TLAJTOLTILISTLI 3
¿Kenon uelis ninonotsas iuan notajuan?
¿TLENON TIKCHIUASKIA?
Xtlanemili itech yejuin: miércoles ika teotlak. Geoff akin kipiya 17 xiuitl, yotlan kichiua nochi tlen yokinauatijkej niman aman kema uelis noseuis. ¡Pampa yokinotlanili! Kontlikuiltia itele niman yauj kampa nochipa notlalia.
Kuakon, ajsi itaj kampa yejua nemi niman nesi ika melak kualantiuj.
“¡Geoffrey! ¿Tleka san nikan titlamauisojtok? ¡Xpaleuiti mokniuj kampa tekichiua! ¡Xkeman tikchiua tlen nimitsnauatia!”.
“Oksejpa yotipeujkej”, san yoliktsin kijtoua Geoff.
Itaj kinisiuiya niman kitlajtoltia: “¿Tlenon otikijto?”.
“Xtlaj onikijto”, kinankilia Geoff niman oksekan ontlachia.
Itaj sajnoye kualantika. “¡Maka ijkon xnechnankili!”, kijlia.
Tla tiGeoff yeskia, ¿tlenon tikchiuaskia niman xijkon mopan panoskia?
XMOTELTI NIMAN XTLANEMILI
Tla tejua tikuika se carro niman tikita ika yejon ojtli tsauktika, okse ojtli tiktejtemoua. Noijki ijkon panoua, uelis tiktejtemos kenon kuajli iuan timonotsas motajuan.
SE NESKAYOTL:
“Nikmachilia ouijtika ninonotsas iuan notaj, kijtoua Leah. Kemantika ijkuak niknojnotstika, yejua nechtlajtoltia: ‘¿Tlenon tinechijlitoya?’”.
LEAH UELIS KICHIUAS KANAJ YEYI TLEMACH
-
Kitsajtsilis itaj.
Leah kitsajtsilia itaj: “¡Xnechkaki! ¡Xkaki tlen nimitsijlitika!”.
-
Xok tlajtos itech yejon.
Leah xok kijlia itaj tlen kijliskia.
-
Kitejtemos kemanon uelis iuan tlajtos.
Leah sakin tlajtoua iuan itaj noso kijkuilouilia ipan se amatl tlen kajmana.
¿Katlejua tikijliskia Leah makitlapejpeni?
XNEMILI YEJUIN: Itaj Leah tlanemilijtika itech okseki tlemach, ika yejon, xkita tlenon panotika. Tla Leah kitlapejpeniskia tlen ika se niman kitsajtsiliskia, kanaj itaj xkasikamatiskia tleka ijkon kichiua. Kanaj yejuin xkichiuaskia makikakikan. Noijki, xkititiskia ika kitlakaita (Efesios 6:2). Tla yejuin kitlapejpeniskia, xkinpaleuiskia omemej.
Maski maonia tlen mitstsakuilis ipan ojtli, uelis tiknextis okseki ken uelis titlajtos niman timasijkamatis iuan motajuan.
Maski nesi ika tlen ika ome kuajli yeskia, xtlamachilise yes tla kitlapejpenis. ¿Tleka? Pampa tla kineki kiyektlalis itlaueluan kipiya ika tlajtos iuan itaj. Ijkon tajtli kimatis tlenon kajmana ichpoch niman uelis kipaleuis. Ijkuak yakaj xtlajtoua, xueli kipaleuiyaj.
Aman, tlen ika yeyi, Leah xkikauilia yejuin makitsakuili tlajtos iuan itaj. Yejua kitejtemoua kemanon iuan tlajtos itech yejuin. Noijki, uelis kitlapejpenis kitlajkuilouilis itaj. Tla ijkon kichiua, nimantsin kuajli nomachilis.
Kitlajkuilouilis itaj uelis kipaleuis kuajli kitomilis tlen kineki kijlis. Ijkuak itaj Leah kamapouas, kuajli kasikamatis tlenon kajmana ichpoch. Ika yejon, tlen ika yeyi kuajli kipaleuiya Leah niman itaj. Tla iuan nonotsa noso kitlapejpenia kitlajkuilouilis, kitlakamatstos tlen Biblia kijtoua ika matikchiuakan “tlajtlamach yejuan kuajkuij yolseuilistli” (Romanos 14:19).
¿Tlenon okse uelis kichiuas Leah?
Xnemili okse tlen uelis kichiuas Leah niman kenon onkisaskia.
MANASIKAMATI TLEN TIKIJTOUA
Xkilnamiki: tlen tejua tikijtoua xnochipa tlen motajuan kinemiliaj tikimijlisneki.
SE NESKAYOTL:
Motajuan mitstlajtoltiaj tleka tikualantika. Tejua tikinnankilia: “Xnikneki nitlajtos itech yejon”.
San ika, yejuamej uelis kasikamatiskej: “Xok sajnoye nitlaneltoka intech notajuan. Nikimijlis notlaueluan san akin imiuan ninouika”.
Xnemili ika tikixnamiki se tlauejli tlen ouijtika niman motaj noso monan kinekij mitspaleuiskej, san ika, tejua tikijtoua: “Maka xmajmana, san noselti uelis nikyektlalis”.
-
¿Tlenon ueliskia kasikamatiskej motajuan?
-
¿Tlenon melak kuajli yeskia tikistos?
Puede que también le interese
LO QUE OPINAN OTROS JÓVENES
Kenon timonojnotsas imiuan motajuan
Melak mitspaleuis tla timonojnotsa imiuan motajuan.
PIZARRA ANIMADA
¿Kenon timonojnotsas imiuan motajuan?
¿Mitstekiyomaka timonojnotsas imiuan motajuan? ¿Kenon uelis tikimijlis tlen tikmachilia?
