Tlen okijkuilo Juan 15:1-27
15 ”Nejua niuvakojtli tlen melauak niman noTaj yejua akin kitoka.
2 Tla seki nomatsitsinuan xtlatlakiltiaj, yejua kinteki, niman nomatsitsinuan tlen kema tlatlakiltiaj yejua kinchipaua para más matlatlakiltikan.
3 Tlen yonimechijli, yomechpaleui xchipauikan.
4 Nouan xnemikan niman nejua nemouan ninemis. Se imatsin uva xueli san iselti tlatlakiltia, noneki onias kampa onka ikojyo, noijki ijkon, nemejuamej xuelis nentlatlakiltiskej tla xnouan nennemij.
5 Nejua niuvakojtli niman nemejuamej imatsitsinuan. Akin nouan nemi, nejua iuan ninemi niman melak tlatlakiltia. Tla nemoxelouaj, nemejuamej xuelis itlaj nenkichiuaskej.
6 Tla yakaj xnouan nemi, kitlajkalij ken se imatsin uva niman uaki. Sakin, yejon imatsitsinuan uva kinsentlaliaj para kintlatiskej.
7 Tla nouan nennemij niman nenkitlakamatij tlen nimechijlia, nochiuas san tlen nemejuamej nenkitlajtlaniskej.
8 Ijkuak nochipa melak nentlatlakiltiaj niman nenkiteititiaj ika nejua onimechmachti nenkiueyiteneuaj noTaj.
9 Ijkon ken Tajtli yonechtlasojtlak, nejua yonimechtlasojtlak; xchiujtokan tlen kichiuas ika toTajtsin mamechtlasojtla.
10 Tla nenkintlakamatij notlanauatiluan, nochipa nimechtlasojtlas, ijkon ken nejua yonikintlakamat itlanauatiluan noTaj niman yejua nochipa nechtlasojtla.
11 ”Nochi yejuin yonimechijli para melak xyolpakikan ijkon ken nejua.
12 Nejua nimechnauatia xmotlasojtlakan ijkon ken nejua yonimechtlasojtlak.
13 Akin notemaka ipampa iamigos, yejua akin más tetlasojtla.
14 Nemejuamej nennoamigos tla nenkichiuaj tlen nimechnauatia.
15 Xok nikijtos tla nentlakeualtin, pampa se tlakeuajli xkimati tlen kichiua iteko. Nikijtos ika nennomigos pampa yonimechijli nochi tlen yonikakili noTaj.
16 Xnemejuamej onennechtlapejpenijkej, nejua akin onimechtlapejpeni. Yonimechnauati xuiyan niman xtlakiltikan fruta tlen nochipa onias. Ijkon, Tajtli mechmakas san tlenon tlen nenkitlajtlaniskej ika notoka.
17 ”Nochi yejuin nimechnauatia para xmotlasojtlakan.
18 Tla gente mechtlauelita, yenenkimatij ika nejua kachtopa onechtlauelitakej.
19 Tla nenkichiuaskiaj ijkon ken gente, yejuamej mechtlasojtlaskiaj. Pero, mechtlauelitaj pampa nejua yonimechtlapejpeni niman xnenkichiuaj ken yejuamej.
20 Xkilnamikikan tlen onimechijli: tlakeuajli xmás ueyixtika ken iteko. Tla yejuamej yonechtlajyouiltijkej, noijki mechtlajyouiltiskej; tla yejuamej yokitlakamatkej tlen onikimijli, noijki mechtlakamatiskej.
21 Nochi yejuin mechchiuiliskej pampa nejua akin onimechmachti niman pampa xkixmatij akin onechajtitlan.
22 Tla nejua xniuajlaskia niman xnikinnojnotsaskia, yejuamej xkipiyaskiaj tlajtlakojli. Pero, aman xuelis kijtoskej tla xkipiyaj tlajtlakojli.
23 Akin nechtlauelita noijki kitlauelita noTaj.
24 Yejuamej xkipiyaskiaj tlajtlakojli tla nejua ximixpan nikinchiuaskia milagros tlen xkeman yakaj ijkon kichiua; pero aman yonechitakej niman yonechtlauelitakej niman noijki yokitlauelitakej noTaj.
25 Pero yejuin opanok para manochiua tlen ijkuilijtika ipan inTlanauatil: ‘Onechtlauelitakej maski xitlaj onikchiuj’.
26 Nejua nikuajtitlanis espíritu santo tlen kiteititia tlen melauak niman ualeua itech Tajtli, yejon espíritu kitemachiltis akinon nejua;
27 niman nemejuamej noijki noneki nenkitemachiltiskej akinon nejua, pampa nouan yonennenkej desde ijkuak opeuj nitenojnotsa.
