1, 2. ¿Tlenon ouijtika okixnamijkej tlaltikpakchanejkej tlen uajnestiuj ipan Génesis, niman tleka noneki tomachtiskej?

¿YOTITLANEMILIJKA itech seki tlaueltin tlen uajnestiuj ipan Biblia? Ipan kachtopa tlaxeloltin uejueyimej itech amoxtli Génesis, tlajtoua ika Caín okimikti ikniuj Abel (Génesis 4:3-8). Lamec okimikti se telpochtli akin okichiuili itlaj tlen xkinamiki (Génesis 4:23). Itlajpixkauan Abrahán onokualanijkej iuan itlajpixkauan Lot (Génesis 13:5-7). Agar onoueyimat itech Sara niman Sara onokualani iuan Abrahán (Génesis 16:3-6). Ismael kintlauelitaya nochimej niman kitlauelitayaj nochimej (Génesis 16:12).

² ¿Tleka yejuin tlaueltin kinteneua Biblia? Pampa uelis tomachtiskej itech yejuin tlen opanok itech akin noijki tlajtlakolejkej katkaj niman yemelak okipixkej tlauejli. Tejuamej noijki titlajtlakolejkej. Niman ijkuak tikpiyaskej tlaueltin ipan tonemilis, uelis tikchiuaskej ijkon ken akin tlen kuajli okichiujkej tlen kinteneua Biblia niman xtikchiuaskej ken akin xkuajli okichiujkej (Romanos 15:4). Yejuin uelis techpaleuis matinemikan ika yolseuilistli iuan oksekimej.

3. ¿Tlenon tomachtiskej ipan yejuin tlamachtijli?

 ³ Ipan yejuin tlamachtijli, tomachtiskej tleka noneki tikyektlaliskej tlaueltin niman kenon uelis tikchiuaskej. Noijki tomachtiskej tlajtolyekanalistin itech Biblia tlen uelis techpaleuis matikyektlalikan tlaueltin niman nochipa kuajli matouikakan iuan Jehová niman iuan oksekimej.

4. ¿Katlejua tlanemilijli onka nochiuiyan ipan tlaltikpaktli niman tlenon yopanok ika yejon?

⁴ Tlaltikpakchanejkej kipiyaj miyek tlauejli niman xuelij san sekan nemij ipampa Satanás. ¿Tleka ijkon tikijtouaj? Ipan xochitlalpan Edén, Satanás okijto nochimej uelis kitlapejpeniskej tlen kuajli niman tlen xkuajli niman xnoneki makinyekana toTajtsin (Génesis 3:1-5). San ika, ijkuak tikitaj tlen panotika aman, uelis tikitaskej ika yejon tlanemilijli san kichiua maonia tlaueltin. Miyekej tlaltikpakchanejkej kinemiliaj ika kinmelaua kitlapejpeniskej tlen kuajli niman tlen xkuajli. Yejuamej noueyimatij, notlatlanij niman xnajmanaj kinyolkokoskej oksekimej itech tlen kitlapejpeniaj kichiuaskej. Yejon tlanemilijli kichiua maonia tlauejli. Biblia techilnamiktia ika tla nimantsin tikualanij, tikpiyaskej miyek tlauejli iuan oksekimej niman miyekpa titlajtlakoskej (Proverbios 29:22).

5. ¿Kenon otemachti Jesús manoyektlali se tlauejli?

⁵ Ijkuak Jesús okitemakak Tlamachtijli ipan Tepetl, yejua okinmachti inomachtijkauan manoyolseuikan iuan oksekimej niman maka makiueyilikan tlauejli, maski kemantika xkinemiliskej ika tla yejon kuajli yes intechkopa. Se neskayotl, yejua okimijli matetlasojtlakan, manoyolseuikan iuan oksekimej, makikixtikan tlen techtlauelmiktia, makiyektlalikan nimantsin se tlauejli niman makintlasojtlakan intlauelikniuan (Mateo 5:5, 9, 22, 25, 44).

6, 7. a) ¿Tleka melak noneki nimantsin xyektlali tlauejli? b) ¿Katlejua tlajtoltilistin noneki matotlajtoltikan tinochimej?

⁶ Ipan yejuin tonajli, tejuamej tikueyichiuaj Jehová ijkuak tikchiuiliaj teoyotl, ijkuak titenojnotsaj niman ijkuak tiauej tlanechikoltin. Tla xtinemij iuan tokniuan ika yolseuilistli, Jehová xkiselis tlen ika tikueyichiuaj (Marcos 11:25). Tla tiknekij kuajli touikaskej iuan Jehová, noneki tikintlapopoluiskej oksekimej ijkuak nopopolouaj (xpoua Lucas 11:4; Efesios 4:32).

