Sekimej notlajtoltiaj tla yonopatlak iTlajtol toTajtsin. Teotlajtoketl Isaías okijto ika “itlajtoltsin toDios onkaj para nochipa” (Isaías 40:8). ¿Kenon uelis tikmatiskej ika xakaj kipatla kampa kijtoua tlen toTajtsin kichiuas?

ToTajtsin uelis kichiuas maka mapoliui iTlajtol niman maka yakaj makipatili tlen ompa kijtoua. Teotlajtokej okijkuilojkej iTlajtol toTajtsin ipan amamej noso okse itlaj tlen xnimantsin ijtlakaui, niman pampa xkinekiyaj mapopoliui, nemiyaj tlakamej akin kichijchiuayaj copias niman kuajli kinpouayaj letras niman ijkon kitaskej ika maka manotlalili, manopatili nion manokixtili se letra. San ika, pampa titlajtlakolejkej, kemantika nopopolouayaj.

Tlakamej okichijchiujkej miyek copias itech Biblia. Tla ipan se copia nonextia itlaj tlen onopatlak, uelis noitas okseki copias niman ijkon kimatiskej tla onopopolojkej (tla okseki tikneki tikmatis, xuiya ipan jw.org niman xpoua tlamachtijli “¿Se ha cambiado o manipulado la Biblia?”).

Matitlanemilikan itech seki amamej tlen kimixmatij ken Rollos del mar Muerto, tlen okinnextijkej ipan seki teostomej nisiuj itech mar Muerto, ipan 1947. Yejuin amamej kipiyaj seki itech iTlajtol toTajtsin niman kipiya ipantsin dos mil xiuitl ika okijkuilojkej. Ixtlamatkej okitakej tla yejuin amamej san noijki kijtoua ken Biblia tlen aman tikpiyaj, ¿niman tlenon okitakej?

Ixtlamatkej okitakej ika tlen kijtoua Biblia san noijki ken amamej tlen yeuejkaui okimijkuilojkej. * Pampa kuajli yokimitakej amamej tlen yeuejkaui okimijkuilojkej, yokitakej ika tlen aman tikpouaj ipan Biblia yejon yemelak itlajtol toTajtsin. Tikmatstokej ika toTajtsin yokichiuj ika iTlajtol maka manopatla hasta ipan yejuin tonaltin.

Kuakon kuajli matikmatstokan ika uelis tikneltokaskej tlen kijtoua Biblia. Aman, matikitakan tlenon okijtokej teotlajtokej itech toTajtsin.