1. ¿Kenon techpaleuis tla tikueyichiuaj toTajtsin ken yejua kineki?

TOTAJTSIN JEHOVÁ melak techtlasojtla. Ika yejon, kineki techyekanas niman ijkon kuajli matinemikan. Tla tikueyichiuaj ken yejua kineki, tipakiskej niman xtikpiyaskej miyek ajmantli ipan tonemilis. Noijki, tikpiyaskej itlateochiualis niman itlapaleuilis (Isaías 48:17). San ika, onka melak miyekej tlaneltokiltin noso religiones. Maski nochimej kijtouaj ika temachtiaj tlen melauak itech toTajtsin, tlamantik noso sejneka temachtiaj itech akinon toTajtsin niman nion xkimatij tlen techtlajtlanilia matikchiuakan.

2. ¿Kenon uelis tikmatis ken noneki tikueyichiuas Jehová, niman kenon ueli tikasikamatij yejon?

² ¿Kenon uelis tikmatis ken noneki tikueyichiuas Jehová? Xnoneki timomachtis nochi tlen temachtiaj nochimej religiones. San noneki timomachtis tlen melauak temachtia Biblia itech kenon tikueyichiuas toTajtsin. Xtlanemili itech yejuin. Ipan miyek países notekitiltia tlen xmelauak tomin. Aman, xnemili ika mitsijliaj tejua tikxelos melauak tomin itech tlen xmelauak. ¿Kenon tikmatiskia katlejua melauak tomin niman katlejua xmelauak tomin? ¿Tiktsontekontlalis kenon tlachia nochi tomin tlen xmelauak? Noso, ¿xkuajli yeskia tla tiktsontekontlalia kenon tlachia tomin tlen kema melauak? Ijkuak kuajli  tikixmatis melauak tomin, uelis kuajli tikitas katlejua xmelauak tomin. Noijki ijkon, ijkuak tomachtiaj katlejua tlaneltokijli tlen melauak, xouijtika tikimixmatiskej tlaneltokiltin xmelajkej.

3. ¿Tlenon okijto Jesús noneki matikchiuakan tla tiknekij kuajli tinemiskej ixpan toTajtsin?

³ Melak noneki matikueyichiuakan Jehová ken yejua kineki. Miyekej kinemiliaj ika toTajtsin kuelita nochi tlen kichiuaj tlaneltokiltin, san ika, Biblia xijkon kijtoua. Noijki, xsan noneki tikijtos ika tikneltoka Cristo, pampa Jesús okijto: “Xnochimej on yejuan nechijliaj: ‘NoTeko, noTeko’, kalakiskej ne kampa noTajtsin iluikak chanej tlamandaroua, yej san yejuamej on yejuan kichiuaj on tlen kineki noTajtsin iluikak chanej”. Kuakon, san tinemiskej kuajli ixpan toTajtsin tla tomachtiaj tlen yejua techtlajtlanilia niman tikchiuaj. Akin xkichiuaj tlen toTajtsin kineki, Jesús okintokayotij kentla akin “kichiuaj on tlen xkuajli” (Mateo 7:21-23). Tlaneltokijli tlen xmelauak ijkon ken xmelauak tomin: xtlaj ika uelis tikchiuas. Niman san mitsijtlakos.

4. ¿Tlenon kijtosnekij ome ojtli tlen Jesús okinteneuj, niman kanon teuikaj?

⁴ Jehová kimijlia nochimej tlaltikpakchanejkej ika uelis kipiyaskej nemilistli tlen xkeman tlamis. San ika, tla tiknekij tinemiskej nochipa ipan Xochitlalpan, noneki tikueyichiuaskej niman tinemiskej ken yejua kineki. Teyolkoko ika miyekej xkinekij ijkon kichiuaskej, ika yejon Jesús okijto: “Ne kampa peua on ojtli yejuan teuika ne miktlan onkaj se tlatsakuilyotl yejuan patlauak, niman on ojtli no patlauak. [...] Pero pitstik on puerta yejuan onkaj ne kampa peua on ojtli yejuan teuika ne kampa onkaj on nemilistli, niman on ojtli pitsauak. [...] Pero nemejuamej xkalakikan ipan on tlatsakuilyotl yejuan pitstik, niman xuiyan ipan on ojtli yejuan pitsauak” (Mateo 7:13, 14). Ken tikitaj, tlaneltokijli tlen melauak teuika itech nemilistli, niman tlaneltokijli xmelauak teuika kampa tlapopolouilistli. Jehová xkineki yakaj mapopoliui, ika yejon kinkauilia nochimej tlaltikpakchanejkej makixmatikan (2 Pedro 3:9). Kuakon, ken tikueyichiuaj toTajtsin uelis techuikas itech nemilistli noso mikilistli.

