1. ¿Kenon uelis titekitiskej iuan Jehová?

IJKUAK Jehová otexchijchiuj, yejua kinekiya matochiuakan itekipanojkauan. Niman maski titlajtlakolejkej, akin tiyolmelaujkanemij itech toTajtsin uelis mojmostla iuan titekitiskej. Se neskayotl, tejuamej titekitij iuan toTajtsin ijkuak titenojnotsaj niman ijkuak titemachtiaj (1 Cor. 3:5-9). Se ueyi tlateochiualistli ika toTajtsin akin nochi ueli kichiua niman akin otexchijchiuj yotechtlapejpeni matikchiuakan yejuin tekitl, tlen melak ueyi kijtosneki. Aman tej, xsan titekitij iuan toTajtsin ijkuak titenojnotsaj. Ipan yejuin tlamachtijli, tikitaskej kenon titekitij iuan toTajtsin ijkuak tikinpaleuiyaj tochanejkauan niman tokniuan, ijkuak kuajli titeseliaj, ijkuak titlapaleuiyaj ipan tekitl tlen kichiua ikalpan toTajtsin ipan nochi tlaltikpaktli niman ijkuak tikchiuaj okseki ipan itekiyo Jehová (Col. 3:23).

2. ¿Tleka xkipiya ika tikitaskej tlen tikchiuaj ipampa Jehová ika tlen oksekimej kichiuaj?

² Ijkuak tikitstiaskej yejuin tlamachtijli, noneki matikilnamikikan ika tinochimej titlatlamantikej. Sekimej itiuejueyimej niman sekimej san titelpokamej, sekimej tikualoj niman sekimej ka, sekimej melak tiuelij itlaj tikchiuaj niman sekimej xtiuelij yejon. Melak nopatla tlen tikixnamikij. Kuakon, xkipiya ika tiknemiliskej tla san achijtsin noso miyek tikchiuaj ipampa Jehová ijkuak tikitaj tlen oksekimej kichiuaj. Apóstol Pablo okijto: “Cada se sa  no yejua ma nota tla kuajli nouika. Akin notas ika kuajli nouika, yejua notlakaitas. Yejua, tej, ma paki xpampa más kuajli nouika ipan inemilis xken okse tlakatl, yej pampa kuajli nouika ken Dios kineki” (Gál. 6:4).

3. ¿Tleka tikijtouaj ika nochimej akin kintlajpiyaj inchanejkauan tekititokej iuan toTajtsin?

³ Jehová kichia matikintlajpiyakan tochanejkauan. Xtlanemili itech yejuin, sekimej tekitij niman ijkon kinmakaskej inchanejkauan tlen kinpoloua. Miyekej nantin nokauaj inchan niman ijkon kimiskaltiskej inkoneuan pipitikej. Niman ijkuak totajuan xok miyek tlemach uelij kichiuaj, tejuamej noijki tikintlajpiyaj. Yejuin melak noneki matikchiuakan. Biblia kijtoua: “Tla yakaj xkintekipanoua on yejuan ken kinta, niman más yejuamej on yejuan ichanchanejkauan, tla ijkon, tej, xkichiua tlen on kuajli tlaneltoktli technauatia, niman más xkuajli kichiua xken yejua on yejuan xtlaneltoka” (1 Tim. 5:8). Tla tikchiuaj yejon tekitl tlen yotikteneujkej, kanaj xmiyek tikchiuaj ipampa Jehová ijkon ken tikuelitaskiaj. San ika, ¡maka matajmanakan! Jehová yolpaki Ijkuak tikintlajpiyaj tochanejkauan (1 Cor. 10:31).

4. ¿Kenon tajtin uelis kiteititiskej ika kachtopa kichiuaj tlen kineki toTajtsin, niman tlenon panoua ijkuak ijkon kichiuaj?

