Sakin ijkuak Adán iuan Eva okiskej itech xochitlalpan Edén, okinpixkej miyekej inkoneuan. Kachtopa inkoneuj, Caín, tokaketl katka, niman ika ome inkoneuj, Abel, yejua kintlajpiaya borregos.

Se tonajli, Caín iuan Abel okimakakej uentli Jehová. ¿Tikmati tlenon se uentli? Yejon kentla se tetlayokolijli tlen tikmakaj toTajtsin. Jehová melak okipakti uentli tlen Abel okimakak, san ika, xokipakti tlen okimakak Caín. Yejon okichiuj ika Caín melak makualani. Jehová okijli ika tla xkiteltiaya itlauel kichiuaskia tlen xkuajli. San ika, Caín xokikakisnek.

Caín okijli Abel: “Tiauej ipan tepetl”. Ijkuak ompa inselti nemiyaj, Caín okiuisok niman okimikti ikniuj. ¿Tlenon  kichiuaskia Jehová? Yejua okitlajtlakolmakak Caín, okititlan uejka itech ichanejkauan. Xok keman ueliskia nokuepas.

¿Tlenon techmachtia yejuin? Ika tejuamej uelis tikmachiliskej ika tikualanij tla xnochiua ijkon ken tiknekij. San ika, tla xueli tikteltiaj totlauel noso tla oksekimej kitaj ika melak tikualantokej, noneki matopatlakan niman matoteltikan, ijkon xtokauiliskej matechyekana tlen tikmachiliaj.

Pampa Abel melak okitlasojtlak Jehová niman okichiuj tlen kuajli, Jehová nochipa kilnamikis. ToTajtsin kiyolitis Abel ijkuak kikuepas tlaltikpaktli se xochitlalpan.