1. ¿Kemanon yaskej nochimej tlapejpeniltin iluikak?

 YEUEJKAUI, akin tiktekichiuiliaj Jehová totlajtoltiayaj: “¿Kemanon yaskej nochimej tlapejpeniltin iluikak?”. Kachtopa tiknemiliayaj ika sekimej tlapejpeniltin makisaskiaj itech Armagedón niman ika se tiempo touan nemiskiaj ipan xochitlalpan. San ika, ipan revista La Atalaya del 15 de julio de 2013 otiuelkej ika nochimej tlapejpeniltin akin nemij ipan tlaltikpaktli yaskej iluikak achto peuas Armagedón (Mat. 24:31).

2. ¿Kanaj tlenon totlajtoltiaj? ¿Niman tlenon tikitaskej ipan yejuin tlamachtijli?

² San ika, kanaj totlajtoltiaj: “¿Tlenon inpan nochiuas akin xyaskej iluikak ijkuak panotos ueyi tlajyouilistli?” (Mat. 24:21; Juan 10:16). Kanaj sekimej nomojtiaj pampa kinemiliaj ika xok yakaj kinyekanas ijkuak tokniuan tlapejpeniltin xok nikan nemiskej, niman kanaj ijkon kinemiliaj ipampa tlen yeuejkaui opanok. Amantsin titlajtoskej itech yejon niman noijki tikitaskej tleka xnoneki tomojtiskej.

 TLEN XPANOS

3, 4. ¿Tlenon sekimej kinemiliaj, niman tleka?

³ ¿Tleka miyekej kinemiliaj ika sekimej tokniuan kitlalkauiskej Jehová ijkuak nochimej tlapejpeniltin itech Grupo akin tlayekana yaskej iluikak? Pampa yeuejkaui ijkon yopanoka. Kachtopa matitlajtokan itech teopixki Jehoiadá. Yejua niman isiuauj, Jehosabeat, kuajli okiskaltijkej Jehoás niman okipaleuijkej kuajli matlayekana. Ijkuak ximikiya Jehoiadá, Jehoás kuajli okitekichiuili Jehová. San ika, ijkuak omik Jehoiadá, Jehoás opeuj kichiua tlen xkuajli, okinkak akin xkitekichiuiliayaj toTajtsin niman okitlalkaui Jehová (2 Crón. 24:​2, 15-19).

⁴ Aman matitlajtokan itech apóstol Juan. Ijkuak ximikiya Juan, yejua melak okinpaleui tokniuan kuajli makitekichiuilikan Jehová niman maka makitlalkauikan (3 Juan 4). Noijki otlapaleui maka manemikan ipan tlanechikojli akin temachtiayaj tlen xmelauak (1 Juan 2:18). San ika, ijkuak Juan omik, ipan nochi tlanechikoltin opeuj temachtiaj tlen xmelauak.

5. ¿Tlenon xnoneki tiknemiliskej?

⁵ ¿Noijki ijkon panos ijkuak nochimej tlapejpeniltin yaskej iluikak? ¿Tokniuan noijki ijkon kichiuaskej ken Jehoás niman kitlalkauiskej Jehová? ¿Nemiskej miyekej akin temachtiskej tlen xmelauak ijkon ken opanok ijkuak omijkej nochimej apóstoles? ¡Ka, xijkon panos! Kuajli tikmatstokej ika itekipanojkauan toTajtsin kuajli kitekichiuilijtoskej Jehová niman xtlaj kinpolos maski xok nikan nemiskej tlapejpeniltin. ¿Kenijki tikmatij?

TLANELTOKIJLI TLEN MELAUAK XKIJTLAKOSKEJ

6. ¿Tlenon tikitaskej?

⁶ ¿Tleka kuajli tikmatstokej ika tlaneltokijli tlen melauak xkijtlakoskej? Pampa Biblia techmachtia ika yejuin tiempo tlen tinemij xok ijkon ken ijkuak nemiyaj israelitas nion ken ijkuak omijkej nochimej apóstoles. Ika yejon, matikitakan tlenon opanok ijkuak nemiyaj israelitas, tlenon opanok ijkuak yomijkaj nochimej apóstoles niman tlenon panotok ipan yejuin tiempo tlen Biblia kitokayotia “ijkuak Dios nochi tlajtlamach kuajli kitlalis” (Hech. 3:21).

7. ¿Tleka xnonekiya najmanaskej israelitas akin melajkanemiyaj maski oksekimej xkitlakamatiyaj Jehová?

