1, 2. a) ¿Tlenon uelis tikmachiliskej ijkuak titlanemiliaj itech inemilis Jesús niman itech ken otenojnots? b) ¿Tlenon tikitaskej ipan yejuin tlamachtijli?

 IJKUAK miki yakaj akin melak tiktlasojtlaj, melak tiktemouaj. Kanaj ijkuak kemach miki, melak toyolkokouaj, niman tla melak otlajyoui achto mikis, más toyolkokouaj. San ika, ijkuak tikilnamikij kenon itlaj otechmajmachti noso kenon itlaj okichiuj noso otechijli para techyolchikauas noso techuetskitis, xok más toyolkokouaj niman oksejpa peua tiyolpakij.

² Noijki ijkon panoua ijkuak tikilnamikij tlen ipan opanok Jesús. Ijkuak tikamapouaj ipan Biblia kenon melak otlajyoui Jesús niman kenon okimiktijkej, melak techyolkokoua. Niman ijkuak inopanoltis Conmemoración niman tla yonopanolti, más titlanemiliaj itech kenon melak patioj imikilis Cristo (1 Cor. 11:24, 25). San ika, melak tiyolpakij ijkuak tiknemiliaj tlen Jesús okijto niman okichiuj ijkuak nemiya nikan ipan tlaltikpaktli. Noijki techyolchikaua ijkuak titlanemiliaj itech tlen kichiujtika niman itech tlen kichiuas ika tlayekapan. Ipan yejuin tlamachtijli, tikitaskej ika tla titlanemiliaj itech nochi yejuin niman itech kenon Jesús melak techtlasojtla, techpaleuis matikmatikan kenon uelis tikteititiskej ika tiktlasojkamatij tlen okichiuj topampa.

3. ¿Tleka noneki tiktlasojkamatiskej tlen Jesús okichiuj topampa?

³ Ijkuak titlanemiliaj itech inemilis niman imikilis Jesús, kichiua matiktlasojkamatikan tlen yejua okichiuj. Ijkuak yejua otenojnots ipan tlaltikpaktli, okinmachti tlaltikpakchanejkej tlen kichiuas iTekiuajyo toTajtsin. Tejuamej melak tikpatiojkaitaj  tlen yotiuelkej itech iTekiuajyo toTajtsin. Melak tiktlasojkamatij ika Jesús omik topampa pampa ijkon ueli iuan touikaj niman noijki ueli touikaj iuan Jehová. Tla tikteititiaj ika titlaneltokaj itech Jesús, noijki uelis nochipa tinemiskej ipan tlaltikpaktli niman uelis oksejpa tikimitaskej tochanejkauan noso toamigos akin yomijkej (Juan 5:28, 29; Rom. 6:23). Tikmatstokej ika nochi yejuin xtechmelaua tikseliskej. Xkeman uelis tiktlaxtlauiliskej Jesús nion toTajtsin nochi tlen yokichiujkej topampa (Rom. 5:8, 20, 21). San ika ¿kenon uelis tikimititiskej ika tiktlasojkamatij tlen yokichiujkej topampa? Matikitakan.

4. ¿Kenon okiteititi María Magdalena ika kitlasojkamatiya pampa Jesús okipaleui? (Xkita tlaixkopinajli).

