TOTAJTSIN okichiuj ika apóstol Pablo makijkuilo chiknaui kualtsitsintin kualneskayomej tlen temaka espíritu santo (Gál. 5:22, 23, TNM). Nochi san sekan, nochiuaj “itlakilyo espíritu santo”. * Niman kalaktokej ipan “nemilistli yejuan yenkuik” tlen kiteititiaj akin kichiuaj ken Cristo (Col. 3:10). Ijkon ken se kojtli kitemaka tlakilyotl ijkuak kuajli kitlajpiyaj, se tlaltikpakchane kiteititis itlakilyo espíritu ijkuak kikauilis ika espíritu santo makiyekana ipan inemilis (Sal. 1:1-3).

Tlasojtlalistli, kachtopa kualneskayotl tlen Pablo okiteneuj. ¿Hasta kanon melak ueyi yejuin kualneskayotl? Pablo okijto ika, tla xkipiyaskia tlasojtlalistli, “xitlaj [...] kijtosneki” (1 Cor. 13:2). San ika ¿tlenon kijtosneki tlasojtlalistli, niman kenon uelis tikpiyaskej niman tikteititiskej mojmostla?

Maski ouijtika tikijtos ika tlajtojli tlen kijtosneki tlasojtlalistli, Biblia techijlia kenon noteititia yejuin kualneskayotl. Kijtoua ika “teijyouiya niman yolkuajli”, “yolpaki ika tlen melauak” niman “nochi kijyouiya, nochi kineltoka, nochi kichia, nochi kixikoua”. Noijki, akin tetlasojtla teititia ika melak teneki, najmana inpampa oksekimej niman xkeman kinkaua akin inuan nouika. Niman akin xtetlasojtla, tenexikolita, noueyimati, kichiua ken akin xtetlakaitaj, san itech tlanemilia, san tetlauelitstok niman xtetlapopoluiya. Xtiknekij tikteititiskej yejuin tlen xkuajli niman tlen teijtlakoua. Tiknekij tikiskaltiskej se tlasojtlalistli tlen “xkitejtemoua san tlen yejua kineki” (1 Cor. 13:4-8, TNM).

“Dios yejua tetlajsojtlalistli”. Melauak, Jehová yejua tlasojtlalistli (1 Juan 4:8). Nochi tlen okichijchiuj niman tlen kichiua techititia yejuin. Tlen melak ueyi okichiuj niman ika okiteitititi tlasojtlalistli yejua ijkuak okuajtitlan Jesús nikan ipan tlaltikpaktli niman ijkon matlajyoui niman mamikiki topampa. Apóstol Juan okijkuilo: “Ipampa yejuin, itlasojtlalis toTajtsin onoteititi ipan tonemilis, pampa toTajtsin okuajtitlan isentenKonetsin ipan tlaltikpaktli niman ijkon matikselikan nemilistli itechkopa yejua. Tlasojtlalistli kijtosneki yejuin, xpampa tejuamej otiktlasojtlakej toTajtsin, yej, ika yejua kachtopa otechtlasojtlak niman okuajtitlan iKonetsin kentla uentli ipampa totlajtlakoluan” (1 Juan 4:9, 10, TNM). Ipampa tlasojtlalistli tlen otechititi toTajtsin, techintlapopoluilia totlajtlakoluan, tikpiyaj tlamachialistli niman uelis tinemiskej nochipa.

Jesús okiteititi ika kintlasojtla tlaltikpakchanejkej ijkuak okinek uajlas niman kuajchiuas tlen toTajtsin kineki. Pablo okijkuilo: “Yejua ika aman tichipajtokej niman xok tikpiaj totlajtlakol, pampa Jesucristo okichiu tlinon Dios okinek ijkuak san sejpa niman para nochipa okixpantilij on itlalnakayo ken itlaj uentli” (Heb. 10:9, 10). Nion se tlaltikpakchane xueliskia kiteititis se tlasojtlalistli ken yejuin. Jesús okijto: “On tetlajsojtlalistli más ueyi yejuan se uelis kipias sa no yejua on ika ma miki impampa itetlajsojkauan” (Juan 15:13). ¿Uelis tikixkopinaskej itlasojtlalis Jehová niman Jesús maski titlajtlakolejkej? Kema uelis tikchiuaskej. Matikitakan kenon.