5. ¿Kenon uelis tikmatiskej akinon kipiyaj tlaneltokijli tlen melauak?

⁵ ¿Kenon uelis tiknextiskej “ojtli yejuan teuika ne kampa onkaj on nemilistli”? Jesús okijto ika xouijtika tikimitaskiaj akin kipiyaj tlaneltokijli tlen melauak tla tikimitaj kenon nemij. Okijto: “Nenkintaskej [...]  ika on tlen kichiuaj”, pampa “nochi tlen kuajli kojtlakijlyotl kipia kuajli itlakilyo” (Mateo 7:16, 17). Kuakon, uelis tikijtoskej ika akin kipiyaj tlaneltokijli tlen melauak nimantsin nesij ika tlen kineltokaj niman ika tlen kichiuaj. Maski yejuamej tlajtlakolejkej niman nopopolouaj, san sekan kiyejyekouaj kichiuaskej tlen toTajtsin kineki. Matikitakan chikuasen tlemach tlen ika uelis tikimixmatiskej.

6, 7. ¿Tlenon kinemiliaj itekipanojkauan toTajtsin itech Biblia, niman kenon noijki okichiuj Jesús?

⁶ Itekipanojkauan toTajtsin temachtiaj tlen nestika ipan Biblia. ToTajtsin iTlajtol kijtoua: “Nochi Yektlajkuilojli itech Dios uajlitikaj, niman yejua otechmakak para aman techpaleuiya. On Yektlajkuilojli techmachtia on tlen melauak, techchikajkanotsa, kiyektlalia on tlen xkuajli, niman temachtia ken ijki onyas se nemilistli melajki. On Yektlajkuilojli onkaj para on tekoneu itech Dios ma ueltiu niman ma noyektlalijtiu para kichiuas nochi tlen kuajli” (2 Timoteo 3:16, 17). Pablo, itlatitlankauj Cristo, okimintlajkuilouili akin noijki tlaneltokayaj itech Cristo: “Ijkuak nemejuamej onenkiselijkej itlajtol yejuan tejuamej otemechmachtijkej, onenkiselijkej ken itlajtol niman xken itlajtol yakaj tlakatl. Niman melauak yejua itlajtol Dios” (1 Tesalonicenses 2:13). Kuakon, akin kipiyaj tlaneltokijli tlen melauak, xsan kineltokaj noso kichiuaj ijkon ken tlaltikpakchanejkej. Ka, nochi tlen kineltokaj ualeujtika ipan Biblia, iTlajtol toTajtsin.

⁷ Jesucristo ijkon okichiuj, pampa tlen otemachti nochi ualeuaya itech iTlajtol toTajtsin. Ipan se teoyotl okijli iTaj iluikakchane: “Motlajtol yejua tlen melauak” (Juan 17:17). Jesús tlaneltokaya itech iTlajtol toTajtsin, niman nochi tlen otemachti ompa ualeuaya. Nochipa kijtouaya: “Yektlajkuilojli kijtoua”, niman sakin kiteijliaya tlen kijtoua iTlajtol toTajtsin (Mateo 4: 4, 7, 10). Noijki ijkon, itekipanojkauan toTajtsin akin nemij ipan yejuin tonajli xtemachtiaj tlen san yejuamej kinemiliaj. Yejuamej kineltokaj ika Biblia yejua iTlajtol toTajtsin, niman ompa kikixtiaj tlen kineltokaj.

8. ¿Tlenon kijtosneki tikueyichiuas Jehová?

⁸ Akin kipiyaj tlaneltokijli tlen melauak kiueyichiuaj san Jehová niman kitemachiltiaj itokayo. Jesús okiteijli: “Xmauistili [xueyichiua] moTeko Dios, niman san yejua xtekipano” (Mateo 4:10). Kuakon itekipanojkauan toTajtsin xkiueyichiuaj yakaj okse, san Jehová. Yejuamej kiueyichiuaj toTajtsin ijkuak kitemachiltiaj itokayo niman ikualneskayouan. Salmo 83:18 ijkin kijtoua: “Tejua akin motoka Jehová, san tejua tiUeyixtika ipan nochi tlaltikpaktli”. Ijkuak kinpaleuiyaj oksekimej makixmatikan toTajtsin, kichiuaj ijkon ken Jesús. Yejua okijli iTaj yejuin tlajtoltin: “On tlaltikpaktlakamej onikinmachiltij akin tejua, [‘motoka’, TNM]” (Juan 17: 6). Noijki ijkon, akin melauak itekipanojkauan toTajtsin kitemachiltiaj itokayo toTajtsin, tlen kineki kichiuas niman ikualneskayouan.