⁴ Matitlanemilikan itech se siuatsintli judía akin itoka katka María Magdalena. Yejua kipiaya chikome xkuajkualtin espíritus niman melak kitlajyouiltiayaj. Kanaj kinemiliaya ika xakaj ueliskia kipaleuis. ¿Kenon onomachili ijkuak Jesús okinkixtili yejon chikome xkuajkualtin espíritus? Kanaj melak okitlasojkamat. Ika yejon, onochiuj inomachtijkauj Cristo niman okitekitilti itiempo, ikojtilis niman nochi tlen kipiaya para kipaleuis Jesús ijkuak tenojnotstinemiya (Luc. 8:1-3). Maski María melak kitlasojkamatiya tlen Jesús okichiuj ipampa, kanaj ok xkasikamatiya ika Jesús kichiuaskia tlen más kipaleuiskia: yejua kitemakaskia inemilis “para nochi on akin kineltokas xpoliuis, yej kipiyas nemilistli para nochipa” (Juan 3:16). Maski María kanaj xkasikamatiya yejuin, yejua okiteititi ika kitlasojkamatiya tlen Jesús okichiuj ipampa. ¿Kenon? Xkeman okitlalkaui Jesús. Ijkuak pilkatoya ipan kojtli melaktik, María ompa onokauj niman ijkon kipaleuis Jesús niman oksekimej akin ompa iuan nemiyaj (Juan 19:25). Niman, ijkuak Jesús nemiya ipan tlalkontli, María niman oksekimej omemej siuamej okajuiyalitoj itlalnakayo Jesús (Mar. 16:1, 2). Jehová melak okiteochiuj María pampa xkeman okitlalkaui Jesús. Ijkuak oyoliuj Jesús, xnochimej inomachtijkauan ouelkej okitakej, san ika, María kema niman hasta iuan otlajto. ¡San xkonnemili kenon melak oyolpak María! (Juan 20:11-18).

5. ¿Kenon uelis tikteititiskej ika tiktlasojkamatij nochi tlen Jehová niman Jesús yokichiujkej topampa?

 ⁵ Tejuamej noijki uelis tikteititiskej ika tiktlasojkamatij tlen Jehová niman Jesús yokichiujkej topampa. ¿Kenon? Tla tijkuij totiempo, tokojtilis niman nochi tlen tikpiyaj niman ijkon titlapaleuiskej ipan ikalpan toTajtsin. Melak miyek tlen uelis tikchiuaskej, uelis tontlapaleuiskej ijkuak kinchijchiuaskej noso kinyektlaliskej kaltin kampa tikueyichiuaj toTajtsin.

6. ¿Kenon mitspaleuiya tlen Jesús okichiuj mopampa?

⁶ Ijkuak titlanemiliaj itech kenon Jehová niman Jesús melak techtlasojtlaj, noijki tiknekij ijkon tikintlasojtlaskej (1 Juan 4:10, 19). Niman peuaj más tikintlasojtlaj ijkuak tikasikamatij ika Jesús omik topampa. Apóstol Pablo melak kitlasojkaitaya yejuin tetlayokolijli. Ika yejon, ijkin okintlajkuilouili gálatas: “IKonetsin Dios, [...] sanoyej onechtlajsojtlak niman nopampa onotemakak para omik” (Gál. 2:20). Jesús omik mopampa, ika yejon, Jehová omitsuajuikak ipan ikalpan niman ijkon uelis iuan timouikas (Juan 6:44). ¿Kenon otimomachili ijkuak otikmat ika Jehová itlaj omitsitili, niman ueyi otlatlaxtlauj para uelis iuan timouikas? ¿Xkichiua más xtlasojtla Jehová niman Jesús? Yejua ika, tinochimej uelis totlajtoltiskej: “¿Tlenon nikneki nikchiuas aman ika nikmati ika Jehová niman Jesús melak nechtlasojtlaj?”.

7. Ijkon ken nesi ipan tlaixkopinajli, ¿kenon uelis tinochimej tikteititiskej ika tiktlasojtlaj Jehová niman Jesús? (2 Corintios 5:14, IY; 2 Corintios 5:15; 6:1, 2)

⁷ Pampa tiktlasojtlaj toTajtsin niman Jesús, techpaleuiya matikintlasojtlakan oksekimej (xpoua 2 Corintios 5:14, IY; b 2 Corintios 5:15; 6:1, 2). Uelis tikteititiskej ika titetlasojtlaj  tla nochimej tikinnojnotsaj. Tejuamej tikinnojnotsaj akin oksekan ualeuaj, akin uejueyixtokej, akin xmás uejueyixtokej niman noijki akin kinopiliaj intomintsin niman akin xmás kinopiliaj. Ijkuak ijkon tikchiuaj, tikpaleuijtokej Jehová pampa yejua “kineki nochi tlakatl ma makisa niman ma kimati on tlen melauak” (1 Tim. 2:4).

