TLAMACHTIJLI 11

Tlen uelis tikchiuas niman ijkon mamitspaleui Biblia

REPRODUCIR EN

¿Xmelak ika kemantika tiknekij tikchiuaskej se ueyi tekitl, san ika, xtikmatij kenijki tipeuaskej? Sekimej yokitakej ika, para uelis kichiuaskej se ueyi tekitl, noneki ika yolik kichiujtiaskej. Aman tej, sekimej kinekij kiamapouaskej nochi Biblia, san ika, kanaj notlajtoltiaj: “¿Kenijki nipeuas?”. Ipan yejuin tlamachtijli, tikitaskej kenijki uelis timomachtis Biblia niman ijkon mamitspaleui niman mamitsyolpakti.

1. ¿Tleka melak kuajli tla mojmostla tikamapouaj Biblia?

Tla mojmostla tikamapouaj Biblia, noso “itlanauatil toTEKO”, melak tiyolpakiskej niman kuajli tinemiskej (xkita Salmo 1:1-3). Ijkuak tipeuas tikamapouas Biblia, uelis san achijtsin tikamapouas, san ika, mojmostla ijkon xchiua. Tla ijkon tikchiua, más tikmatis tlen kijtoua iTlajtol toTajtsin niman más tikuelitas tikamapouas.

2. ¿Tlenon uelis tikchiuas niman ijkon mamitspaleui Biblia?

Tla yotikamapoujkej Biblia, aman noneki itech titlanemiliskej. ¿Tleka? Pampa san ijkon uelis techpaleuis tlen ompa kijtoua. Maka xkilkaua: xsan noneki tikamapouas Biblia, noijki noneki itech titlanemilis (Josué 1:8). Ijkuak tikamapoujtos, xmotlajtolti: “¿Tlenon nechititiaj yejuin textos itech Jehová? ¿Kenijki uelis nikchiuas tlen nikan kijtoua? ¿Kenijki uelis ika nikinpaleuis oksekimej?”.

3. ¿Kemanon uelis tikamapouas Biblia?

¿Tikita ika xtikpiya tiempo niman ijkon tikamapouas Biblia? Timiyekej ijkon topan nochiua. Yejua ika, Biblia techijlia matikxelokan tiempo niman nochipa matikchiuakan tlen kuajli (Efesios 5:16). Xkita tlen hora uelis tikamapouas Biblia, niman, ijkon xchiua. Sekimej kuelitaj kiamapouaskej Biblia ika kualkan, sekimej ika tlakualispan, sekimej ika tlayoua niman oksekimej ijkuak achijtsin noseuiyaj. ¿Tejua kemanon uelis tikamapouas iTlajtol toTajtsin?

OKSEKI XKASIKAMATI

Matikitakan tlenon uelis tikchiuas niman ijkon más tikuelitas tikamapouas Biblia. Noijki matikitakan tlenon uelis mitspaleuis más xkasikamati tlen mitsmachtijtokej ipan Biblia.

Ika yolik tikueliliaj se tlakuajli tlen xkeman tijkuayaj. Yejuin techititia ika noijki uelis tikuelitaskej tikamapouaskej Biblia.

4. Uelis tikuelitas tikamapouas Biblia

Sekimej xmás kuelitaj kiamapouaskej Biblia ijkuak peuaj kiamapouaj. San ika, xnemili yejuin: ijkuak tikmatij se tlakuajli tlen xkeman tijkuayaj, kanaj xtikueliliskej, san ika, ika yolik uelis tikueliliskej. Noijki ijkon, ika yolik uelis tikuelitaskej tikamapouaskej Biblia. Xkitakan 1 Pedro 2:2 niman xtlajtokan itech yejuin:

¿Tiknemilia ika tla mojmostla tikamapoua Biblia tikuelitas tlen ompa kijtoua niman tiknekis nochipa tikamapouas?

Xkitakan VIDEO niman xkimixmatikan sekimej telpokamej akin, ika yolik, okuelitakej kiamapouaskej Biblia. Tla yonenkitakej video, aman xtlajtokan itech yejuin:

VIDEO: Telpokamej akin yokuelitakej iTlajtol toTajtsin (5:33)

¿Tleka sekimej telpokamej xmás ueliyaj kiamapouayaj Biblia?
¿Tlenon okinpaleui mauelikan makiamapouakan Biblia?
¿Tlenon okichiujkej niman ijkon más kuelitaskej kiamapouaskej Biblia?

Tlen mitspaleuis xkamapoua Biblia:

Xtlapejpeni se Biblia tlen kuajli nasikamati niman tlen kuajli onotlajtolkuep. Uelis tikamapouas Traducción del Nuevo Mundo tla onka ika motlajtol.
Xkinamapoua textos tlen más tikinuelita. Tabla tlen itoka “Ken uelis tipeuas tikamapouas moBiblia” uelis mitspaleuis xchiua yejuin.
Xkijkuilojtiuj kanon titlantiuj. Ipan tabla tlen itoka “Tlen nikamapoujtiuj ipan Biblia” uelis tikijkuilojtias kampa tiauj. Yejuin tabla tiknextis ipan yejuin amatlajkuilojli.
Xtekitilti aplicación JW Library^®. Ika yejuin aplicación san kanon uelis tikamapouas Biblia niman san kanon uelis tijkakis.
Xkita amatlajkuilojli Tlen tepaleuiya timomachtis iTlajtol toTajtsin. Ompa uajnestiuej mapas niman tablas tlen mitspaleuiskej más xkasikamati tlen kijtoua Biblia.

5. Moselti xmomachti libro tlen ipan mitsmachtiaj

Xkitakan Salmo 119:34 niman xtlajtokan itech yejuin:

¿Tleka melak kuajli tla tiktlajtlanilia Jehová mamitspaleui ijkuak tikamapouas Biblia noso ijkuak moselti timomachtis yejuin libro?

¿Tlenon más uelis tikchiuas niman ijkon kuajli timomachtis? Ijkuak timomachtis yejuin libro, uelis tikchiuas yejuin:

Xkinamapoua párrafos tlen uajnestiuej kampa peua tlamachtijli.
Xkintejtemo textos, xkinamapoua niman xkitstiuj ika, tlen uajnestiuj ipan libro, melauak onokixti ipan Biblia.
Xkintlapalyoti tlajtoltin tlen kinankilia tlen techtlajtoltia párrafo. Tla ijkon tikchiua, tikmatis kenijki titlanankilis ijkuak mitsmachtiskej.

¿Tikmatiya yejuin?

Akin tiiteixpantijkauan Jehová yotikintekitiltijkej miyek Biblias, san ika, más tikuelitaj Traducción del Nuevo Mundo pampa melak kuajli nasikamati, kuajli onotlajtolkuep niman kuajkui itoka toTajtsin (xkita tlamachtijli de jw.org, tlen itoka: “¿Iteixpantijkauan Jehová kipiyaj Biblia tlen yejuamej kitekitiltiaj?”).

SEKIMEJ KIJTOUAJ: “Melak tetlatsiuiti timomachtis Biblia niman nion xnikpiya tiempo”.

¿Niman tejua tlenon tiknemilia?

TLEN OTIUEL

Tla tiknekij más matechpaleui Biblia, noneki tikitaskej tlen hora tikamapouaskej, niman, ijkon tikchiuaskej. Noijki noneki tiktlajtlaniliskej toTajtsin matechpaleui niman toselti tomachtiskej libro tlen ipan techmachtiaj.