TOTAJTSIN xkinekiya matinemikan ijkon ken aman tinemij. Yejua kinekiya ika ipan yejuin tlaltikpaktli san manemikan akin kitlakaitaskiaj itlayekanalis, akin nopaleuiskiaj ika itlanauatiluan niman kichiuaskiaj tlen kuajli ijkon ken yejua kichiua. Kinekiya matinemikan ika toyojlo, matiyolpakikan imiuan tochanejkauan, matiuelikan okseki tekitl niman matijkualtsintilikan yejuin tlaltikpaktli.

• “Yokichiu para nochiuiyan ipan in tlaltikpaktli maka ma onyaj guerras” (Salmo 46:9).

• “Yoyejkok on tonajli para tikimpopolos on yejuan” kijtlakojtokej yejuin tlaltikpaktli (Apocalipsis 11:18).

• “Xok yakaj kijtos: ‘Nikualo’” (Isaías 33:24).

• “Notlajsojkakoneuan kipakaseliskej on tlen kitlaniskej ipan intekiu” (Isaías 65:22).

¿Kenon nochiuas nochi yejuin? ToTajtsin yokitlali iKoneuj, Jesús, ken Tekiuaj itech se Tekiuajyotl tlen iluikak uajtlayekantos ipan nochi tlaltikpaktli. Biblia kitokayotia iTekiuajyo toTajtsin (Daniel 2:44). Biblia noijki kijtoua itech Jesús: “Dios toTEKO kitlalis para Rey yes, niman kipiyas on tekiuajyotl [...], niman itekiuajyo xkaman tlamis” (Lucas 1:32, 33).

Ijkuak Jesús nemiya ipan tlaltikpaktli, okichiuj miyek milagros niman ijkon okiteititi ika, ijkuak tekiuajtis, más kuajli tinemiskej xijkon ken aman.

• Okinpajti kokolistin, ijkon okiteititi ika uelis kinpopolos nochi kokolistin (Mateo 9:35).

• Okitelti se ajakakiyaujtli, ijkon okiteititi ika uelis kiteltis nochi tlen kijtlakoua tlaltikpaktli (Marcos 4:36-39).

• Miyekej okintlakualti, ijkon okiteititi ika uelis techmakas nochi tlen techpoloua (Marcos 6:41-44).

• Atl okikuep vino ipan se iluitl, ijkon okiteititi ika kichiuas ika tejuamej matiyolpakikan (Juan 2:7-11).

¿Tlenon noneki tikchiuas tla tikneki tikselis tlen toTajtsin yokijto kinmakas akin kitlasojtlaj? Onka se ojtli tlen noneki ipan tias. Biblia kijtoua ika yejon ojtli “teuika ne kampa onkaj nemilistli”, niman ika xmiyekej akin uelij kinextiaj (Mateo 7:14).

¿Katlejua ojtli teuika ipan nemilistli? Jehová kijtoua: “Nejua ninemoTEKO Dios. Nejua nemechititia tlen kuajli para nemejuamej; nemechyekana ipan on ojtli yejuan noneki nenkinejnemiskej” (Isaías 48:17). Tla tejua tinejnemi ipan yejuin ojtli, mitspaleuis melak kuajli xnemi.

Jesús okijto: “Nejua niojtli, nitlin melauak, niman ninemilistli” (Juan 14:6). Tla tikneltokaj tlen Jesús otemachti niman tikchiuaj ijkon ken yejua okichiuj, techpaleuis matonisiuikan itech toTajtsin niman kichiuas kuajli matinemikan.

 ¿Kenon uelis tiknextis ojtli tlen teuika ipan nemilistli? Maski onkatij miyekej religiones, Jesús kuajli okijto: “Xnochimej on yejuan nechijliaj: ‘NoTEKO, noTEKO’, kalakiskej ne kampa noTajtsin iluikak chanej tlamandaroua, yej san yejuamej on yejuan kichiuaj on tlen kineki noTajtsin iluikak chanej” (Mateo 7:21). Noijki okijto: “Uelis nenkintaskej tla tlakajkayajkej noso ka  ika on tlen kichiuaj” (Mateo 7:16). Biblia uelis mitspaleuis xmati kenon toTajtsin kineki matikueyichiuakan (Juan 17:17).

¿Tlenon noneki tikchiuas niman ijkon tinemis ipan ojtli tlen teuika ipan nemilistli? Noneki tikixmatis akin otexchijchiuj. ¿Akinon yejua? ¿Kenon itoka? ¿Kenon yejua? ¿Tlenon kichiujtika? ¿Tlenon kineki matikchiuakan? *

Jehová xkinekiya ika san nochipa matitekitikan, matitlakuakan, matoyolpaktikan niman matikinpiyakan tochanejkauan. Yejua kinekiya kuajli matikixmatikan niman ijkon iuan matouikakan. Ijkuak tiktlakamatij, tikititiaj ika tiktlasojtlaj. Jesús okijto: “In nemilistli yejuan para nochipa se kiselia ijkuak mitsixmati tejua yejuan san moselti melauak tiDios” (Juan 17:3).

Tla tikneki tikpaktis toTajtsin akin melauak, kanaj nonekis itlaj tikpatlas ipan monemilis. Kanaj tikitas ika achijtsin ouijtika, san ika, tejua kuajli tinemis tla tipeua tinejnemi ipan yejuin ojtli. Tla tikneki tikmatis okseki itech toTajtsin, xtlajtlani mamitsmachtikan ipan topágina de Internet, www.jw.org/ngu. Iteixpantijkauan Jehová ika inyojlo kinekiskej mitsontlajpaloskej kampa tejua tiknekis niman ijkuak tejua tiuelis.