1. ¿Tlenon kichiujtokej miyekej tokniuan niman ijkon chikauak kitekichiuiliskej Jehová?

 SA ACHIJTSIN poliui para kipopoloskej nochi tlen xkuajli nochiua ipan yejuin tlaltikpaktli niman tejuamej tikpiyaj miyek tekitl (Mat. 24:14, TNM; Luc. 10:2; 1 Ped. 5:2). Ika yejon, tinochimej tiknekij chikauak tiktekichiuiliskej Jehová. Sekimej tokniuan kinemilijtokej nochiuaskej precursores, ontlapaleuiskej Betel noso yaskej kampa kinchijchiuaj kaltin kampa tikueyichiuaj Jehová. Niman miyekej tokniuan tlakamej nokojtilijtokej nochiuaskej tlayekankej noso tlapaleuijkej ipan tlanechikojli (1 Tim. 3:1, 8). Kuajli tikmatstokej ika Jehová melak yolpaki ijkuak kita ika itekipanojkauan ika inyojlo kinekij kitekichiuiliskej (Sal. 110:3; Is. 6:8).

2. ¿Kanaj kenon uelis tomachiliskej tla xtikseliaj se tekitl tlen desde yeuejkaui tiknekij?

² San ika, kanaj uelis melak toyolkokoskej tla tikitaj ika yopanok tiempo niman xtikseliaj on tekitl tlen desde yeuejkaui tiknekij tikpiyaskej. Noso kanaj toyolkokouaj pampa aman itiuejueyimej noso pampa xok ueli tikchiuaj miyek tekitl ipan ikalpan Jehová (Prov. 13:12). Yejon tlen ipan nochiujtika Melissa, * akin kinekiskia ontlapaleuis Betel noso yas ipan Tlamachtijli tlen kiseliaj Akin Tenojnotsaj itech iTekiuajyo toTajtsin. Yejua kijtoua: “Nejua inilamajtsin niman xok uelis nontlapaleuis kampa nejua niknekiskia. Yejon kemantika nechyolkokoua”.

3. ¿Kanaj tlenon noneki kichiuaskej akin kinekij kiseliskej okseki tekitl ipan ikalpan toTajtsin?

³ Nemij sekimej tokniuan akin telpokamej niman xkualoj. San ika, tla kinekij kiseliskej okseki tekitl ipan ikalpan toTajtsin  kachtopa noneki kuajli kichikauaskej intlaneltokil niman kichiuaskej tlen toTajtsin kuelita. Kanaj yejuamej tlamachilisejkej niman kuelitaj kichiuaskej miyek tekitl, san ika, noneki nokojtiliskej más teijyouiskej, kuajli kichiuaskej intekiyo noso tetlakaitaskej. Tla yejuamej nokojtiliaj kichiuaskej tlen toTajtsin kuelita, kanaj sakin uelis kinmakaskej on tekitl tlen yejuamej kinekij. Matikitakan tlen ipan onochiuj Nick. Ijkuak kipiaya 20 xiuitl melak onoyolkoko pampa xokitlalijkej ken tlapaleuijketl ipan tlanechikojli. Yejua kijtoua: “Niknemiliaya ika nikchiujtoya itlaj tlen xkuajli”. San ika, yejua xonosiaujkauj, yej onokojtili kuajli tlapaleuis ipan tlanechikojli niman chikauak tenojnotsas. Aman, yejua nemi ipan se Grupo akin tlayekana ipan se Sucursal.

4. ¿Tlenon tikitaskej ipan yejuin tlamachtijli?

⁴ ¿Toyolkokouaj pampa xtikseliaj se tekitl tlen desde yeuejkaui tiknekij? Tla kema, kuakon matikijlikan Jehová nochi tlen tikmachiliaj (Sal. 37:5-7). Uelis tikintlajtoltiskej tokniuan akin chikaujtok intlaneltok matechijlikan ipan tlenon uelis más titekitiskej niman matokojtilikan matikchiuakan tlen techijliskej. Tla ijkon tikchiuaj, kanaj sakin uelis tikseliskej on tekitl tlen tiknekij. San ika ¿tla tikitaj ika xok uelis tikchiuaskej tekitl tlen tiknekij ijkon ken Melissa?, ¿tlenon uelis tikchiuaskej para nochipa tiyolpaktoskej? Ipan yejuin tlamachtijli, tikitaskej tlenon uelis techpaleuis matiknankilikan yejuin. Kachtopa, tikitaskej tlenon uelis techyolpaktis, sakin, tlenon techpaleuis más matiyolpakikan niman sa ika tlami tikitaskej kenon tokojtiliskej tikchiuaskej okseki tekitl tlen techpaleuis más matiyolpakikan.

5. ¿Itech tlenon noneki titlanemiliskej tla tiknekij tiyolpakiskej? (Eclesiastés 6:9).