⁴ Tajtin akin kichiuaj ken Cristo tekitij iuan Jehová ijkuak kinpaleuiyaj inkoneuan makinemilikan kenon ueliskej kitekichiuiliskej Jehová ika tlayekapan. Miyekej tajtin ijkon yokichiujkej. Niman aman inkoneuan chikauak kitekichiuiliaj toTajtsin, hasta uejka ontlapaleuiyaj. Sekimej tekitij ken misioneros, oksekimej tlapaleuiyaj ken precursores kampa nonekij tenojnotskej niman oksekimej tekitij ipan Betel. Niman melauak ika ijkuak inkoneuan uejka nemij, intajuan xmiyekpa kimitaj ken kuelitaskiaj. Maski ijkon, yejuamej kinyolchikauaj inkoneuan makitekichiuilijtokan Jehová maski san kanon nemiskej. ¿Tleka? Pampa yejuamej melak kinyolpaktia kitaskej ika inkoneuan kachtopa kichiujtokej tlen kineki Jehová ipan innemilis (3 Juan 4). Miyekej itech yejon tajtin kanaj nomachiliaj ken Ana, akin okijto ika okitlaneujtika Jehová ikoneuj Samuel. Yejon tajtin kitaj ika se ueyi tlateochiualistli ika ijkon tekitij iuan Jehová (1 Sam. 1:28).

5. ¿Kenon uelis tikinpaleuiskej tokniuan akin nemij ipan totlanechikol? (Xkita tlaixkopinajli kampa peua tlen tomachtijtokej).

⁵ ¿Tlenon uelis tikchiuaskej tla tejuamej xtikpiyaj yejon tekitl tlen yotikteneujkej? Kanaj uelis tikinpaleuiskej tokniuan akin iuejueyimej, akin kualoj noso akin noneki makinpaleuikan. Noijki uelis tikinpaleuiskej akin kintlajpiyaj tokniuan. ¿Tleka xtikitaj tla ipan totlanechikol nemi yakaj akin uelis tikpaleuiskej? Matikonnemilikan ika se tokniuj siuatl kitlajpiya itaj akin iueyi. ¿Tleka xtikonitaj niman maski san achijtsin iuan tokauaj niman ijkon yejon tokniuj siuatl uelis kichiuas okseki tekitl? Noso kanaj toteijliskej ika uelis yakaj tikuikaskej ipan tlanechikoltin, noso ika uelis tikuikaskej hospital tla kineki yakaj konitas, noso uelis tikontlakouiliskej. Tla ijkon tikchiuaj, titekititoskej iuan Jehová niman tiknankilijtoskej inteoyouan yejuin tokniuan (xpoua 1 Corintios 10:24).

6. ¿Tlenon kijtosneki kuajli titeseliskej?

⁶ Itekipanojkauan toTajtsin kimixmatij ken akin kuajli kiminseliaj akin “xchanejkej” (Heb. 13:2). ITlajtol toTajtsin kinteneua miyekej akin kuajli oteselijkej. Niman techmachtia kenon tejuamej noijki uelis kuajli titeseliskej (Gén. 18:1-5). Kuakon, nochipa ijkuak tiueliskej, matikinpaleuikan oksekimej,  maski tla tokniuan noso xtokniuan (Gál. 6:10).

7. ¿Tlenon kualtsin panoua ijkuak tikinseliaj akin chikauak kitekichiuiliaj Jehová?

⁷ Uelis titekitiskej iuan Jehová tla tikinseliaj noso tikinseuiyaj tokniuan akin chikauak kitekichiuiliaj Jehová (xpoua 3 Juan 5, 8). Melak techpaleuiya ijkuak ijkon tikchiuaj pampa toyolchikauaj (Rom. 1:11, 12). Matikitakan tlen okichiuj se tokniuj akin itoka Olaf. Ijkuak yejua san telpochtli katka, se tokniuj tlayekanketl ipan circuito akin xkipiaya isiuauj okitlajpaloto itlanechikol niman xakaj ouel okiseui. Olaf okintlajtolti itajuan, akin xnomachtiayaj, tla tokniuj tlayekanketl ipan circuito ueliskia nokauas inchan. Yejuamej okijlikej ika kema ueliskia ompa nokauas, san ika, Olaf kochiskia ipan sillón. Yejon tlen okichiuj Olaf, niman xkeman onoyolkuep. Melak kuajli onomachili nochi yejon semana pampa okiseui tokniuj. Mojmostla, san kualkan nokuiteuayaj, niman ijkuak tlakuayaj tlajtouayaj itech tlen teyolchikauaya. Nochi yejuin okichiuj ika Olaf makineki chikauak kitekichiuilis Jehová. Aman yopanok 40 xiuitl, niman Olaf miyekan yotlapaleui ken misionero.