Pablo techtlajtlanilia: “Xkixkopinakan toTajtsin, ken itlasojkakoneuan, niman xkistinemikan ika tlasojtlalistli, ijkon ken Cristo noijki otechtlasojtlak niman onotemakak topampa ken tlamanijli niman uentli, itlaj ajuiyak tlen ajsi kampa toTajtsin” (Efes. 5:1, 2, TNM). Tla tiknekij tikistinemiskej ika tlasojtlalistli, kipiya tikteititiskej yejuin kualneskayotl ipan nochi tlen tikchiuaj ipan tonemilis. Tlasojtlalistli noteititia ika tlen tikchiuaj, xsan ika tlajtojli. Juan okijkuilo: “Nokonetsitsiuan, ma ka san xteijlikan ika nenkipiaj tetlajsojtlalistli, nion ma ka san xkijtokan ika nenkintlajsojtlaj on tokniuan, yej melauak xkintlajsojtlakan ikan nochi nemoyojlo niman xkintitikan ika nenkintlajsojtlaj ika nochi on tlen nenkichiuaj” (1 Juan 3:18). Se neskayotl, tlasojtlalistli tlen tikmachiliaj ipampa Jehová niman tlaltikpakchanejkej kichiua ika matitenojnotsakan itech “kuajli tlajtoltin itech Tekiuajyotl” (Mat. 24:14, TNM; Luc. 10:27). Noijki tikteititiaj tlasojtlalistli ijkuak titeijyouiyaj, tikchiuaj tlen kuajli niman titetlapopoluiyaj. Ika yejon, Biblia techtlajtlanilia: “Xmotlapojpoluikan iuan oksekimej ijkon ken Dios omechtlapojpoluij itechkopa Cristo” (Efes. 4:32).

Melauak tlasojtlalistli, xkipiya tikasikamatiskej ika kijtosneki titekauilis nochi manochiua. Se neskayotl, seki tajtin akin nochi kitekauiliaj manochiua, kanaj kichiuaj nochi tlen inkoneuj kineki san pampa xok kinekij machokato. San ika, tajtin akin yemelak kintlasojtlaj inkoneuan, kipiyaj san se intlajtol. Noijki ijkon, Jehová yejua tlasojtlalistli, san ika, “kiyektlalia akin kitlasojtla” (Heb. 12:6). Kuakon titeyektlalis ijkuak nonekis, noijki ijkon tikteititiaj ika titetlasojtlaj (Prov. 3:11, 12). San ika, kipiya tikilnamikiskej ika titlajtlakolejkej niman ika xnochipa toyekanaj ika tlasojtlalistli. Ika yejon, ok onka kampa noneki matoyektlalikan. Matikitakan yeyi ken uelis tikchiuaskej.

Kachtopa. Matiktlajtlanilikan toTajtsin matechmaka iespíritu santo. Jesús okijto ika Jehová “kinmakas Espíritu Santo on yejuan kitlajtlaniliskej” (Luc. 11:13). Tla ipan teoyotl tiktlajtlanij espíritu santo niman tokojtiliaj toyekanaskej ika yejuin, kuakon mojmostla ika tlen tikchiuaj tikteititiskej miyek tlasojtlalistli (Gál. 5:16). Se neskayotl, tlayekankej ipan tlanechikojli uelis kitlajtlaniliskej Jehová makinmaka espíritu santo niman ijkon uelis kinnojnotsaskej oksekimej ika tlasojtlalistli itech tlen uajnestiuj ipan Biblia. Niman akin tajtin uelis kichiuaskej teoyotl niman ijkon espíritu santo makinpaleui makinyektlalikan inkoneuan ika tlasojtlalistli, niman xika tlauejli.

Ika ome. Matitlanemilikan itech kenon Jesús okiteititi tlasojtlalistli maski ijkuak kitlajyouiltijtoyaj (1 Ped. 2:21, 23). Ineskayo uelis melak techpaleuis ijkuak yakaj techyolkokoua noso ijkuak topan nochiua tlen xkinamiki. Ijkuak yejon panos, kimelauas matotlajtoltikan: “¿Tlenon kichiuaskia Jesús?”. Se tokniuj siuatl itoka Leigh, notlajtoltis yejuin melak kipaleuiya pampa ijkon tlanemilia kachtopa kichiuas itlaj. Yejua kijtoua: “Se tonajli, se akin iuan nitekiti okintitlanili oksekimej akin touan tekitij se correo kampa melak xkuajli tlajtouaya notechkopa niman itech notekiyo. Yejon melak onechyolkoko. San ika, oninotlajtolti: ‘¿Tlenon kichiuaskia Jesús tla kichiuiliskiaj yejuin?’. Ijkuak yonitlanemili itech tlen kichiuaskia yejua, oniktlapejpeni nikilkauas niman xnikueyilis tlen opanok. Sakin, onikmat ika siuatsintli akin xkuajli notech otlajto kixnamiktoya se ueyi kokolistli niman melak noyolajmantoya. Kuakon, onikasikamat ika kanaj xkinekiya nechyolkokos. Nitlanemilis ipan tlasojtlalistli tlen okiteititi Jesús maski ijkuak kitlajyouiltijtoyaj, onechpaleui manikchiua tlen yejua kichiuaskia niman manikititi tlasojtlalistli akin iuan nitekitiya”. Tla tikixkopinaj Jesús, nochipa toyekanaskej ika tlasojtlalistli.