⁵ Tla tiknekij tiyolpakiskej, noneki tikchiuaskej tlen kijtoua Eclesiastés 6:9 (xpoua). Akin tlanemilia itech tlen aman ueli kichiua yolpaki ipampa itekiyo. San ika, akin san tlanemilijtika itech tlen kinekiskia kichiuas, san kileuijtika tlen xuelis kipiyas. ¿Tlenon techmachtia yejuin? Ika, tla tiknekij tiyolpakiskej, noneki titlanemiliskej itech tlen aman ueli tikchiuaj niman maka san matitlanemilijtokan itech tlen xuelis tikchiuaskej.

6. ¿Tlenon tikitaskej aman, niman tlenon techmachtis tlen tikitaskej?

⁶ Tinochimej tikuelitaj tikchiuaskej itlaj tlen yenkuik. Kuakon, ¿uelis tiyolpakiskej san ika tlen aman ueli tikchiuaj? Kema. Hasta uelis tikuelitaskej totekiyo tlen aman tikchiujtokej. ¿Kenon? Tla tiknekij tikmatiskej, matikitakan tlen Jesús okijto ipan Mateo 25:14-30. Kampa otlajto itech yeyimej tlakamej akin okinmakakej tomin tlen itoka katka talento. * Tikitaskej tlenon uelis tikchiuaskej para matechyolpakti totekiyo niman tla itechyolpaktia tikitaskej kenon más techyolpaktis.

7. Ika achijtsin tlajtoltin xkijto tlenon okijto Jesús ipan Mateo 25:14-30.

⁷ Ipan Mateo 25:14-30, Jesús otlajto itech se tlakatl akin oksekan oyaj. Achto yaskia, okonminots itlakeualuan niman cada se okimakak seki talentos niman ijkon makimiyekilikan. * Se itlakeual okimakak makuijli talentos, okse okimakak ome talentos niman on okse san se talento okimakak. Ijkon okinmakak pampa okitak tlenon ueliskia kichiuaskiaj. On kachtopa ome tlakeualtin kuajli otekitkej niman okimiyekilijkej itomin inteko. San ika, on ika yeyi  tlakeuajli xtlaj okichiuj ika on tomin tlen okimakakej, ika yejon, iteko okikuili itekiyo.

8. ¿Tleka melak oyolpak on kachtopa tlakeuajli?

⁸ On kachtopa tlakeuajli kanaj melak oyolpak ijkuak okitak ika iteko okimakak makuijli talentos. Tlen okimakakej melak ueyi tomin katka niman yejon kiteititia ika iteko itech tlaneltokaya. San ika ¿kanaj kenon onomachili on ika ome tlakeuajli? Yejua ueliskia noyolkokos pampa san ome talentos okimakakej. San ika ¿tlenon okichiuj?

9. ¿Tlenon xokijto Jesús itech on ika ome tlakeuajli? (Mateo 25:22, 23).

⁹ (Xpoua Mateo 25:22, 23). Jesús xokijto tla on ika ome tlakeuajli okualan niman onoyolkoko pampa san ome talentos okimakakej. Niman xokiteasikamachilti tla yejuin tlakeuajli ijkin okijto: “¿San yejuin tlen nechmakaskej? ¡Nejua noijki ueli nikchiua tlen kichiua akin okimakakej makuijli talentos! Tla noteko xnechpatiojkaita, más kuajli tla nikomintlaltokas yejuin ome talentos niman nikchiuas tlen nejua nikneki”.

10. ¿Tlenon okichiuj on ika ome tlakeuajli?

¹⁰ On ika ome tlakeuajli kuajli okichiuj itekiyo niman chikauak otekit para kimiyekilis itomin iteko, ijkon ken okichiuj kachtopa tlakeuajli. Yejua ika, okitlan okseki ome talentos, iteko melak oyolpak niman okimakak más tekitl.

11. ¿Tlenon uelis tikchiuaskej niman ijkon más tiyolpakiskej?

¹¹ Noijki ijkon, tejuamej uelis más tiyolpakiskej tla tokojtiliaj kuajli tikchiuaskej nochi tekitl tlen techmakaj ipan ikalpan Jehová. Matokojtilikan kuajli titenojnotsaskej niman  titlapaleuiskej ipan tlanechikojli (Hech. 18:5; Heb. 10:24, 25). Kuajli matikyektlalikan tlen tikijtoskej ijkuak titlanankiliskej ipan tlanechikojli, niman ijkon uelis tikinyolchikauaskej tokniuan. Tla techijliaj ika tikpanoltiskej se tlamachtijli ipan tlanechikojli tlen tikpiyaj itlajkotian semana, kuajli matikyektlalikan. Tla techmakaj se tekitl ipan tlanechikojli, saniman matajsikan niman kuajli matikchiuakan tlen technauatiaj. Maka matiknemilikan tla seki tekitl tlen technauatiaj xueyi kijtosneki noso ika xnoneki nimantsin tikchiuaskej. Nochipa matokojtilikan más kuajli tikchiuaskej totekiyo (Prov. 22:29). Tla tejuamej más titekitij ipan itekiyo Jehová, más totoka chikauis totlaneltok niman melak tiyolpakiskej (Gál. 6:4). Niman xtechtekiyomakas tipakiskej ijkuak oksekimej kiseliskej tekitl tlen tejuamej tikuelitaskiaj tikseliskej (Rom. 12:15; Gál. 5:26).

