1. ¿Kenon techpaleuiya tla titlanemiliaj itech tlen Jehová yotechijli techmakas?

 JEHOVÁ kimijlia nochimej akin kitlakamatij ika kinmakas “nemilistli yejuan para nochipa” (Rom. 6:23). Ijkuak titlanemiliaj itech tlen Jehová yotechijli techmakas, más tiktlasojtlaj. Matitlanemilikan itech yejuin: Jehová melak techtlasojtla, ika yejon, techmakas nemilistli para nochipa niman ijkon uelis nochipa nisiuj itech tinemiskej.

2. ¿Kenon techpaleuiya pampa Jehová yotechijli ika techmakas nemilistli tlen xkeman tlamis?

² Pampa Jehová yotechijli ika techmakas nemilistli tlen xkeman tlamis, techpaleuiya matikixnamikikan tlen ouijtika. Maski tla totlauelikniuan techijliskej ika techmiktiskej, tejuamej xtijkajkauaskej ika tiktekichiuiliskej Jehová. ¿Tleka? Pampa tikmatstokej ika tla timikij niman itech otimelajkanenkej, yejua oksejpa techmakas tonemilis niman uelis nochipa tinemiskej (Juan 5:28, 29; 1 Cor. 15:55-58; Heb. 2:15). ¿Tleka kuajli tikmatstokej ika uelis nochipa tinemiskej? Matikitakan.

3. ¿Tleka kuajli tikmatstokej ika Jehová uelis kichiuas nochipa matinemikan? (Salmo 102:12, 24, 27).

³ Tikmatstokej ika Jehová uelis kichiuas nochipa matinemikan pampa itech ualeua nemilistli niman nochipa nemi (Sal. 36:9). Matikitakan seki tlaxeloltin itech Biblia tlen techititiaj ika Jehová nochipa yonen niman nochipa nemis. Salmo 90:2 kijtoua ika toTajtsin nemi “desde yeuejkaui niman para nochipa”. Salmo 102 noijki ijkon kijtoua itech toTajtsin (xpoua Salmo  102:12, 24, 27). Niman teotlajtoketl Habacuc noijki ijkon okijto itech toTajtsin: “¿Xtejua akin otinen melak yeuejkaui, oh Jehová? Oh noTajtsin, akin Tichipauak, tejua xtimiki” (Hab. 1:12, TNM).

4. ¿Tleka xnoneki techajmanas tla ouijtika tikitaj tikasikamatiskej kenon Jehová nochipa nemi?

⁴ ¿Ouijtika tikita tikasikamatis ika Jehová “nochipa nemi”? (Is. 40:28). Tla kema, xsan tejua ijkon mopan yonochiuj. Yeuejkaui, Elihú ijkin okijto itech toTajtsin: “Xuelis tikpouaskej keski xipan kipiya” (Job 36:26). Aman tej, tla xtikasikamatij itlaj, xkijtosneki ika xmelauak. Matitlajtokan itech tlauijli. Kanaj xtikasikamatij kenon tekiti tlauijli, san ika, yejon xkijtosneki ika xonka tlauijli. Noijki ijkon, kanaj xkeman uelis tikasikamatiskej kenon toTajtsin xkeman onemiko niman kenon xkeman mikis. San ika, yejon xkijtosneki ika toTajtsin xnochipa nemi. Tlen Biblia techijlia itech toTajtsin kema melauak, maski xtikasikamatij (Rom. 11:33-36). Noijki, toTajtsin inemiya achto ika oniaskia universo niman nochi tlen kipiya, ken tonajli niman okseki sitlalimej. Biblia techijlia: “ToTEKO ikan ipoder okichijchiu tlaltikpaktli”. Niman noijki kijtoua: “Okipatlau on cielo” (Jer. 51:15; Hech. 17:24). Matikitakan okse itlaj tlen techpaleuiya kuajli matikmatstokan ika uelis nochipa tinemiskej.

5. ¿Tlenon inpan nochiuaskia Adán iuan Eva tla kitlakamatiskiaj Jehová?

