PARTE 1
“Akin yopoliuj niktejtemos”
Se borreguito yopoliuj. Xnomati kenon opanok, ijkuak kikuajkuaya sakatl onoxelojtia itech oksekimej. Aman xok kimita oksekimej borreguitos nion tlajpixketl. Xok yakaj kitlajpiya niman oyaj kampa nemij akin uelis kikuaskej. Kuakon kikaki yakaj tlajtoua niman kitenkaki, kema, itlajtol tlajpixketl. Tlajpixketl konnextia borreguito niman kinapaloua, kitlapachoua noso kitetejkuiya ika itlaken niman kuika ichan.
MIYEKPA Jehová noteneua ken se tlajpixketl. Ipan iTlajtol techijlia: “Nejua nikintejtemos noborreguitos niman nikintlajpiyas” (Ezequiel 34:11, 12).
“Noborreguitos tlen nikintlajpiya”
¿Akinomej iborreguitos Jehová? Uelis tikijtoskej ika nochimej akin kitlasojtlaj niman kiueyichiuaj. Biblia kijtoua: “Xuajlakan, matikueyichiuakan niman matoixpilokan; matotlakuanketsakan ixpan Jehová akin otexchijchiuj. Pampa yejua toTajtsin, niman tejuamej tiikalpan tlen kiyekana, iborreguitos tlen kintlajpiya” (Salmo 95:6, 7). Ijkon ken borreguitos yauej itech se tlajpixketl, akin kiueyichiuaj toTajtsin noijki yauej itech. San ika ¿nochipa uelij ijkon kichiuaj? Ka. Itekipanojkauan toTajtsin kemantika nochiuaj ken borreguitos “akin yonoxelojkaj”, “ixpolijtinemij” niman chachayaujtokej (Ezequiel 34:12; Mateo 15:24; 1 Pedro 2:25). Maski ijkon, ijkuak se tlaltikpakchane noxeloua itech Jehová, yejua xkikaua kentla xok uelis nokuepas itech.
¿Tikmachilia ika Jehová ok motlajpixkauj? ¿Kenon Jehová yokiteititi ika yejua se tlajpixketl ipan yejuin tonaltin? Matikitakan yeyi tlemach.
Yejua kichikaua totlaneltokil. Jehová kijtoua: “Kampa kuajkuajli sakatl nikintlakualtis [...]. Yejuamej ompa notekaskej kampa kuajkuajli sakatl, niman yejuamej tlakuajkuaskej kampa melak sakayo” (Ezequiel 34:14). Jehová nochipa techmaka miyek tlamachtijli tlen kichikaua totlaneltokil ijkuak noneki. ¿Tikilnamiki se amatlajkuilojli, se tlamachtijli noso se video tlen okinankili tlen otiktlajtlanili ipan se teoyotl? ¿Xmelak ika omitstlanemililti ika Jehová najmana mopampa?
Yejua techtlajpiya niman techpaleuiya. Jehová techijlia: “Akin yonoxelo oksejpa nikuajuikas, nikpajtis akin kualo, niman nikyolchikauas akin nokokoua” (Ezequiel 34:16). Jehová kinyolchikaua akin xok kojtikej niman kipiyaj miyek ajmantli. Yejua kinpajtia akin yonokokojkej, maski kanaj akin okichiuj, se tokniuj akin nemi ipan tlanechikojli. Kinuajuika akin yonoxelojkaj niman akin kinemiliaj ika xtlaj kuajli kichiuaj.
Yejua techtejtemoua ijkuak tipoliuij. Jehová kijtoua: “Nejua nikinmakixtis itech nochiuiyan kampa onoxelojkaj”, niman noijki kijtoua: “Akin yopoliuj niktejtemos” (Ezequiel 34:12, 16). Jehová xkikaua akin yopoliuj kentla xok uelis nokuepas itech. Yejua kita ijkuak se poliui. Ika yejon, kitejtemoua niman paki ijkuak kinextia (Mateo 18:12-14). Niman akin kiueyichiuaj kintokayotia “nennoborreguitos, noborreguitos tlen nikintlajpiya” (Ezequiel 34:31). Niman tejua noijki tiiborreguito.
Jehová xkikaua akin noxeloua kentla xok uelis nokuepas itech. Yejua paki ijkuak oksejpa kinextia akin noxeloua
“Xchiua oksejpa matinemikan ijkon ken tinemiyaj yeuejkaui”
¿Tleka Jehová mitstejtemoua niman mitsnotsa xmokuepa itech? Pampa kineki ika tejua xnemi ika paktli. Ijkon ken ijkuak melak chikauak kiyaui, toTajtsin kijtoua ika ijkon melak mitsteochiuas (Ezequiel 34:26). Yejuin tlajtoltin yemelak nochiua. Niman tejua yotikitak ika ijkon mopan yonochiuj.
¿Uelis tikilnamikis kenon otimomachili ijkuak kemach tikixmatstiaya Jehová? Xtlanemili, ¿kenon otimomachili ijkuak otikasikamat kenon itoka toTajtsin niman otikmat tlen kineki kichiuas ipampa tlaltikpakchanejkej? ¿Tikilnamiki kenon kualtsin timomachiliaya imiuan tokniuan ijkuak tiaya ipan uejueyimej tlanechikoltin? Ijkuak titenojnotsaya itech kuajli tlajtoltin niman kuelkakiyaj tlen tikteijliaya, ¿xmelak ika tejkoya ika paktli mochan niman kuajli timomachiliaya?
Uelis oksejpa ijkon kualtsin timomachilis. Yeuejkaui itekipanojkauan toTajtsin okichiujkej yejuin teoyotl: “Oksejpa xtechuajuika motech, Jehová, niman xouijtika tokuepaskej motech. Xchiua oksejpa matinemikan ijkon ken tinemiyaj yeuejkaui” (Lamentaciones 5:21). Jehová okinnankili tlen okitlajtlanilijkej niman yejuamej oksejpa opeujkej kitekichiuiliaj ika pakilistli (Nehemías 8:17). Jehová noijki ijkon kichiuas mouan.
Tikijtos timokuepas itech Jehová xouijtika, san ika, tikchiuas kema ouijtika. Matikitakan tlenon kixnamikij akin kinekij nokuepaskej, niman kenon uelis tikchiuas tejua.
Puede que también le interese
DOCUMENTALES
ToTajtsin iTlamachtil kichiua san sekan matinemikan
Uejueyimej intlanechikoluan iuan miyekej países iteixpantijkauan Jehová okintokayotijkej “toTajtsin iTlamachtil”. ¿Kenon okinpaleui miyekej tlaltikpakchanejkej ipan nochi tlaltikpaktli?
DOCUMENTALES
Iteixpantijkauan Jehová: chikauak intlaneltokil yokipixkej. Parte 1: Kisaj itech tlayoualyotl
Xkita yejuin video kampa nesi kenon sekimej tlaltikpakchanejkej okiyejyekojkej nemiskej ijkon ken melauak temachtia Biblia maski okixnamijkej tlemach tlen melak xkuajli. Mitsyolchikauas maka xkajkaua xtekichiuili toTajtsin.
DOCUMENTALES
Iteixpantijkauan Jehová: chikauak intlaneltokil yokipixkej. Parte 2: Kikauiliaj mapetlani intlauil
Jesús okimijli inomachtijkauan “xkinmachtikan tlaltikpakchanejkej ipan nochi kalpamej”. Maski kixnamikij tlen xkuajli, Nomachtijkej itech Biblia kuajli yokimatkej ika yemelak kikauilijtokej mapetlani intlauil.
