1. ¿Tlenon opanok pampa ikniuan José otenexikolitakej?

JACOB kintlasojtlaya nochimej ikoneuan, san ika, más kitlasojtlaya José akin kipiaya 17 xiuitl. Ikniuan José xokuelitakej yejon. Yejuamej opeujkej kinexikolitaj José niman melak okitlauelitakej. Yejua xkichiuaya tlen xkuajli niman xkinamikiya ijkon makichiuilikan. San ika, yejuamej okinemakakej ken se tlakeuajli niman okijlikej intaj ika se yolki okimiktijka ikoneuj akin melak kitlasojtlaya. Pampa yejuamej otenexikolitakej, inchanejkauan xok ika inyojlo nemiyaj niman melak okiyolkokojkej intaj (Gén. 37:3, 4, 27-34).

2. Itech tlen kijtoua Gálatas 5:19-21, ¿tleka nexikojli melak xkuajli?

² ITlajtol toTajtsin kijtoua ika nexikojli * melak xkuajli. Akin tenexikolitaj kichiuaj “tlen xkuajli keleuiya intlalnakayo”, niman yejuin uelis kichiuas maka manemikan kampa tlanauatis iTekiuajyo toTajtsin (xpoua Gálatas 5:19-21). Miyekpa, nexikojli kipeualtia tlauejli, kichiua ika miyekej manokuajkualanikan niman maka kuajli manouikakan.

3. ¿Tlenon tikitaskej ipan yejuin tlamachtijli?

³ Ijkuak tikitaj tlenon okichiujkej ikniuan José, kuajli tikasikamatij ika akin tenexikolitaj xkuajli nouikaj imiuan oksekimej niman kipiyaj tlauejli imiuan inchanejkauan. Maski tejuamej xkeman tikchiuaskiaj ken yejuamej, maka keman matikilkauakan ika toyojlo uelis techkajkayauas niman uelis kichiuas matitenexikolitakan (Jer. 17:9). Matikitakan tleka sekimej tlaltikpakchanejkej akin yeuejkaui onenkej otenexikolitakej, yejuin  techpaleuis matotlajpiyakan maka ijkon tikchiuaskej. Noijki tikitaskej kenon tijkixtiskej nexikojli itech toyojlo niman kenon uelis titlapaleuiskej niman ijkon maonia yolseuilistli.

4. ¿Tleka filisteos kinexikolitayaj Isaac?

⁴ Ijkuak yakaj kipiya miyek tomin. Isaac kipiaya melak miyek tlemach, ika yejon, filisteos kinexikolitayaj (Gén. 26:12-14). Filisteos hasta “okintemiltijkej ikan tlajli nochi” pozos kampa Isaac kimatlitiaya iyolkauan (Gén. 26:15, 16, 27). Nemij miyekej tlaltikpakchanejkej akin kichiuaj ijkon ken filisteos niman kinnexikolitaj akin más kipiyaj tomin xijkon ken yejuamej. Xsan kinekij kipiyaskej tlen oksekimej kipiyaj, noijki hasta kinekiskiaj makipolokan.

5. ¿Tleka akin tlayekanayaj ipan tlaneltokiltin kinexikolitayaj Jesús?

⁵ Ijkuak yakaj melak kitlasojtlaj. Judíos akin tlayekanayaj ipan tlaneltokiltin melak okinexikolitakej Jesús pampa kitayaj ika miyekej tlaltikpakchanejkej kitlasojtlayaj (Mat. 7:28, 29). Jesús ouajlaka ipan tlaltikpaktli pampa toTajtsin okuajtitlanka niman temachtiaya tlen melauak. Maski ijkon, tlayekankej ipan tlaneltokiltin okitlajtolchijchiuilijkej pampa kinekiyaj maka sa makitlakaitakan (Mar. 15:10; Juan 11:47, 48; 12:12, 13, 19). ¿Tlenon tiuelij itech yejuin? Ika noneki tokojtiliskej maka tikinnexikolitaskej akin melak kintlasojtlaj ipan tlanechikojli pampa miyek tlen kuajli kichiuaj. Yej noneki tokojtiliskej tikchiuaskej ken yejuamej (1 Cor. 11:1; 3 Juan 11).

6. ¿Kenijki okiteititi Diótrefes ika nexikole katka?