⁵ Nochi tlen Jehová okichijchiuj ipan tlaltikpaktli, mikiskia, san tlaltikpakchanejkej xmikiskiaj pampa Jehová okijto ika tlaltikpakchanejkej ueliskiaj nochipa nemiskej. San nonekiya itlaj kichiuaskej, Jehová ijkin okijlika Adán: “On kojtli yejuan temachistia on tlen kuajli niman on tlen xkuajli, maka tikuas itlakyo, pampa ipan on tonajli ijkuak tikuas itlakyo, xmatstia ika ika onkaj timikis” (Gén. 2:17). Tla Adán iuan Eva kitlakamatiskiaj Jehová, xmikiskiaj. Niman kanaj ajsiskia tonajli ijkuak toTajtsin kinkauiliskia makikuakan kojtlakilyotl “yejuan temaka nemilistli”, yejon kimasikamachiltiskia ika nemiskiaj “para nochipa” (Gén. 3:22). b

6, 7. a) ¿Tlenon okseki techititia ika Jehová xotexchijchiuj para matimikikan? b) ¿Tlenon tikuelitaskia tikchiuas ijkuak tikpiyas nemilistli tlen xkeman tlamis? (Xkimita tlaixkopinaltin).

⁶ Melak temojkatlachialti ika sekimej ixtlamatkej yokitakej ika totsontekon melak miyek ueli kejyeua xijkon ken tlen tiuelij ipan nochi tonemilis. Ipan 2010, se revista okijto  ika totsontekon ueliskia kejyeuas se video tlen uejkaui tres millones de horas (tiuejkauiskiaj ipantsin 300 xiuitl ika tikitstoskiaj yejon video). San ika, kanaj totsontekon ueliskia más miyek kejyeuas. Yejuin techititia ika Jehová okichijchiuj totsontekon para uelis más miyek kejyeuas xijkon ken tlen tiuelij ipan 70 noso 80 xiuitl (Sal. 90:10).

⁷ Jehová noijki otexchijchiuj para matiknekikan nochipa tinemiskej. Ken kijtoua Biblia, toTajtsin “okitlalilij ipan iyojlo nochi tlakatl ika xkaman mikiskej” (Ecl. 3:11). Ika yejon, xtiknekij timikiskej (1 Cor. 15:26). Matitlanemilikan itech yejuin. Ijkuak melak tikualoj, ¿san ijkon tokauaj niman san tikchiatokej matimikikan? Ka, tiauej kampa tepajtijketl niman tiktolouaj noso tikonij tlen yejua techmaka para tipajtiskej. Ijkon tikchiuaj pampa xtiknekij timikiskej. Niman ijkuak miki yakaj akin melak tiktlasojtlaj, maski tla iueyi noso xiueyi, melak uejkaui toyolkokojtokej (Juan 11:32, 33). ToTajtsin melak techtlasojtla niman kineki nochipa matinemikan, ika yejon, otexchijchiuj para matiuelikan niman matiknekikan nochipa tinemiskej. San ika, onka okseki tlen techititia ika kema uelis nochipa tinemiskej. Aman matikitakan tlen Jehová yokichiuj niman tlen kichiujtika tlen techititia ika yejua xkipatla tlen kichiuasnekiya desde yeuejkaui.

8. ¿Tlenon techijlia Isaías 55:11 itech tlen Jehová kineki kichiuas?

⁸ Maski Adán iuan Eva otlajtlakojkej niman san inpampa tinochimej timikij, Jehová ok kinektok kichiuas tlen yokijtojka (xpoua Isaías 55:11). Yejua ok kineki ika tlaltikpakchanejkej  akin itech melajkanemij nochipa manemikan. ¿Kenon tikmatij? Ipampa nochi tlen yejua yokijto niman yokichiuj para kichiuas tlen kineki.

9. ¿Tlenon yokijto kichiuas toTajtsin? (Daniel 12:2, 13).