8. ¿Tleka noneki matikinchiuilikan oksekimej tlen kuajli maski xtechtlasojkamachiliskej? Xkijto se neskayotl.

⁸ Onka miyek tlen uelis tikchiuaskej inpampa oksekimej maski tla tikitaskej ika xkitlasojkamatij. Matikitakan se neskayotl. Ipan España, se tokniuj siuatl kimachtiaya itech Biblia se siuatl akin itoka Yésica, akin ualeua Ecuador. Se tonajli ijkuak nomachtijtoyaj Biblia, Yésica opeuj choka niman tokniuj okitlajtolti tleka chokaya. Yésica okijli ika ijkuak xiyaya España, yejua melak xkipiaya tomin. Se tonajli xkipiaya tlen kikualtis ikoneuj, san kipiaya atl. Ijkuak kiyejyekojtoya kikochitis ikoneuj, yejua okichiuj se teoyotl. Xouejkauj, omemej tokniuan siuamej opanokej ichan niman okimakakej se revista. San ika, yejua melak xkuajli okinnankili, okitsajtsayan revista niman okimijli: “¿Yejuin tlen nenkinekij manikualti nokoneuj?”. Tokniuan okiyejyekojkej kiyoltlaliskej, san ika, Yésica xokinkak. Sakin, tokniuan onokuepkej, niman ipan ikiyauatenko okikauilitoj se chikijtli ika tlakuajli. Aman, ijkuak nomachtijtoyaj, yejua opeuj choka pampa okasikamat ika toTajtsin okinankilijka iteoyouj, san ika, yejua xokinek makipaleuikan. Aman, Yésica melak kinekiya kitekichiuilis Jehová. Kema, melak kualtsin tlen opanok pampa tokniuan okichiujkej tlen kuajli ipampa yejon siuatl (Ecl. 11:1, 6).

9, 10. a) ¿Kemanon ononek ika israelitas matlapaleuikan? b) ¿Kenon uelis titlapaleuiskej ipan yejuin tonaltin ipan tlanechikojli?

⁹ Kemantika ononek ika israelitas matlapaleuikan ipan se tekitl (Éx. 36:2; 1 Crón. 29:5; Neh. 11:2). Ipan yejuin tonaltin, tejuamej noijki uelis titlapaleuiskej ika totiempo, ika tlen tiuelij tikchiuaj, niman ika totomintsin, niman ijkon tikinpaleuiskej tokniuan. Tla ijkon tikchiuaj, melak tipakiskej niman tikseliskej miyek tlateochiualistin.

¹⁰ ITlajtol toTajtsin kinyolchikaua tokniuan tlakamej akin nemij ipan tlanechikojli matekitikan iuan Jehová. Kinyolchikaua matekitikan ken tlapaleuijkej niman ken tlayekankej (1 Tim. 3:1, 8, 9; 1 Ped. 5:2, 3). Akin ijkon tekitij, melak kinekij kinpaleuiskej tokniuan kuajli makipiyakan intlaneltokil niman kinpaleuiyaj ika tlen kinpoloua (Hech. 6:1-4). ¿Techtlajtoltianij tokniuan tlayekankej tla uelis tikinpaleuiskej? Kanaj techijlianij tla uelis titeseuiskej, tla uelis tikinxeloskej toamatlajkuiloluan, tla uelis tikitaskej kanon titenojnotsaskej, tla uelis titlapaleuiskej ijkuak itlaj noyektlalis noso kanaj itlaj okse  tekitl techtlajtlaniliskej matikchiuakan. Tokniuan akin ijkon tlapaleuiyaj kijtouaj ika melak pakij.