9, 10. ¿Kenon noteititiaj tlasojtlalistli akin melauak kichiuaj ken Cristo?

⁹ Itekipanojkauan toTajtsin yemelak notlasojtlaj, xnonexikolitaj. Jesús okijto: “Tla nemotlajsojtlaj semej iuan oksekimej, nochi tlakatl kitas ika nennotemachtijkauan” (Juan 13:35). Kachtopa tlaneltokakej itech Cristo ijkon notlasojtlayaj. Yejuin tlasojtlalistli tlen kipiyaj itekipanojkauan toTajtsin, kichiua ika makimitakan oksekimej kentla yemelak imikniuan, maski sekimej chipaujkej, tlajtouaj okse tlajtojli noso ualeuaj oksekan (xpoua Colosenses 3:14). Akin kipiyaj tlaneltokijli xmelauak xijkon notlasojtlaj. Tla ijkon notlasojtlaskiaj xnomiktiskiaj semej iuan oksekimej san pampa ualeuaj oksekan noso pampa tlajtouaj okse tlajtojli. Akin melauak kichiuaj ken Cristo xkinmiktiaj akin noijki ijkon tlaneltokaj ken yejuamej niman oksekimej tlaltikpakchanejkej. Biblia temachtia: “Ijkin uelis nenkimatiskej akinomej tekoneuan itech on diablo. Tla yakaj xkichiua tlen kuajli noso xkitlajsojtla ikniu, yejua xtekoneu itech Dios. [...] Noneki titotlajsojtlaskej inuan oksekimej. Ma ka ma tikchiuakan ken Caín okichiu, yejuan tekoneu katka itech on diablo, niman okimiktij ikniu” (1 Juan 3:10-12; 4:20, 21).

 ¹⁰ Melauak tlasojtlalistli xtekauilia tikinmiktis oksekimej, san ika, noijki kineki kijtos okse tlemach. Akin yemelak kichiuaj ken Cristo ika nochi inyojlo kixelouaj tonaltin niman nopaleuiyaj semej iuan oksekimej niman ijkon noyolchikauaj. Noijki hasta kitemakaj tlen kipiyaj (Hebreos 10:24, 25). Nopaleuiyaj ijkuak ouijtika tlen panotokej niman xkintlachtekiliaj oksekimej. Kitlakamatij tlen Biblia kijtoua ijkuak kimijlia “nochimej ma tikinchiuilikan on tlen kuajli” (Gálatas 6:10).

11. ¿Tleka melak noneki matikneltokakan ika toTajtsin techmakixtia san ipampa Jesucristo?

¹¹ Akin melauak kichiuaj ken Cristo kineltokaj ika toTajtsin kinmakixtia ipampa Jesucristo. Biblia temachtia ika “xakaj okse ueli temakixtia, pampa Dios xokuajtitlan yakaj okse tlakatl ipan in tlaltikpaktli yejuan itechkopa uelis timakisaskej” (Hechos 4:12). Ken otikitakej ipan capítulo 5, Jesús okitemakak inemilis iuan ijkon kinmakixtia tlaltikpakchanejkej akin tetlakamatij (Mateo 20:28). Noijki, Jehová yokitlali kentla Tekiuaj itech iTekiuajyo tlen tlanauatis ipan nochi tlaltikpaktli. Ika yejon, toTajtsin kichia matiktlakamatikan Jesús niman matikchiuakan tlen otemachti tla tiknekij tinemiskej nochipa. Kuakon, tikasikamatij tleka Biblia kijtoua: “Yejuan kineltoka iKonetsin Dios kipia nemilistli para nochipa, pero on yejuan xkitlakamati xkipias yejua in nemilistli” (Juan 3:36).

12. ¿Tlenon kijtosneki xtimokalaktis itech tlen Satanás kiyekana ipan tlaltikpaktli?