⁷ Ijkuak nemiyaj israelitas. Ijkuak imikiskia Moisés, yejua ijkin okimijli israelitas: “Nikmatstikaj ika sakin ijkuak yonimik nenkichiuaskej xkuajli niman nenkitlalkauiskej on ojtli yejuan yonemechnauatij xtokakan” (Deut. 31:29). Noijki okimijli ika tla yejuamej xtetlakamatiyaj, kinuikaskiaj okse kalpan (Deut. 28:​35, 36). ¿Onochiuj tlen okijto Moisés? Kema. Tekiuajkej niman israelitas xok okitlakamatkej Jehová. Ika yejon, Jehová okintlajtlakolmakak niman xok okitekauili manemikan tekiuajkej ipan kalpan Israel (Ezeq. 21:​25-27). San ika, israelitas akin melajkanemiyaj itech Jehová melak okinyolchikauj ijkuak okitakej ika onochiuj nochi tlen toTajtsin yokijtojka (Is. 55:​10, 11).

8. ¿Tleka xtechmojkatlachialtia ika tokniuan akin yeuejkaui onenkej xok san sekan nemiyaj?

⁸ Ijkuak yomijkaj nochimej apóstoles. ¿Tleka xtechmojkatlachialtia ika tokniuan akin yeuejkaui onenkej xok san sekan nemiyaj? Pampa Jesús yokijtojka ika miyekiyaskiaj akin kixnamikiskiaj ikalpan toTajtsin (Mat. 7:​21-23; 13:​24-30, 36-43). Ipan kachtopa siglo, Pablo, Pedro niman Juan okitakej ika yemelak ijkon inochiujtoya (2 Tes. 2:​3, 7; 2 Ped. 2:1; 1 Juan 2:18). Sakin, ijkuak yomijkaj nochimej apóstoles, akin kixnamikij  ikalpan toTajtsin opeuj kipaleuiyaj Ueyixtika Babilonia, kampa nemij tlaneltokiltin tlen xmelajkej. Oksejpa onochiuj tlen yonoijtojka.

9. ¿Tleka xsan noijki nochiujtok ijkon ken ijkuak nemiyaj israelitas niman ijkuak yomijkaj apóstoles?

⁹ “Ijkuak Dios nochi tlajtlamach kuajli kitlalis”. Aman yejuin tiempo tlamantik. Aman xok nochiua ijkon ken onochiuj ijkuak onenkej israelitas niman ijkuak omijkej nochimej apóstoles. Yejuin tiempo tlen tinemij tiktokayotiaj sa itlamiyan tonaltin (2 Tim. 3:1). San ika, Biblia kijtoua ika ijkuak opeuj sa itlamiyan tonaltin noijki opeuj se tiempo tlen melak ueyi kijtosnekiskia niman uejkauiskia: “ijkuak Dios nochi tlajtlamach kuajli kitlalis” (Hech. 3:21). Yejuin tiempo opeuj ipan 1914 niman tlamis ijkuak xok onias tlajtlakojli niman ijkuak tlaltikpaktli kikuepaskej se xochitlalpan. ¿Niman katlejua “tlajtlamach” kuajli okitlali Jehová ipan 1914? Yejua okitlali se Tekiuaj: Jesucristo. Jesucristo opeuj tekiuajti ne iluikak niman kichiua tlen Jehová kineki. San ika, xsan yejon tlen opanok, ijkuakon noijki opeuj noyektlalia ken kiueyichiuaj toTajtsin (Is. 2:​2-4; Ezeq. 11:​17-20). San ika ¿oksejpa kijtlakoskej tlaneltokijli tlen melauak?

10. a) ¿Tlenon yokijtojka Biblia itech kenijki tikueyichiuaskiaj toTajtsin? (Isaías 54:17). b) ¿Tleka melak techyolchikaua tlen kijtoua Isaías?

¹⁰ (Xpoua Isaías 54:17). Yejuin teotlajtojli tlen inochiujtika kijtoua: “Xakaj kichijchiua on arma yejuan uelis mitsmiktis tejua”. Noijki inochiujtika tlen kijtoua Isaías 54:​13, 14, ompa kijtoua: “Nejua nikinmachtis nochimej on mokoneuan. Nochimej yejuamej sanoyej kuajli nemiskej. On melajkachiualistli niman melajkanemilistli mitsyolchikauaskej, niman on motlauelikniuan xok tikinmakajsis [ . . . ], yej moyolika tinemis”. Nion Satanás akin nikan tlayekantika xuelis kichiuas ika itekipanojkauan Jehová maka sa matemachtikan (2 Cor. 4:4). ¡Tlaneltokijli tlen melauak xkeman kijtlakoskej! Nion se arma xuelis kijtlakos.