⁷ Jehová kineki ika nochimej akin kitekichiuiliaj matetlapopoluikan niman manemikan ika yolseuilistli iuan oksekimej. Uelis totlajtoltiskej: “¿Nikintlapopoluiya nimantsin nokniuan? ¿Niyolpaki imiuan ninemis?”. Tla nesi ika tejua ok noneki titetlapopoluis, xchiuili teoyotl Jehová niman xtlajtlanili mamitspaleui tikchiuas ken noneki. ToTajtsin mitskakis niman mitsnankilis (1 Juan 5:14, 15).

8, 9. ¿Tlenon noneki tikchiuaskej tla yakaj itlaj texchiuilia?

⁸ Tinochimej titlajtlakolejkej, niman ika yejon uelis oksekimej kijtoskej noso kichiuaskej itlaj tlen uelis techyolkokos (Eclesiastés 7:20; Mateo 18:7). ¿Tlenon uelis tikchiuaskej? Uelis titlanemiliskej niman tomachtiskej itech yejuin tlen opanok: Se tokniuj siuatl okintlajpalo omemej tokniuan tlakamej kampa onosentlalijkej kualtsin panoskej san sekan. Se tokniuj xkuajli onomachili ken okitlajpalo yejuin tokniuj. Ijkuak yejuin omemej tokniuan san inselti nemiyaj, tokniuj akin xkuajli onomachili opeuj xkuajli tlajtoua itech tokniuj siuatl. San ika, okse tokniuj okijli ika yejon  tokniuj siuatl kuajli yokitekichiuili Jehová ipan 40 xiuitl maski yokixnamik miyek tlen ouijtika. Tokniuj okijli ika tokniuj siuatl xkinekiya kiyolkokos. ¿Tlenon okichiuj yejuin tokniuj? Yejua okijto: “Melauak tlen tikijtoua”. Kuakon tokniuj okitlapopolui itech tlen opanok.

⁹ ¿Tlenon techmachtia tlen opanok? Ijkuak yakaj texchiuilia itlaj noso techyolkokoua, uelis tiktlapejpeniskej tlen tikchiuaskej. Se akin tetlasojtla tetlapopoluiya (xpoua Proverbios 10:12; * 1 Pedro 4:8). Ijkuak tijkauiliaj mapano tlen texchiuiliaj, melak tikyolpaktia Jehová (Proverbios 19:11; Eclesiastés 7:9). Kuakon ijkuak oksejpa yakaj kijtos noso kichiuas itlaj tlen techyolkokos, matotlajtoltikan: “¿Uelis nijkauilis mapano tlen onexchiuili? ¿Yemelak noneki manitlanemili itech yejuin?”.

10. a) ¿Kenon onomachili se tokniuj ijkuak sekimej opeuj xkuajli tlajtouaj itechkopa? b) ¿Tlenon okipaleui yejuin tokniuj makipiya yolseuilistli?

¹⁰ Ijkuak oksekimej kijtoskej itlaj tlen xkuajli totechkopa, uelis ouijtika tijkauiliskej mapano. Xtlanemili tlen ipan onochiuj se tokniuj precursora itoka Lucy. Sekimej ipan tlanechikojli xkuajli otlajtokej itech ken tenojnotsa niman ken kikui itiempo. Yejua melak onoyolkoko niman okintlajtlanili tlayekankej makipaleuikan. ¿Tlenon opanok? Yejua kijtoua ika tokniuan okikuikej Biblia ika okipaleuijkej. Okijlikej maka melak matlanemili itech tlen kinemiliaj oksekimej niman matlanemili itech tlen kinemilia Jehová. Yejua okiyolchikauj tlen okipouj ipan Mateo 6:1-4 (xpoua). Yejuin okipaleui makilnamiki ika tlen kichiuas makiyolpakti Jehová yejon tlen melak noneki. Kuakon okitlapejpeni kikauilis mapano tlen xkuajli okijtokej itechkopa. Aman, tla tokniuan kijtouaj itlaj itech itenojnotsalis, yejua yolpaki pampa yejua kimati ika kichiua nochi tlen kiyolpaktis Jehová.

