Itoka. Ipan Biblia kijtoua: “ToTEKO yejua sen ueyi tlauijsoketl. JEHOVÁ, in yejua itoka” (Éxodo 15:3). Ipan Biblia, itoka toTajtsin uajnestiuj ipantsin siete mil veces. Maski ijkon, ipan miyek biblias yokipatlakej itoka ika okseki tlajtoltin ken toTeko. ToTajtsin kineki iuan xmouika niman xnotsa ika itoka (Salmo 105:1).

Ken noijki tikixmatij. Biblia noijki kiteneua Jehová ken toTajtsin, akin nochi ueli kichiua, toTlachijchiujkauj, toTaj, toTeko niman ken akin melak Ueyixtika. Miyekej akin yeuejkaui okitekichiuilijkej okinotskej ika yejuin tlajtoltin (Daniel 9:4).

 Kenon yejua. “Dios yejua Espíritu” (Juan 4:24). Biblia kuajli kijtoua ika xkeman yakaj kita toTajtsin (Juan 1:18, TNM). Noijki kuajli techijlia ika yejua ueli yolpaki noso najmana. Kuakon, tlen tikchiuaj uelis kiyolkokos noso kiyolpaktis (Proverbios 11:20; Salmo 78:40, 41).

Kualtsin ken noyekana. ToTajtsin xakaj kichikoita, yejua nochimej kinselia, maski tlatlamantikej nesij, oksekan ualeuaj noso tlamantik tlajtouaj (Hechos 10:34, 35). Yejua noijki kiteititia ika teiknelia, teijyouiya, xtekaua niman nochipa kijtoua tlen melauak (Éxodo 34:6, 7). San ika, kipiya naui tlen ika kualtsin noyekana niman tlen kichiua matiknekikan tiknisiuiskej.

Kojtilistli. Yejua kijtoua: “Nejua niDios yejuan nochi ueli nikchiua”. Yejon kijtosneki ika uelis kichiuas tlen yokijto pampa ikojtilis xkeman tlami (Génesis 17:1).

Tlamachilistli. Xakaj nemi akin melak tlamachilise ijkon ken toTajtsin. Ika yejon Biblia kijtoua ika “san iselti tlamatki” (Romanos 16:27).

Melajkayotl. ToTajtsin nochipa kichiua tlen melajki. “Nochi kuajli kisa itekiu” niman “yejua xkaman kichiua itlaj yejuan xmelajki” (Deuteronomio 32:4).

Tlasojtlalistli. Biblia kijtoua ika “Dios yejua tetlajsojtlalistli” (1 Juan 4:8). ToTajtsin xsan kiteititia ika tetlasojtla, yejua tlasojtlalistli. Pampa sajnoye ueyi itlasojtlalis hasta nesi ipan nochi tlen kichiua, niman yejon melak techpaleuiya.

Ken touan nouika. ToTajtsin akin nemi ne cielo melak techtlasojtla (Mateo 6:9). Tla tejuamej itech titlaneltokaj, uelis iuan touikaskej (Salmo 25:14). Yejua melak najmana topampa, ika yejon kineki itech matonisiuikan ika teoyotl niman matikijlikan nochi tlen techajmana (Santiago 4:8; 1 Pedro 5:7).

Jesús xsan no yejua toTajtsin. Jehová iselti okichijchiuj Jesús. Ika yejon, ipan Biblia kijtoua ika “yejua isenTekoneu toTajtsin” (Juan 1:14). ToTajtsin Jehová kachtopa okichijchiuj Jesús niman sakin okitlali “ken se tlamachijchijketl” niman ijkon makichijchiua tlen onka ipan cielo niman nochi tlen onka (Proverbios 8:30, 31; Colosenses 1:15, 16).

 Jesús xkeman okijto tla yejua toTajtsin. Yejua okijto: “Pero nejua kemaj nikixmati pampa itech niualeua, niman yejua onechajtitlan” (Juan 7:29). Ijkuak tlajtotoya iuan se inomachtijkauj niman okinots Jehová, okijto: “NoTajtsin niman nemoTajtsin” niman “noDios niman nemoDios” (Juan 20:17). Ijkuak yejua omik, Jehová okiyoliti niman ijkon manemi ne cielo, okichiuj inakastlan manoseui niman okichiuj matlanauati (Mateo 28:18; Hechos 2:32, 33).

Jesucristo uelis mitspaleuis xmonisiui itech toTajtsin

Ouajla ipan tlaltikpaktli niman ijkon otechititiko kenon iTaj. Jehová okijto itech Jesús: “In yejua notlajsojkaKoneu. Yejua xtenkakikan” (Marcos 9:7). Jesús yejua akin melak kuajli kixmatstika toTajtsin. Jesús okijto: “Xakaj kimati akinon noTajtsin, yej san nejua yejuan niteKoneu, niman on yejuan nikneki nikimpanextilia” (Lucas 10:22).

Kuajli noyekana ijkon ken toTajtsin. Jesús noijki okichiuj ken iTaj, ika yejon ouel okijto: “On yejuan nechita, no kita on noTajtsin” (Juan 14:9). Jesús ouel okinpaleui oksekimej makinisiuikan toTajtsin pampa ika itlajtoluan niman ika tlen kichiuaya kiteititiaya ika iTajtsin kintlasojtlaya. Jesús okijto: “Nejua niojtli, nitlin melauak, niman ninemilistli. Tej, san nejua notechkopa uelis ajsiskej itech noTajtsin” (Juan 14:6). Noijki okijto: “On yejuan melauak kinekij kimauistiliaj toTajtsin, kimauistiliskej impan inyojlo niman ika tlen melauak ken Dios kineki. ToTajtsin tej, ijki kineki ma kichiuakan on yejuan kimauistiliaj” (Juan 4:23). ¡San xkonnemili! Jehová kintejtemoua akin kinektokej kimatiskej tlen melauak itech yejua, ijkon ken tejua.