8. ¿Kenon uelis tikteititiskej ika tikintlasojtlaj tokniuan?

⁸ Noijki uelis tikteititiskej ika tiktlasojtlaj Jehová niman Jesús tla tikintlasojtlaj tokniuan (1 Juan 4:21). ¿Kenon uelis tikteititiskej ika tikintlasojtlaj tokniuan? Tla titajmanaj inpampa niman tla tikinpaleuiyaj ijkuak kixnamikij tlen ouijtika. Noijki tla tikinyolseuiyaj ijkuak nomijkatiaj, tla tikomintlajpalouaj ijkuak kualoj niman tla tokojtiliaj tikinyolchikauaskej ijkuak tikitaskej ika melak najmanaj (2 Cor. 1:3-7; 1 Tes. 5:11, 14). Tikmatstokej ika “ioración on yolmelajki tlakatl yejuan ikan nochi iyojlo kichiua, sanoyej kipiya poder”, ika yejon, noijki tikchiuaj teoyotl inpampa tokniuan (Sant. 5:16).

9. ¿Kenon noijki uelis tikteititiskej ika tikintlasojtlaj tokniuan?

⁹ Noijki uelis tikteititiskej ika tikintlasojtlaj tokniuan tla tokojtiliaj kuajli imiuan touikaskej. Tejuamej tikyejyekouaj titetlapopoluiskej ijkon ken Jehová kichiua. Matitlanemilikan itech yejuin: tla Jehová okitekauili ika iKonetsin mamiki ipampa totlajtlakoluan, ¿xnoneki nimantsin tikintlapopoluiskej tokniuan ijkuak itlaj texchiuiliaj? Tejuamej xtiknekij tikchiuaskej ijkon ken on xkuajli tlakeuajli akin Jesús okiteneuj. Iteko okitlapopolui niman okijli ika xok nonekiya kitlaxtlauilis tlen kuikiliaya, san ika, yejon xkuajli tlakeuajli xokinek kitlapopoluis okse tlakeuajli akin xmiyek kuikiliaya (Mat. 18:23-35). Ika yejon, tla yotimokualani iuan se tokniuj, ¿tleka xtikyejyekoua iuan timoyolseuis achto nopanoltis Conmemoración? (Mat. 5:23, 24). Tla ijkon tikchiua, tikteititis ika melak tiktlasojtla Jehová niman Jesús.

10, 11. ¿Kenon tlayekankej uelis kiteititiskej ika kitlasojtlaj Jehová niman Jesús? (1 Pedro 5:1, 2).

¹⁰ ¿Kenon tlayekankej uelis kiteititiskej ika kitlasojtlaj Jehová niman Jesús? Tla kintlajpiyaj iborreguitos Jesús (xpoua 1 Pedro 5:1, 2). IKoneuj toTajtsin ijkon okasikamachilti apóstol Pedro. Ijkuak okasikej Jesús, Pedro yexpa okijto ika xkixmatiya, ika yejon, kanaj oksejpa kinekiya kitas para kijlis ika melak kitlasojtlaya. Niman sakin ika oyoliuj Jesús, yejua okitlajtolti Pedro: “Simón, ikoneu Jonás, ¿más tinechtlajsojtla xken yejuamej in?”. Tikmatstokej ika Pedro san tlenon kinektoskia kichiuas para kititis ika kema kitlasojtlaya. Niman ijkuak Pedro okijli ika kema, Jesús okinankili: “Tla ijkon xkincuidaro noborregos” (Juan 21:15-17). Desde ijkuakon, Pedro okintlajpix iborreguitos Jesús niman ijkon okititi ika kitlasojtlaya.

