikchiuaskej tla san tikueyichiuaj Jehová? (Apocalipsis 4:11).

⁴ San Jehová matikueyichiuakan niman maka matikinueyichiuakan tajtsitsintin. Jehová okinnauati israelitas ika san yejua makiueyichiuakan (Deut. 5:6-10). Ijkuak Diablo okitlatlatak, Jesús okijto ika noneki san Jehová tikueyichiuaskej (Mat. 4:8-10). Yejua ika, tejuamej xtikinueyichiuaj tajtsitsintin. Xtikinueyichiuaj akin tlayekanaj ipan tlaneltokiltin, políticos noso akin melak kimixmatij. Tejuamej san tikueyichiuaj Jehová, toTajtsin akin nochi okichijchiuj (xpoua Apocalipsis 4:11).

5. ¿Tleka tikpatiojkaitaj nemilistli niman yestli?

⁵ Matikpatiojkaitakan nemilistli niman yestli. ¿Tleka? Pampa Jehová kijtoua ika toyesyo kijtosneki tonemilis niman yejua akin otechtlayokoli tonemilis (Lev. 17:14). Ijkuak Jehová kemach okimijli tlaltikpakchanejkej ika ueliskia kikuaskej nakatl, okimijli maka makikuakan yestli (Gén. 9:4). Niman noijki ijkon okinnauati israelitas itechkopa Tlanauatijli tlen okimakak Moisés (Lev. 17:10). Niman, ipan kachtopa siglo okichiuj ika Grupo akin Tlayekana makimijli tokniuan ika xnonekiya kikuaskej yestli (Hech. 15:28, 29). Ijkuak tejuamej kuajli tiktlapejpeniaj kenon topajtiskej, tikteititiaj ika noijki tikpatiojkaitaj yestli. b

6. ¿Tlenon uelis techpaleuis maka matiauilnemikan?

⁶ Matokojtilikan niman ijkon xtiauilnemiskej (Heb. 13:4). Apóstol Pablo ijkin okijto: “Xpopolokan nochi tlen xkuajli nemotech onkaj”. Ika yejuin tlajtoltin, yejua techijlitika ika noneki tikinpopoloskej nochi xkuajli ileuilistin. Ika yejon, xtikchiuaj noso xtikitaj itlaj tlen uelis kichiuas matiauilnemikan (Col. 3:5; Job 31:1). Niman ijkuak tikixnamikij se tlatlatalistli, tokojtiliaj xtiknemiliskej noso xtikchiuaskej itlaj tlen uelis kichiuas maka sa matouikakan iuan toTajtsin.

7. ¿Tlenon noneki tikchiuaskej, niman tleka?

⁷ Jehová kineki matiktlakamatikan ika nochi toyojlo (Rom. 6:17). Nochi tlen yejua technauatia techpaleuiya, niman xuelis tikinpatlaskej itlanauatiluan (Is. 48:17, 18; 1 Cor. 6:9, 10). Tiknekij tikyolpaktiskej Jehová niman tikchiuaskej ijkon ken se salmista, akin okijto: “Ikan nochi noyojlo yonikijtoj para nikintla[ka]matis motlanauatiluan desde aman hasta kaman nimikis” (Sal. 119:112). Tikmatstokej ika Satanás kinektika kichiuas maka sa matimelajkanemikan. ¿Tlenon kitekitiltia?

8. ¿Tleka Satanás kichiua matechixnamikikan?

⁸ Kichiua matechtlaueltokakan. Pampa Satanás xkineki matimelajkanemikan kichiua matechixnamikikan. Yejua kineki maka sa matouikakan iuan Jehová (1 Ped. 5:8). Tokniuan akin onenkej ipan kachtopa siglo okimijlikej maka sa matenojnotsakan, okinuisojkej niman sekimej hasta okinmiktijkej pampa kitlakamatstoyaj toTajtsin (Hech. 5:27, 28, 40; 7:54-60). Aman, Satanás noijki kichiua matechtlaueltokakan. Ijkon tikitaj ipampa tlen kinchiuiliaj tokniuan de Rusia niman okseki países. Niman ipan nochi tlaltikpaktli miyekej nokniuan noijki kimixnamikij.

9. ¿Tleka noneki titlatlachixtoskej para tikitaskej ijkuak Satanás texchiualtisnekis matikchiuakan itlaj tlen xkuajli? Xkijto se neskayotl.