Ika yeyi. Matijkauakan tlen tiknekij inpampa oksekimej. Yejuin tlasojtlalistli tlen kineskayotia akin melauak kichiuaj ken Cristo (Juan 13:34, 35). Biblia techtlajtlanilia matikpiyakan “tlanemilijli tlen noijki kipiaya Cristo Jesús”. Ijkuak okikauj inemilis ipan iluikak, topampa okikauj nochi tlen ompa kipiaya niman hasta okinek mikis (Filip. 2:5-8, TNM). Tla tikixkopinaj kenon nochipa kinektoya notemakas  ipampa oksekimej niman kenon otetlasojtlak, kuakon, uelis tikmachiliskej niman titlanemiliskej ken yejua, noijki tikitaskej kachtopa tlen oksekimej kinpoloua niman xtlen tejuamej tiknekij. ¿Kenon techpaleuiya tikiskaltiskej tlasojtlalistli?

Ijkuak tikteititiaj tlasojtlalistli melak techpaleuiya. San ome matikitakan.

• TIKINPIYAJ TOKNIUAN IPAN NOCHI TLALTIKPAKTLI. Pampa totlasojtlaj semej iuan oksekimej, tikmatij ika tokniuan itech san katlejua tlanechikojli tlen tikontlajpaloskej, techseliskej ika tlasojtlalistli. Kema, se ueyi tlateochiualistli tikpiyaskej intlasojtlalis tokniuan ipan nochi tlaltikpaktli (1 Ped. 5:9). Tlasojtlalistli ken yejuin san uelis tiknextiskej ipan ikalpan Jehová.

• YOLSEUILISTLI. Ijkuak toijyouiyaj semej iuan oksekimej ika tlasojtlalistli, tiuelij tiyolpakij ipan “yolseuilistli yejuan [te]chsentlalia semej iuan oksekimej” (Efes. 4:2, 3). Tinochimej tikmachiliaj yejuin yolseuilistli ipan totlanechikoluan niman toueyitlanechikoluan, niman xkanaj oksekan noita yejuin ipan tlaltikpaktli tlen melak xeliujtika (Sal. 119:165; Is. 54:13). Ijkuak tokojtiliaj kuajli touikaskej iuan oksekimej, tikteititiaj ika melak tikintlasojtlaj niman noijki tikyolpaktiaj toTajtsin iluikakchane (Sal. 133:1-3; Mat. 5:9).

Pablo okijto: “Tetlajsojtlalistli techmelajkatlalia ipan totlaneltok” (1 Cor. 8:1). ¿Tlenon kijtosnekij yejuin tlajtoltin? Ipan tlaxelojli ueyi 13 itech kachtopa amatlajkuilojli Corintios, Pablo otetomili tlenon kijtosneki yejuin. Kachtopa, tlasojtlalistli kitejtemoua ika oksekimej kuajli manemikan (1 Cor. 10:24; 13:5). Noijki, pampa tlasojtlalistli teijyouiya, tetlakaita niman techiuilia tlen kuajli, yejua tlen ika nochijchiuaj familias akin notlasojtlaj niman tlanechikoltin tlen san sekan tekitij (Col. 3:14).

Xonka tlasojtlalistli tlen melak kualtsin niman tepaleuiya ken tlen tikmachiliaj ipampa toTajtsin. Ipampa yejuin tlasojtlalistli, tlaltikpakchanejkej itech nochi raza, tlajtojli niman maski san kanon maualeuakan kiueyichiuaj niman kitekichiuiliaj Jehová “san sekan” ika pakilistli (Sof. 3:9). Matokojtilikan tikteititiskej mojmostla yejuin melak ueyi kualneskayotl tlen ualeua itech itlakilyo espíritu santo.