XNEMILI YEJUIN: tikistinemi ipan se museo kampa onka miyek tlemach tlen yeuejkaui onochijchiujkej. Nochi yokojkoyonkej, yososolijkej niman yotlajtlapankej. Seki xok sesentetl niman ueyi kech kinpoloua. San ika, tikita se tlen melak kuajli onka. Kuajli nesi ika ouijtika ken tlachijchiujtli. “¿Yejuin tlen melak yenkuik?”, tiktlajtoltia akin mitstlatlachaltijtiuj. “Ka, yejuin tlen melak youejkauj niman xkeman kiyektlaliaj”, mitsnankilia. “¿Nochipa san kejyeujtokej?”, tikijtoua tejua. “Ka”, mitsnankilia, “yejuin tlen melak yotlaxiko, ipan yopanok chikauak ejekatl niman kiyaujtli, niman miyekej yokinejkej kijtlakoskej”. Kuakon, tejua kanaj tiknemilia: “¿Ika tlenon tlachijchiujtli?”.

Uelis tikijtoskej ika Biblia ijkon ken yejon tlen melak techmojkatlachialtia. Biblia se amoxtli tlen melak youejkauj, xijkon ken oksekimej. Melauak ika onka okseki amatlajkuiloltin tlen youejkauj ika onochijchiujkej, san ika, noijki ken yejon tlemach tlen yotikinteneujkej tlen melak yososolijkej, miyekej melak yoijtlakaujkej pampa youejkaujkej. Tlen kijtouaj yejuin amoxtin itech ciencia, se neskayotl, xok noselia ipampa tlen yenkuik yonoixmat niman tlen kuajli yonoteititi. Tlen kijtoua itech kenon se nopajtis, miyekpa teijtlakouaj maski kinekiya tepaleuiskej. Niman miyek itech yejon amatlajkuiloltin tlen youejkaujkej, san nokaua achijtsin intech, pampa yopoliujkej noso melak yoijtlakaujkej.

Biblia melak sejneka. Ikipiya ipantsin 3,500 xiujtin ika youejkauj, san ika, nion achijtsin xnopatla. Niman, maski ipan miyek xiujtin miyekpa yokinejkej kipopoloskej, okitlatijkej, xokitekauilijkej manopiya niman okichiujkej maka makitlakaitakan, Biblia xoijtlakauj. Maski aman melak miyek yonoixmat, miyek itech tlen kijtoua Biblia kiteititia ika kuajli temachtiaya hasta itech tlen xnoixmatiya (xkita recuadro “¿Kijtouaya tlen ok xnoixmatiya?”).

Maski ijkon, kanaj tejua timotlajtoltia: “¿Melauak ika aman ok tepaleuiya tlen kijtoua Biblia?”. Tla tikneki tikmatis itech yejuin, xtlanemili itech xkuakualtin tlaueltin tlen kixnamiktokej tlaltikpakchanejkej. ¿Katlejua melak temomojtikej? Kanaj titlanemilia itech guerra, ken kitsokuilouaj tlaltikpaktli, tlen xkuajli nochiua noso ken tlakajkayauaj. Aman matikimitakan seki itlajtolyekanalisuan Biblia niman, ijkuak tikimitstiaskej, xmotlajtolti: “¿Melak kuajli tichantiskiaj tla tinochimej tikchiuaskiaj ken ompa kijtouaj?”.

MATIKTEKTEMOKAN YOLSEUILISTLI

“Dios kintiochiua on yejuan kichiuaj kanika para ma ka onyas tlauejli ipan on tlakamej pampa Dios kintokayotis ikoneuan” (Mateo 5:9). “Xchiuakan kanika hasta kampa nenueliskej ken ijki nemoyolika nennemiskej iuan nochi tlakatl” (Romanos 12:18).

MATITEIKNELIKAN NIMAN MATITETLAPOPOLUIKAN

“Dios kintiochiua on yejuan kimpaleuiyaj oksekimej ikan teiknelilistli pampa Dios no itlaj ika kimiknelis” (Mateo 5:7). “Xmoijyouijtokan se iuan okse niman xmotlapopoluijtokan ika kuajli nemoyojlo se iuan okse maski tla yakaj kipiya itlaj tlen xkuajli itech okse. Ijkon ken Jehová omechtlapopolui ika kuajli iyojlo, nemejuamej noijki noneki ijkon nenkichiuaskej” (Colosenses 3:13, TNM).

MAKA MATITECHIKOITAKAN

ToTajtsin “itech san se tlakatl yejua okixtij nochi kech tlakamej nemij ipan in países yejuan onokej imanyan in tlaltipaktli” (Hechos 17:26). “Dios xkichikoita se tlakatl iuan okse, yej kiselia san katlejua tlakatl yejuan kitlakaita niman kuajli kichiua maski ualeua san katlejua país” (Hechos 10:34, 35).

MAKA MATIKIJTLAKOKAN TLALTIKPAKTLI

“ToTajtsin Jehová okajsik tlakatl niman okitlali ipan xochitlalpan Edén niman ijkon makitoka niman makitlajpiya” (Génesis 2:15). ToTajtsin kinpopolos “on yejuan kixoxotoniaj on tlaltikpaktli” (Apocalipsis [Revelación] 11:18).

