1-3. a) ¿Kenon kitaj tekitl miyekej tlaltikpakchanejkej? b) ¿Tlenon kijtoua Biblia itech tekitl, niman tlenon tikitaskej ipan yejuin capítulo?

 IPAN yejuin tonajli, miyekej tlaltikpakchanejkej kitaj tekitl kentla itlaj tlen xteyolpakti. Mojmostla kichiuaj tekitl tlen xkuelitaj niman ijkuak kichiuaj hasta kinekij matlantiuetsi. San ika, xnoneki nochipa ijkon tlanemiliskej. Uelis kinextiskej tlen kinpaleuis kuajli makichiuakan intekiyo niman hasta mapakikan.

² Biblia techijlia ika kuajli matitlanemilikan itech tekitl. Kijtoua ika titekitis niman tlen tikchiuas ika motekiyo se tlateochiualistli. Ika yejon, Salomón akin tlamachilise okijkuilo: “Nochimej matlakuakan niman makonikan niman mayolpakikan ipampa nochi intekiyo. Yejuin se tetlayokolijli itech toTajtsin” (Eclesiastés 3:13). Jehová, akin melak techtlasojtla niman kineki kuajli matinemikan, kineki matipakikan ipan totekiyo niman itech tlen tikpiyaj ijkuak titekitij. Tla tikitaj totekiyo ijkon ken kita toTajtsin, niman tla tikintlakamatij itlajtolyekanalisuan, uelis nochipa tinemiskej itech itlasojtlalis (xpoua Eclesiastés 2:24; 5:18).

³ Ipan yejuin capítulo tiknankiliskej naui tlajtoltilistin: ¿Kenon akin kichiua ken Cristo ueli yolpaki ipampa nochi itekiyo? ¿Katlejua tekitl xnoneki kichiuas? ¿Kenon uelis kitemachiuas itekiyo niman tekitl tlen kichiua ika  kiueyichiua toTajtsin? ¿Niman katlejua tekitl tlen melak ueyi kijtosneki noneki makichiua? Kachtopa, matitlajtokan itech omemej akin melak tekitkej: Jehová niman Jesucristo.

4, 5. ¿Tlenon kijtoua Biblia kampa nesi ika Jehová melak tekitki?

⁴ Jehová yejua akin Ueyixtika Tekitketl. Génesis 1:1 kijtoua: “Ijkuak xtlaj onkatka toTajtsin okinchijchiuj iluikamej niman tlaltikpaktli”. Sakin, ijkuak otlan itekiyo ipan tlaltikpaktli, okijto ika “melak kuajli” nochi tlen yokichijchiujka (Génesis 1:31). Kijtosneki ika melak paktoya ika itekiyo. Kema, “toTajtsin akin paktika” melak yolpaki pampa yejua tekitki (1 Timoteo 1:11).

⁵ Pampa Jehová melak tekitki, xkeman san ijkon nemi. Ika yejon, melak miyek xiuitl ika tlayekapan ijkuak yotlanka nochi tlen okichijchiuj ipan tlaltikpaktli, Cristo okijto: “NoTajtsin hasta aman tekiti” (Juan 5:17). San ika ¿tlenon kichiujtika toTajtsin? Itech iluikak, kinuajyekantika niman kinuajtlajpixtika tlaltikpakchanejkej. Noijki, yokintlapejpeni sekimej akin kichiuaj ken Cristo niman yokinmakak espíritu santo. Yejuamej tekiuajtiskej iuan Jesús ipan iluikak (2 Corintios 5:17). ToTajtsin xkeman kikajkaua ika tekiti, inpampa tlaltikpakchanejkej akin kitlasojtlaj, tekititika manochiua tlen kineki: manemikan nochipa ipan se yenkuik tlaltikpaktli (Romanos 6:23). Niman melak paki ika tlen yokichiuj, pampa melak miyekej tlaltikpakchanejkej kiseliaj tlajtoltin itech Tekiuajyotl, toTajtsin kinuajuika itech niman yejuamej kipatlaj innemilis, tlen kinpaleuiya nochipa manemikan itech itlasojtlalis (Juan 6:44).

6, 7. ¿Kenon okiteititi Jesús itech ken chikauak titekitis?