11, 12. a) ¿Tlenon noneki tikchiuaskej tla nesi ika se tokniuj kichiua itlaj totechkopa? b) ¿Tlenon uelis tomachtiskej ken Abrahán okiyektlali tlauejli iuan Lot? (Xkita tlaixkopinajli kampa peua tlen tomachtijtokej).

¹¹ “Tinochimej tikchiuaj miyek tlajtlamach tlen xkuajli” (Santiago 3:2). Matikonnemilikan ika se tokniuj xkuajli nomachilia pampa tejua itlaj otikijto noso otikchiuj. ¿Tlenon noneki tikchiuas? Jesús okijto: “Tla ijkuak tiktemaka mouen ne tlaixpan tikelnamiki ika okse itlaj ika motech kualani, xkaua mouen ne ipan on tlaixpan niman xuiya itech on tlakatl. Achtopa iuan xmoyoltlaliti, niman kemaj oksejpa xuiya ne itech on tlaixpan niman xtemaka mouen” (Mateo 5:23, 24). Kuakon xtlajto iuan mokniuj. Ijkuak iuan titlajtos, noneki xchiua ika maonia yolseuilistli iuan yejua. Tejua noneki tikselis ika otimopopolo niman maka xyejyeko tiktlajtlakoltis yejua. Toyolseuiskej iuan tokniuan yejon tlen melak noneki.

¹² Biblia kijtoua ika itekipanojkauan toTajtsin uelis noyolseuiskej ijkuak nokualaniskej noso xnotlajtolnamikiskej. Se neskayotl, Abrahán iuan isobrino Lot kinpiayaj miyek yolkamej. Kuakon intlajpixkauan opeujkej nokualaniaj pampa xkimajxiliaya tlajli kampa kinpiyaskej inyolkauan. Pampa Abrahán kinekiya maonia yolseuilistli, okikauili Lot makitlapejpeni kachtopa melak kuajli tlajli (Génesis 13:1, 2, 5-9). ¡Melak kuajli neskayotl tlen uelis tomachtiskej! ¿Xkuajli okisato Abrahán ipampa tlen okichiuj?  Ka. Nimantsin ijkuak opanok yejuin, Jehová okijli ika kimakas Abrahán miyek tlemach xijkon ken okipolo (Génesis 13:14-17). ¿Tlenon techmachtia itech yejuin? Tla tikpolouaj itlaj, Jehová techteochiuas ijkuak tikyektlaliskej se tlauejli ika tlasojtlalistli ^[1] (xkita nota kampa ontlami).

13. ¿Tlenon okichiuj se tokniuj tlayekanketl ijkuak xkuajli okinots se tokniuj niman tlenon uelis tomachtiskej itech yejuin neskayotl?

¹³ Matikitakan se neskayotl tlen opanok. Se tokniuj yenkuik tlayekanketl itech se tekitl tlen nochiua ipan se ueyi tlanechikojli okonots se tokniuj tla ueliskia kipaleuis itech yejon tekitl. Yejon tokniuj xkuajli ken okinankili niman xok okinek iuan matlajto ipan teléfono. Ipan okse semana, tokniuan onosentlalijkej ipan Kajli kampa Tosentlaliaj, kachtopa okichiuilijkej teoyotl Jehová niman sakin opeuj tlajtouaj kanaj se hora. Tokniuj akin xkuajli nomachiliaya okijli tlen opanok iuan tokniuj akin kachtopa tlayekanketl katka itech yejon tekitl. Tokniuj akin yenkuik tlayekanketl okikak ika tlasojtlalistli niman okipaleui ika Biblia. Sakin yejuin omemej tokniuan onoyolseuijkej niman san sekan otekitkej ipan ueyi tlanechikojli. Yejon tokniuj melak okitlasojkamachili tokniuj yenkuik tlayekanketl ika iuan otlajto ika tlasojtlalistli.

14, 15. a) ¿Kemanon noneki tikchiuas tlajtolpaleuilistli tlen kijtoua Mateo 18:15-17? b) ¿Katlejua yeyi tlemach okijto Jesús tlen noneki nochiuas niman tlenon tiknekiskej manochiua ijkuak tikchiuaskej yejon?

