1 Corintios 10:1-33
-
Techpaleuiya tlen inpan onochiuj israelitas (1-13)
-
Tlen xkuajli inpan nochiuas akin kinueyichiuaj imágenes (14-22)
-
Imesa Jehová niman inmesa demonios (21)
-
-
Uelis tiktlapejpeniskej tlen tikchiuaskej; niman maka matikinyolkokokan oksekimej (23-33)
-
“Nochi xchiuakan para makiueyiteneuakan toTajtsin” (31)
-
10 Aman, nokniuan, nikneki xmatikan ika tochanejkauan akin yeuejkaui onenkej, nochimej onejnentiajkej itsintlan* moxtli, nochimej okipanauijkej on mar.
2 Nochimej okinapolaktijkej ijkuak nemiyaj itsintlan moxtli niman itlajkotian on mar para kichiuaskej ken Moisés.
3 Nochimej okikuajkej tlen toTajtsin okinmakak
4 niman nochimej okonikej tlen toTajtsin okinmakak. Pampa yejuamej koniyaj atl itech on tetl tlen toTajtsin okinmakak, niman yejon tetl kijtosnekiya Cristo.
5 Pero miyekej de yejuamej omikkej ipan tlaluaktli pampa xokiyolpaktijkej toTajtsin.
6 Yejuin techpaleuiya para maka tikileuiskej tlen xkuajli, ijkon ken okichijkej yejuamej.
7 Noijki, maka matikinueyichiuakan imágenes, ijkon ken okichijkej sekimej de yejuamej. Ijkon ken ijkuilijtika: “Israelitas onotlalijkej, otlakuajkej niman itlaj okonikej, niman satepan onokuitejkej para noyolpaktiskej”.
8 Noijki, maka matiauilnemikan,* ijkon ken sekimej de yejuamej okichijkej. Pampa oauilnenkej,* omikkej 23,000 san ipan se tonajli.
9 Noijki, maka matikchiuakan itlaj san para tikitaskej tla Jehová teiknelia, ijkon ken sekimej de yejuamej okichijkej niman sakin omikkej pampa on kouamej okinkuajkej.
10 Noijki maka matotlaueltikan, ijkon ken sekimej de yejuamej okichijkej. Pampa onotlaueltijkej, se iángel toTajtsin okinmikti.
11 Nochi yejuin okinpanok para itlaj techmachtis akin tinemij ipan tonaltin ijkuak tlamis tlen aman onka, niman onoijkuilo para tikmatiskej tlenon uelis topan nochiuas tla ijkon tikchiuaj.*
12 Yejua ika, akin kinemilia ika kuajli notelketstok* manotlajpiya para maka uetsis.
13 Nochi tlen nenkileuiyaj para nenkichiuaskej se tlajtlakojli san noijki tlen kileuiyaj oksekimej. Pero, toTajtsin yolmelajki niman xkikauilis xkixnamikikan itlaj tlen xuelis nenkixikoskej. Ijkuak itlaj nenkixnamikiskej, yejua noijki mechpaleuis xtlaxikokan.
14 Yejua ika, noknitsitsinuan, maka xkinueyichiuakan imágenes.
15 Nimechnotsa ken akin kuajli tlanemiliaj. San no nemejuamej xkitakan tla melauak tlen nikijtoua.
16 ¿Xmelauak ika copa tlen ika tiktlasojkamachiliaj toTajtsin kijtosneki iyesyo Cristo? ¿Xmelauak ika pan tlen tiktlatlapanaj kijtosneki itlalnakayo Cristo?
17 San se pan onka, kuakon maski tejuamej timiyekej, tiyeskiaj kentla san se tlalnakayotl pampa nochimej tikuaj yejon pan.
18 Xkimilnamikikan israelitas. Ijkuak kikuayaj tlen yokiuentlalijkaj, ¿xyeskia kentla tlakuaskiaj iuan toTajtsin?
19 Kuakon, tlenon nikneki nikijtos, ¿ueyi kijtosneki se imágen? ¿Noso ueyi kijtosneki tlen kiuentlaliliaj?
20 Ka. Nimechijlisneki ika nochimej akin kinueyichiuaj imágenes, kinuentlaliliaj demonios, xkiuentlaliliaj toTajtsin. Niman xnikneki ika nemejuamej xmouikakan iuan demonios.
21 Xuelis nentlaonitoskej ipan icopa Jehová niman ipan incopa demonios. Noijki xuelis nentlakuaskej ipan “imesa Jehová” niman ipan inmesa demonios.
22 Noso, ¿tiknekij tikualaniskej Jehová? ¿Xmelak ika yejua más kojtik xijkon ken tejuamej?
23 Nochi uelis tikchiuaskej, pero xnochi tepaleuiya. Nochi uelis tikchiuaskej, pero xnochi teyolchikaua.
24 Matikchiuakan tlen oksekimej kinpaleuis, maka san tlen tejuamej techpaleuis.
25 Xkuakan nochi nakatl tlen kinemakaj niman maka xtetlajtoltikan itlaj tlen kipajsolos* nemotlamachilis.
26 Pampa “Jehová iyaxka* yejuin mundo niman nochi tlen ipan onka”.
27 Tla yakaj akin xtlaneltoka itech Jesús mechnotsa iuan xtlakuatij niman nemejuamej nenyauej, xkuakan nochi tlen mechmakas niman maka xtetlajtoltikan itlaj tlen kipajsolos nemotlamachilis.
28 Pero, tla yakaj mechijliskia “Yejuin yokiuentlalijkaj”, maka xkuakan para maka nenkiyolkokoskej akin ijkon mechilijtika, niman maka yakaj kipajsolos itlamachilis.
29 Xnitlajtojtika itech motlamachilis, nitlajtojtika itech intlamachilis oksekimej. Maski nejua uelis niktlapejpenis tlen nikchiuas, xnikchiua, para maka yakaj manechtejteneua.
30 ¿Tleka nechtejteneuaskej tla niktlasojkamachilia toTajtsin ijkuak nitlakua?
31 Yejua ika, tla nemejuamej nentlakuaj, itlaj nenkonij noso nenkichiuaj itlaj okse, nochi xchiuakan para makiueyiteneuakan toTajtsin.
32 Maka xkinyolkokokan akin judíos, akin griegos nion akin nemij ipan itlanechikol toTajtsin.
33 Ijkon ken nejua, ijkuak itlaj nenkichiuaskej, xchiuakan tlen uelis kinpaleuis oksekimej manomakixtikan niman maka san tlen nemejuamej mechpaleuis.
Notas
^ Noso “itlan”.
^ Xkita auilnemilistli.
^ Xkita auilnemilistli.
^ Xkita tlen aman onka.
^ Noso “ijkatok”.
^ Noso “kajmanas”.
^ Noso “itlatki”.