⁶ Youejkauj, Jesús yokiteititi ika chikauak tekiti. Melak miyek xiuitl ijkuak xiuajlaya ipan tlaltikpaktli yejua “kuajli tekitketl” akin Jehová okitekitilti niman ijkon okichijchiuj  nochi tlemach “ne iluikak niman nikan ipan tlaltikpaktli” (Proverbios 8:22-31; Colosenses 1:15-17). Niman ijkuak onemiko ken tlaltikpakchane noijki kuajli tekitketl katka. Ijkuak ok pitentsin katka, onomachti kinchijchiuas kaltin niman okixmatkej kentla “kojxinki” (Marcos 6:3). a Matikilnamikikan ika ipan yejon tonajli xonkatka miyek tlemach tlen ika tekitiskia, miyek tlemach tlen aman notekitiltia ika electricidad. Ipan yejon tekitl, nonekiya kojtilistli niman tiueltos tikchiuas. ¿Tikonnemiliaj kenon Jesús yaya kontejtemoua kojtin, kanaj yejua kintsontekiya niman sakin kintilantiaya hasta kampa kintekitiltiskia? ¿Noijki ken kinyektlaliaya niman kintlaliaya vigas ipan kaltin, kinchijchiuaya puertas niman okseki muebles? Kema, pampa yejua ijkon ipan yonochiuj kimatiya kenon tepakti tekitl ijkuak kuajli nochiua.

⁷ Jesús noijki melak kuajli okichiuj itekiyo tlen okimakak toTajtsin. Melak onosentemakak ipan yejon tekitl yeyi xiuitl uan tlajko. Kinekiya kinnojnotsas miyekej tlaltikpakchanejkej, niman ika yejon kuajli kintekitiltiaya tonaltin, san kualkan nokuiteuaya niman ontlamiya ijkuak melak yotlayouatik (Lucas 21:37, 38; Juan 3:2). Yaya ipan “uejueyimej kalpamej niman kalpantsitsintin, tenojnotstinemiya niman teijlitinemiya kuajli tlajtoltin itech iTekiuajyo toTajtsin” (Lucas 8:1, TNM). Onejnen melak miyek kilómetros ipan ojtli kampa melak tlalpoktitlan niman ijkon kominojnotsaya tlaltikpakchanejkej itech kuajli tlajtoltin.

8, 9. ¿Kenon Jesús oyolpak ipampa nochi itekiyo?

⁸ ¿Oyolpak Jesús ipampa nochi itekiyo? ¡Kema! Otenojnots itech Tekiuajyotl kentla kitokaskia xinachtli niman ijkuak oyaj sa nopixkaskia. Itekiyo toTajtsin kiyolchikauaya  niman kichikauaya nion xnajmanaya tla xtlakuaya ijkuak kichiuaya (Juan 4:31-38). Ijkuak otlan itekiyo ipan tlaltikpaktli, ¡melak oyolpak ijkuak okijli iTaj: “Nejua yonitlan on tlen otinechnauatij nikchiuas. Ijkon, tej, yonimitsueyilij ipan in tlaltikpaktli”! (Juan 17:4.)

⁹ Kuajli tikmatstokej ika xok yakaj ijkon kuajli otechititi kenon se uelis yolpakis ipampa nochi itekiyo ken Jehová niman Jesús. Pampa tiktlasojtlaj Jehová, tikixkopinaj (Efesios 5:1). Niman pampa tiktlasojtlaj Jesús, tikchiuaj ken yejua ijkon “ken [...] noneki [tik]chiuaskej” (1 Pedro 2:21). Aman, matikitakan kenon uelis tipakiskej tlen tikchiuaj ika totekiyo.

10, 11. ¿Tlenon techpaleuis matikitakan tlen kuajli itech totekiyo?

¹⁰ Akin kichiua ken Cristo kipiya ika tekitis. Niman tiknekij tiyolpakiskej ijkuak tikchiuaj. San ika, yejuin ouijtika tla xtikuelitaj tlen tikchiuaj. Ijkuak ijkon panos, ¿kenon uelis se yolpakis ipampa nochi itekiyo?

¹¹ San matiknemilikan tlen techpaleuis ipan tonemilis. Kanaj xuelis tikpatlaskej totekiyo, san ika, kema uelis tikpatlaskej kenon titlanemiliaj itech totekiyo. Tla titlanemiliaj itech kenon kita Jehová, yejuin melak techpaleuis. Xnemili, tla tikinpiyaj tochanejkauan akin tikintlakualtiskej, matikilnamikikan ika ixpan toTajtsin melak ueyi kijtosneki. Kema, iTlajtol kijtoua ika akin xkinmaka ichanejkauan tlen kinpoloua “más xkuajli kichiua xken yejua on yejuan xtlaneltoka” (1 Timoteo 5:8). Ijkuak tikasikamatij kenon totekiyo techpaleuiya matikchiuakan tlen toTajtsin yotechnauatij, melak techyolmapeua niman kichiua kuajli matomachilikan, xijkon ken oksekimej akin imiuan titekitij.