¹¹ Tlayekankej, ijkuak inopanoltis Conmemoración niman tla yonopanolti, uelis nenkichiuaskej tlen Jesús okijli Pedro. Uelis nenkiteititiskej ika melak nenkitlasojtlaj Jehová niman Jesús tla kuajli nenkintlajpiyaj tokniuan niman tla nenkinpaleuiyaj tokniuan akin xok yauej tlanechikoltin noso xok touan tenojnotsaj (Ezeq. 34:11, 12). Noijki, uelis nenkinyolchikauaskej akin kemach nomachtijtokej Biblia niman akin kemach ika sejpa yauej Conmemoración. Tejuamej tiknekij kuajli manomachilikan ijkuak yaskej Conmemoración pampa tikuelitaskiaj ika yejuamej noijki manochiuakan inomachtijkauan Cristo.

12. ¿Tleka techpaleuiya matiyolchikauikan tla titlanemiliaj itech tlen Jesús okijto ijkuak ikajsiskiaj niman ikimiktiskiaj? (Juan 16:32, 33).

¹² Ijkuak ikajsiskiaj niman ikimiktiskiaj Jesús, yejua okimijli inomachtijkauan: “Ipan in tlaltikpaktli nentlajyouiskej, pero xpiyakan yolchikaualistli pampa nejua yoniktlan ipoder in tlaltikpaktli” (xpoua Juan 16:32, 33). Jesús  otlaneltokak itech Jehová, ika yejon, xonomojti ijkuak itlauelikniuan okijlikej ika kimiktiskiaj niman ouel omelajkanen. Jesús kimatstoya ika noijki kintlaueltokaskiaj inomachtijkauan, yejua ika, okitlajtlanili Jehová makinpaleui (Juan 17:11). ¿Tleka yejon techpaleuiya matiyolchikauikan? Pampa Jehová más kojtik xijkon ken totlauelikniuan (1 Juan 4:4). Niman yejua nochi kitstika. Kuajli tikmatstokej ika tla titlaneltokaj itech Jehová, xmás tomojtiskej niman tiyolchikaujkej yeskej.

13. ¿Kenon José de Arimatea okiteititi ika yolchikauak katka?

¹³ Matitlanemilikan itech José de Arimatea, se tlakatl akin judíos melak kitlakaitayaj. Yejua teuan katka ipan Sanedrín, kampa nemiyaj akin uejueyixtoyaj intech judíos. San ika, ijkuak Jesús tenojnotstinemiya, yejua nomojtiaya kijtos ika tlaneltokaya itech Jesús. Juan kijtoua ika “José san ichtaka inomachtijkau katka Jesús, pampa kinmakasiya on hebreos” (Juan 19:38). Maski yejua kuelitaya tlen temachtiaya Jesús, xkijtouaya ika tlaneltokaya itech iKoneuj toTajtsin pampa kanaj kimojtiaya ika judíos maka sa makitlakaitakan. Maski ijkon, Biblia kijtoua ika sakin ika omik Jesús, José “onoyolchikau, niman oyaj itech Pilato para okitlajtlanilij imikatlalnakayo Jesús” (Mar. 15:42, 43). Aman nochimej ikimatstoyaj ika José tlaneltokaya itech Jesús.

14. ¿Tlenon noneki tikchiuaskej tla techmojtia tlen ueliskia kijtoskej totechkopa?

¹⁴ ¿Mitsmojtia tlen oksekimej uelis kijtoskej motechkopa ijkon ken José de Arimatea? Ijkuak tinemi escuela noso kampa titekiti, ¿tipinaui tikijtos ika tiiteixpantijkauj Jehová? ¿Xtikmati tla ipeuas titenojnotsas noso tla itimoapolaktis pampa mitsmojtia tlen ueliskia kijtoskej motechkopa? Maka mamitsmojti tlen ueliskia kijtoskej, tejua xmokojtili xtekichiuili Jehová. Xtlajtlanili Jehová mamitspaleui niman mamitsyolchikaua niman ijkon tikchiuas tlen yejua kineki. Ijkuak tikitas ika Jehová kinnankilia moteoyouan, más tiyolchikauak yes (Is. 41:10, 13).

15. ¿Kenon okinpaleui inomachtijkauan Jesús pampa oyolpajkej ijkuak okitakej ika Jesús yoyoliujka? (Lucas 24:52, 53).