 ⁹ Ijkuak xnimantsin nesi tla texchiualtijtokej itlaj matikchiuakan. Kemantika xnimantsin nesi tla Satanás texchiualtisneki matikchiuakan itlaj tlen xkuajli (Efes. 6:11). Matikitakan tlenon ipan onochiuj tokniuj Bob. Yejua nemiya ipan hospital pampa kichiuiliskiaj se ueyi operación. Yejua okimijli tlapajtikej ika maski san tlenon panoskia, xkiseliskia yestli. Cirujano okijli ika kitlakaitaskia tlen yejua yokitlapejpenijka. Se yeuajli achto kichiuiliskiaj operación, sakin ika yoyajka ifamilia Bob, akin kitetlalilia anestesia okitato. Okijli ika kanaj xkitlaliliskiaj yestli, san ika, ompa nisiuj kipiyaskiaj para tla nonekiskia kitlaliliskej. Kanaj yejon anestesista okinemili ika Bob kijtoskia kema makitlalilikan yestli pampa xok ompa nemiya ifamilia. San ika, Bob okijto ika maski san tlenon panoskia yejua xkiseliskia yestli.

10. ¿Tleka uelis techijtlakos ken tlanemiliaj akin xkitekichiuiliaj Jehová? (1 Corintios 3:19, 20).

¹⁰ Ken tlanemiliaj akin xkitekichiuiliaj Jehová. Tla peua titlanemiliaj ijkon ken akin xkitekichiuiliaj Jehová, ueliskia tijkauaskej toTajtsin niman xok tikintlakamatiskej itlanauatiluan (xpoua 1 Corintios 3:19, 20). “Tlamatkilistli yejuan kisa ipan in tlaltikpaktli” san kichiua matiknekikan matikchiuakan tlen tejuamej tikileuiyaj. Matikitakan tlenon opanok ipan tlanechikoltin tlen onkatkaj Pérgamo niman Tiatira. Sekimej tokniuan opeuj tlanemiliaj ijkon ken akin xkitekichiuiliayaj Jehová, akin auilnemiyaj niman akin kinueyichiuayaj tajtsitsintin. Jesús okinchikajkanots yejuin ome tlanechikoltin pampa xtlaj kimijliayaj akin auilnemiyaj (Apoc. 2:14, 20). Ipan yejuin tonaltin, akin xkitekichiuiliaj toTajtsin noijki kinekij matitlanemilikan ijkon ken yejuamej. Kanaj sekimej tochanejkauan noso akin tikimixmatij techijliaj matoyekanakan ika tlen tikmachiliaj niman maka matikintlakamatikan itlanauatiluan Jehová. Kanaj techijliskej ika xtlaj panoua tla tikchiuaj tlen tikileuiyaj niman ika tlen kijtoua Biblia xok techpaleuiya.

11. ¿Tlenon xnoneki tikchiuaskej?

¹¹ Kemantika uelis tiknemiliskej ika Jehová noneki más kuajli techimasikamachiltis itlanauatiluan. Kanaj hasta tiknekiskej tikchiuaskej “okseki tlemach tlen xok ijkuiliujtok” (1 Cor. 4:6, TNM). Ipan itonaluan Jesús, akin tlayekanayaj ipan tlaneltokiltin yejon okichiujkej. Okiteijlikej makichiuakan itlaj tlen xok uajlaya ipan iTlajtol toTajtsin. Niman yejon okichiuj ika oksekimej makitakan ouijtika kitekichiuiliskej Jehová (Mat. 23:4). San ika, Jehová, ika iTlajtol niman ikalpan kuajli techijlia tlenon tikchiuaskej. Xnoneki itlaj okse tiktlaliliskej (Prov. 3:5-7). Ika yejon, xsan tikuajnemiliaj tikintlaliskej okseki tlanauatiltin ipan Biblia niman noijki xtikimijliaj tokniuan tlenon noneki kichiuaskej tla yejon san no yejuamej noneki kitlapejpeniskej.

12. ¿Kenon Satanás kisemoyaua “temachtilistli tlen xmelauak”?

¹² “Temachtilistli tlen xmelauak”. Satanás kitekitiltia “temachtilistli tlen xmelauak” niman “intemachtil niman incostumbre on tlaltikpaktlakamej” para tekajkayauas niman texelos (Col. 2:8). Ijkon okichiuj ipan kachtopa siglo. Okichiuj ika sekimej judíos matemachtikan tlen xuajlaya ipan Biblia. Niman noijki okichiuj ika oksekimej makineltokakan ika ok nonekiya noyekanaskej ika iTlanauatil Moisés. Nochi yejuin katka “temachtilistli tlen xmelauak” pampa xkichiuaya makiueyichiuakan Jehová, akin itech ualeua tlamachilistli. Aman, Satanás kitekitiltia miyek tlemach niman ijkon kichiuas manosemoyaua tlen xmelauak temachtiaj akin tlayekanaj ipan política. Desde ijkuak opeuj kokolistli COVID-19,  opeuj miyekan noijtoua tlen xmelauak. c Tokniuan akin okitlakamatkej tlen ikalpan toTajtsin okimijli, xinpan onochiuj tlen okixnamijkej akin okineltokakej tlen xmelauak (Mat. 24:45).