12. ¿Tleka techpaleuiya matitekitkej niman matimelajkej ipan totekiyo?

¹² Matikteititikan ika titekitkej niman timelajkej. Akin yemelak  tikchiuaj ken Cristo noneki matitekitkej niman matomachtikan kuajli tikchiuaskej totekiyo. Yejuin kichiuas nimantsin matikchiuakan niman melak techpaleuis, ken ijkuak toteko matechtlasojkaita (Proverbios 12:24; 22:29). Noijki, ijkuak timelajkej niman xtlaj tikichtekij, ken tomin nion tlen ompa notekitiltia, techpaleuiya kuajli matikisatij (Efesios 4:28). Ken yotikitakej ipan capítulo tlen yotiuajpanokej, yejon kichiua ika totekouan matechneltokakan. Niman maski tla yejuamej xkitaj ika melak titekitkej, uelis tipakiskej ika “totlamachilis melajki” niman ika tikyolpaktiaj toTajtsin (Hebreos 13:18, TNM; Colosenses 3:22-24).

13. ¿Tlenon panoua tla ipan totekiyo kuajli toyekanaj?

 ¹³ Tikmatstoskej ika ken toyekanaj uelis kiueyichiuas toTajtsin. Ijkuak melak kuajli toyekanaj, oksekimej xuelis kijtoskej tla xkitaj. ¿Tlenon tikchiuaj ika yejon? Tikualnextiaj “on tlamachtilistli [itech] Dios toTemakixtijkau” (Tito 2:9, 10). Ijkuak kuajli toyekanaj, tikualnextiaj tlaneltokijli tlen melauak niman kichiua oksekimej makitakan ika melak kualtsin. ¡Melak kuajli yeskia ika akin iuan titekitij makineki nomachtis itech tlen melauak san pampa techita ken toyekanaj! Niman maka matikilkauakan itlaj tlen melak ueyi kijtosneki: xonka okse tlen melak techpaktia ken ijkuak tikmatij ika ken toyekanaj kiyolpaktia Jehová niman kiueyichiua (xpoua Proverbios 27:11; 1 Pedro 2:12).

14-16. ¿Tlenon ome tlajtoltilistli noneki tochiuiliskej ijkuak tiktlapejpeniskej se tekitl?

¹⁴ Biblia xnochi kijtoua tlen kuajli niman tlen xkuajli tikchiuaskej ipan se tekitl. San ika, yejuin xkijtosneki tla uelis tikseliskej maski san katlejua tekitl niman maski san tlenon matikchiuakan. ToTajtsin iTlajtol techpaleuiya matiktlapejpenikan se tekitl tlen melajki, tlen matechpaleui niman makuelita toTajtsin (Proverbios 2:6). ¿Kenon uelis tikmatiskej tla xkuelita se tekitl? Tla tochiuiliaj ome tlajtoltilistli.

¹⁵ ¿Nochiua itlaj tlen Biblia technauatia maka matikchiuakan? ToTajtsin iTlajtol kijtoua ika xkuajli tla se tlachteki, tlakajkayaua niman kinchijchiua tajtsitsintin (Éxodo 20:4; Hechos 15:29; Efesios 4:28; Apocalipsis [Revelación] 21:8). Ika yejon, xtikseliaj nion se tekitl kampa techtlajtlaniliskiaj matikchiuakan yejuin. Pampa tiktlasojtlaj Jehová xtikseliaj tekitl kampa technauatiskiaj maka matiktlakamatikan itlanauatiluan (xpoua 1 Juan 5:3).

¹⁶ ¿Kentla nitlapaleuijtoskia manochiua tlen xkuajli? Matiknemilikan  ika techtekiuiltiaj se tekitl kampa san titlachipauaskej. Yejuin tekitl xkijtosneki tla xkuajli. Aman, ¿tla titlachipauaskej kampa auilnemilo? Kanaj tejuamej xtikchiuaskej yejuin tlemach tsokuiltik. San ika, tla nochipa ompa titekitij, ¿xtitlapaleuijtoskiaj itech tlen Biblia kijtoua maka manochiua? (1 Corintios 6:9.) Pampa tiktlasojtlaj Jehová, xtiknekij titlapaleuiskej nion achijtsin itech tlen iTlajtol kijtoua maka matikchiuakan.

17. a) ¿Itech tlenon noneki titlanemiliskej niman ijkon kuajli tiktlapejpeniskej totekiyo? (Xkita recuadro  “¿Uelis nikselis yejuin tekitl?”.) b) ¿Tlenon tikchiuaskej niman ijkon totlamachilis techpaleuis matiktlapejpenikan tlen toTajtsin kuelita?