⁹ Jehová yokijto ika kinyolitis akin yomijkej niman noijki yokijto ika uelis nochipa nemiskej (Hech. 24:15; Tito 1:1, 2). Job kuajli kimatstoya ika Jehová san kinektika kinyolitis akin yomijkej (Job 14:14, 15). Teotlajtoketl Daniel kimatstoya ika tlaltikpakchanejkej yoliuiskej niman ika uelis nochipa nemiskej (Sal. 37:29; xpoua Daniel 12:2, 13). Judíos akin nemiyaj ipan itonaluan Jesús noijki kimatstoyaj ika akin melajkanemiskiaj itech Jehová, ueliskiaj kiseliskej “nemilistli yejuan para nochipa” (Luc. 10:25; 18:18). Jesús miyekpa okijto ika Jehová kinyolitiskia akin yomijkej, niman ken tikmatij, Jehová okiyoliti Jesús (Mat. 19:29; 22:31, 32; Luc. 18:30; Juan 11:25).

10. ¿Tlenon techititia pampa yeuejkaui okinyolitijkej akin yomijkaj? (Xkita tlaixkopinajli).

¹⁰ Jehová techmaka tonemilis niman ueli kinyolitia akin yomijkej. Yejua okipaleui teotlajtoketl Elías para makiyoliti ikoneuj siuakaualtsintli akin chantiya Sarepta (1 Rey. 17:21-23). Sakin, toTajtsin noijki okipaleui teotlajtoketl Eliseo para makiyoliti ikoneuj se siuatsintli akin chantiya Sunem (2 Rey. 4:18-20, 34-37). Pampa yeuejkaui Jehová okinyoliti akin yomijkaj, techititia ika oksejpa uelis kinyolitis akin yomijkej. Niman ijkuak Jesús nemiya ipan tlaltikpaktli, kuajli okiteititi ika iTajtsin okimakak kojtilistli para teyolitis (Juan 11:23-25, 43, 44). Aman Jesús nemi ne iluikak niman yokimakakej “nochi tekiuajyotl” para tlanauatis “ne iluikak niman nikan ipan in tlaltikpaktli”. Ika yejon, uelis kichiuas tlen okijto, ika “on mikatsitsimej” oksejpa nokuiteuaskej niman uelis nochipa nemiskej (Mat. 28:18; Juan 5:25-29).

11. ¿Kenon techpaleuiya ika Jesús omik topampa?

¹¹ ¿Tleka Jehová okitekauili ika iKonetsin matlajyoui ijkuak omik? Jesús otechnankili yejon ijkuak okijto: “Dios sanoyej okintlajsojtlak on tlaltikpaktlakamej, hasta okitemakak isenteKonetsin para nochi on akin kineltokas xpoliuis, yej kipiyas nemilistli para nochipa” (Juan 3:16). Jesús omik topampa, ika yejon, Jehová ueli techintlapopoluilia totlajtlakoluan niman noijki uelis kichiuas nochipa matinemikan (Mat. 20:28). Apóstol Pablo otlajto itech tlen toTajtsin kineki kichiuas. Yejua okijto: “Ijkon ken ipampa sen tlakatl opeu on mikilistli ipan in tlaltikpaktli, no ijki ipampa sen tlakatl opeu yoliuij on mikatsitsimej. Ijkon ken nochimej mikij pampa tekoneuan itech Adán, no ijki nochimej yejuan tekoneuan itech Cristo oksejpa yoliskej” (1 Cor. 15:21, 22).

12. ¿Kenon kichiuas Jehová tlen kineki ipan tlaltikpaktli?

¹² Jesús okinmachti inomachtijkauan makitlajtlanikan ipan inteoyouan mauajla iTekiuajyo toTajtsin niman manochiua tlen toTajtsin kineki ipan tlaltikpaktli (Mat. 6:9, 10). Jehová yokitlali iKoneuj ken Tekiuaj ipan iTekiuajyo niman kinsentlalijtika 144,000 tlaltikpakchanejkej para matekiuajtikan iuan Jesús niman ijkon manochiua tlen yejua kineki. Ijkuak tlaltikpakchanejkej kipiyaskej nemilistli tlen xkeman tlamis, nochiuas seki tlen toTajtsin kineki manochiua ipan tlaltikpaktli (Apoc. 5:9, 10).

13. ¿Tlenon kichiujtika Jehová ipan yejuin tonaltin, niman tlenon noneki tikchiuas?