¹⁵ Ijkuak Jesús omik, inomachtijkauan melak onoyolkokojkej. ¿Tejua kenon timomachiliskia? Inomachtijkauan Jesús melak kitlasojtlayaj niman kichiayaj makinpaleui, san ika, aman Jesús yomijka (Luc. 24:17-21). Ijkuak Jesús oyoliuj, ouajnonexti imixpan inomachtijkauan niman okimijli ika ipan nochiujtoyaj teotlajtoltin itech Biblia. Noijki, okimijli makichiuakan se tekitl tlen melak ueyi kijtosneki  (Luc. 24:26, 27, 45-48). Niman ijkuak yopanoka 40 tonaltin ika Jesús yoyoliujka, yejua oyaj iluikak. San ika, inomachtijkauan xok noyolkokojtoyaj, aman melak yolpaktoyaj. Melak yolpakiyaj pampa kimatiyaj ika Jesús yoltoya niman ika kinpaleuiskia makichiuakan tekitl tlen yejua okinnauatijteuj. Niman pampa inomachtijkauan Jesús yolpakiyaj, okinpaleui chikauak makitekichiuilikan Jehová (xpoua Lucas 24:52, 53; Hech. 5:42).

16. ¿Kenon uelis tikchiuaskej ijkon ken inomachtijkauan Jesús?

¹⁶ ¿Kenon uelis tikchiuaskej ijkon ken inomachtijkauan Jesús? Tla mojmostla ika nochi toyojlo tiktekichiuiliaj Jehová niman xsan ijkuak inopanoltis Conmemoración nion tla yonopanolti. Niman uelis ijkon tikchiuaskej tla kachtopa tiktlaliaj iTekiuajyo toTajtsin ipan tonemilis. Sekimej tokniuan xok más tekitij pampa kinekij kipiyaskej tiempo para ontenojnotsaskej, yaskej tlanechikoltin niman kiueyichiuaskej Jehová imiuan inchanejkauan nochi semanas. Sekimej hasta yokijtokej ika xkipiyaskej miyek tlemach pampa kinekij más tlapaleuiskej ipan tlanechikojli noso kinekij ontenojnotsaskej kampa xmiyekej nemij akin tenojnotsaj. Melauak ika noneki nochipa tokojtiliskej tla tiknekij nochipa tiktekichiuiliskej Jehová, san ika, yejua yotechijli ika melak techteochiuas tla ijkon tikchiuaj (Prov. 10:22; Mat. 6:32, 33).

17. ¿Tlenon noneki tikchiuaskej ijkuak inopanoltis niman tla yonopanolti Conmemoración? (Xkita tlaixkopinajli).

¹⁷ Sa tiknektokej maajsi martes 4 de abril para tikpanoltiskej Conmemoración. San ika, desde aman uelis titlanemiliskej itech inemilis niman imikilis Jesús. Noijki matitlanemilikan itech kenon Jehová niman Jesús yotechititijkej ika techtlasojtlaj. Niman más matitlanemilikan itech yejon ijkuak ajsis tonajli para nopanoltis Conmemoración niman tla yonopanolti. Uelis tikxelos tiempo niman ijkon más kuajli timomachtis sección 16 itech folleto Tlen tepaleuiya timomachtis iTlajtol toTajtsin, kampa kijtoua “Sa ika tlami semana ijkuak Jesús onen ipan tlaltikpaktli”. Xtejtemo tlaxeloltin tlen mitspaleuiskej más xtlasojkamachili toTajtsin, más xtetlasojtla, más xyolchikaui niman más xyolpaki. Niman xnemili kenon uelis tikteititis ika yemelak tiktlasojkamachilia toTajtsin nochi tlen okichiuj mopampa. Niman kuajli matikmatstokan ika tla tokojtiliaj tikilnamikiskej Jesús ijkuak inopanoltis Conmemoración niman tla yonopanolti, yejua melak kipatiojkaitas (Apoc. 2:19).