⁶ Ijkuak yakaj kimakaj se tekitl ipan tlanechikojli. Ipan kachtopa siglo, Diótrefes kinnexikolitaya akin tlayekanayaj ipan tlanechikojli. Pampa kinekiya san yejua makitlakaitakan, opeuj kintejteneua apóstol Juan niman oksekimej tokniuan tlayekankej (3 Juan 9, 10). Maski xkeman tikchiuaskiaj ken Diótrefes, kanaj uelis peuas tiknexikolitaskej se tokniuj akin kimakaj se tekitl tlen tejuamej tiknekiyaj ipan tlanechikojli. Niman kanaj más ijkon tikmachiliskiaj tla tikitaj ika noijki tiueliskiaj tikchiuaskej yejon tekitl, noso hasta más kuajli tikchiuaskiaj.

7. ¿Kenon uelis techijtlakos tla titenexikolitaj?

⁷ Nexikojli yeskia kentla se xiujtli tlen melak teijtlakoua. Ijkuak nexikojli noneluayotia ipan toyojlo, melak ouijtika tikuiuitlas noso tijkixtis. Noskaltia tla toueyimatij, tla titetlauelitaj niman tla titsotsokamej. Ijkuak titenexikolitaj, xueli titetlasojtlaj, xueli titeikneliaj niman xkuajli touikaj imiuan oksekimej. Tla tikitaj ika nexikojli yopeuj itsmolini ipan toyojlo, noneki tikixtijtiuetsiskej. ¿Kenon uelis tijkixtiskej?

8. ¿Tlenon techpaleuis matijkixtikan nexikojli itech toyojlo?

⁸ Uelis tijkixtiskej nexikojli itech toyojlo tla tiyolyemankej niman tla tiyolpakij san ika tlen tikpiyaj. Kema, tla ijkon tikchiuaj, nexikojli xuelis noneluayotis ipan toyojlo. Tla tiyolyemankej, xtiknemiliskej ika melak tiuejueyixtokej niman ika kinamiki matikpiyakan miyek tlemach xijkon ken oksekimej (Gál. 6:3, 4). Akin yolpaki san ika tlen kipiya kuajli nemi niman xsan kitstika tla oksekimej miyek kipiyaj xijkon ken yejua (1 Tim. 6:7, 8). Tla tiyolyemankej niman tiyolpakij san ika tlen tikpiyaj, tipakiskej ijkuak tikitaskej ika yakaj kiselia itlaj tlen kuajli.

9. Ken kijtoua Gálatas 5:16 niman Filipenses 2:3, 4, ¿kenon uelis techpaleuis espíritu santo?

⁹ Melak noneki matikpiyakan iespíritu santo Jehová tla tiknekij tijkixtiskej nexikojli itech toyojlo, pampa yejon techpaleuis matiyolyemankej niman matiyolpakikan san ika tlen  tikpiyaj (xpoua Gálatas 5:16; Filipenses 2:3, 4). Iespíritu toTajtsin techpaleuiya matikitakan tlenon onka ipan totlamachilis niman ipan toyojlo. ToTajtsin techpaleuis matiknemilikan tlen kuajli niman maka sa matiknemilikan tlen teijtlakoua (Sal. 26:2; 51:10). Matitlajtokan intech Moisés niman Pablo, akin xokikauilijkej ika nexikojli manoskalti ipan inyojlo.

10. ¿Tlenon ueliskia kichiuas matenexikolita Moisés? (Xkita tlaixkopinajli tlen onka ixpan yejuin revista).

¹⁰ Moisés kiyekanaya ikalpan Jehová niman melak miyekej kitlakaitayaj. Maski ijkon, xokinemili ika san yejua kinamikiya kipiyas yejuin tekitl. Se tonajli, Jehová okikuili Moisés seki espíritu santo niman okinmakak sekimej tlayekankej israelitas akin nemiyaj “iyeualkan on tabernáculo”. Sakin, Moisés okitekakili ika omemej tlayekankej akin xoyajkaj kampa onkatka tabernáculo noijki okiselijkej espíritu santo niman opeujkej tlajtouaj ken teotlajtokej. ¿Tlenon okichiuj Moisés ijkuak Josué okijli maka makinkauili mateotlajtokan? Moisés xokinnexikolitak, yejua melak oyolpak pampa yejon omemej tlakamej noijki okiselijkaj se kualtsin tekitl (Núm. 11:24-29). ¿Tlenon tiuelij itech Moisés?