¹² Akin melak itekipanojkauan toTajtsin xnokalaktiaj itech tlen Satanás kiyekana. Ijkuak Jesús nemiya ixpan tlanauatijketl romano Pilato akin kiyolkuitijtoya, okijli: “Nejua xnitlamandaroua nikan ipan in tlaltikpaktli ken se rey” (Juan 18:36). Maski san ipan katlejua país machantikan, akin yemelak kichiuaj ken Cristo kitlakamatij iTekiuajyo toTajtsin. Xkinpaleuiyaj tekiuajkej ijkuak xnokalaktiaj ipan política nion ipan tlauejli tlen onka ipan tlaltikpaktli. San ika, tla sekimej kinekij kipaleuiskej se partido político, noso kinekij notlaliskej ken tekiuajkej, yejuamej xkimijliaj katlejua partido político makitlapejpenikan. Niman maski xkinpaleuiyaj tekiuajkej, kema kitlakamatij  tlanauatiltin tlen yokitlalijkej. ¿Tleka? Pampa iTlajtol toTajtsin kinnauatia akin kichiuaj ken Cristo “ma tetlakamati[kan] intech on tekiuajke”, kijtosneki, akin tlanauatiaj (Romanos 13:1). San ika, ijkuak se tekiuaj kitlajtlani manochiua itlaj tlen itlanauatiluan toTajtsin xtekauiliaj, akin melak itekipanojkauan toTajtsin kichiuaj ken itlatitlankauan Jesús, akin okijtokej: “Kimelaua tiktlakamatiskej achtoj Dios xken nemejuamej yejuan san nentlakamej” (Hechos 5:29; Marcos 12:17).

13. ¿Tlenon kineltokaj itech iTekiuajyo toTajtsin akin melauak kichiuaj ken Cristo, niman, tlenon kichiuaj?

 ¹³ Akin melauak kichiuaj ken Cristo tenojnotsaj ika san iTekiuajyo toTajtsin kuajkuis yolseuilistli ipan nochi tlaltikpaktli. Jesús okijto: “In kuajli tlajtojli yejuan techijlia ken ijki tlamandaroua on yejuan iluikak chanej, noteijlis nochiuiyan ipan in tlaltikpaktli para nochimej países ma kixmatikan on tlen melauak” (Mateo 24:14). Akin melauak kichiuaj ken Cristo xkimijliaj oksekimej matlaneltokakan ika tekiuajkej kinyektlaliliskej intlaueluan. Tlen kema kichiuaj, tenojnotsaj ika san iTekiuajyo toTajtsin kuajkuis yolseuilistli ipan nochi tlaltikpaktli (Salmo 146:3). Niman Jesús otechmachti matiktlajtlanikan ipan toteoyouan ika mayejko yejon tekiuajyotl, ijkuak okijto: “Mauajla motekiuajyo. Manochiua nikan ipan tlaltikpaktli tlen tejua tikneki, ijkon ken nochiua ne iluikak” (Mateo 6:10). ToTajtsin iTlajtol kijtoua ika yejuin Tekiuajyotl “kinpopolos nochi tekiuajyomej, niman san yejua nochipa nemis” (Daniel 2:44; Apocalipsis [Revelación] 16:14; 19:19-21).

14. Itech nochi tlaneltokiltin, ¿san katlejua tlaneltokijli tiknemilia kichiua tlen melauak?

¹⁴ Ika tlen yotikitakej, xmotlajtolti: “¿Katlejua tlaneltokijli kikixtia ipan Biblia nochi tlen temachtia niman kitekakistilia itokatsin toTajtsin Jehová? Kema, ¿akinomej tlaneltokaj itech Jesús niman tetlasojtlaj ken yejua? ¿Akinomej xnokalaktiaj itech tlen Satanás kiyekana niman tenojnotsaj ika san iTekiuajyo toTajtsin kichiuas maonia yolseuilistli ipan nochi tlaltikpaktli? Itech nochimej tlaneltokiltin tlen onka ipan tlaltikpaktli, ¿katlejua tlaneltokijli kichiua nochi tlen yotikijtokej?”. Ken tikitaj, san iteixpantijkauan Jehová kichiuaj yejuin (xpoua Isaías 43:10-12).

15. Maski tla tikneltokaj ika toTajtsin yoltika, ¿tlenon noijki kineki matikchiuakan?

¹⁵ Tla tiknekij tikpaktiskej toTajtsin, xsan noneki itech matitlaneltokakan. Biblia kijtoua ika hasta espíritus xkuakualtin kineltokaj toTajtsin (Santiago 2:19). San ika, niman nesi ika yejuamej xkichiuaj tlen Jehová kineki pampa xkuajli nemij ixpan. Tla tiknekij tikyolpaktiskej toTajtsin, xsan noneki  matikneltokakan ika yejua yoltika, noijki noneki matikchiuakan tlen yejua kineki. Noijki, kipiya ika tikisaskej itech tlaneltokijli xmelauak niman matitlaneltokakan itech tlen melauak.

16. ¿Tlenon noneki tikchiuaskej tla xtiknekij tinemiskej ipan tlaneltokijli xmelauak?