12. ¿Tlenon okichiujkej Melissa niman Nick niman ijkon más yolpakiskej?

¹² ¿Tikilnamikij Melissa, akin otikteneujkaj ipan párrafo 2 akin kinekiya yas Betel noso yas ipan Tlamachtijli tlen kiseliaj Akin Tenojnotsaj itech iTekiuajyo toTajtsin? Maski xok uelis yas kampa yejua kineki, yejua kijtoua: “Ninokojtilia kuajli nikchiuas notekiyo ken precursora niman ninokojtilia nitenojnotsas ijkon ken techijliaj ipan ikalpan toTajtsin. Niman yejon melak yonechyolpakti”. ¿Niman tlenon okichiuj Nick, akin otikteneujkej ipan párrafo 3 ijkuak xokitlalijkej ken tlapaleuijketl ipan tlanechikojli? Yejua kijtoua: “Oninokojtili más kuajli nitenojnotsas niman kuajli nitlanankilis ipan tlanechikoltin. Noijki, oniktemilti se solicitud para Betel, niman se xiuitl sakin onechnotskej”.

13. ¿Kenon techpaleuis tla tokojtiliaj kuajli tikchiuaskej totekiyo tlen aman tikpiyaj? (Eclesiastés 2:24).

¹³ Kuakon, tla tokojtiliaj kuajli tikchiuaskej totekiyo tlen aman tikpiyaj, ¿kijtosneki ika sakin techmakaskej tekitl tlen tejuamej tiknekij? Kanaj kema. Ijkon ken ipan onochiuj Nick. San ika, tla xtechmakaj on tekitl tlen tejuamej tiknekij, ijkon ken Melissa, melak tiyolpakiskej niman kuajli tomachiliskej pampa tikmatstoskej ika kuajli tiktekichiuilijtokej Jehová (xpoua Eclesiastés 2:24). Noijki, melak tiyolpakiskej pampa tikmatstokej ika tlen tikchiujtokej kiyolpaktia toTeko, Jesucristo.

14. ¿Tlenon noneki nochipa tikilnamikiskej?

¹⁴ Tla itokojtilijtokej chikauak tiktekichiuiliskej Jehová, ¿kijtosneki ika xok noneki tiknemiliskej kenon más kuajli tiktekichiuiliskej? Ka, xyejon kijtosneki. Noneki tokojtiliskej tikchiuaskej tlen techpaleuis más kuajli matitenojnotsakan, matitemachtikan niman matikinpaleuikan tokniuan. Uelis ijkon tikchiuaskej tla titlamachilisejkej, tla tikasikamatij ika xnochi ueli tikchiuaj niman tla tokojtiliaj tikinpaleuiskej oksekimej (Prov. 11:2; Hech. 20:35).

15. ¿Katlejua tekitl techpaleuis más matiyolpakikan?

¹⁵ ¿Kenon uelis más kuajli tiktekichiuiliskej Jehová? Matiktlajtlanilikan toTajtsin matechpaleui matikitakan tlenon más uelis tikchiuaskej (Prov. 16:3; Sant. 1:5). Ijkon ken otikitakej ipan  kachtopa párrafo, ¿kanaj uelis tochiuaskej precursores auxiliares, regulares, tiaskej Betel noso tiaskej kampa nochijchiuaj kaltin kampa tikueyichiuaj toTajtsin? ¿Uelis tomajmachtiskej okse tlajtojli tlen techpaleuis más miyekej matikinnojnotsakan noso para tontlapaleuiskej ipan okse tlanechikojli? Tla tiknekij más tikmatiskej itech tlen yotikonteneujkej, uelis tikamapouaskej libro Organizados para hacer la voluntad de Jehová ipan capítulo 10, niman uelis titlajtoskej imiuan tlayekankej  akin nemij ipan totlanechikol. * Tla tokojtiliaj tikchiuaskej tlen yotikijtokej, más tiyolpakiskej niman oksekimej kitaskej kenon chikaujtiuj totlaneltokil.

16. ¿Tlenon uelis tikchiuaskej tla aman xueli tikchiuaj se tekitl tlen tikuelitaskiaj?