TLEN PANOS

11. ¿Tleka kuajli tikmatstokej ika akin xyaskej iluikak xsan inselti nokauaskej?

¹¹ ¿Tlenon panos ijkuak xok nikan nemiskej tlapejpeniltin? Matikilnamikikan ika Jesús yejua akin totlajpixkauj niman yejua akin kiyekana tlanechikojli. Yejua okijto: “San nejua  niCristo yejuan Dios onechtlalij para ninemotemachtijkau” (Mat. 23:10). ToTekiuaj melak kuajli techtlajpiyas. Ika yejon, akin xyaskej iluikak xnoneki nomojtiskej. Niman maski ijkuakon xtikmatiskej kenijki Cristo kiyekanas ikalpan, kuajli tikmatstokej ika melak kuajli kichiuas. Matikitakan seki tlen Biblia kiteneua tlen techpaleuis maka matomojtikan.

12. a) ¿Kenijki Jehová okitlajpix ikalpan sakin ika yomijka Moisés? b) ¿Kenijki Jehová okitlajpix ikalpan ijkuak Elías oksekan oyaj? (Noijki xkita tlaixkopinajli).

¹² Moisés omik achto kalakiskiaj israelitas ipan Tlajli tlen Jehová yokimijlika kinmakas. ¿Tlenon ipan nochiuaskia ikalpan toTajtsin? ¿Jehová xok kinpaleuiskia pampa yomijka Moisés? Ka, Jehová xkeman okintlalkaui israelitas ijkuak itech melajkanemiyaj. Matikteneuakan tlen opanok achto mikis Moisés. Jehová okijli Moisés ika Josué yejua akin aman kiyekanaskia ikalpan, ika yejon, Moisés ouejkauj kimajmachtia Josué (Éx. 33:11; Deut. 34:9). Noijki, nemiyaj miyekej tlakamej akin kinyekanayaj 1,000 tlakamej, 100 tlakamej, 50 tlakamej niman 10 tlakamej (Deut. 1:15). Kuajli nesi kenijki Jehová kitlajpixtoya ikalpan. Noijki matikteneuakan tlen opanok ijkuak nemiya Elías. Yejua okinpaleui israelitas makiueyichiuakan Jehová. San ika, sakin Jehová okontitlan Judá (2 Rey. 2:1; 2 Crón. 21:12). ¿Jehová kitlalkauiskia ikalpan pampa xok ompa nemiskia Elías? Ka, pampa Elías ouejkauj kimajmachtia Eliseo. Noijki, nemiyaj teotlajtokej akin noijki kinmajmachtijtoyaj, niman yejuamej noijki okipaleuijkej ikalpan toTajtsin (2 Rey. 2:7). Kuajli tikitaj ika nochipa onenkej tlakamej akin okiyekankej ikalpan toTajtsin, niman Jehová nochipa okichiuj tlen yejua kineki niman nochipa okintlajpix itekipanojkauan.

13. ¿Tlenon kijtoua Hebreos 13:5b? (Noijki xkita tlaixkopinajli).

¹³ ¿Tlenon inpan nochiuas itekipanojkauan toTajtsin ijkuak nochimej tlapejpeniltin yaskej iluikak? Biblia kijtoua ika Jehová xkeman kinkauas nion kintlalkauis (xpoua Hebreos 13:5b). Ijkon ken Moisés niman Elías okinmajmachtijkej oksekimej tlakamej para makiyekanakan ikalpan toTajtsin, aman Grupo akin Tlayekana ipan nochi tlanechikoltin noijki kinmajmachtia tokniuan. Aman onka tlamachtiltin tlen kiseliaj tlayekankej ipan tlanechikoltin, tlayekankej ipan circuito, akin tlayekanaj ipan se sucursal niman  noijki akin tlayekanaj Betel. Noijki, tokniuan itech Grupo akin Tlayekana kinmajmachtiaj sekimej tokniuan para makinpaleuikan ipan intekiyo. Kuajli matikmatstokan ika yejuin tokniuan kuajli yokinmachtijkej niman ueliskej kintlajpiyaskej itekipanojkauan toTajtsin akin nikan nokauaskej.

14. ¿Tlenon kuajli yotikasikamatkej?