¹⁴ Miyek tlaueltin tlen panoua itech tokniuan uelis san yejuamej kiyektlaliskej niman noneki ijkon manochiua. San ika, kemantika xueli ijkon nochiua. Kemantika nonekis intlapaleuilis oksekimej ijkon ken kijtoua Mateo 18:15-17 (xpoua). “Itlaj  tlen xkuajli” noso tlajtlakojli tlen okiteneuj Jesús xsan pitentsin tlauejli. ¿Kenon tikmatij? Jesús okijto ika tla se akin kichiua tlajtlakojli xkineki noyolkuepas sakin tla iuan yotlajto ikniuj, iuan teixpantijkej niman tlayekankej ipan tlanechikojli, noneki noitas ken akin “xkineltoka Dios noso ken se tlaixpachouani tlakobrarojketl”. Ipan yejuin tonajli, kijtosneki ken se akin kikixtiaj itech tlanechikojli. Tlajtlakojli noso “itlaj tlen xkuajli” uelis ompa kalakis ken ijkuak se tekajkayaua niman ijkon kitekuilis itlaj tlen xkimelaua noso ken se tetlajtolchijchiujketl. San ika, xompa kalaki tlajtlakojli ken ijkuak se kikajkayaua ixnamik, ijkuak omemej tlakamej noso omemej siuamej nonamiktiaj, akin kixnamiki tlen melauak noso akin kinueyichiua tajtsitsintin. Yejuin tlajtlakoltin nochipa noneki kitaskej tlayekankej.

¹⁵ Jesús kinekiya ika yejuin tlajtolpaleuilistli matikitakan ken tikpaleuiskej se tokniuj pampa tiktlasojtlaj (Mateo 18:12-14). ¿Kenon uelis tikchiuaskej yejuin tlajtolpaleuilistli? Kachtopa, noneki toyolseuiskej iuan tokniuj san iuan yejua, maka iuan oksekimej. Kanaj nonekis iuan titlajtoskej miyekpa. San ika ¿tlenon tikchiuaskej tla ok xueli iuan toyolseuiyaj? Ika ome, noneki titlajtoskej iuan tokniuj iuan yakaj akin kimati tlen opanok noso akin uelis kitas tla itlaj xkuajli yonochiuj. Tla yejon tlauejli ouel onoyektlali, “yejua oksejpa kuajli mouan nokauas”. San ika, san tla ijkuak iuan yotitlajto mokniuj miyekpa niman xueli nemoyolseuiyaj, noneki tikchiuas okse. Ika yeyi, tikimijlis tlauejli tlayekankej ipan tlanechikojli.

16. ¿Tlenon teititia ika tikchiuaskej tlajtolpaleuilistli tlen Jesús okijto melak tepaleui niman titetlasojtlas?

¹⁶ Miyekpa, xnonekis tikchiuaskej yejuin yeyi tlemach tlen uajnestiuj ipan Mateo 18:15-17. Yejuin techyolchikaua. ¿Tleka ijkon tikijtouaj? Pampa miyekpa, akin okichiuj tlajtlakojli kiselia ika onopopolo niman noyektlalia tlauejli, ika yejon xnoneki manoijto ika kikixtiskej itech tlanechikojli. Tokniuj akin okichiuilijkej itlaj noneki kitlapopoluis ikniuj niman ijkon onias yolseuilistli. Kuakon kuajli nesi ika itlajtolpaleuilis Jesús xnoneki nimantsin matikimijlikan tlayekankej. San noneki tikimijliskej tlayekankej sakin tla yotikchiujkej ome tlemach niman tla nesi ika yemelak itlaj xkuajli yonochiuj.

17. ¿Tlenon tlateochiualistli tikpiyaskej ijkuak tiktejtemoskej maonia yolseuilistli se iuan okse?

¹⁷ Pampa tinochimej titlajtlakolejkej, uelis tikinyolkokoskej tokniuan. Se inomachtijkauj Jesús itoka Santiago okijkuilo: “Tla yakaj, nochipa ikan inenepil san kijtoua on tlen kuajli, melauak yejua kuajli tlakatl, niman ueli kuajli kimandaroua nochi itlalnakayo” (Santiago 3:2). Tla tiknekij tikyektlaliskej tlauejli, noneki tikchiuaskej nochi tlen tiuelij niman ijkon tiktejtemoskej “yolseuilistli” niman matikpiyakan (Salmo 34:14). Ijkuak nochipa tikchiuaj maonia yolseuilistli iuan nochimej tokniuan, techpaleuiya san sekan matinemikan (Salmo 133:1-3). Niman tlen melak ueyi kijtosneki, kuajli iuan touikaskej “Dios yejuan kitemaka yolseuilistli” (Romanos 15:33). Melak tiyolpakiskej tikpiyaskej nochi yejon tlateochiualistin ijkuak tikyektlaliskej tlauejli ika tlasojtlalistli.