¹⁶ ¿Tlenon uelis tikchiuaskej tla xueli tikchiuaj nion se tekitl tlen otikinteneujkej ipan párrafo 15? Matokojtilikan tikchiuaskej tlen kema tiuelij. Matikitakan seki tlen uelis tikchiuaskej.

17. Itech tlen kijtoua 1 Timoteo 4:13, 15, ¿tlenon uelis kichiuas se tokniuj para más kuajli temachtis?

¹⁷ (Xpoua 1 Timoteo 4:13, 15). ¿Tlenon uelis kichiuaskej tokniuan tlakamej akin yonoapolaktijkej? Uelis nomajmachtiskej kenon más kuajli tlaamapouaskej niman temachtiskej. ¿Tleka? Pampa tla kuajli tlaamapouaj niman temachtiaj, melak kinpaleuiskej akin kinkakiskej. Tejua, ¿tlenon uelis tikchiuas? Kuajli xmomachti niman xchiua tlen kijtoua amatlajkuilojli Xmomachti kuajli titlaamapouas niman titemachtis. Xmomachti nochi tlamachtiltin, xmomajmachti mochan niman ijkuak tikpanoltis se tlamachtijli xchiua ijkon ken yotiuel. Noijki, xkijli mamitspaleui tokniuj akin kinpaleuiya tokniuan * noso oksekimej tlayekankej “on yejuan ika nokauaj tenojnotsaj ika on kuajli tlajtojli niman temachtiaj” (1 Tim. 5:17). Maka san xkita kenon tikchiuas tlen kijtoua amatlajkuilojli Titlaamapouas niman titemachtis, noijki xkita kenon uelis tikinchikauilis intlaneltokil akin mitskaktokej niman tikinpaleuis makichiuakan tlen tikimijlia. Tla ijkon  tikchiua, melak tiyolpakis niman noijki yolpakiskej akin mitskakiskej.

18. ¿Tlenon techpaleuis más kuajli matitenojnotsakan niman matitemachtikan?

¹⁸ Tinochimej akin tikchiuaj ken Cristo noneki titenojnotsaskej niman titemachtiskej (Mat. 28:19, 20, TNM; Rom. 10:14). ¿Tikuelitaskiaj más kuajli tikchiuaskej yejuin tekitl? Tla kema, melak techpaleuis tla tomachtiaj amatlajkuilojli Titlaamapouas niman titemachtis, niman tla tikchiuaj tlen ompa tiuelij. Noijki, uelis tikitaskej kenon más kuajli titenojnotsaskej tla tikitaj amatlajkuilojli Nemilistli niman Tekitl ken Cristo. Tlen Tomachtiskej niman tlen Notekitiltis niman videos tlen techititiaj kenon uelis peuas titenojnotsaskej. Matikyejyekokan tikchiuaskej nochi tlen ompa tiuelij para tikitaskej katlejua más techpaleuis kampa titenojnotsaj. Tla ijkon tikchiuaj, melak tiyolpakiskej pampa tikitaskej ika más kuajli titemachtiaj (2 Tim. 4:5).

19. ¿Tlenon techpaleuis matikchiuakan ijkon ken Cristo?

¹⁹ Maka matikilkauakan ika tinochimej noneki tokojtiliskej tikchiuaskej ijkon ken Cristo (Gál. 5:22, 23; Col. 3:12; 2 Ped. 1:5-8). ¿Kenon uelis tikchiuaskej? Matikonnemilikan ika tiknekij más tikchikauaskej totlaneltokil, uelis tiktejtemoskej ipan toamatlajkuiloluan kampa matlajto itech tlaneltokijli. Ipan JW Broadcasting^® noijki uelis tikimitaskej videos kampa tlajtouaj itech sekimej tokniuan akin okiteititijkej ika tlaneltokaj itech Jehová maski okixnamijkej tlen ouijtika. Sakin matiknemilikan kenon uelis tikteititiskej totlaneltokil ijkon ken yejuamej.

20. ¿Tlenon uelis tikchiuaskej para más tiyolpakiskej niman xtoyolkokoskej?

²⁰ Kuajli tikmatstokej ika tinochimej tiknekiskiaj más chikauak tiktekichiuiliskej Jehová. Maka matikilkauakan ika ipan xochitlalpan uelis ijkon tikchiuaskej. San ika, chika yejko yejon tonajli kuajli matikchiuakan tekitl tlen aman tikpiyaj ipan ikalpan toTajtsin. Tla ijkon tikchiuaj, más tiyolpakiskej niman xsajnoye toyolkokoskej. Niman xsan yejon, noijki, tikteititiskej ika tiktlakaitaj niman tiktlasojtlaj Jehová, “toTajtsin akin paktika” (1 Tim. 1:11, TNM). Kuakon, matiyolpakikan ipampa tlen ueli tikchiuaj ipampa Jehová.