11. ¿Kenon tlayekankej uelis kichiuaskej ken Moisés?

¹¹ Matikonnemilikan ika se tokniuj tlayekanketl melak kuelita kichiuas se tekitl tlen okimakakej, kanaj kuelita kiyekanas tlanechikojli kampa tomachtiaj Amatl Tekakistilijketl. Aman matiknemilikan ika kitlajtlaniliaj makimajmachti okse tokniuj niman ijkon sakin yejua uelis kiyekanas yejon tlanechikojli. Tla tokniuj tlayekanketl yolyemanki, xkinemilis tla xok kipatiojkaitaj, yejua ika iyojlo kimajmachtis okse tokniuj.

12. ¿Kenon kiteititiaj miyekej tokniuan ika yolyemankej niman ika yolpakij san ika tlen kipiyaj?

¹² Matikitakan kenon kiteititiaj miyekej tokniuan akin youeuentsintiakej ika yolyemankej. Sekimej tokniuan tlayekankej youejkaujkej ika kixelouaj tekitl itech tlayekankej. San ika, ijkuak kajxiltiaj 80 xiuitl, kasikamatij ika noneki yakaj okse kichiuas yejon tekitl. Tokniuan tlayekankej ipan circuito akin kajxiltiaj 70 xiuitl noijki kiteititiaj ika yolyemankej pampa kinektokej kikauaskej tlen kichiuayaj niman kiseliaj okse tekitl tlen kinmaka Jehová. Niman xiuejkaui, miyekej betelitas xok nemij Betel, aman kichiuaj okse tekitl ipan ikalpan Jehová. Nochimej yejuin tokniuan xkinnexikolitaj akin aman kichiujtokej tekitl tlen yejuamej kichiuayaj.

13. ¿Tlenon ueliskia kichiuas ika Pablo makinnexikolita 12 apóstoles?

¹³ Apóstol Pablo noijki kuajli okiteititi ika yolyemanki katka niman yolpakiya san ika tlen Jehová kimakaya. Xokikauili nexikojli manoneluayoti ipan iyojlo. Maski melak otenojnots, yejua okijto ika yolyemanilistli: “Nejua tej, xniueyixtikaj ken on oksekimej apóstoles, niman nion achijtsin xnechmelaua nechtokayotiskej apóstol” (1 Cor. 15:9, 10). On 12 apóstoles okistinenkej iuan Jesús ijkuak yejua ouajlaka ipan tlaltikpaktli. San ika, Pablo opeuj kitekichiuilia Jehová sakin ika Jesús yomijka niman yoyoliujka. Maski sakin Pablo okitlapejpenijkej ken apóstol akin miyekan ontenojnotsaskia, yejua xteuan tlapouajli katka intech on 12 apóstoles (Rom. 11:13; Hech. 1:21-26). Maski ijkon, yejua kitlasojkamatiya tlen Jehová kimakaya niman xokinnexikolitak on 12 apóstoles, akin okistinenkej iuan Jesús.

14. ¿Tlenon tikchiuaskej tla tiyolyemankej niman tla tiyolpakij san ika tlen tikpiyaj?

¹⁴ Tla tiyolyemankej niman tla tiyolpakij san ika tlen tikpiyaj, tikchiuaskej ken Pablo niman noijki tikintlakaitaskej tokniuan akin Jehová yokinmakak se tekitl (Hech. 21:20-26). Yejua yokintekitlali sekimej  tokniuan matlayekanakan ipan tlanechikojli. Maski yejuamej noijki nopopolouaj pampa tlajtlakolejkej, Jehová kimita ken “tetlayokoliltin” (Efes. 4:8, 11). Ijkuak tikintlakaitaj tlayekankej niman tikchiuaj ika yolyemanilistli tlen yejuamej techijliaj, kuajli touikaj iuan Jehová niman tinemij ika yolseuilistli imiuan tokniuan.

15. ¿Tlenon noneki tikchiuaskej?

