Jehová okimijli israelitas ika nonekiya chipaujkanemiskej. Yejua ika, okinnauati: “Maka xtetlajtolchijchiuilijtinemi ipan mokalpan. Maka xmokuiteua para tiktoyauas iyesyo mokniuj. Nejua niJehová” (Lev. 19:2; Lev. 19:16, TNM).

Tlajtoltin “maka xmokuiteua para” kuajli teasikamachiltia tlen kijtosnekiya yejuin tlaxelojli ika hebreo. San ika ¿tlenon kijtosneki? Se libro judío tlen tlajtoua itech Levítico, kijtoua: “Yejuin tlaxelojli xueli kuajli tikasikamatij pampa xtikmatij tlenon yemelak teasikamachiltisnekiya ika tlajtojli hebreo, ika hebreo yejuin tlajtoltin kijtosnekij ‘xtimotelketsas nisiuj noso inakastlan yakaj’”.

Sekimej ixtlamatkej kinemiliaj ika yejuin tlajtoltin ok kiteneujtokej tlen kijtoua Levítico 19:15, kampa kijtoua: “Maka tikchikoitas yejuan mayanki, nion maka tikmakajsis on yejuan ueyixtikaj. Tla nonekis, titetlajtlakolmakas noso titemanauis, xchiua ken kitocaroua”. Tla yejon melauak, kuakon tlen kijtoua Levítico 19:16, kampa kijtoua: “Maka xmokuiteua para”, kanaj kijtosnekiya ika israelitas xnonekiya kichiuaskej tlen xkuajli ijkuak teyolkuitiskiaj, tlanemakaskiaj noso ika xnonekiya kinchiuiliskej tlen xkuajli inchanejkauan. Niman noijki xnonekiya tekajkayauaskej san para yejuamej nopaleuiskej. Tejuamej tikmatstokej ika noijki xnoneki tikchiuaskej nochi yejuin. Aman matikitakan kenon más kuajli tikasikamatiskej tlen kijtoua Levítico 19:16.

Matikitakan kenon peua Levítico 19:16. ToTajtsin kimijlia israelitas ika xnoneki tetlajtolchijchiuiliskej. Melauak ika ijkuak yakaj tetejteneua uelis kichiuas maonia tlauejli, san ika, más xkuajli ijkuak yakaj tetlajtolchijchiuilia (Prov. 10:19; Ecl. 10:12-14; 1 Tim. 5:11-15; Sant. 3:6). Akin tetlajtolchijchiuiliaj ijkon kichiuaj pampa xkinekij makitlakaitakan akin yejuamej kitlauelitaj. Yejuamej ijkon kichiuaj maski kimatij ika hasta uelis mikis akin kitlajtolchijchiuiliaj. Yejon tlen ipan onochiuj Nabot. Sekimej tlakamej okitlajtolchijchiuilijkej niman, ipampa yejon, okitemojmotlakej hasta okimiktijkej maski xokichiuj tlen xkuajli (1 Rey. 21:8-13). Ika yejon, ken kijtoua itlamiyan Levítico 19:16, yakaj akin tetlajtolchijchiuilia kentla nokuiteuaskia para kitoyauas iyesyo ikniuj.

Kemantika, yakaj tetlajtolchijchiuilia pampa tetlauelita. Ipan 1 Juan 3:15, kijtoua: “San akinon yejuan kitlauelita ikniu, yejua sen temiktijketl ipan iyojlo. Niman nemejuamej nenkimatstokej ika xakaj yejuan temiktijketl kipiya yenkuik nemilistli yejuan para nochipa”. Sakin ika toTajtsin okinnauati israelitas tlen kijtoua Levítico 19:16, okimijli: “Maka xpiya tlauejli ipan moyojlo itechkopa yakaj okse” (Lev. 19:17).

Tlen kijtoua Levítico 19:16 techijlia tlenon xnoneki tikchiuaskej tinochimej akin tiktekichiuiliaj toTajtsin. Techijlia ika xnoneki tiknemiliskej tlen xkuajli niman ika xnoneki titetlajtolchijchiuiliskej. Tla tokuiteuaj para tiktoyauaskej iyesyo yakaj, noso tiktlajtolchijchiuiliaj yakaj san pampa xkuajli iuan touikaj noso tiknexikolitaj, kijtosneki ika tikteititijtokej ika tiktlauelitaj. Niman matikilnamikikan ika se akin kitekichiuilia toTajtsin xkipiya ika tetlauelitas (Mat. 12:36, 37).