Onka miyek tlen uelis mitsijliskej ijkuak timoyolkokoua. San ika, xnochi uelis mitspaleuis. Xnemili, kanaj sekimej mitsijliskej maka xchoka niman maka xteititi tlen tikmachilia. Niman oksekimej uelis mitsijliskej xteititi noso xkijto nochi tlen tikmachilia. San ika, Biblia techijlia tlen kinamiki tikchiuaskej, niman tlen kijtoua, noijki ijkon yokitakej akin tlaixmatkej ika tepaleui tlen kemach yonomachtijkej itech yejuin.

Oksekimej kinemiliaj ika xkuajli nesi tla se tlakatl choka. San ika ¿noneki tipinauis tichokas teixpan? Akin yonomachtijkej kenon kuajli tomachiliskej, kimatstokej ika ijkuak se noyolkokoua nochipa choka. Ijkuak se noyolkokoua pampa okipolo se ichanejkauj, ika yolik yolseujtias. Tla xtikteititia ika timoyolkokoua, uelis mitsijtlakos niman xmitspaleuis. Biblia xkijtoua ika tla xkuajli tichokas ijkuak timoyolkokoua. Xtlanemili itech Jesús,  ijkuak Lázaro omik akin iuan nouikaya, yejua ochokak, maski kipiaya kojtilistli ika kichiuas oksejpa manemikan akin yomijkej (Juan 11:33-35).

Miyekpa, ijkuak se xkichiaya mamiki ichanejkauj, melak kualani. Onka miyek tlen ika uelis melak kualanis. Kanaj ijkuak se akin melak kitlakaita kijlia itlaj tlen kiyolkokoua noso kijlia tlen xnonekiya makijli. Mike, chanej akin Sudáfrica, kijtoua: “San nikpiaya 14 xiuitl ijkuak omik notaj. Se tlayekanketl itech tlaneltokijli okijto ika toTajtsin kineki manemikan iluikak akin kichiuaj tlen kuajli niman ika yejon kinuika. * Yejuin melak onechkualani pampa tejuamej melak tiknekiyaj ika notaj touan manemi. Yopanok 63 xiuitl niman ok nechyolkokoua tlen onechijlikej”.

¿Niman tlenon panoua ijkuak se notlajtlakoltia? Ijkuak nion achijtsin xnochiaya yakaj mamiki, akin noyolkokoua uelis miyekpa kinemilis yejuin: “Yejuin xpanoskia tla nejua nikchiuaskia itlaj”. Noso kanaj timomachilis ika tikpiya tlajtlakojli pampa san kemach onemokualanijkej. Yejuin uelis kichiuas xmotlajtlakolti.

Niman tla xkuajli timomachilia pampa timotlajtlakoltia, maka san ijkon xmokaua. Xtlajto iuan se akin kuajli iuan timouika niman ijkon mamitskaki. Yejua mitspaleuis xkasikamati ika nochimej ijkon nomachiliaj akin kipolouaj se inchanejkauj. Biblia techilnamiktia: “Se akin melauak kuajli iuan touikaj nochipa techtlasojtla, niman nochiua ken tokniuj ijkuak tikpiyaj tlajyouilistli” (Proverbios 17:17).

ToTajtsin Jehová yejua akin melak kuajli iuan touikaskej ijkuak ijkon tomachiliaj. Ika yejon, xkijli nochi tlen tikmachilia “pampa yejua kineki [mits]paleuis” (1 Pedro 5:7). Niman noijki, yejua kijtoua ika techpaleuis tinochimej ika tlen tikmachiliaj niman tlen tiknemiliaj. ITlajtol kijtoua: “Dios mechmakas yolseuilistli on yejuan más ueyi de nochi kech se tlakatl uelis kajsikamatis” (Filipenses 4:6, 7). Noijki xkauili ika toTajtsin mamitspaleui niman mamitsyolseui ika iTlajtol, Biblia. Xkijkuilo ipan se amatl textos tlen mitsyolchikauas (xkita  recuadro ipan yejuin página). Hasta uelis tikintsontekontlalis. Titlanemilis itech yejuin textos uelis mitspaleuis ijkuak ipan yeuajli san moselti timomachilia niman xueli tikochi (Isaías 57:15).

San kinaman, se tlakatl akin kipiya 40 xiuitl, itoka Jack, kijtoua ika kemantika nomachilia iselti pampa isiuauj, akin kipiaya cáncer, omik. San ika, teoyotl melak kipaleuiya, yejua kijtoua: “Ijkuak niknotsa toTajtsin, xok ninomachilia noselti. Nochipa ipan yeuajli ninokuiteua niman xok ueli nikochi. Kuakon nikita niman nitlanemilia itech tlen kijtoua Biblia niman nikijlia toTajtsin tlen nikmachilia. Yejuin nechpaleuiya kuajli maninomachili, maniyolseui niman oksejpa ueli nikochi”.

Se ichpochtli itoka Vanessa noijki omik inan ipampa se kokolistli. Yejua noijki yokitak kenon yokipaleui ijkuak kinotsa toTajtsin. Yejua kijtoua: “Ijkuak melak ouijtika nipanoua, melak nichoka niman nikteneua itoka toTajtsin. Jehová onechkak ijkuak oniknots niman nochipa onechyolchikauj”.

Sekimej akin tetlajtolpaleuiyaj ijkuak noyolkokouaj tlaltikpakchanejkej pampa miki inchanejkauj, kijtouaj ika melak tepaleui tla ipan yejon tonaltin kinpaleuiyaj oksekimej. Ken ijkuak kichiuaskej tekitl tlen nonekis ipan inkalpan. Ijkuak ijkon kichiuaj, oksejpa kuajli nomachiliaj niman ika yolik popoliui ika noyolkokouaj (Hechos 20:35). Miyekej akin kichiuaj ken Cristo akin noijki kipolouaj se inchanejkauj, yokitakej ika ijkuak kinpaleuiyaj oksekimej, kinpaleuiya oksejpa kuajli manomachilikan (2 Corintios 1:3, 4).