MATIKTLAUELITAKAN UEYI ILEUILISTLI NIMAN AUINEMILISTLI

“Xmotlapiakan para ma ka sanoyej xnekikan nenmoyaxkatiskej tlajtlamach pampa inemilis se tlakatl xne ualejtikaj itech on tlen miyek kipia” (Lucas 12:15). “Aman pampa nemejuamej ye neniyaxkauan Dios, ma ka nion achijtsin xteneuakan on auilnemilistli, nion itlaj okse yejuan xchipauak, nion itlaj yejuan ueyi eleuilistli” (Efesios 5:3).

MATOYEKANAKAN MELAJKI NIMAN KUAJLI MATITEKITIKAN

“Tiknekij toyekanaskej melajki itech nochi tlemach” (Hebreos 13:18, TNM). “Yejuan tlachteki, ma kajkaua ika tlachteki, niman ma peua tekiti” (Efesios 4:28).

MATIKINPALEUIKAN AKIN ITLAJ KINPOLOUA

“Xkinyoleuakan on yejuan notsinkixtiaj; xkimpaleuikan on yejuan xkojtikej ipan intlaneltok, niman xpiakan ijyouilistli inuan nochimej” (1 Tesalonicenses 5:14). Noneki matikinpaleuikan “iknomej niman siuakaualtsitsintin  ika on tlen kimpoloua” (Santiago 1:27).

Biblia xsan tlajtoua itech yejuin tlen ika kuajli tinemis, noijki techmachtia matikinpatiojkaitakan niman mojmostla ijkon matikchiuakan ipan tonemilis. Tla  miyekej ijkon kichiuaskiaj ipan innemilis, ¿xtiknemilia ika melak tepaleuiskia ipan tlaueltin tlen melak xkuakualtin tlen kixnamiktokej tlaltikpakchanejkej? Melauak ika ken Biblia techyoleua matinemikan, aman melak tepaleuiya xijkon ken yeuejkaui. San ika ¿tlenon uelis kichiuas Biblia mopampa?

Tlakatl akin melak tlamachilise ijkon ken xkeman yakaj nemi, okijto ika, tlamachilistli “noteititia yejua  ika on tlen nochiua” (Mateo 11:19). ¿Xtiknemilia ika yejuin melauak ijkon? Ken se uelis kimatis tla ken kijliaj yemelak tepaleuij noso ka, yejua kitas kenon ontlamis ijkuak ijkon kichiuas. Yejua ika, tejua uelis tikijtos: “Tla Biblia melauak tepaleui, ¿xnesiskia yejon ipan nonemilis? ¿Yemelak uelis nechpaleuis nikinyektlalis tlaueltin tlen aman nikinpiya?”. Matikitakan se neskayotl.

Diana, * kichiuaya miyek ipan inemilis, pakiya niman kiyolpaktiaya tlen kichiuaya, san ika, nion xokimat kenon san totoka okixnamik miyek tlemach tlen xkuajli: iichpokatsin omik, otlan inamiktilis niman xok kipiaya tomin. Yejua kijtoua: “Xok nikmatiya niakinon katka; xok nikpiaya noichpokatsin, nion noueuentsin nion nokal. Onikpolo nochi: akin nejua katka, nokojtilis niman notlamachialis”.

Aman, Diana kuajli okasikamat ika melauak ken kijtouaj yejuin tlajtoltin: “San tinemij ipan tonemilis  70 xiujtin, tla se melak kojtik 80. San ika, tentika ika tlauejli niman ajmantli; nimantsin panoua niman tejuamej tipopoliuij” (Salmo 90:10).

Ijkuak okixnamik nochi yejuin, Diana onopaleui itech Biblia, niman temojkatlachialti kenon melak okipaleui. Ken tikitaskej ipan okseki yeyi tlamachtiltin, miyekej yokichiujkej ken kijtoua Biblia ipan innemilis niman melak temojkatlachialti kenon yokinpaleui. Yokitakej ika Biblia ijkon ken tlen otikteneujkej ijkuak otikpeualtijkej tlamachtijli. Xijkon ken okseki miyekej amatlajkuiloltin tlen, ijkuak youejkaujkej ika onochijchiujkej, xok tepaleuiyaj. ¿Kanaj pampa Biblia xijkon ken okseki? ¿Kanaj ualeua itech toTajtsin niman xitech tlaltikpakchanejkej? (1 Tesalonicenses 2:13).

Kanaj tejua noijki tiknemilia ika nemilistli nion xuejkaui niman tentika ika miyek tlaueltin. Ijkuak tikpiya miyek tlaueltin, ¿itech akinon tiktejtemoua yolseuilistli, tlapaleuilistli, niman tlajtoltin tlen yemelak mitspaleuiskej?

Matikitakan yeyi itech kenon Biblia melak mitspaleuis ipan tlen tikchiua mojmostla. Mitspaleuis kenon:

1. Xtikpiyas tlaueltin ijkuak uelis.

2. Tikinyektlalis tlaueltin ijkuak uajnesiskej.

3. Tikxikos tlen xuelis nopatlas.

Tlamachtiltin tlen uajlauej tlajtoskej itech yejuin yeyi tlemach.