¹⁵ Xuelis onias yolseuilistli kampa nonexikolitalo. Ika yejon, noneki matijkixtikan nexikojli itech toyojlo niman maka matikchiuakan ika oksekimej matenexikolitakan. Kipiya ika tikchiuaskej yejuin ome tlemach tla tiknekij tiktlakamatiskej tlen Jehová technauatia. Yejua techijlia matokojtilikan tikchiuaskej “on tlajtlamach yejuan kuajkij yolseuilistli” (Rom. 14:19). Aman tej, ¿tlenon uelis tikchiuaskej niman ijkon tikinpaleuiskej oksekimej maka matenexikolitakan?, niman ¿kenon uelis titlapaleuiskej niman ijkon maonia yolseuilistli?

16. ¿Kenon uelis tikinpaleuiskej oksekimej maka matenexikolitakan?

¹⁶ Tlen tikchiuaj niman ken tikyekanaj tonemilis uelis kinpaleuis noso kimijtlakos oksekimej. Tlaltikpakchanejkej akin xkitlakamatij Jehová kinekij matoueyimatikan ipampa tlen tikpiyaj (1 Juan 2:16). Yejuin kichiua ika miyekej manonexikolitakan. Tejuamej xtiknekij ika nexikojli manoskalti ipan inyojlo oksekimej. Yejua ika, xtikijtojtinemij tlen tikpiyaj niman tlen tiknemiliaj tijkouaskej. Noijki, xtikteijlitinemij nion xtoueyimatstinemij ipampa nochi tekitl tlen tikchiuaj ipan tlanechikojli. Tla san  nochipa tikijtojtinemij tlen tekitl tikpiyaj ipan ikalpan Jehová, kichiuas ika oksekimej matechnexikolitakan. San ika, ijkuak tajmanaj inpampa niman tikitaj tlen kuajli kichiuaj, yejuamej kuajli nomachiliaj niman tinochimej kuajli touikaj niman tinemij ika yolseuilistli.

17. ¿Kenon ones ika ikniuan José yonopatlakaj, niman tleka ouel onopatlakej?

¹⁷ Kema uelis tijkixtiskej nexikojli ipan toyojlo. Oksejpa matitlajtokan intech ikniuan José. Ijkuak yopanokaj seki xiujtin, yejuamej okinextitoj José ne Egipto. Maski José okimixmat, yejua xokimijli ika yejua katka José, kachtopa kinekiya kitas tla yonopatlakaj. José otlanauati makintlakualtikan ikniuan, san ika, okiteijli más miyek tlakuajli makimakakan Benjamín, akin xokoyotl katka (Gén. 43:33, 34). Maski ijkon opanok, xkanaj tiknextiaj kampa makijto ika ikniuan okinexikolitakej Benjamín. Yejuamej okiteititijkej ika melak najmanayaj ipampa Benjamín niman ipampa intaj, Jacob (Gén. 44:30-34). Ikniuan ouel okikixtijkej nexikojli itech inyojlo, niman yejon okichiuj ika nochimej inchanejkauan oksejpa melak kuajli manouikakan (Gén. 45:4, 15). Noijki ijkon, tla tejuamej tikuiuitlaj noso tijkixtiaj nexikojli itech toyojlo, melak kuajli touikaskej imiuan tochanejkauan niman imiuan tokniuan akin nemij ipan tlanechikojli.

18. Itech tlen kijtoua Santiago 3:17, 18, ¿tlenon panos tla tinochimej titlapaleuiyaj niman ijkon maonia yolseuilistli?

¹⁸ Jehová melak kineki matijkixtikan nexikojli itech toyojlo niman matikchiuakan tlen nonekis niman ijkon maonia yolseuilistli. Noneki tokojtiliskej tikchiuaskej yejuin, pampa, ken yotikitakej ipan yejuin tlamachtijli, tinochimej titlajtlakolejkej niman kemantika titenexikolitaj (Sant. 4:5). Noijki, tinemij ipan yejuin tlaltikpaktli kampa miyekej kinekij matitenexikolitakan. San ika, tla tiyolyemankej, tla titetlasojkamachiliaj niman tla tiyolpakij san ika tlen tikpiyaj, xtitenexikolitaskej, yej melak kuajli touikaskej imiuan oksekimej, melak titetlasojtlaskej, titeikneliskej niman tiktechiuiliskej tlen kuajli (xpoua Santiago 3:17, 18).