Jehová okijli Jacob ika kitlajpiyaskia ijkon ken okintlajpix Abrahán iuan Isaac. Jacob onochanti kampa itoka katka Harán, ompa ononamikti, okipix miyekej ikoneuan niman miyek tlemach.

Sakin, Jehová okijli Jacob: “Xmokuepa mokalpan”. Kuakon Jacob niman ichanejkauan opeuj nokuepaj. Ipan ojtli sekimej itlakeualuan Jacob okijlikej: “Mokniuj Esaú iuajlatika niman kinuajuika 400 tlakamej”. Jacob nomojtiaya tla Esaú itlaj kinchiuiliskia yejua iuan ichanejkauan. Ika yejon, okitlajtlanili Jehová: “Nimitstlajtlanilia xnechmakixti itech nokniuj”. Uajmostla Jacob okititlanili Esaú se tetlayokolijli: miyek borregos, chivos, uakaxtin, camellos niman polokomej.

Ika yeuajli ijkuak Jacob iselti onokauj, ¡okitak se iluikaktekitketl! Iluikaktekitketl opeuj iuan noxixikoua. Yejuamej onoxixikojkej hasta ijkuak otlanes. Maski okikokojkej, Jacob xonosiaujkauj. Iluikaktekitketl okijli: “Xnechkauili maniuiya”. San ika, Jacob okijli: “Ka. Tla xtinechteochiua, xnimitskauilis”.

Kuakon iluikaktekitketl okiteochiuj Jacob, aman yejua kimatiya ika Jehová xkikauiliskia Esaú itlaj makichiuili.

 Yejon kualkan, Jacob oontlachix uejka niman okitak Esaú niman 400 tlakamej. Jacob oyaj iyekapan ichanejkauan niman onotlakuankets chikometipan ixpan ikniuj. Esaú onotlalo niman okikechnapalo Jacob. Omemej opeuj chokaj niman onoyolseuijkej. ¿Kenon tiknemilia onomachili Jehová itech ken Jacob okiyektlali tlauejli?

Sakin, Esaú onokuep ichan niman Jacob noijki oyaj ichan. Jacob okipix 12 ikoneuan: Rubén, Simeón, Leví, Judá, Dan, Neftalí, Gad, Aser, Isacar, Zabulón, José niman Benjamín. Jehová kimakixtiskia ikalpan itechkopa José, semej itech ikoneuan Jacob. ¿Tikmati kenon okichiuj? Matikitakan.