Ka. Xyejon tlen kijtosneki.

Matitlanemilikan itech tlen David okijkuilo ipan yejon tlaxelojli niman ipan okseki tlaxeloltin. Okijto: “Nochipa nikyekteneuas motokatsin, niman mojmostla nicumpliros on tlen onimitsprometerouilij”, “NoTEKO niman noDios, nimitsyekteneuas ikan nochi noyojlo, niman nochipa nikueyiteneuas moyektokatsin” niman “Nikinmijlis nochimej ika sanoyej tiueyixtikaj para nochipa” (Sal 61:8; 86:12; 145:1, 2).

Ijkuak David okimijkuilo yejuin tlajtoltin, yejua xkinemiliaya ika xkeman mikiskia. Yejua kimatstoya ika tlaltikpakchanejkej mikij pampa tlajtlakolejkej niman kimatstoya ika yejua noijki tlajtlakole katka (Gén. 3:3, 17-19; Sal. 51:4, 5). Kimatstoya ika itekipanojkauan Jehová akin itech omelajkanenkej, ken Abrahán, Isaac niman Jacob, omijkej. Niman kimatstoya ika yejua noijki mikiskia (Sal. 37:25; 39:4). San ika, tlen okijto ipan Salmo 61:8 kiteititia ika kinekiya nochipa kiueyiteneuas Jehová, kijtosneki, ika kinekiya kiueyiteneuas chika yoltoya (2 Sam. 7:12).

Kemantika, David okijkuilo tlen ipan onochiuj. Ijkon tikitaj ijkuak tikpouaj Salmos 18, 51 niman 52. Ipan Salmo 23, David kijtoua ika Jehová yeskia kentla se tlajpixketl akin kinyekana, kinyolseuiya niman kintlajpiya iborreguitos. David noijki ijkon kintlajpiaya iborreguitos, ika yejon, kinekiya kitekichiuilis Jehová chika nemiya (Sal. 23:6).

Noijki, matikilnamikikan ika tlen David okijkuilo ualeuaya itech toTajtsin. Yejua noijki okimijkuilo seki teotlajtoltin tlen sakin nochiuaskiaj. Se matikteneuakan. Ipan Salmo 110, David okijto ika ajsiskia tonajli ijkuak iTeko notlaliskia iyekmakopa toTajtsin ne iluikak. Noijki kiseliskia ueyi poder, ika yejon, kintlanis itlauelikniuan toTajtsin niman “kinyolkuitis on naciones”. Akin nikan noteneua yeskia se iuejkachanejkauj David: Mesías. Yejua tekiuajtiskia desde ne iluikak niman yeskia teopixki “para nochipa” (Sal. 110:1-6). Jesús okijto ika teotlajtojli tlen onkatka ipan Salmo 110 tlajtouaya itechkopa niman ika nochiuaskia ika tlayekapan (Mat. 22:41-45).

Ken yotikitakej, Jehová okichiuj ika David makijkuilo tlen nochiuaskia ipan itonaluan niman noijki tlen nochiuas ika tlayekapan ijkuak yejua yoliuis niman uelis nochipa kiueyiteneuas Jehová. Aman ika itikmatstokej yejuin, ¿tlenon uelis tikijtoskej itech Salmo 37:10, 11, 29? Yejuin tlaxeloltin kijtouaj tlen opanok ipan kalpan Israel niman noijki techijliaj tlenon panos ika tlayekapan ijkuak toTajtsin kichiuas nochi tlen yotechijli (uelis tikitas ipan yejuin revista tlamachtijli “Nouan tinemis ipan Xochitlalpan”, párrafo 8).

Tlen kijtoua Salmo 61:8 niman okseki tlaxeloltin techititia ika David kinekiya kiueyiteneuas Jehová ne Israel chika yoltoya. Niman noijki techititia tlen yejua kichiuas ika tlayekapan ijkuak Jehová kiyolitis.