 ¹⁷ Tla tiknekij kuajli tiktlapejpeniskej se tekitl, san noneki kuajli matitlanemilikan itech tlajtoltilistin tlen uajlauej itech párrafos 15 niman 16. San ika, onka okseki tlen noijki noneki kuajli itech matitlanemilikan. b Xuelis tikchiaskej ika tekitketl yolmelauak makijto nochi tlen noneki tikchiuaskej. Nikan noneki tejuamej kuajli matitlanemilikan. Yotikitakej ipan capítulo 2 ika noneki matikmachtikan totlamachilis ijkuak tomachtiaj iTlajtol toTajtsin niman ijkuak tikitaj tlenon tikchiuaskej mojmostla ipan tonemilis.  Ijkon, “[to]tlamachilis tlen yo[tik]machtijkej” “pampa [tik]tekitiltiaj”, techpaleuis matiktlapejpenikan tlen toTajtsin kuelita niman uelis nochipa tinemiskej itech itlasojtlalis (Hebreos 5:14, TNM).

18. ¿Tleka ouijtika tiktemachiuaskej totekiyo iuan tekitl tlen tikchiuaj itech toTajtsin?

¹⁸ Ipan yejuin “sa itlajtlankan [...] tonajli” kampa “sanoyej xkuajli tonaltin” ouijtika tiktlapejpeniskej tlen matechpaleui nochipa tikchiuaskej tlen kuelita toTajtsin (2 Timoteo 3:1). Tikmatstokej ika ouijtika tiknextiskej tekitl niman maka matikpolokan. Niman ika noneki tikinmakaskej tochanejkauan tlen kinpoloua. San ika, tla xtotlajpiyaj, uelis peuas tikchiuaskej tlen oksekimej techijliskej niman hasta techmauaskej melak matikileuikan tomin, tlen xtechkauilis kuajli matiktekichiuilikan toTajtsin (1 Timoteo 6:9, 10). Matikitakan tlenon techpaleuis tiktemachiuaskej totekiyo niman tekitl tlen kiueyichiua toTajtsin niman ijkon nochipa matikchiuakan “on tlen más kuajli” (Filipenses 1:10).

19. ¿Tleka noneki matitlaneltokakan itech Jehová ika nochi toyojlo, niman itech tlenon xtikchiuaskej tla tikmatstokej ika techtlajpiya?

¹⁹ Matitlaneltokakan itech Jehová ika nochi toyojlo (xpoua Proverbios 3:5, 6). ¿Xmelak ika san yejua itech kinamiki matitlaneltokakan? Kema, pampa techtlasojtla niman pampa techtlajpiya (1 Pedro 5:7). Yejua melak kuajli kimatstika tlenon techpoloua xijkon ken tejuamej, niman nochipa kitstika kenon techpaleuis (Salmo 37:25). Ika yejon, melak kuajli tla xtikilkauaj tlen Biblia techijlia: “Ma ka xkeleuikan on tomin. Xpakikan san  ika on tlen nenkipiaj, pampa Dios okijtoj: ‘Xkeman nimitskauas nion nimitstlalkauis’” (Hebreos 13:5). Miyekej tokniuan akin chikauak kitekichiuiliaj toTajtsin, ken precursores noso okse  tekitl, yokitakej kenon toTajtsin nochipa kinmaka tlen kinpoloua. Tla melak tikneltokaj ika Jehová techpaleuis, xtajmanaskej itech kenon tikintlakualtiskej tochanejkauan (Mateo 6:25-32). Xkeman tijkauiliskej ika totekiyo makichiua maka sa matitenojnotsakan nion maka matosentlalikan ipan totlanechikoluan (Mateo 24:14; Hebreos 10:24, 25).

20. ¿Tlenon okijtosnek Jesús ijkuak okijto: “Tla mixtololojuan kuajli tlacha[j], ueli tikita on tlen tikchiua”? ¿Kenon uelis ijkon tikchiuaskej?