¹⁴ Nochi tlen yotikitakej ipan yejuin tlamachtijli yotechpaleui matikasikamatikan yejuin: ijkuak nochimej tlapejpeniltin kinuikaskej iluikak, ipan itlamiyan ueyi tlajyouilistli, ikalpan toTajtsin ok kitekichiuilijtos Jehová nikan ipan tlaltikpaktli. Tejuamej xtlaj topan nochiuas pampa Jesucristo yejua akin techyekana. Maski ijkuakon techtlaueltokaskej itlauelikniuan toTajtsin, akin Biblia kintokayotia Gog de Magog, yejuamej xtlaj uelis texchiuiliskej nion xuelis kichiuaskej maka sa matikueyichiuakan Jehová (Ezeq. 38:​18-20). Kuajli matikmatstokan ika Jehová techmakixtis. Ipan se tlatlachalistli, Juan okitak se grupo kampa nemi “sanoyej miyek tlakatl”, ipan yejuin grupo nemij akin xyaskej iluikak, niman noijki okijlijkej ika yejuin grupo ouajkis “ipan on temojtij tlajyouilistli” (Apoc. 7:​9, 14). Kuakon, akin tiktekichiuiliaj toTajtsin xtlaj topan nochiuas.

15, 16. Ken kijtoua Apocalipsis 17:​14, ¿tlenon kichiuaskej tlapejpeniltin ipan Armagedón, niman tleka yejon melak techyolchikaua?

¹⁵ Kanaj totlajtoltiaj yejuin: “¿Tlenon kichiuaskej tokniuan tlapejpeniltin ijkuak inemiskej iluikak?”. Biblia kijtoua ika akin tlayekanaj nikan ipan tlaltikpaktli “kuijsokiskej on Borreguito. Pero on Borreguito [te]tlanis”. ¿Niman akinomej kipaleuiskej para matetlani? Tlaxelojli kijtoua: “Dios okinnots niman okintlapejpenij, niman kuajli onouikakej iuan on Borreguito”. Yejuin kijtosneki ika tlapejpeniltin akin yoliuiskej ne iluikak kipaleuiskej (xpoua Apocalipsis 17:14). Ijkuak nochimej tlapejpeniltin inemiskej iluikak, kimijliskej matlauisokikan. ¡Melak temojkatlachialti tlen kichiuaskej! Sekimej tlapejpeniltin melak kuelitayaj tlauisokiskej niman sekimej hasta soldados katkaj, san ika, ijkuak  onochiujkej iteixpantijkauan Jehová, nochi yejon okikajkaujkej (Gál. 5:22; 2 Tes. 3:16). San ika, ijkuak inemiskej iluikak, tlauisokiskej iuan Cristo niman ángeles niman ijkon kintlaniskej itlauelikniuan toTajtsin.

¹⁶ Matiknemilikan yejuin: sekimej tlapejpeniltin akin nikan nemij melak iuejueyimej niman xok kojtikej. San ika, ijkuak yaskej iluikak, nokuepaskej espíritus niman melak kojtikej yeskej niman tlauisokiskej iuan Jesucristo. Tla yopanok Armagedón, kinpaleuiskej tlaltikpakchanejkej maka sa makipiyakan tlajtlakojli. Kuajli tikmatstokej ika tlapejpeniltin más techpaleuiskej ijkuak yaskej iluikak xijkon ken tla nokauaskiaj nikan ipan tlaltikpaktli pampa ok kipiyaskiaj tlajtlakojli.

17. ¿Kenijki tikmatij ika nochimej itekipanojkauan toTajtsin xtlaj inpan nochiuas ijkuak panotos Armagedón?

¹⁷ ¿Tejua tinemi ipan grupo akin xyaskej iluikak? Tla kema, ¿tlenon noneki tikchiuas ijkuak panotos Armagedón? San nonekis titlaneltokas itech Jehová niman tikchiuas nochi tlen mitstlajtlanilia. Kanaj nonekis tikchiuas tlen kijtoua Isaías 26:20 itech Traducción del Nuevo Mundo: “Xuiya, [ . . . ] xkalaki tlaijtik ipan mocuartos, niman xkintsakua mopuertas tla yotikalak. Xmiyana san se achijtsin hasta ijkuak mapano kualankayotl”. Melak techyolpaktia tikmatiskej ika nochimej itekipanojkauan Jehová akin nemiskej iluikak niman akin nemiskej ipan tlaltikpaktli xtlaj inpan nochiuas. Ijkon ken apóstol Pablo, tejuamej noijki tikmatstokej ika on tekiuajkej, “on tlen aman nochiua” niman “on tlen okse tonajli nochiuas” xuelis techxeloskej itech itetlasojtlalis toTajtsin (Rom. 8:​38, 39). Maka xkilkaua yejuin: Jehová melak mitstlasojtla niman xkeman mitskauas.