¹³ Ipan yejuin tonaltin, Jehová kinsentlalijtika “sanoyej miyek tlakatl” niman kinmachtijtika para kimatiskej kenon chantiskej ijkuak tekiuajtis (Apoc. 7:9, 10; Sant. 2:8).  Tlaltikpakchanejkej xeliujtokej pampa notlauelitaj niman pampa onka guerras. San ika, akin Jehová kinsentlalijtika xijkon kichiuaj, yejuamej xnotlauelitaj. Uelis tikijtoskej ika inespadas kinkueptokej arados (Miq. 4:3). Yejuamej xteixnamikij ipan guerras kampa melak miyekej mikij, yej kinpaleuijtokej tlaltikpakchanejkej makixmatikan toTajtsin akin melauak niman kinmachtiaj itech tlen kineki kichiuas niman ijkon uelis kipiyaskej “nemilistli on yejuan melauak nemilistli” (1 Tim. 6:19). Pampa yejuamej kipaleuiyaj iTekiuajyo toTajtsin, kanaj inchanejkauan kintlaueltokaj noso kanaj xmás kipiyaj tomintsin, san ika, Jehová kinpaleuiya (Mat. 6:25, 30-33; Luc. 18:29, 30). Nochi yejuin techititia ika iTekiuajyo toTajtsin yemelak tlayekanas ipan tlaltikpaktli niman kichiuas tlen toTajtsin kineki.

14, 15. ¿Kenon Jehová kipopolos mikilistli?

¹⁴ Jesús Tekiuaj itech iTekiuajyo toTajtsin niman itekiuajtitika iluikak, niman kichiuas nochi tlen Jehová yokijto (2 Cor. 1:20). Desde 1914 yokuajteititijtia ika más ueyixtika xijkon ken itlauelikniuan (Sal. 110:1, 2). Sa achijtsin poliui, Jesús niman 144,000 kinpopoloskej nochimej akin kichiuaj tlen xkuajli (Apoc. 6:2).

¹⁵ Ijkuak Jesús tekiuajtitos Mil xiuitl, kinyolitis akin yomijkej niman kinpaleuis tlaltikpakchanejkej akin tetlakamatij maka makipiyakan  tlajtlakojli. Itlamiyan Mil xiuitl, Satanás sa ika tlami techtlatlatas, niman nochimej akin Jehová kitas ika yolmelajkej kinmakas “on kuajli tlajli, para ipan chantiskej nochipa” (Sal. 37:10, 11, 29). “Niman on mikilistli, yejuan nochi tlak[a]tl itlauelikniu, yejua sa ika nochi kitlanis Cristo” (1 Cor. 15:26). ¡Melak tiyolpakiskej pampa xok onias mikilistli!

16. ¿Tleka tikneki tiktekichiuilis Jehová?

¹⁶ Ken yotikitakej, uelis kuajli tikmatstoskej ika nochipa tinemiskej pampa iTlajtol toTajtsin ijkon kijtoua. Pampa tikmatstokej ika uelis tikpiyaskej nemilistli tlen xkeman tlamis, techpaleuiya matimelajkanemikan itech Jehová maski tikixnamikij tlen melak ouijtika ipan yejuin itlamiyan tonaltin. San ika, tla tiknekij tikyolpaktiskej Jehová, noneki timelajkanemiskej itech niman itech Jesús pampa yemelak tikintlasojtlaj niman xsan pampa tiknekij timakisaskej (2 Cor. 5:14, 15). Tla yemelak tikintlasojtlaj Jehová niman Jesús, tiknekiskej tikchiuaskej ken yejuamej niman titenojnotsaskej (Rom. 10:13-15). Ijkuak más tokojtiliaj tiktemakaskej tlen tikpiyaj niman noijki ijkuak tokojtiliaj xsan totech titlanemiliskej, Jehová más kineki touan nouikas niman xkeman techkauas (Heb. 13:16).

17. ¿Tlenon noneki tikchiuaskej? (Mateo 7:13, 14, TNM).

¹⁷ ¿Niman tejuamej? ¿Nochipa tinemiskej? Jehová kineki techmakas nemilistli tlen xkeman tlamis, san ika, noneki tiaskej ipan ojtli tlen teuika ipan nemilistli (xpoua Mateo 7:13, 14, TNM). c ¿Niman kenon tinemiskej ijkuak tikseliskej nemilistli tlen xkeman tlamis? Yejon tikitaskej ipan okse tlamachtijli.