 ²⁰ San matikitstokan tikchiuaskej tlen toTajtsin kineki (Lucas 11:34). Jesús okijto: “Tla mixtololojuan kuajli tlacha[j], ueli tikita on tlen tikchiua”. Yejuin kijtosneki maka san matiktejtemojtokan tlen xtepaleui. Se akin kichiua ken Cristo kipiya ika san kitstos kenon kichiuas tlen toTajtsin kineki. Tla ijkon tikchiuaj, xsan tiknekiskej tiktlaniskej miyek tomin nion san tikpiyaskej tlen melak patioj. Nion xsan tiknekiskej tiktejtemoskej tlen kemach kistika pampa oksekimej kijtouaj ika ijkon uelis tinemiskej ika pakilistli. ¿Tlenon techpaleuis san matikitstokan tikchiuaskej tlen toTajtsin kineki? Tla xtotlaneuiyaj tlen xtechpoloua pampa tiknekij tikpiyaskej niman tla xtikpiyaj tlen san nochipa matechtekikotonto. Ken kijtoua Biblia, matipakikan “tla tikpiaj tlen tikuaj niman no tikpiaj totlaken” (1 Timoteo 6:8). Kema, san matikpiyakan tlen noneki.

21. ¿Tleka noneki tikitaskej tlenon kachtopa tikchiuaskej, niman tlenon kipiya kachtopa tikchiuaskej ipan tonemilis?

²¹ Kachtopa matikchiuakan itekiyo toTajtsin. Pampa xtikaxiliaj tikchiuaskej miyek, noneki matikitakan tlenon kipiya ika tikchiuaskej kachtopa. Tla xijkon tikchiuaj, san tikpoloskej nochi se tonajli tikchiujtoskej tlen xnoneki. ¿Niman tlenon melak noneki matikchiuakan? Maski miyekej tlaltikpakchanejkej kitaj ika melak kuajli timomachtis ipan uejueyimej kaltlamachtiltin niman tikpiyas se tekitl kampa tiktlanis melak miyek tomin, Jesús okimijli inomachtijkauan makitejtemokan “kachtopa Tekiuajyotl” (Mateo 6:33, TNM). Akin yemelak tikchiuaj ken Cristo kachtopa tikchiuaj tekitl itech iTekiuajyo toTajtsin niman sakin itech okseki tlemach. Ika ken tinemij, tlen tiktlapejpeniaj tikchiuaj niman ika tlen tiknekij tikchiuaskej ika tlayekapan, tikteititiaj ika tiktlasojkaita iTekiuajyo toTajtsin niman tlen yejua kineki xijkon  ken miyek tlemach niman okseki tlen techtekiuiltia yejuin tlaltikpaktli.

22, 23. a) ¿Katlejua tekitl melak noneki matikchiuakan, niman kenon tikteititiaj ika melak tiktlasojkaitaj? (Xkita recuadro  “Melak yonechyolpakti tlen oniktlapejpeni nikchiuas”.) b) Ijkuak titekitij, ¿tlenon noneki maka tikilkauaskej?

²² Itekipanojkauan toTajtsin kimatstokej ika sa achijtsin poliui ijkuak tlamis tlajtlamach ken nochiua ipan tlaltikpaktli. Ika yejon, kichiuaj tekitl tlen melak ueyixtok itech se akin kichiua ken Cristo: tenojnotsaj itech Tekiuajyotl niman kinpaleuiyaj ika oksekimej noijki makitekichiuilikan toTajtsin (Mateo 24:14; 28:19, 20). Ijkon ken Jesucristo, melak tekititokej ipan yejuin tekitl tlen kinmakixtia oksekimej. ¿Kenon kichiuaj yejuin? Miyekej chikauak tenojnotsaj ipan tlanechikojli. Oksekimej nochiuaj precursores niman misioneros. Niman miyekej tajtin kinyolchikauaj inkoneuan chikauak makitekichiuilikan toTajtsin ken precursores noso okse tekitl ken yejuin, pampa kimatstokej ika noneki matlanemilikan kenon kichiuaskej okseki tekitl itech toTajtsin. Pampa akin kichiuaj ken Cristo chikauak tenojnotsaj, ¿uelis tikijtoskej ika yolpakij “ipampa nochi intekiyo”? Kema. Xonka okse tekitl, ken ijkuak se kitekichiuilia Jehová ika nochi inemilis, tlen melak mitspaktis, kichiuas kuajli timomachilis niman tikselis tlateochiualistin (xpoua Proverbios 10:22).

²³ Miyekej chikauak titekitij niman ijkon tikinmakaj tochanejkauan tlen kinpoloua. Maski ijkon, se uelis yolpakis ipampa nochi itekiyo, ijkon ken Jehová kineki. Tla toyekanaj ijkon ken yejua tlanemilia niman ika itlajtolyekanalisuan, uelis tipakiskej ipan totekiyo. Aman, xtijkauiliskej itlaj makichiua maka sa matitenojnotsakan itech Tekiuajyotl, tekitl tlen melak noneki matikchiuakan. Ijkon tikteititiskej ika tiktlasojtlaj Jehová niman tiknekij nochipa tinemiskej itech itlasojtlalis.