¹⁶ Pablo otechijli ika maka matonelokan iuan tlaneltokijli xmelauak. Okijkuilo: “‘Xkisakan ne intsajlan on yejuan xtlaneltokaj, niman intech xmoxelokan. Ma ka xmatokakan on tlen xchipauak, niman nejua nemechselis’” (2 Corintios 6:17; Isaías 52:11). Kuakon, akin melauak kichiuaj ken Cristo xtlaj kichiuaj itech tlen nochiua ipan tlaneltokijli xmelauak.

17, 18. ¿Tlenon kijtosneki “Ueyixtikaj Babilonia”, niman tleka melak nimantsin noneki matikisakan itech?

¹⁷ Nochimej tlaneltokiltin xmelajkej nemij ipan “Ueyixtikaj Babilonia” (Apocalipsis 17:5). * Yejuin tokayotl techilnamiktia yeuejkaui kalpan, itoka Babilonia, kampa opeuj tlaneltokijli xmelauak sakin ijkuak yopanoka apachiuilistli. Ipan yejuin tonajli, miyek tlen temachtiaj niman tlen kichiuaj ipan tlaneltokijli tlen xmelauak ouajpeuj itech yeuejkaui Babilonia. Akin ompa chantiyaj kinueyichiuayaj tajtsitsintin tlen kipiayaj yeyi inxayak, niman ipan yejuin tonajli, miyekej tlayekankej itech tlaneltokiltin temachtiaj ika toTajtsin se Trinidad; kijtosneki ika nemi se toTajtsin akin Tajtli, toTajtsin Tekoneuj niman okse toTajtsin Espíritu santo. San ika, Biblia temachtia ika san se nemi toTajtsin akin melauak, Jehová, niman iKoneuj itoka Jesucristo (Juan 17:3). Babilonios noijki kineltokayaj ika ijkuak se miki kipiaya se alma tlen yoltika niman ika ueliskia tlajyouis. Ipan yejuin tonajli, miyekej tlaneltokiltin temachtiaj ika tikpiyaj se alma noso espíritu tlen uelis tlajyouis kampa tlatlatos.

¹⁸ Tlaneltokijli tlen kipiayaj yeuejkaui akin chantiyaj ipan Babilonia onosemoyauj ipan nochi tlaltikpaktli. Kuakon, xouijtika tikasikamatij tleka Ueyixtika Babilonia kijtosneki nochimej tlaneltokiltin tlen onka ipan tlaltikpaktli akin kixnamikij Jehová. Aman, toTajtsin yokijto ika Babilonia san nimantsin kipopoloskej.  ¿Tikasikamati tleka melak noneki matikisakan itech Ueyixtika Babilonia? ToTajtsin Jehová kineki nimantsin xkisa, maka xuejkaui, niman amantsin xchiua ijkuak ok tiuelis (xpoua Apocalipsis 18:4, 8).

19. ¿Tlenon kualtsin panos tla tiktekichiuilia Jehová?

¹⁹ Tla tiknemilia tijkauas tlaneltokijli tlen xmelauak, kanaj uelis oksekimej xok mouan nouikaskej. San ika, ijkuak tiktekichiuilis Jehová imiuan akin noijki kitekichiuiliaj, tikpiyas miyekej akin imiuan timouikas. Noijki ijkon mopan nochiuas ken kachtopa inomachtijkauan Jesús, akin okikaujkej seki tlemach ijkuak okitokakej: tikinpiyas melak miyekej mokniuan ipan nochiuiyan tlaltikpaktli akin noteititiaj ika melauak notlasojtlaj. Niman uelis tikchias tinemis “ipan on tonaltin yejuan uajlau” (xpoua Marcos 10:28-30). Niman noijki, akin onoxelojkej motech pampa xijkon titlaneltoka ken yejuamej, ika tlayekapan uelis nomachtiskej tlen kijtoua Biblia niman kitekichiuiliskej Jehová.

20. ¿Tlenon kichiaj ika tlayekapan akin kipiyaj tlaneltokijli tlen melauak?

²⁰ Biblia temachtia ika toTajtsin xuejkauis ijkuak kinpopolos tlaltikpakchanejkej xkuakualtin niman iTekiuajyo toTajtsin kinyekanas tlaltikpakchanejkej yolmelaujkej (2 Pedro 3:9, 13). ¡Melak kualtsin yes ijkuak nochi noyenkuilis! Ompa onias san se tlaneltokijli, noueyichiuas toTajtsin ken yejua kineki. ¿Xtiknemilia ika noneki tipeuas tikitas kenon timosentlalis imiuan akin melauak itekipanojkauan toTajtsin?