1 Corintios 12:1-31
12 Nokniuan, nikneki xmatikan ika toTajtsin kichiua matiuelikan matikchiuakan tlatlamantik* tekitl.
2 Nemejuamej nenkimatij ika ijkuak xnentlaneltokayaj itech toTajtsin, nenkichiuayaj tlen kinekiyaj imágenes maski xuelij tlajtouaj niman nenyayaj kampa mechuikayaj.
3 Nikneki xmatikan ika tla yakaj kipiya iespíritu santo toTajtsin xuelis kijtos ika Jesús se xkuajli tlakatl. Noijki, xakaj uelis kijtos ika Jesús toTeko tla toTajtsin xkimaka espíritu santo.
4 Maski ueli tikchiuaj tlatlamantik tekitl, san no yejua iespíritu santo toTajtsin techpaleuiya.
5 Tlatlamantik ken tiktekichiuiliaj toTajtsin, pero nemi san se toTeko.
6 Tlatlamantik ken techpaleuiya espíritu santo, pero san no yejua toTajtsin akin kichiua ijkon mapano.
7 Pero, toTajtsin techmaka espíritu santo para matikinpaleuikan oksekimej.
8 Ika espíritu santo, toTajtsin ueli kichiua ika yakaj maueli matlajto ika tlamachilistli; niman ika yejon espíritu ueli kichiua ika yakaj makijto tlen xakaj kimati.
9 Noijki, ika yejon espíritu ueli kichiua ika yakaj matlaneltoka niman yakaj okse maueli matepajti;
10 yakaj okse makinchiua milagros;* okse makimijto teotlajtoltin; okse makixmati tla itlaj ualeua itech toTajtsin noso ka; okse matlajto tlatlamantikej tlajtoltin niman okse matlajtolkuepa.
11 Pero espíritu santo techpaleuiya matikchiuakan nochi yejuin, niman kinmaka yejon tekitl ken yejua kineki.
12 Totlalnakayo miyek tlemach kipiya, pero maski miyek kipiya san se totlalnakayo uajnochiua, Cristo noijki ijkon.
13 Pampa maski tla tijudíos noso tigriegos, titlakeualtin noso xtitlakeualtin, tinochimej otechapolaktijkej ika san no yejua espíritu para tochiuaskej san se tlalnakayotl. Niman tinochimej otechmakakej san no yejua espíritu.
14 Nochimej tikmatstokej ika totlalnakayo xsan se tlemach kipiya, miyek tlemach ika tlachijchijtli.
15 Tokxi xkikajkauaskia ika teuan yeskia itech totlalnakayo san pampa tla kijtoskia: “Pampa xnimatli xniteuan itech tlalnakayotl”.
16 Niman tonakas xkikajkauaskia ika teuan yeskia itech totlalnakayo san pampa tla kijtoskia: “Pampa xniixtololojtli xniteuan itech tlalnakayotl”.
17 Tla nochi totlalnakayo yeskia tixtololoj, ¿kenon titlakakiskiaj? Tla nochi totlalnakayo yeskia tonakas, ¿kenon titlaijnekuiskiaj?
18 Pero toTajtsin okitlatlajtlalili totlalnakayo ijkon ken yejua kinekiya.
19 ¿Kenon tikpiyaskiaj totlalnakayo tla tinochimej san no yejua tikpiyaskiaj?
20 Pero, maski miyek tlemach tikpiyaj, tochiuaj san se tlalnakayotl.
21 Tixtololoj xuelis kijlis toma ika xtlaj ika tepaleui nion totsontekon xuelis kimijlis tokxiuan ika xtlaj ika tepaleuijkej.
22 Tlen ipan totlalnakayo nesi ika xmás ueyixtika noijki tepaleui
23 niman tlen tikpiyaj ipan totlalnakayo niman tiknemiliaj ika xmás ueyi kijtosneki más tiktlajpiyaj. Yejua ika, más tiktlajpiyaj tlen ipan totlalnakayo kichiua matipinauikan.
24 Tlen kualtsin kipiya totlalnakayo xtlaj noneki tikchiuiliskej. Pero, ijkuak toTajtsin okichijchiuj totlalnakayo, okichiuj ika más makitlakaitakan tlen noneki
25 para nochi yejon tlemach tlen kipiya totlalnakayo maka maxejxelijto niman san no yejuamej manotlajpiyakan.
26 Tla itlaj ipan totlalnakayo tlajyouiya, nochi totlalnakayo tlajyouiya. Tla itlaj ipan totlalnakayo kititiaj ika kitlakaitaj, paki nochi tlen onka ipan totlalnakayo.
27 Nemejuamej nenteuamej itech itlalnakayo Cristo niman cada se de nemejuamej nenyeskiaj kentla itlaj tlen ika tlachijchijtli itlalnakayo.
28 Niman toTajtsin yokimakak cada se, tekitl tlen kichiuas ipan tlanechikojli. Kachtopa okintlali apóstoles, ika ome teotlajtojkej, ika yeyi akin temachtiaj, sakin akin kinchiuaj milagros,* satepan akin uelij tepajtiaj, akin tepaleuiyaj, akin uelij tlayekanaj, akin uelij tlajtouaj tlatlamantikej tlajtoltin.
29 ¿Xmelak ika xnochimej apóstoles, xnochimej teotlajtojkej, xnochimej temachtiaj niman xnochimej kinchiuaj milagros?*
30 ¿Xmelak ika xnochimej uelij tepajtiaj, xnochimej uelij tlajtouaj tlatlamantikej tlajtoltin niman xnochimej uelij tlajtolkuepaj?
31 Nochipa xmokojtilijtokan nenkiseliskej más ueyi tlateochiualistli. Pero aman nimechititis se ojtli tlen más kuajli.
Notas
^ Noso “sesejneka”.
^ Noso “tlen temojkatlachialti”.
^ Noso “tlen temojkatlachialti”.
^ Noso “tlen temojkatlachialti”.