13. ¿Tleka xnoneki tijkauiliskej ika itlaj makichiua maka kuajli matiktekichiuilikan Jehová?

¹³ Tlen kichiua maka kuajli matiktekichiuilikan Jehová. Maka matikilkauakan ika noneki tiktlapejpeniskej “on tlen más kuajli” (Filip. 1:9, 10). Tla san nochipa titlakuajtokej, titlaonitokej, toyolpaktijtokej niman titekititokej, uelis techkuilis miyek tiempo niman xok uelis tikchiuaskej tlen más techpaleuis (Luc. 21:34, 35). Mojmostla tijkakij kenon políticos xnotlajtolnamikij niman kenon oksekimej kichiuaj marchas. Maka matijkauilikan ika yejon matechijtlako. Noijki, xnoneki tikitaskej noso tijkakiskej kenon políticos xnotlajtolnamikij. Pampa, tla ijkon tikchiuaj, uelis tikinpaleuiskej maski san ipan toyojlo. Satanás kikui yejuin makuijli tlemach niman ijkon kichiuas maka matimelajkanemikan. Matikitakan tlenon uelis techpaleuis tikixnamikiskej Satanás niman timelajkanemiskej.

14. ¿Tlenon uelis techpaleuis matimelajkanemikan itech Jehová?

¹⁴ Matiknemilikan tleka otosentemakakej niman otoapolaktijkej. Otikchiujkej yejuin pampa tiknekiyaj tiktekichiuiliskej Jehová. Xkilnamiki tlenon omitspaleui niman ijkon tikmatis ika timomachtijtoya tlen melauak. Otikixmat Jehová niman otikitak ken moTajtsin akin nemi iluikak, otiktlakaitak niman opeuj más tiktlasojtla. Ochikauj motlaneltok niman yejon okichiuj xmoyolkuepa itech tlen xkuajli yotikchiujka. Tejua otijkauj ika tikchiua tlen Jehová kitlauelita niman opeuj tikchiua tlen yejua kuelita. Otiyolseuj ijkuak otikmat ika toTajtsin yomitstlapopoluijka (Sal. 32:1, 2). Otikijto tias tlanechikoltin niman tikimijlis oksekimej nochi tlen kualtsin yotiuelka. Aman ika yotimosentemakak niman yotimoapolakti tinejnentiuj ipan yejon ojtli tlen teuika kampa  nemilistli niman xtikneki tijkauas yejon ojtli (Mat. 7:13, 14).

15. ¿Kenon techpaleuiya tla tomachtiaj iTlajtol toTajtsin niman itech titlanemiliaj?

¹⁵ Matomachtikan iTlajtol toTajtsin niman itech matitlanemilikan. Se kojtli noneki uejkatlan kinpiyas ineluayouan niman ijkon xuetsis. Noijki ijkon, tejuamej noneki chikauak titlaneltokaskej itech iTlajtol toTajtsin niman ijkon xtiuetsiskej niman timelajkanemiskej. Ijkuak se kojtli noskaltijtiuj, ineluayouan noijki noskaltijtiuej niman más tlalkalaktiuej. Ijkuak tomachtiaj Biblia niman itech titlanemiliaj, chikaui totlaneltok niman más tikneltokaj ika tlen toTajtsin temachtia yejon tlen techpaleuis (Col. 2:6, 7). Matitlanemilikan itech kenon itekipanojkauan Jehová, akin yeuejkaui onenkej, okinpaleui tlen yejua okimijli makichiuakan. Matitlajtokan itech Ezequiel, yejua melak ochikauj itlaneltok ijkuak okitak ipan se tlatlachalistli kenon se ángel kitemachiujtoya templo. Tlen okitak Ezequiel xsan yejua okichikauili itlaneltok, tejuamej noijki miyek tlen techmachtia itech kenon tikintlakaitaskej itlanauatiluan Jehová niman tikueyichiuaskej ken yejua kuelita (Ezeq. 40:1-4; 43:10-12). d Tejuamej noijki techpaleuiya tla tikxelouaj tiempo niman ijkon tomachtiskej tlen más ouijtika itech iTlajtol toTajtsin niman itech titlanemiliaj.