11. ¿Tlenon kualtsin ipan onochiuj se tokniuj pampa tlapaleuiaya kampa kinchijchiuaj Kaltin kampa Tosentlaliaj?

¹¹ Miyekpa, yejon tokniuan akin ontlapaleuiyaj kampa kinchijchiuaj Kaltin kampa Tosentlaliaj kimixmatij oksekimej tokniuan niman peuaj imiuan nouikaj. Se tokniuj akin itoka Margie yotekit 18 xiuitl kinchijchiujtinemi Kaltin kampa Tosentlaliaj. Itech nochi yejon xiujtin, yejua okinmachti tokniuan ichpokamej kenon tekitiskej. Yejua kijtoua ika ijkuak nochiua yejon tekitl, nochimej melak noyolchikauaj (Rom. 1:12). Niman, ijkuak okixnamik tlen ouijtika ipan inemilis, yejon tokniuan akin imiuan nouikaya niman akin okimixmatka kampa otekitkej melak okiyoltlalijkej. ¿Kemantika yotitlapaleuitoj kampa tokniuan kalchijchiuaj? Uelis titlapaleuiskej, maski tla xkeman tikchiuayaj tekitl tlen ompa nochiua.

12. ¿Kenon uelis titlapaleuiskej kampa tlaixpoliui?

¹² Uelis titekitiskej iuan Jehová tla titlapaleuiyaj kampa tlaixpoliui. Se neskayotl, uelis tiktemakaskej tomintsin (Juan 13:34, 35; Hech. 11:27-30). Noijki kanaj uelis titlachipauaskej noso tikinyektlaliskej kaltin. Gabriela, se tokniuj akin ualeua Polonia okipolojka ikal ijkuak oapachiuilok. San ika, melak opak ijkuak tokniuan okipaleuitoj. Yejon tokniuan nemiyaj ipan tlanechikoltin tlen nisiuj onkatkaj. Ijkuak yejua tlanemilia itech tlen ipan onochiuj, kijtoua ika xkineki tlajtos itech tlen okipolo, yejua kineki tlajtos itech tlen okiseli. Yejua kijtoua: “Yejuin tlen nopan onochiuj nechasikamachiltia ika melak teyolpakti tinemis ipan ikalpan Jehová niman ika se tlateochiualistli”. Miyekej akin ijkon yokinpaleuijkej noijki ijkon kijtouaj. Akin tekitij iuan Jehová niman ijkon kinpaleuiskej tokniuan melak pakij niman kuajli nomachiliaj (xpoua Hechos 20:35; 2 Corintios 9:6, 7).

13. ¿Tleka ueyiya totlasojtlalis itech Jehová ijkuak titlapaleuiyaj? Xkijto se neskayotl.

¹³ Se tokniuj akin itoka Stephanie niman oksekimej tenojnotskej, otekitkej iuan toTajtsin ijkuak okinpaleuijkej tokniuan akin ocholojkej Estados Unidos. Yejon tokniuan  ompa oyajkej pampa onkatka guerra ipan inpaís. Stephanie niman tokniuan okintejtemouilijkej niman okintlayektlalilijkej kampa ueliskiaj nokauaskej. Yejua kijtoua: “Melak oajsik ipan toyojlo ijkuak otikitakej kenon opajkej niman kenon okitlasojkamatkej ika tokniuan itech nochi tlaltikpaktli kintlasojtlayaj. Yejuamej kinemiliaj ika tejuamej otikinpaleuijkej, san ika, yejuamej akin yotechpaleuijkej. Otikitakej kenon tetlasojtlaj, kenon kipiyaj intlaneltokil, kenon san sekan nemij niman kenon tlaneltokaj itech Jehová. Nochi yejon okichiuj maueyiya totlasojtlalis itech Jehová. Noijki yokichiuj matikpatiojkaitakan nochi tlen techmaka itechkopa ikalpan”.

14, 15. a) ¿Kenon tlanemiliaya teotlajtoketl Isaías? b) ¿Kenon uelis tikixkopinaskej Isaías?

