Kanaj tikilnamiki ika Gail, akin otikteneujkej ijkuak otipeujkej itech yejuin series, xkuajli kimatiya tla uelis kixikos ika noyolkokouaya ika omik iueuentsin, Rob. San ika, yejua melak kineki oksejpa kitas iueuentsin ipan yenkuik tlaltikpaktli tlen toTajtsin yokijto kitlalis. Yejua kijtoua: “Apocalipsis [Revelación] 21:3, 4 se texto tlen melak nikuelita”. Ompa kijtoua: “Sa no yejua Dios inuan chantis niman yejua nochiuas inDios. Dios kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok”.

Gail kijtoua: “Ika yejuin tlajtoltin nasikamati nochi. Nikimiknelia akin kipolouaj se akin kitlasojtlaj niman xkimatij tla oksejpa uelis kitaskej”. Gail kichiua tlen kineltoka ijkuak tenojnotsa itech kuajli tlajtoltin 70 horas ipan se metstli. Kinnojnotsa akin nisiuj chantij kampa yejua chanti itech tlenon kichiuas toTajtsin ika tlayekapan ijkuak “xok onyas mikilistli”.

Kanaj tejua uelis tikijtos: “¡Xueli nikneltoka yejon!”. San ika, xtlanemili itech se tlakatl itoka Job. Yejua yokasijka se kokolistli melak xkuajli (Job 2:7). Maski Job kinekiya mamiki, yejua ok tlaneltokaya itech ikojtilis toTajtsin ika oksejpa yoliuiskia ipan tlaltikpaktli. Yejua okijto: “¡Tla ipan tlalkontli tinechiyanaskia, [...] tiktlaliskia kemanon ontlamiskia tonajli niman xnechilnamiki! [Tejua] tinechnotsas, niman nejua nimitsnankilis. Melak tiknekis tikchiuas yejuin ipampa tlen yokichijchiujkej momauan” (Job 14:13, 15). Xok uejkaujtipan poliui, yejon tlen toTajtsin kichiuas ipampa Job niman ipampa miyekej oksekimej ijkuak yejuin tlaltikpaktli nokuepas se xochitlalpan (Lucas 23:42, 43, TNM). “Ika on mimikej yoliuiskej nochimej”, kijtoua Biblia ipan Hechos 24:15. Niman Jesús okijto: “Ma ka yejua ika in xmojkatlachakan, pampa yejkos on tonajli ijkuak nochimej on mimikej kakiskej notlajtol niman kisaskej ipan intlalkon” (Juan 5:28, 29). Job kitas ijkuak nochiuas yejon tlajtoltin. Yejua oksejpa uelis kipiyas kojtilistli niman itlalnakayo nochipa selik yes xijkon ken ijkuak se telpochtli (Job 33:24, 25). Niman noijki ijkon ipan nochiuas akin kitlasojkamachiliskej toTajtsin ika kinmakas oksejpa innemilis ipan tlaltikpaktli.

Tla tejua yotikpolo se akin tiktlasojtla, kanaj tlen yotikitakej nikan ok xmitsyolseuiya kuajli. San ika, tla titlanemilia itech tlen kijtoua toTajtsin kichiuas tlen uajnestiuj ipan Biblia, tejua uelis tikpiyas tlamachialistli niman yolchikaualistli tlen mitspaleuis (1 Tesalonicenses 4:13).

¿Tikuelitaskia timomachtis okseki kenon uelis tikxikos ijkuak timoyolkokoua? Noso kanaj timotlajtoltia itlaj ken yejuin: “¿Tleka toTajtsin kikauilia maonia tlen xkuajli niman tlajyouilistli?”. Timitstlajtlaniliaj xkalaki ipan página itech Internet tlen otiktlapojkej, jw.org, niman xkita kenon Biblia teyolchikaua niman kuajli ken tlanankilia.