16. ¿Tlenon okipaleui Bob mayolmelajkanemi? (Salmo 112:7).

¹⁶ Matiyolmelajkanemikan. Ipan se tlakuikajli, tekiuaj David okijto ika nochipa kitlasojtlaskia Jehová niman ika nochipa itech yolmelajkanemiskia (Sal. 57:7). Tejuamej noijki uelis ijkon tikchiuaskej: uelis tiyolmelajkanemiskej niman nochipa titlaneltokaskej itech Jehová (xpoua Salmo 112:7). Oksejpa matitlajtokan itech Bob, akin otikteneujkej ipan párrafo 9. ¿Tlenon okipaleui mayolmelajkanemi? Ijkuak okijlikej ika ompa kipiyaskiaj yestli, yejua okijto ika tla kinemilijtoyaj kitlaliliskej nimantsin yaskia. Bob kijtoua: “Nion achijtsin xoniometlamat niman xnechajmanaya tlen ueliskia panos”.

17. ¿Tlenon tiuelij itech tlen ipan onochiuj Bob? (Noijki xkita tlaixkopinajli).

 ¹⁷ Desde yeuejkaui, Bob yokijtojka kitlakamatiskia Jehová, xononek kichias yas ipan hospital para kitlapejpenis yejon. Kachtopa, yejua melak kinekiya kiyolpaktis Jehová. Ika ome, onomachti Biblia niman toamatlajkuiloluan itech kenon Jehová kita nemilistli niman yestli. Niman sa ika tlami, kuajli kimatstoya ika Jehová kiteochiuaskia tla kintlakamatiya itlanauatiluan. Ijkon ken Bob, tejuamej noijki uelis tiyolmelajkanemiskej ijkuak itlaj tikixnamikiskej.

18. ¿Tlenon techmachtia tlen ipan onochiuj Barac? (Xkita tlaixkopinajli tlen nesi ixpan yejuin revista).

¹⁸ Matitlaneltokakan itech Jehová. Matitlanemilikan itech juez Barac, niman kenon melak kuajli okisato pampa okichiuj tlen Jehová okijli. Ijkuakon, israelitas xkipiayaj nochi tlen nonekiya para tlaixnamikiskiaj, xkipiayaj nion se escudo niman nion se lanza. Maski ijkon, Jehová okijli Barac makixnamikiti Sísara niman isoldados cananeos maski yejuamej miyek kipiayaj tlen ika tlaixnamikiskej (Juec. 5:8). Siuateotlajtoketl Débora okijli Barac mauajtemo ipan tepetl Tabor niman mauiya ipan tlalmantli para kixnamikis Sísara, akin yaya ika 900 carros. Maski nesiya ika ipan tlalmantli tetlaniskiaj akin kinuikayaj incarros, Barac otetlakamat. Ijkuak soldados uajtemotoyaj itech tepetl, Jehová okichiuj chikauak makiyaui. Carros opeujkej sokikalakij niman Jehová okichiuj ika Barac matetlani (Juec. 4:1-7, 10, 13-16). Jehová noijki uelis techpaleuis. Yejua kichiuas nochi kuajli makisati tla itech titlaneltokaj niman tla tikchiuaj tlen techijlia ikalpan (Deut. 31:6).

19. ¿Tleka tikneki nochipa timelajkanemis?

¹⁹ Aman ika ok tlayekantok Satanás ipan yejuin tlaltikpaktli, noneki tokojtilijtoskej niman ijkon timelajkanemiskej (1 Tim. 6:11, 12; 2 Ped. 3:17). Kemantika uelis techtlaueltokaskej noso xnimantsin nesis tla texchiualtijtokej itlaj matikchiuakan. Akin xkitekichiuiliaj toTajtsin kinekiskej matitlanemilikan ijkon ken yejuamej, kinekiskej techmachtiskej tlen xmelauak niman uelis onias tlen kichiuas maka kuajli matiktekichiuilikan Jehová. Nochi yejon uelis kichiuas maka itech matimelajkanemikan (Efes. 4:14). Maka matijkauilikan ika ijkon topan manochiua, yej matiktlasojtlakan Jehová niman matikintlakamatikan itlanauatiluan. Noijki, noneki titeasikamatiskej. Ipan okse tlamachtijli tikitaskej kenon san Jehová niman Jesús kiteititiaj ika teasikamatij, niman kenon uelis tikchiuaskej ken yejuamej.