¹⁴ ¿Tikuelitaskiaj tikchiuaskej okseki ipan itekiyo toTajtsin? ¿Tiknektoskiaj tiaskej kampa nonekij tenojnotskej? Yemelak ika xnoneki uejka tiaskej niman ijkon tiktekichiuiliskej Jehová. San ika, nemij sekimej tokniuan akin uelij yauej. Yejuamej noijki ijkon tlanemiliaj ken teotlajtoketl Isaías. Ijkuak Jehová otetlajtolti: “¿Akinon niktitlanis, niman akinon yas topampa?”, Isaías otenankili: “¡Nikan ninemi! ¡Nejua xnechtitlani!” (Is. 6:8). ¿Tiueliskiaj niman tiknektoskiaj titlapaleuiskej ipan ikalpan Jehová? ¿Kenon uelis titlapaleuiskej?

¹⁵ Jesús okijto yejuin itech tenojnotsalistli niman tikinmachtis oksekimej: “Sanoyej miyek tlatoktli, pero xmiyekej nemij tekitkej para pixkaskej. Yejua ika, tej, xtlajtlanilikan iTeko on tlakilyotl más ma kinuajtitlani on pixkakej para ma pixkakij” (Mat. 9:37, 38). ¿Uelis titlapaleuiskej ken precursores kampa nonekij tenojnotskej? ¿Noso uelis tikpaleuiskej yakaj ijkon makichiua? Miyekej tokniuan kitaj ika ijkuak tlapaleuiyaj ken precursores kampa nonekij tenojnotskej, ijkon kiteititiaj ika kitlasojtlaj Jehová niman ika kintlasojtlaj tlaltikpakchanejkej. ¿Onka okseki tlen uelis tikchiuaskej ipan itekiyo toTajtsin? Tla tikchiuaj, melak tipakiskej.

16, 17. ¿Tlenon okseki uelis tikchiuaskej ipan ikalpan toTajtsin?

¹⁶ ¿Tikuelitaskiaj titlapaleuiskej Betel noso kampa nochijchiuaj Kaltin kampa Tosentlaliaj? Uelis ompa titekitiskej seki metstin noso san seki tonaltin. Ipan ikalpan Jehová nochipa nonekij tokniuan akin kinektokej tlapaleuiskej maski san kanon niman maski san tlen tekitl kinmakaskej. Kanaj uelis techmakaskej se tekitl tlen xkeman tikchiuaj noso xsajnoye tikixmatij. Maski san tlenon tikchiuaskej, Jehová kinpatiojkaita akin kinektokej tlapaleuiskej niman tekipanoskej kampa nonekis (Sal. 110:3).

¹⁷ ¿Tikuelitaskiaj matechmachtikan niman ijkon chikauak tiktekichiuiliskej Jehová? Kuakon, kanaj uelis tiaskej ipan Tlamachtijli tlen kiseliaj Akin Tenojnotsaj itech iTekiuajyo toTajtsin. Ipan yejuin tlamachtijli, kinmachtiaj tokniuan akin chikauak kitekichiuilijtokej Jehová niman ijkon ikalpan toTajtsin uelis melak kintekitiltis. Akin kinekij kiseliskej yejuin tlamachtijli noneki kinektoskej yaskej maski san kanon kintitlaniskej ijkuak tlamiskej intlamachtil. ¿Tikuelitaskiaj tiaskej niman noijki ijkon tiktekichiuiliskej Jehová? (1 Cor. 9:23).

18. ¿Tlen tlateochiualistin tikseliaj ijkuak mojmostla titekitij iuan Jehová?

¹⁸ Pampa tiitekipanojkauan Jehová, tejuamej tiktemakaj tlen tikpiyaj, tikchiuaj tlen kuajli, titeikneliaj niman titetlasojtlaj. Mojmostla tikitaj kenon titepaleuiskej. Nochi yejuin kichiua matipakikan niman matiyolseujtokan (Gál. 5:22, 23, TNM). Maski melak nopatla tlen toseselti tikixnamikij, uelis melak tipakiskej tla tikuelitaj tiktemakaskej ijkon ken Jehová niman tla nochipa iuan titekitij (Prov. 3:9, 10).